இலங்கை – நியூசிலாந்து 2ஆவது டெஸ்ட்: 3ஆவது நாள்

இலங்கை, நியூசிலாந்து அணிகளுக்கிடையிலான இரண்டாவது டெஸ்ட் போட்டியின் மூன்றாவது நாள் ஆட்டநிறைவின்போது நியூசிலாந்து அணி 118 ஓட்டங்கள் முன்னிலை பெற்றுள்ளது. 


இந்தப் போட்டியில் நாணயச்சுழற்சியில் வெற்றிபெற்ற இலங்கை அணி முதலில் களத்தடுப்பைத் தேர்வுசெய்தது. தனது முதலாவது இன்னிங்ஸில் துடுப்பெடுத்தாடிய நியூசிலாந்து அணி 221 ஓட்டங்களையும், இலங்கை அணி 356 ஓட்டங்களையும் பெற்றுக்கொண்டன. 


பின்னர், தனது இரண்டாவது இன்னிங்ஸிற்காகத் துடுப்பெடுத்தாட ஆரம்பித்த நியூசிலாந்து அணி, 75 ஓட்டங்களைப் பெற்றிருந்த வேளையில் முதலாவது விக்கெட்டை இழந்தது.


40 ஓட்டங்களைப் பெற்றிருந்த ருதபோர்ட், நுவன் பிரதீப்பின் பந்துவீச்சில் சந்திமாலிடம் பிடிகொடுத்து ஆட்டமிழந்தார். 35 ஓட்டங்களைப் பெற்றிருந்த லதாமின் விக்கெட்டையும் நுவன் பிரதீப் வீழ்த்தியபோது நியூசிலாந்து அணியின் ஓட்ட எண்ணிக்கை 78 ஆக இருந்தது. அடுத்துவந்த ரோஸ் டெய்லரை ஓட்டமெதுவும் பெறாத நிலையில் றங்கன ஹேரத் போல்ட் செய்ய, 79 ஓட்டங்களைப் பெற்ற நிலையில் 3 விக்கெட்களை இழந்து நியூசிலாந்து அணி தடுமாறியது. 


கேன் வில்லியம்சனும் அணித்தலைவர் மக்கலமும் இணைந்து நிதானமாக விளையாடி அணியின் ஓட்ட எண்ணிக்கையை 122 வரை உயர்த்தினர். 22 ஓட்டங்களைப் பெற்றிருந்தவேளையில் பிரண்டன் மக்கலம், தம்மிக பிரசாத்தின் பந்துவீச்சில் எல்.பி.டபிள்யுவாகி வெளியேறினார். 


அடுத்துவந்த ஜேம்ஸ் நீசாம், களத்தில் ஒரு மணிநேரம் நிலைத்து நின்றாலும் 19 ஓட்டங்களை மாத்திரமே பெற்ற நிலையில் நுவன் பிரதீப்பின் பந்துவீச்சில் ஆட்டமிழந்தார். அப்போது நியூசிலாந்து அணி 159 ஓட்டங்களைப் பெற்றிருந்தது. 


அதன் பின்னர் விக்கெட் காப்பாளர் வட்லிங்கும் வில்லியம்சனும் பிரிக்கப்படாத இணைப்பாட்டத்தைப் புரிந்து அணியின் ஓட்ட எண்ணிக்கையை 253 வரை உயர்த்தியிருந்த நிலையில் இன்றை நாள் ஆட்டம் நிறைவுக்கு வந்தது. 


வில்லியம்சன் 200 பந்துவீச்சுக்களைச் சந்தித்து 80 ஓட்டங்களையும், வட்லிங் 140 பந்துகளில் 48 ஓட்டங்களையும் பெற்று ஆட்டமிழக்காமல் களத்திலிருந்தனர்.

உலகக்கிண்ண பங்களாதேஷ் அணி

உலகக் கிண்ணத்தில் விளையாடவுள்ள பங்காளதேஷ் கிரிக்கெட் அணி அறிவிக்கப்பட்டுள்ளது. பங்களாதேஷ் கிரிக்கெட் சபையின் தெரிவுக்குழு இந்த அணியை தெரிவு செய்து அறிவித்துள்ளது. 


சகலதுறை வீரரான சௌமியா சர்கார், புதிய வீரராக அணிக்குள் இணைக்கப்பட்டுள்ளார். இவர் கடந்த மாதம் சிம்பாவே அணியுடன் நடைபெற்ற ஐந்தாவது ஒருநாள் சர்வதேசப் போட்டியில் தனது அறிமுகத்தை மேற்கொண்டார். நசிர் ஹொசைன், டஸ்கின் அஹமட் ஆகியோர் சிம்பாவே தொடரில் விளையாடாத வீரர்கள் இந்த அணியில் இணைக்கப்பட்டுள்ளனர். அணித் தலைவர் யார் என்பதை இன்னமும் அறிவிக்கவில்லை. மஸ்ரபி மோர்த்தாசா தலைவராகவும் சகிப் அல்-ஹசன் உப தலைவராகவும் அறிவிக்கப்படுவர் என நம்பப்படுகின்றது. 


அணியை தெரிவு செய்யும் போது உலகக் கிண்ணத்தை வெல்ல வேண்டும் என்ற நினைப்பிலேயே தெரிவு செய்வோம். ஆனாலும் நடைமுறை சாத்தியம் என்று ஒன்று உள்ளது. அதன்படி பங்களாதேஷ் அணியிலும் பார்க்க பலம் குறைந்த அணிகளான ஆப்கானிஸ்தான், ஸ்கொட்லாந்து அணிகளை வெற்றி பெறவேண்டும். அத்துடன் நியூசிலாந்து, இலங்கை, அவுஸ்திரேலியா, இங்கிலாந்து அணிகளில் ஏதாவது ஒன்றையாவது வெல்ல வேண்டும் என்ற எதிர்பார்ப்பே உள்ளது. முடிந்தால் இரண்டாம் சுற்றுக்கு தெரிவாக வேண்டும் என்ற குறிக்கோளுடனேயே இந்த அணியை தெரிவு செய்துள்ளோம் என தெரிவுக்குழுவின் தலைவர் பரூக் அஹமட் தெரிவித்துள்ளார். 


அணி விபரம் 
தமிம் இக்பால், அனாமல் ஹக், சௌமியா சர்கார், மொமியுனல் ஹக், சகிப் அல் ஹசன், முஸ்பிகீர் ரஹீம், மஹமதுல்லா, நசீர் ஹொசைன், சபீர் அஹமட், மஷ்ரபீ மோர்தாசா, தஸ்கின் அஹமட், அல் அமின் ஹொசைன், ரூபல் ஹொசைன், அரபாத் சன்னி, டைஜுல் இஸ்லாம் 

இலங்கை கிரிக்கெட் அணியில் யாழ். வீரர்கள்

செபமாலைப்பிள்ளை பிளெமின்

 

இலங்கை 19 வயதுப்பிரிவு 31 பேர் கொண்ட கிரிக்கெட் அணியில் யாழ். சென்.ஜோன்ஸ் கல்லூரி வீரர்களான பரமானந்தம் துவாரகசீலன், செபமாலைப்பிள்ளை பிளெமின் ஆகியோர் இடம்பிடித்துள்ளனர்.

 

 

இலங்கை 19 வயதுப்பிரிவு கிரிக்கெட் அணி இம்மாதம் நடுப்பகுதியில் நடைபெறவுள்ள பங்களாதேஷ் அணியுடனான போட்டிகளில் விளையாடவுள்ளது.

 

 

தேசிய தெரிவாளர்களினால் பெயரிடப்பட்டுள்ள 31 பேர் கொண்ட பெயர்ப்பட்டியலில் யாழ்ப்பாணம் சென்.ஜோன்ஸ் கல்லூரி வீரர்கள் இருவர் இணைத்துக்கொள்ளப்பட்டுள்ளனர்.

 

இந்த 19 வயதுப்பிரிவு அணியின் தலைவராக காலி றிச்மண்ட் கல்லூரியின் அஸலங்க கடமையாற்றுகின்றார்.

பரமானந்தம் துவாரகசீலன்

சென்.ஜோன்ஸ் அணிக்கு வெற்றி

பி.துவாரகசீலனின் சகலதுறை ஆட்டம் கைகொடுக்க> சென்.ஜோன்ஸ் கல்லூரி 6 விக்கெட்களால் ஜா – எல கிறிஸ்ட் கிங் கல்லூரி அணியை வென்றது.


இலங்கை பாடசாலைகள் கிரிக்கெட் சங்கத்தின் ஏற்பாட்டில் 19 வயதுப்பிரிவு பிரிவு 3 அணிகளுக்கிடையிலான மட்டுப்படுத்தப்படாத ஓவர்கள் கொண்ட கிரிக்கெட் போட்டி தற்போது இடம்பெற்று வருகின்றது.


இந்த சுற்றுப்போட்டியின் போட்டியொன்று சென்.ஜோன்ஸ் கல்லூரி மைதானத்தில் சென்.ஜோன்ஸ் கல்லூரி அணிக்கும் ஜா – எல கிறிஸ்ட் கிங் கல்லூரி அணிக்கும் இடையில் கடந்த வெள்ளிக்கிழமை (02) மற்றும் சனிக்கிழமை (04) ஆகிய இரு தினங்கள் நடைபெற்றது.


நாணயச் சுழற்சியில் வென்ற சென்.ஜோன்ஸ், முதலில் துடுப்பெடுத்தாடி, 60.4 ஓவர்களில் அனைத்து  விக்கெற்களையும் இழந்து, 196 ஓட்டங்களைப் பெற்றது. துடுப்பாட்டத்தில் பி.துவாரகசீலன் 40, எம்.சிந்துஜன் 37, ஆர்.பிரிசங்கர் 35 ஓட்டங்களைப் பெற்றுக்கொடுத்தனர்.


பந்துவீச்சில் கிறிஸ்ட் கிங் சார்பாக, எச் பெரோ 9.4 ஓவர்கள் பந்துவீசி 24 ஓட்டங்களை விட்டுக்கொடுத்து 6 விக்கெற்களை கைப்பற்றினார்.


பதிலுக்கு முதலாவது இனிங்ஸை துடுப்பெடுத்தாடிய கிறிஸ்ட் கிங் அணி, 39.2 ஓவர்களில் 83 ஓட்டங்களுக்குச் சகல விக்கெட்களையும் இழந்தது. துடுப்பாட்டத்தில் ஆர்.டி சில்வா 21 ஓட்டங்களைப் பெற்றுக்கொடுத்தார்.


பந்துவீச்சில் சென்.ஜோன்ஸ் சார்பாக பி.துவாரகசீலன் 04, ஜே.கிசாந்துஜன் 03, கே.கபில்ராஜ் 02 விக்கெட்களைக் கைப்பற்றினார்கள்.


இரண்டு நாள் துடுப்பாட்ட போட்டியில், இரண்டாவதாக துடுப்பெடுத்தாடும் அணி 100 ஓட்டங்களுக்கும் அதிகமான ஓட்டங்களை குறைவாக பெற்றால் மீண்டும் இரண்டாவதாக துடுப்பெடுத்தாடிய அணியே, மீண்டும் துடுப்பெடுத்தாடவேண்டும் என்ற விதிக்கமைய (பலோ ஓன்) கிறிஸ்ட் கிங் அணி இரண்டாவது இனிங்ஸூக்காக மீண்டும் களமிறங்கியது.


இரண்டாவது இனிங்ஸில் மிகுந்த போராட்டத்தை வெளிப்படுத்திய அவ்வணி, 90.3 ஓவர்களை எதிர்கொண்டு 194 ஓட்டங்களுக்கு சகல விக்கெற்களையும் இழந்தது. துடுப்பாட்டத்தில் தரிந்து பெரேரா 94 ஓட்டங்களைப் பெற்றுக்கொடுத்தார்.


பந்துவீச்சில் சென்.ஜோன்ஸ் சார்பாக ஏ.கானாமிர்தன் 63 ஓட்டங்களை விட்டுக்கொடுத்து 5 விக்கெட்களையும், ஏ.ஹரோல்ட் லக்கி 2 விக்கெட்களையும் கைப்பற்றினார்கள்.


82 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய சென்.ஜோன்ஸ் அணி, 9.1 ஓவர்களில் 4 விக்கெற்களை இழந்து வெற்றியிலக்கை அடைந்தது. துடுப்பாட்டத்தில் ஏ.கானாமிர்தன் 30, பி.துவாரகசீலன் 24 ஓட்டங்களைப் பெற்றுக்கொடுத்தனர்.

சங்காவின் 11ஆவது இரட்டைச் சதம்

டெஸ்ட் கிரிக்கெட் போட்டிகளில் 11ஆவது இரட்டைச் சதத்தினை இலங்கை அணியின் நட்சத்திர துடுப்பாட்ட வீரர் குமார் சங்கக்கார, இன்று பெற்றுக் கொண்டார். 
 
இலங்கை – நியூஸிலாந்து அணிகளுக்கிடையிலான இரண்டாவது டெஸ்ட் போட்டி, நேற்று வெலிங்டனில் ஆரம்பமாகியது. இப்போட்டியில் 203 ஓட்டங்களைப் பெற்று ஜேம்ஸ் நீஸமின் பந்துவீச்சில் ஆட்டமிழந்தார்.


தனது 130ஆவது டெஸ்ட் போட்டியில் விளையாடிவரும் சங்கக்கார, 224ஆவது இனிங்ஸில் 203 ஓட்டங்களைப் பெற்று ஆட்டமிழந்தார். இதன்மூலம், 12,198 ஓட்டங்களைப் பெற்றுள்ளார். டெஸ்ட் வரலாற்றில், 38 சதங்கள், 51 அரைச்சதங்களை குவித்துள்ளார் சங்கா. டெஸ்ட் போட்டிகளில் அதிக ஓட்டங்களைக் குவித்தவர்கள் வரிசையில், உலகில் 5ஆவது இடத்தில் சங்கா இருப்பதும் குறிப்பிடத்தக்கது.

ஜோன்சன் சந்தேகம்

அவுஸ்திரேலியா அணியின் வேகப்பந்து வீச்சாளர் மிச்சல் ஜோன்சன், இந்திய – அவுஸ்திரேலியா அணிகளுக்கிடையில் நடைபெறவுள்ள சிட்னி கிரிக்கெட் போட்டியில் விளையாடுவது சந்தேகம் என்ற நிலை ஏற்பட்டுள்ளது. அவருக்கு ஏற்பட்டுள்ள தசைப் பிடிப்பே இந்த சந்தேகத்துக்கு காரணமாகும். 

 

நேற்று இடம்பெற்ற பயிற்சிகளில் அவர் ஈடுபடவில்லை. அவுஸ்திரேலியா அணியின் பந்துவீச்சை தலைமை தாங்குபவர் மிச்சல் ஜோன்சன். அவர் இல்லாமல் அவுஸ்திரேலியா அணிக்கு பின்னடைவு ஏற்பட வாய்ப்புக்கள் உள்ளன. ஆனாலும் மிச்சல் ஸ்டார்க், பீற்றர் சிடில் ஆகியோர் அணிக்குள் மீண்டும் இணைந்து இருப்பது குறித்த பின்னடைவில் இருந்து பாதுகாக்கும் நிலை உள்ளது. உலகக் கிண்ண தொடருக்கு வீரர்களை பாதுகாக்க வேண்டிய நிலை உள்ளது. 

 

 

தொடரில் அவுஸ்திரேலியா அணி வெற்றி பெற்றுள்ள நிலையில் மிச்சல் ஜோன்சனுக்கு ஓய்வளிப்பது பாதக தன்மையை ஏற்படுத்தாது. மிச்சல் ஜோன்சன், இந்திய வீரர்களுடனும் டெஸ்ட் அணித் தலைவர் விராத் கோலியுடனும் வாய்த்தர்க்கத்தில் ஈடுபாட்டார். இந்த நிலையில் அவர் இல்லாமல் போட்டி நடைபெற்றால் இரு அணிகளும் வாய்ச் சண்டையில் ஈடுபடுவது குறையும் என நம்பலாம்.

 

சாதனை படைத்தார் சங்கா

டெஸ்ட் கிரிக்கெட் போட்டிகளில் மிக விரைவாக 12,000 ஓட்டங்கள் கடந்த வீரர் என்ற சாதனையை இலங்கை அணியின் நட்சத்திர துடுப்பாட்ட வீரர் குமார் சங்கக்கார, இன்று தனதாக்கிக் கொண்டார். 

 

இலங்கை – நியூஸிலாந்து அணிகளுக்கிடையிலான இரண்டாவது டெஸ்ட் போட்டி, இன்று வெலிங்டனில் ஆரம்பமாகியது. இப்போட்டியில் 5 ஓட்டங்களைக் கடந்தால் 12,000 ஓட்டங்கள் என்ற நிலையில் துடுப்பெடுத்தாடிய சங்கக்கார, இலகுவாக தனது இலக்கினை அடைந்து சாதனை படைத்தார். இவருக்கு முன்னதாக சச்சின் டெண்டுல்கர் மற்றும் ரிக்கி பொன்டிங் ஆகியோர் 247 இனிங்ஸ்களில் விளையாடியே 12,000 ஓட்டங்களைக் கடந்திருந்தனர். ஆனால், சங்கக்கார இந்த சாதனையினை 224 இனிங்ஸ்களில் பெற்றுக்கொண்டமை குறிப்பிடத்தக்கது. இதன்மூலம், சச்சின், பொன்டிங் ஆகியோரின் சாதனையை சங்கா முறியடித்தார்.

 

 

தனது 130ஆவது டெஸ்ட் போட்டியில் விளையாடிவரும் சங்கக்கார, 224ஆவது இனிங்ஸில் 33 ஓட்டங்களைப் பெற்று ஆட்டமிழக்காமல் களத்திலுள்ளார். இதன்மூலம், 12,028 ஓட்டங்களைப் பெற்றுள்ளார். டெஸ்ட் வரலாற்றில், 37 சதங்கள், 51 அரைச்சதங்களை குவித்துள்ளார் சங்கா. டெஸ்ட் போட்டிகளில் அதிக ஓட்டங்களைக் குவித்தவர்கள் வரிசையில், உலகில் 5ஆவது இடத்தில் சங்கா இருப்பதும் குறிப்பிடத்தக்கது.

 

2014ஆம் ஆண்டுக்கான சிறந்த அணி சென்றலைட்ஸ்

யாழ். சென்ரல் விளையாட்டுக்கழகத்தால் மேற்கொள்ளப்படும் யாழ். மாவட்ட துடுப்பாட்ட அணிகளை தரப்படுத்தும், ஜோர்ஜ் வெப்ஸ்டர் தரப்படுத்தலில் 2014ஆம் ஆண்டுக்கான சிறந்த அணியாக 131.04 புள்ளிகளைப் பெற்ற சென்றலைட்ஸ் அணி பெற்றுக்கொண்டுள்ளது.


2014ஆம் ஆண்டுக்கான போட்டிகள் அனைத்தும் முடிவடைந்த நிலையில், அணிகளின் தரவரிசை நிலைமைகளை சென்ரல் விளையாட்டுக்கழகத்தின் தலைவரும் யாழ்ப்பாண துடுப்பாட்டச் சங்க செயலாளருமான எஸ்.விமலதாஸ் திங்கட்கிழமை (29) வெளியிட்டார்.


இந்த தரவரிசை இருபது – 20, 30, 40, 50 ஓவர்கள் போட்டிகளை மையமாக வைத்து கணிக்கப்படுகின்றது.


இருபது – 20 போட்டியில் வெற்றிபெறும் அணிக்கு 2 புள்ளிகளும், 30 ஓவர்கள் போட்டியில் வெற்றிபெறும் அணிக்கு 3 புள்ளிகளும், 40 ஓவர்கள் போட்டியில் வெற்றிபெறும் அணிக்கு 4 புள்ளிகளும், 50 ஓவர்கள் கொண்ட போட்டியில் வெற்றிபெறும் அணிக்கு 50 புள்ளிகளும் வழங்கப்படுகின்றது.


இதனைவிட, அணிகள் பெற்றுக்கொள்ளும் ஒவ்வொரு 10 ஓட்டங்களுக்கும் 0.1 புள்ளிகளும், வீழ்த்தப்படும் ஒவ்வொரு இலக்குக்கு 0.1 புள்ளிகளும் வழங்கப்பட்டு தரவரிசை கணிக்கப்படுகின்றது.


சென்றலைட்ஸ் விளையாட்டுக்கழகம் பங்குபற்றிய 22 போட்டிகளில் 19 போட்டிகளில் வெற்றிபெற்று 131.04 புள்ளிகளுடன் முதலிடத்தையும், கொக்குவில் மத்திய சனசமூக நிலைய அணி பங்குபற்றிய 24 போட்டிகளில் 21 போட்டிகளில் வெற்றிபெற்று 127.47 புள்ளிகளுடன் இரண்டாமிடத்தையும், பற்றீசியன் விளையாட்டுக்கழகம் பங்குபற்றிய 19 போட்டிகளில் 11 போட்டிகளில் வெற்றிபெற்று 85.40 புள்ளிகளுடன் மூன்றாமிடத்தையும் பெற்றுக்கொண்டன.


யாழ்ப்பாணப் பல்கலைக்கழகம் (72.26), சென்ரல் விளையாட்டுக்கழகம் (69.95), மானிப்பாய் பரிஷ் விளையாட்டுக்கழகம்; (60.82), ஸ்ரீகாமாட்சி விளையாட்டுக்கழகம் (60.76), கிறாஸ்கோப்பர்ஸ் விளையாட்டுக்கழகம் (60.43), யூனியன்ஸ் விளையாட்டுக்கழகம் (47.63), யாழ்ப்பாணம் ஜொனியன்ஸ் விளையாட்டுக்கழகம் (44.65) அடுத்தடுத்த இடங்களில் இருக்கின்றன.


2010ஆம் ஆண்டு முதல் மேற்கொள்ளப்பட்டு வருகின்ற இந்த தரவரிசையில், 2010, 2011ஆம் ஆண்டுகளில் யாழ்ப்பாணப் பல்கலைக்கழக அணியும், 2012ஆம் ஆண்டு கொக்குவில் மத்திய சனசமூக நிலைய அணியும், 2013ஆம் ஆண்டு ஜொனியன்ஸ் அணியும் சிறந்த அணிகளாக தெரிவு செய்யப்பட்டிருந்தன.


யாழ்ப்பாணத்துக்கு துடுப்பாட்டத்தை 1898ஆம் ஆண்டு காலப்பகுதியில் அறிமுகப்படுத்திய யாழ்ப்பாணம் மத்திய கல்லூரியின் முன்னாள் அதிபரும் பாதிரியார் ஜோர்ஜ் வெப்ஸ்டர் ஞாபகார்த்தமாகவே இந்த தரவரிசை செய்யப்படுவதுடன், வருடத்தில் சிறந்த அணிக்கு வெற்றிக்கேடயமும் வழங்கப்பட்டு வருகின்றது.

கொக்குவில் மத்திய சனசமூக நிலைய அணி

பற்றீசியன் விளையாட்டுக்கழகம்

கோளி – ஜோன்சன் மோதல் தொடர்கின்றது

இந்திய கிரிக்கெட் வீரர் விராத் கோளி மற்றும் அவுஸ்திரேலியா கிரிக்கெட் அணியின் வீரர் மிச்சல் ஜோன்சன் ஆகியோருக்கிடையில் மூன்றாவது டெஸ்ட் போட்டியில் ஏற்பட்ட வாய் தர்க்கம், நேற்றைய நான்காம் நாளிலும் தொடர்ந்துள்ளது. 

இரு அணிகளுக்குமிடையிலான டெஸ்ட் தொடர் ஆரம்பித்த நாளில் இருந்து அவுஸ்திரேலியா வீரர்களின் வசை பாடல்களுக்கு உடனுக்குடன் இந்திய அணியின் உப தலைவர் விராத் கோளி, ஆக்ரோஷமாக பதிலடி கொடுத்து வருகின்றார். இதன் காரணமாக முதற்ப் போட்டியில் அபராதம் விதிக்கப்பட்டது. இந்த நிலையில் மூன்றாவது போட்டியின் மூன்றாம் நாளான நேற்று முன்தினம் மிச்சல் ஜோன்சன் – விராத் கோளி ஆகியோருக்கிடையில் மோதல் உருவானது. விராத் கோளி தடுத்தாடிய பந்து, ஜோன்சனின் கைகளுக்கு செல்ல, பந்தை எடுத்து விக்கெட்களை நோக்கி ஜோன்சன் எறிந்தார். பந்து, விராத் கோளியின் முதுகை தாக்கியது. கோபமடைந்த கோளி இனி பந்தை எனக்கு எறியாமல் முடிந்தால் விக்கெட்டை தகர்க்க கூடிய முறையில் எறியவும் என கூறினார். 

இதனையடுத்து ஜோன்சனும் பதிலுக்கு கருத்துகளைக் கூற அவரின் பந்துவீச்சை கேலி செய்தபடி கோளி மற்றும் ரெஹானே ஆகியோர் குறி வைத்து தாக்கினர். அவுஸ்திரேலியாவினரின் பாணியில் அவர்கள் செயற்பட்டனர். 

இதனை தொடர்ந்து நேற்று அவுஸ்திரேலியா அணி தமது இரண்டாம் இன்னிங்ஸில் துடுப்பாடிய வேளையில் மிச்சல் ஜோன்சன் துடுப்பாட களமிறங்கினார். அந்தவேளையில் அவரை விராத் கோளி கேலி செய்தார். மிச்சல் ஜோன்சன் ஆட்டமிழந்த வேளையிலும் மீண்டும் விராத் கோளி அவரை நோக்கி கேலியான வார்த்தைகளை பிரயோகித்துள்ளார். அதனை நடுவர்களிடம் மிச்சல் ஜோன்சன் முறையீடு செய்து மைதானத்தை விட்டு வெளியேறினார். 

இந்த சமபவங்கள் தொடர்பாக கருத்து தெரிவித்த விராத் கோளி, தன்னை மதிக்காதவர்களை தான் ஒருபோதும் மதிக்கமாட்டேன். சில அவுஸ்திரேலியா வீரர்களுடன் நல்ல நட்பாக பழகி வருகின்றேன். எல்லாம் ஒரே மாதிரி இல்லை. அவுஸ்திரேலியாவின் இதுபோன்ற செயற்பாடுகள் மாறாது. அவர்கள் கற்ற பாடங்களின் மூலம் திருந்துவதாகவும் இல்லை என கூறியுள்ளார். அதேவேளை அவர்கள் இவ்வாறு செயற்படுவதன் மூலமே தான் அவர்களுடன் தான் ஓட்டங்களை அடித்து பெறக் கூடியதாக உள்ளது எனவும் கூறியுள்ளார். அத்துடன் தனது இந்த நடைமுறை மாறாது எனவும் கூறியுள்ளார்.

கோளியின் ஆக்ரோஷம் நல்லது: டீன் ஜோன்ஸ்

இந்திய அணியின் உப தலைவர் விராத் கோளி, அவுஸ்திரேலியா வீரர்களுடன் ஆக்ரோஷமாக நடந்து கொள்ளவது நல்லது என அவுஸ்திரேலியா அணியின் முன்னாள் வீரர் டீன் ஜோன்ஸ் தெரிவித்துள்ளார். 

இந்திய ஊடகம் ஒன்றுக்கு இவ்வாறு டீன் ஜோன்ஸ் தெரிவித்துள்ளார். இந்திய அணியில் இவ்வாறான புதிய கலாசாரம் உருவாகி இருப்பது நன்றே. அத்துடன் இது அவர்கள் வெற்றிகளைப் பெற வேண்டும் என்ற பசி இருக்கின்றது என்பதை வெளிப்படுத்துகின்றது. கோளி தனியே இவ்வாறு வசை பாடாமல் ஓட்டங்களையும் குவிக்கின்றார். இது நல்லது. அவரின் வார்த்தைகளை நான் ரசிக்கின்றேன். அவற்றில் எனக்கு எந்த ஆட்சேபனையும் இல்லை. இது இந்திய இளையவர்களுக்கு நல்ல முன் உதாரணமாகவும் இருக்கின்றது. ஆனால் இந்த ஆக்ரோஷம் தனியே வெற்றிகளைப் பெற போதாது. சரியாக துடுப்பாட வேண்டும். இறுதி நாளில் பெரிய ஓட்ட எண்ணிக்கை பெற வேண்டும். அதற்கு கோளி சிறப்பாக துடுப்பாட வேண்டும் எனவும் டீன் ஜோன்ஸ் மேலும் கூறியுள்ளார்.