Category Archives: Featured

தொடரைக் கைப்பற்றியது இந்தியா

 

இந்தியா, இங்கிலாந்து அணிகளுக்கிடையிலான மூன்று போட்டிகள் கொண்ட இருபதுக்கு-20 சர்வதேசப் போட்டித் தொடரை இந்திய அணி கைப்பற்றியுள்ளது.

 

முதலிரண்டு போட்டிகளிலும் இரண்டு அணிகளும் தலா ஒவ்வொரு போட்டியில் வென்றிருந்த நிலையில், பெங்களூரில், இன்று (01) இடம்பெற்ற தீர்க்கமான மூன்றாவது போட்டியில், 75 ஓட்டங்களால் வெற்றிபெற்ற இந்திய அணி, 2-1 என்ற ரீதியில் தொடரைக் கைப்பற்றியது.

 

நாணயச் சுழற்சியில் வெற்றிபெற்ற இங்கிலாந்து அணியின் தலைவர் ஒயின் மோர்கன், இந்திய அணியை முதலில் துடுப்பெடுத்தாடப் பணித்தார். இந்திய அணி சார்பாக, றிஷாப் பண்ட் அறிமுகத்தை மேற்கொண்டிருந்தார்.

 

முதலில் துடுப்பெடுத்தாடிய இந்திய அணி, 20 ஓவர்களில் ஆறு விக்கெட்டுகளை இழந்து 202 ஓட்டங்களைக் குவித்தது.

 

இந்திய அணியின் தலைவர் விராத் கோலி, அணியின் ஓட்ட எண்ணிக்கை நான்கு ஆக இருக்கும்போதே ஆட்டமிழந்தபோதும், இந்திய அணியின் இரண்டாவது விக்கெட்டுக்காக ஜோடி சேர்ந்த லோகேஷ் ராகுலும் சுரேஷ் ரெய்னாவும் 61 ஓட்டங்களை பகிர்ந்ததுடன், மூன்றாவது விக்கெட்டுக்காக ஜோடி சேர்ந்த ரெய்னாவும் மகேந்திர சிங் டோணியும் 55 ஓட்டங்களைப் பகிர்ந்ததுடன், நான்காவது விக்கெட்டுக்காக ஜோடி சேர்ந்த டோணியும் யுவ்ராஜ் சிங்கும் 57 ஓட்டங்களைப் பகிர்ந்திருந்தனர். இந்திய அணியின் இனிங்ஸின் 18ஆவது ஓவரை கிறிஸ் ஜோர்டான் வீசியிருந்த நிலையில், மூன்று, 6 ஓட்டங்கள், ஒரு 4 ஓட்டங்கள் உள்ளடங்கலாக, 23 ஓட்டங்களை அந்த ஓவரில் யுவ்ராஜ் சிங் பெற்றிருந்தார்.

 

துடுப்பாட்டத்தில், இந்திய அணி சார்பாக, சுரேஷ் ரெய்னா 63(45), மகேந்திர சிங் டோணி 56(36), யுவ்ராஜ் சிங் 27(10), லோகேஷ் ராகுல் 22(18) ஓட்டங்களைப் பெற்றனர். இதில், தனது 76ஆவது இருபதுக்கு-20 சர்வதேசப் போட்டியில் விளையாடிய டோணி, இருபதுக்கு-20 சர்வதேசப் போட்டிகளில் தனது முதலாவது அரைச்சதத்தைப் பெற்றுக் கொண்டார்.

 

பந்துவீச்சில், இங்கிலாந்து அணி சார்பாக, தைமல் மில்ஸ், பென் ஸ்டோக்ஸ், லியாம் பிளங்கெட், கிறிஸ் ஜோர்டான் ஆகியோர் தலா ஒவ்வொரு விக்கெட்டினைக் கைப்பற்றினார்.

 

பதிலுக்கு, 203 ஓட்டங்கள் என்ற வெற்றியிலக்குடன் துடுப்பெடுத்தாடிய இங்கிலாந்து அணி, 16.3 ஓவர்களில் சகல விக்கெட்டுகளையும் இழந்து 127 ஓட்டங்களை மாத்திரமே பெற்றுத் தோல்வியடைந்தது.

 

இங்கிலாந்து அணியின் இரண்டாவது விக்கெட்டுக்காகவும், மூன்றாவது விக்கெட்டுக்காகவும், முறையே 47, 64 ஓட்டங்களைப் பகிரப்பட்டபோதும், இறுதி எட்டு விக்கெட்டுக்களையும் எட்டு ஓட்டங்களுக்கு, 18 பந்துகளில் இழந்திருந்தது.

 

துடுப்பாட்டத்தில், இங்கிலாந்து அணி சார்பாக, ஜோ றூட் 42(37), ஒயின் மோர்கன் 40(21), ஜேசன் றோய் 32(23) ஓட்டங்களைப் பெற்றனர்.

 

பந்துவீச்சில், இந்திய அணி சார்பாக, யுஸ்வேந்திர சஹால், நான்கு ஓவர்களில், 25 ஓட்டங்களை மட்டுமே விட்டுக்கொடுத்து ஆறு விக்கெட்டுகளைக் கைப்பற்றினார். இருபதுக்கு-20 சர்வதேசப் போட்டிகளில், மூன்றாவது சிறந்த பந்துவீச்சுப் பெறுதி இதுவாகும். சஹால் தவிர, ஜஸ்பிரிட் பும்ரா மூன்று விக்கெட்டுகளைக் கைப்பற்றியதோடு, அமித் மிஷ்ரா ஒரு விக்கெட்டினைக் கைப்பற்றினார்.

 

போட்டியின் நாயகனாகவும் தொடரின் நாயகனாகவும் சஹால் தெரிவானார்.

 

அந்தவகையில், டெஸ்ட் தொடரில், 4-0 என்ற ரீதியில் தோற்ற இங்கிலாந்து, ஒருநாள் சர்வதேசப் போட்டித் தொடரில், 2-1 என்ற ரீதியில் தோற்று, தற்போது இருபதுக்கு-20 சர்வதேச போட்டித் தொடரிலும் தோற்று, எல்லா வகையான தொடரிலும் தோற்று வெற்றுக்கையுடன் இந்தியாவை விட்டு இங்கிலாந்து செல்கிறது.

சசெக்ஸில் டேவிட் விஸே; மீண்டுமொரு கொல்பாக்

 

தென்னாபிரிக்க கிரிக்கெட் அணியின் சகலதுறை வீரர் டேவிட் விஸே, தனது நாட்டுக்காக விளையாடுவதை விடுத்து, “கொல்பாக்” வீரராக, இங்கிலாந்துப் பிராந்திய அணியான சசெக்ஸ் அணியில் ஒப்பந்தம் செய்துள்ளார்.

 

தென்னாபிரிக்காவுக்காக 6 ஒருநாள் சர்வதேசப் போட்டிகளிலும் 20 இருபதுக்கு-20 சர்வதேசப் போட்டிகளிலும் இதுவரை விளையாடியுள்ள டேவிட் விஸே, இருபதுக்கு-20 சர்வதேசப் போட்டிகளில் 23 ஓட்டங்களுக்கு 5 விக்கெட்டுகள் என்ற சிறப்பான பெறுபேற்றைக் கொண்டுள்ளார். 

 

இலங்கைக்கெதிரான 2ஆவது டெஸ்டின் முடிவில், அவ்வணியின் வேகப்பந்து வீச்சாளர் கைல் அபொட், துடுப்பாட்ட வீரர் றீலி றொஸோ ஆகியோர், கொல்பாக் முறையில் ஹம்ப்ஷையர் அணிக்காக ஒப்பந்தம் செய்யப்பட்டுள்ளதாக அறிவிக்கப்பட்டிருந்தது.  இந்நிலையிலேயே, டேவிட் விஸேவின் அறிவிப்பும் வெளியாகியுள்ளது.  31 வயதான டேவிட் விஸே, இலங்கைக்கெதிரான இருபதுக்கு-20 சர்வதேசப் போட்டித் தொடருக்கான குழாமில் சேர்க்கப்படுவதாக இருந்த போதிலும், அவரது இந்த அறிவிப்புக் காரணமாக, அக்குழாமிலிருந்து அவர் நீக்கப்பட்டே, அக்குழாம் அறிவிக்கப்பட்டது. 

 

கொல்பாக் வீரர்களைத் தவிர, ஏனைய வீரர்களான ஃபப் டு பிளெஸி, ஹஷிம் அம்லா, குயின்டன் டீ கொக், ஏபி டி வில்லியர்ஸ், ஜே.பி.டுமினி, கஜிஸ்கோ றபடா ஆகியோருக்கு ஓய்வு வழங்கப்பட்டுள்ளது. காயம் காரணமாக டேவ் ஸ்டெய்ன், கிறிஸ் மொறிஸ் ஆகியோர் சேர்க்கப்படவில்லை. அணியின் தலைவராக, ஃபர்ஹான் பெஹர்டியன் செயற்படவுள்ளார்.   

லக்மால் முன்னேற்றம்; மத்தியூஸ் பின்னடைவு

 

சர்வதேச கிரிக்கெட் சபையினால், டெஸ்ட் வீரர்களுக்கான புதிய தரப்படுத்தல்கள் வெளியிடப்பட்டுள்ளன. அவுஸ்திரேலியா எதிர் பாகிஸ்தான் (3ஆவது டெஸ்ட்), தென்னாபிரிக்கா எதிர் இலங்கை (2ஆவது டெஸ்ட்) ஆகிய போட்டிகளின் முடிவிலேயே, இத்தரப்படுத்தல்கள் வெளியிடப்பட்டுள்ளன.

 

துடுப்பாட்ட வீரர்களுக்கான தரப்படுத்தலில், முதல் 6 இடங்களிலும் மாற்றங்கள் ஏற்படுத்தப்படவில்லை. ஸ்டீவன் ஸ்மித், விராத் கோலி, ஜோ றூட், கேன் வில்லியம்ஸன், டேவிட் வோணர், அஸார் அலி ஆகியோரே, முதல் 6 இடங்களில் காணப்படுகின்றனர்.

 

14ஆவது இடத்தில் காணப்பட்ட யுனிஸ் கான், 7ஆவது இடத்துக்கு முன்னேறியுள்ளார். தொடர்ந்து குயின்டன் டீ கொக் (9இலிருந்து 8க்கு), ஏபி டி வில்லியர்ஸ் (8இலிருந்து 9க்கு), ஹஷிம் அம்லா (7இலிருந்து 10க்கு) ஆகியோர் காணப்படுகின்றனர்.

 

3ஆவது போட்டிக்கு முன்னர் 11ஆவது இடத்தில் காணப்பட்ட இலங்கை அணித்தலைவர் அஞ்சலோ மத்தியூஸ், 3ஆவது போட்டியில் போதிய திறமைகளை வெளிப்படுத்தாதன் காரணமாக, 14ஆவது இடத்துக்குப் பின்தள்ளப்பட்டுள்ளார். 23ஆவது இடத்தில் காணப்பட்ட சந்திமால் 26ஆவது இடத்துக்கும், 31ஆவது இடத்தில் காணப்பட்ட தனஞ்சய டி சில்வா 33ஆவது இடத்துக்கும் பின்தள்ளப்பட்டுள்ளனர்.

 

பந்துவீச்சாளர்களில் முதலிரு இடங்களிலும் இரவிச்சந்திரன் அஷ்வின், இரவீந்திர ஜடேஜா இருவரும் காணப்படுகின்றனர். 5ஆவது இடத்தில் காணப்பட்ட ஜொஷ் ஹேஸல்வூட், பாகிஸ்தானுக்கெதிராகச் சிறப்பாகச் செயற்பட்டு, 3ஆவது இடத்துக்கு முன்னேறியுள்ளார்.

 

ரங்கன ஹேரத்துக்குச் சுழற்சியை வழங்கக்கூடாது என, தென்னாபிரிக்க ஆடுகளங்களை, வேகப்பந்து வீச்சாளர்களுக்குச் சாதகமான ஆடுகளங்களாக அந்நாட்டு ஆடுகள மேற்பார்வையாளர்கள் மாற்றியிருந்த நிலையில், விக்கெட்டுகளைக் கைப்பற்றத் தவறிய ஹேரத், 3ஆவது இடத்திலிருந்து 4ஆவது இடத்துக்குப் பின்தள்ளப்பட்டுள்ளார்.

 

தொடர்ந்து வரும் இடங்களில் டேல் ஸ்டெய்ன் (4இலிருந்து 5க்கு), ஜேம்ஸ் அன்டர்சன், ஸ்டுவேர்ட் ப்ரோட், கஜிஸ்கோ றபடா (17இலிருந்து 8க்கு), வேர்ணன் பிலாந்தர், மிற்சல் ஸ்டார்க் (8இலிருந்து 10க்கு) ஆகியோர் காணப்படுகின்றனர்.

 

தென்னாபிரிக்காவுக்கு எதிரான 2ஆவது போட்டியில் சிறப்பாகப் பந்துவீசியிருந்த இலங்கையின் சுரங்க லக்மால், லஹிரு குமார இருவரும், தங்கள் வாழ்நாளின் சிறந்த அடைவைப் பெற்றுள்ளனர். இப்போட்டிக்கு முன்பாக 36ஆவது இடத்தில் காணப்பட்ட லக்மால், 30ஆவது இடத்துக்கு முன்னேறியுள்ளார். தனது 3ஆவது டெஸ்ட் போட்டியில் விளையாடிய குமார, முதலிரு போட்டிகளின் பின்னர் முதல் 100 பேரில் ஒருவராக இடம்பெற்றிருக்காத நிலையில், 7 விக்கெட்டுகளைக் கைப்பற்றியமை காரணமாக, 67ஆவது இடத்தைப் பிடித்துள்ளார்.

‘டோணி தான் எப்போதும் தலைவர்’

 

இந்திய அணியின் மட்டுப்படுத்தப்பட்ட போட்டிகளுக்கான புதிய தலைவராக நியமிக்கப்பட்டுள்ள விராத் கோலி, தனது தலைவராக, எப்போதும் மகேந்திரசிங் டோணியே இருப்பார் எனக் குறிப்பிட்டுள்ளார்.

 

மட்டுப்படுத்தப்பட்ட ஓவர்கள் கொண்ட அணிகளின் தலைவராக இருந்த டோணி, கடந்த வாரம் ஓய்வுபெற்றதைத் தொடர்ந்து, புதிய தலைவராக, கடந்த வெள்ளிக்கிழமையன்று, கோலி உறுதிப்படுத்தப்பட்டார். ஏற்கெனவே டெஸ்ட் தலைமைத்துவத்தை வகிக்கும் கோலி, தற்போது ஒட்டுமொத்த அணியின் தலைமைத்துவத்தையும் ஏற்பது தொடர்பாகவும் டோணி தொடர்பாகவும் கருத்துத் தெரிவித்தார்.

 

"தலைமைத்துவம், என்னைச் சரியான விதத்தில் நடத்திக் கொள்ளுதல் ஆகிய விடயங்களில், அவரிடமிருந்து (டோணி), நான் ஏராளமானவற்றைக் கற்றுக் கொண்டேன். 'டோணி' என்று நீங்கள் நினைக்கும் போது, மனதில் முதலாவதாக வருவது 'அணித்தலைவர்' என்பது தான்.

 

"என்னைப் பொறுத்தவரை, எனது அணித்தலைவராக அவரே எப்போதும் இருப்பார். ஏனென்றால், எனது கிரிக்கெட் வாழ்வு, அவரது தலைமைத்துவத்தின் கீழேயே ஆரம்பித்தது. என்னை வழிநடத்திய, எனக்கு வாய்ப்புகளை வழங்கிய, கிரிக்கெட் வீரராக நான் வளர்வதற்கு எனக்கு வாய்ப்புகளையும் நேரங்களையும் வழங்கியவராக, அணியிலிருந்து நான் நீக்கப்படுவதைத் தடுத்த ஒருவராக, டோணியே இருப்பார்" என்று கோலி குறிப்பிட்டார்.

 

இருவருக்குமிடையில் இருதரப்பு மரியாதை காணப்படுவதாகக் குறிப்பிட்ட கோலி, "நாம் இருவரும் அற்புதமான நட்பைக் கொண்டுள்ளோம். அவரது கருத்துகளை எனதருகே கொண்டிருப்பதற்கு, நான் மிகவும் அதிர்ஷ்டசாலி" என்றும் குறிப்பிட்டார்.

 

டெஸ்ட் போட்டிகளிலிருந்து டோணி திடீரென ஓய்வுபெற்றபோது, 2015ஆம் ஆண்டு ஜனவரியில், அதற்கான தலைமைத்துவத்தைப் பொறுப்பேற்ற கோலி, அப்போது இருந்ததை விட, இப்போது அதிகம் தயாராக இருப்பதாகத் தெரிவித்தார். டெஸ்ட் போட்டிகளில் டோணி விளையாட மாட்டாரென, போட்டிக்கு முதல்நாளே தனக்கு முன்னர் அறிவிக்கப்பட்டதாகவும், திடீரென அணித்தலைவராக விளையாட வேண்டியேற்பட்டதாகவும், கோலி குறிப்பிட்டார்.

 

கோலியின் கீழ், 2019ஆம் ஆண்டுக்கான உலகக் கிண்ணத்துக்கான தயார்படுத்தல்களில் இந்திய அணி ஈடுபடவுள்ள நிலையில், அந்தத் தொடருக்காக அணியை வழிநடத்துதல், தனது வாழ்வின் மிகப்பெரிய அடைவாக அமையுமென, கோலி மேலும் குறிப்பிட்டார்.

மீண்டும் வெள்ளையடித்தது நியூசிலாந்து

 

நியூசிலாந்து, பங்களாதேஷ் அணிகளுக்கிடையிலான 3 போட்டிகள் கொண்ட இருபதுக்கு-20 சர்வதேசப் போட்டித் தொடரின் 3ஆவது போட்டியிலும் வெற்றிபெற்ற நியூசிலாந்து அணி, வெள்ளையடிப்புச் செய்துள்ளது.

 

பே ஓவல் மைதானத்தில் இன்று இடம்பெற்ற இப்போட்டியில், நாணயச் சுழற்சியில் வெற்றிபெற்ற பங்களாதேஷ் அணி, முதலில் களத்தடுப்பில் ஈடுபடத் தீர்மானித்தது. இதன்படி துடுப்பெடுத்தாடக் களமிறங்கிய நியூசிலாந்து அணி, 20 ஓவர்களில் 4 விக்கெட்டுகளை இழந்து 194 ஓட்டங்களைக் குவித்தது. 6.1 ஓவர்களில் 3 விக்கெட்டுகளை இழந்து 41 ஓட்டங்களைப் பெற்றுத் தடுமாறிவந்த நியூசிலாந்து அணிக்காக, 4ஆவது விக்கெட்டுக்காக இணைந்த கேன் வில்லியம்ஸ், கொரி அன்டர்சன் இருவரும், 12 ஓர்களில் 124 ஓட்டங்களைக் குவித்தனர். பின்னர், இறுதி நேரத்தில் அதிரடியை வெளிப்படுத்திய அன்டர்சன், 200க்கு அண்மையான ஓட்டங்களைப் பெறுவதை உறுதிப்படுத்தினார்.

 

துடுப்பாட்டத்தில் அன்டர்சன், 41 பந்துகளில் 2 நான்கு ஓட்டங்கள், 10 ஆறு ஓட்டங்கள் உள்ளடங்கலாக ஆட்டமிழக்காமல் 94 ஓட்டங்களைக் குவித்தார். கேன் வில்லியம்ஸன், 57 பந்துகளில் 60 ஓட்டங்களைப் பெற்றார்.
பந்துவீச்சில் றுபெல் ஹொஸைன், 3 விக்கெட்டுகளைக் கைப்பற்றினார்.

 

195 ஓட்டங்களை வெற்றியிலக்காகக் கொண்டு களமிறங்கிய பங்களாதேஷ் அணி, 20 ஓவர்களில் 6 விக்கெட்டுகளை இழந்து 167 ஓட்டங்களை மாத்திரம் பெற்று, 27 ஓட்டங்களால் தோல்வியடைந்தது. ஒரு கட்டத்தில் 8.1 ஓவர்களில் ஒரு விக்கெட்டை இழந்து 82 ஓட்டங்களுடன் பலமாகக் காணப்பட்ட அவ்வணி, இறுதி நேரத்தில் விக்கெட்டுகளை இழந்தமையால், ஓட்டங்களைப் பெறத் தவறியிருந்தது. துடுப்பாட்டத்தில் சௌமியா சர்கார் 42 (28), ஷகிப் அல் ஹஸன் 41 (34) ஓட்டங்களைப் பெற்றனர். பந்துவீச்சில் இஷ் சோதி, ட்ரென்ட் போல்ட் இருவரும் தலா 2 விக்கெட்டுகளைக் கைப்பற்றினர்.

 

போட்டியின் நாயகனாக, அன்டர்சன் தெரிவானார்.

 

ஏற்கெனவே, 3 போட்டிகள் கொண்ட ஒருநாள் சர்வதேசப் போட்டித் தொடரை, நியூசிலாந்து அணி வெள்ளையடித்திருந்த நிலையில், தற்போது இருபதுக்கு-20 சர்வதேசப் போட்டித் தொடரையும் வெள்ளையடித்துள்ளமை குறிப்பிடத்தக்கது.

நாளை முதல் கோலியின் கைகளில் இந்தியா

 

இந்தியாவின் மட்டுப்படுத்தப்பட்ட ஓவர்கள் கொண்ட அணிகளுக்கான தலைவராக இருந்த மகேந்திரசிங் டோணி, தனது பதவியிலிருந்து, நேற்றிரவு, திடீரென விலகியதைத் தொடர்ந்து, தேர்வாளர்கள் நாளைய தினம் கூடவுள்ளனர். இங்கிலாந்துக்கு எதிரான இந்தியக் குழாமைத் தெரிவுசெய்வதற்காகவே அவர்கள் நாளை கூடுகின்றனர்.

 

2007ஆம் ஆண்டு, இருபதுக்கு-20 சர்வதேசப் போட்டிகளின் தலைவராக முதலில் நியமிக்கப்பட்ட டோணி, உலக இருபதுக்கு-20 தொடரை வெற்றிகொண்ட பின்னர், ஒருநாள் சர்வதேசப் போட்டி அணியின் தலைவராக நியமிக்கப்பட்டார். பின்னர், 2008ஆம் ஆண்டில், டெஸ்ட் போட்டிகளுக்கான தலைவரானார்.

 

எதிர்பார்க்காத முடிவுகளை எடுப்பதில் பெயர்போனவரான டோணி, அவுஸ்திரேலியாவில் இடம்பெற்றுக் கொண்டிருந்த டெஸ்ட் தொடருக்கு நடுவில், டெஸ்ட் தலைமையிலிருந்து டெஸ்ட் போட்டிகளிலிருந்தும் விலகியிருந்தார். அதேபோன்றே, யாரும் எதிர்பாராத வண்ணமாகவே, அவரது இந்த அறிவிப்பும் வெளியாகியிருந்தது.

 

ஆனால், டெஸ்ட் தலைவராகப் பதவியேற்ற பின்னர், இளம் வீரரான விராத் கோலியின் கீழ், டெஸ்ட் அணியில் பாரிய மாற்றங்களும் புத்துணர்ச்சியும் ஏற்பட்டிருந்ததாகக் கருதப்பட்டது. ஆகவே, அனைத்து வகையான போட்டிகளினதும் தலைவராக கோலி வருவாரா என்ற கேள்வியை விட, எப்போது வருவார் என்ற கேள்வியே நிலவியது.

 

அந்தக் கேள்விக்கான விடையாக, டோணியின் பதவி விலகல், "வெள்ளிக்கிழமை (நாளை) முதல்" என்ற பதிலைத் தந்துவிட்டிருக்கிறது. இரவிச்சந்திரன் அஷ்வின், றோகித் ஷர்மா, அஜின்கியா ரஹானே உள்ளிட்ட சிலர், குறைந்தளவு வாய்ப்புகளைக் கொண்டிருந்தாலும், விராத் கோலியைத் தாண்டி, வேறு எவரையும் நியமிப்பதற்கு, தேர்வாளர்கள் முயல்வார்கள் என்று கருதப்படவில்லை.

 

இந்திய அணியின் தலைமைப் பதவியென்பது, இலகுவான ஒன்று கிடையாது. சச்சின் டென்டுல்கர் போன்ற ஜாம்பவானே, அணித்தலைமையைச் சிறப்பாகக் கொண்டு நடத்துவதற்குச் சிரமப்பட்டிருந்தார். ஆகவே, டெஸ்ட் தலைவராக கோலி நியமிக்கப்படும் போது, அவரது துடுப்பாட்டப் பெறுபேறுகள் பாதிக்கப்படுமென்ற அச்சம் நிலவியது. ஆனால், அவரது துடுப்பாட்டத்தில் அவர் வெளிப்படுத்திய அதிசிறப்பான துடுப்பாட்டப் பெறுபேறுகள், அணித்தலைமை என்ற சவாலை, அவர் சிறப்பாக எதிர்கொள்கின்றார் என்பதைக் காட்டுகிறது.

 

எனவே, தற்போதுள்ள சவாலாக, 3 வகையான போட்டிகளிலும் விளையாடி, அவற்றில் தலைமை தாங்கும் சவால், கோலிக்குக் காத்திருக்கிறது. தவிர, இந்தியன் பிறீமியர் லீக் போட்டிகளிலும் அவருக்கான தலைமைப் பதவி இருக்கிறது. இவ்வளவற்றையும் சமாளித்துக் கொண்டு, தனது துடுப்பாட்டப் பெறுபேறுகள் பாதிக்காமல் செயற்படுவார் கோலி என்ற எதிர்பார்ப்புக் காணப்படுகிறது.

 

இதற்கு மேலதிகமாக, டோணி போன்ற மாபெரும் ஆளுமையை, அணிக்குள் சாதாரண வீரராக வைத்துக் கொண்டு, அணியை எவ்வாறு கோலி கையாள்வார் என்ற சவாலும் இருக்கிறது. ஆனால், பெரிதாகப் பகட்டுத்தனம் இல்லாத டோணி, அணிக்குள் கோலிக்கான பெரியளவான சவாலாக இருக்க மாட்டார் என்றே கருதப்படுகிறது.

 

இந்தியாவின் மிகப்பெரிய மதம் என அழைக்கப்படும் கிரிக்கெட்டில், 3 வகையான போட்டிகளின் தலைவராகவும் நட்சத்திரத் துடுப்பாட்ட வீரராகவும் உள்ள கோலி, நாளை மேற்கொள்ளப்படவுள்ள தேர்வைத் தொடர்ந்து, நாட்டின் முக்கியமான ஒருவராக மாறவுள்ளார் என்பதே உண்மையாகும்.

அபொட், றொஷோ திடீர் ஓய்வு

 

தென்னாபிரிக்க அணியின் வேகப்பந்து வீச்சாளர் கைல் அபொட், இளம் துடுப்பாட்ட வீரர் றீலி றொஷோ இருவரும், சர்வதேசப் போட்டிகளிலிருந்து திடீரென ஓய்வுபெற்றுள்ளனர். இங்கிலாந்தின் பிராந்தியப் போட்டிகளில் விளையாடுவதற்கே அவர்கள் ஓய்வுபெற்றுள்ளனர்.

 

இங்கிலாந்து பிராந்திய அணிகளில், கொல்பாக் முறையில் வீரர்களைச் சேர்க்கும் முறையில் விளையாடுவதற்கே, அபொட்டும் றொஷோவும் முடிவெடுத்துள்ளனர். கொல்பாக் முறை என்பது, ஐரோப்பிய ஒன்றிய நாடுகளுடன் ஐரோப்பிய ஒன்றிய சங்க ஒப்பந்தத்தைக் கைச்சாத்திட்ட நாடுகளைச் சேர்ந்தவர்கள், ஐரோப்பிய ஒன்றிய நாடுகளைச் சேர்ந்த வீரர்களுக்குக் காணப்படும் பணியாற்றுவதற்கும் நடமாடுவதற்குமான சுதந்திரத்தைக் கொண்டுள்ளனர் என்பதாகும். அவ்வாறான ஒப்பந்தத்தைக் கொண்ட நாடுகளில் தென்னாபிரிக்காவும் ஒன்றாகும்.
இலங்கைக்கெதிரான 2ஆவது டெஸ்ட் போட்டியில் தென்னாபிரிக்க அணி வெற்றிபெற்ற பின்னர், இது தொடர்பான அறிவிப்புகள் விடுக்கப்பட்டன.

 

முதலில், கைல் அபொட் செல்வதை உறுதிப்படுத்திய அணித்தலைவர் ஃபப் டு பிளெஸி, "ஒன்று அல்லது இரண்டு விக்கெட்டுகளை கைல் அபொட் பெறாமை குறித்து வருத்தமடைகிறேன். அவரது இறுதிப் போட்டியில் அவர் அவ்வாறு செய்திருந்தால் சிறப்பாக இருந்திருக்கும்" என்றார்.

 

கிடைக்கப்பெற்ற தகவல்களின்படி, தென்னாபிரிக்காவை விட்டு அபொட் செல்லவுள்ளார் என்ற தகவல் வெளியானதுடன், அவருடன் தென்னாபிரிக்க கிரிக்கெட் சபை, பேச்சுவார்த்தைகளை நடத்தியதாகவும், அவை வெற்றியளிக்காமை காரணமாக, தற்போது அந்த முடிவு குறித்து அறிவிக்கப்படுவதாகவும் தெரிவிக்கப்பட்டது.

 

இந்தத் தொடரின் 3ஆவது போட்டியில் கைல் அபொட் விளையாடத் தயாராக இருந்த போதிலும், எதிர்காலத்தில் தென்னாபிரிக்காவுக்காக விளையாடப் போவதில்லை என்பதால், விடைபெறும் போட்டியொன்றை வழங்க, தென்னாபிரிக்க கிரிக்கெட் சபை, தயாராக இருக்கவில்லை எனத் தெரிவிக்கப்படுகிறது. இதை உறுதிப்படுத்துவது போன்று கருத்துத் தெரிவித்த டு பிளெஸி, “அவர் (அபொட்), தென்னாபிரிக்காவுக்காக விளையாட வேண்டுமென நான் நினைக்கிறேன். ஆனால், எங்களது அணியின் ஓர் அங்கமாக அவர் இருக்க மாட்டாரெனில், அவரிலிருந்து தாண்டிப் போகவேண்டிய தேவையுள்ளது. அவரது முடிவை நான் மதிக்கிறேன். ஆனால் அம்முடிவோடு நான் ஒத்துப் போகவில்லை” என்று தெரிவித்தார்.

 

தனது முடிவு தொடர்பாக விளக்கமளித்த அபொட், இந்த ஒப்பந்தத்தில், கடந்தாண்டு கைச்சாத்திட்டதாகத் தெரிவித்தார். இன்னும் 12 மாதங்களின் பின்னர், அணியின் பிரதான வேகப்பந்து வீச்சாளர்கள் அனைவரும் உடற்றகுதியுடன் இருக்கும் போது, தான் விளையாடாமல் இருக்கும் போது, ஹம்ப்ஷையர் அணிக்காக விளையாடாமல் போனமை குறித்து வருந்திக் கொண்டிருக்க விரும்பவில்லை என்று அவர் தெரிவித்தார். இந்தத் தொடரின் முடிவிலேயே, தனது அறிவிப்பை விடுக்க இருந்ததாகவும், எனினும் துரதிர்ஷ்டவசமாக, அதை இப்போதே அறிவிக்க வேண்டியேற்பட்டதாகத் தெரிவித்தார்.

 

தனது முடிவு குறித்து அறிக்கையொன்றை வெளியிட்ட றொஸோ, தென்னாபிரிக்காவை விட்டுச் செல்வதற்காக தான் எடுத்த முடிவு, இலகுவானதாக அமைந்திருக்கவில்லை என்று தெரிவித்தார்.

 

தற்போதுள்ள அறிவிப்புகளின்படி, ஹம்ப்ஷையர் அணிக்காக 4 ஆண்டுகளுக்காக அபொட்டும், 3 ஆண்டுகளுக்காக றொஸோவும் ஒப்பந்தம் செய்யப்பட்டுள்ளனர்.

அடிபணிந்தது இலங்கை

 

தென்னாபிரிக்க, இலங்கை அணிகளுக்கிடையிலான 3 போட்டிகள் கொண்ட டெஸ்ட் தொடரின் 2ஆவது போட்டியில், இலங்கை அணி மிக மோசமான பெறுபேறை வெளிப்படுத்தி, படுதோல்வியைச் சந்தித்தது.

 

நியூலன்ட்ஸ் மைதானத்தில் இடம்பெற்ற இப்போட்டியின் 4ஆவது நாளான இன்று, 4 விக்கெட்டுகளை இழந்து 130 ஓட்டங்களுடன் இலங்கை அணி களமிறங்கியது. இலங்கை அணிக்கு வழங்கப்பட்ட 507 என்ற இலக்கு, பெறப்படக் கடினமானது என்ற போதிலும், ஓரளவு போராட்டத்தை வெளிப்படுத்த வேண்டுமென்பதே எதிர்பார்ப்பாக இருந்தது.

 

அணியின் சிரேஷ்ட வீரர்களான தலைவர் அஞ்சலோ மத்தியூஸ், உப தலைவர் டினேஷ் சந்திமால் ஆகியோர் களமிறங்கினர். இந்தப் போட்டியில் இலங்கை அணி போராட்டத்தை வெளிப்படுத்துவதாக இருந்தால், இவர்களின் பங்களிப்பு அவசியமாக இருந்தது. ஆனால், போட்டி ஆரம்பித்த 6ஆவது ஓவரிலேயே சந்திமால் ஆட்டமிழந்தார். 2 ஓவர்களின் பின்னர், உபுல் தரங்க ஆட்டமிழந்தார்.

 

பின்னர், அஞ்சலோ மத்தியூஸும் பந்துவீச்சாளர்களுமே எஞ்சியிருந்த நிலையில், தரங்க ஆட்டமிழந்த ஓவரிலேயே மத்தியூஸும் ஆட்டமிழந்து ஏமாற்றமளித்தார். 7 விக்கெட்டுகளை இழந்து 166 ஓட்டங்களுடன் காணப்பட்ட இலங்கை அணி, 200 ஓட்டங்களைக்கூடப் பெறுமா என்ற சந்தேகம் காணப்பட்டது. ஆனால், சுழற்பந்து வீச்சாளர் ரங்கன ஹேரத், இலங்கை அணி 200 ஓட்டங்களைக் கடப்பதை உறுதிப்படுத்தினார். ஹேரத் பெற்ற 35 ஓட்டங்களின் உதவியுடன், இலங்கை அணி 224 ஓட்டங்களைப் பெற்றது.

 

பந்துவீச்சாளர்களில், 21 வயதான இளம் வேகப்பந்து வீச்சாளரான கஜிஸ்கோ றபடா, 6 விக்கெட்டுகளை வீழ்த்தினார். கௌஷால் சில்வா, தனஞ்சய டி சில்வா, அஞ்சலோ மத்தியூஸ், டினேஷ் சந்திமால், உபுல் தரங்க ஆகியோர், றபடாவின் விக்கெட்டுகளில் உள்ளடங்கியிருந்தனர். தவிர, வேர்ணன் பிலாந்தர், 3 விக்கெட்டுகளைக் கைப்பற்றினார்.

 

இப்போட்டியில் இலங்கை அணி, 282 ஓட்டங்களால் தோல்வியடைந்திருந்த நிலையில், இனிங்ஸ் தோல்வியடையாத போட்டிகளில், இலங்கை அணி பெற்றுக் கொண்ட 2ஆவது மோசமான தோல்வியாக இது அமைந்தது.

 

ஸ்கோர் விவரம்…

நாணயச் சுழற்சி: இலங்கை

தென்னாபிரிக்கா: 392/10 (துடுப்பாட்டம்: டீன் எல்கர் 129, குயின்டன் டீ கொக் 101, ஃபப் டு பிளெஸி 38 ஓட்டங்கள். பந்துவீச்சு: லஹிரு குமார 6/122, ரங்கன ஹேரத் 2/57, சுரங்க லக்மால் 2/93)

இலங்கை: 110/10 (துடுப்பாட்டம்: உபுல் தரங்க ஆ.இ 26, திமுத் கருணாரத்ன 24 ஓட்டங்கள். பந்துவீச்சு: வேர்ணன் பிலாந்தர் 4/27, கஜிஸ்கோ றபடா 4/37, கேஷவ் மஹராஜ் 2/32)

தென்னாபிரிக்கா: 224/7 (துடுப்பாட்டம்: டீன் எல்கர் 55, ஃபப் டு பிளெஸி 41 ஓட்டங்கள். பந்துவீச்சு: சுரங்க லக்மால் 4/69)

இலங்கை: 192/10 (துடுப்பாட்டம்: அஞ்சலோ மத்தியூஸ் 49, ரங்கன ஹேரத் ஆ.இ 35, டினேஷ் சந்திமால் 30, ஓட்டங்கள். பந்துவீச்சு: கஜிஸ்கோ றபடா 6/55, வேர்ணன் பிலாந்தர் 3/48)

போட்டியின் நாயகன்: கஜிஸ்கோ றபடா

தலைவர் பதவியிலிருந்து விலகினார் டோணி

 

இந்தியாவின் மட்டுப்படுத்தப்பட்ட ஓவர்கள் கொண்ட போட்டிகளுக்கான தலைவர் பதவியிலிருந்து மகேந்திர சிங் டோணி விலகியுள்ளார். இம்மாதம் இடம்பெறவுள்ள இங்கிலாந்து அணிக்கெதிரான ஒருநாள் சர்வதேசப் போட்டித் தொடர், இருபதுக்கு-20 சர்வதேசப் போட்டித் தொடருக்கு முன்பதாகவே, தனது பதவியிலிருந்து டோணி விலகியுள்ளார்.

 

எவ்வாறெனினும், இங்கிலாந்து அணிக்கெதிரான தொடரில், விக்கெட் காப்பில் ஈடுபடும் துடுப்பாட்ட வீரராக அணியில் தேர்வு செய்யப்படுவதற்கு டோணி தயாராகவுள்ளார் என இந்திய கிரிக்கெட் கட்டுப்பாட்டுச் சபை, இன்று பிற்பகல் தெரிவித்துள்ளது.

 

இங்கிலாந்துத் தொடருக்கான அணிகளைத் தெரிவு செய்வதற்காக, மும்பையில் நாளை தேர்வாளர்கள் கூடுகின்றனர். இந்நிலையில், இந்தியாவின் மட்டுப்படுத்தப்பட்ட ஓவர்கள் கொண்ட போட்டிகளுக்கான புதிய தலைவரை உடனடியாக இந்திய கிரிக்கெட் சபை அறிவிக்காதபோதும், இந்திய டெஸ்ட் அணித் தலைவரான விராத் கோலியே தலைவராக நியமிக்கப்பாடுவார் என்று எதிர்பார்க்கப்படுகிறது.

 

டெஸ்ட் போட்டிகளிலிருந்து, கடந்த 2014ஆம் ஆண்டு டிசெம்பர் மாதம் மெல்பேணில் இடம்பெற்ற போட்டியுடன் ஓய்வுபெற்றதுடன், அணித்தலைமையிலிருந்து விலகிய டோணி, 2007ஆம் ஆண்டு தான் அணித்தலைவராக பதவியேற்ற ஒருநாள் சர்வதேசப் போட்டிகள், இருபதுக்கு-20 சர்வதேசப் போட்டிகளில் அணித்தலைவராக நேற்று வரை தொடர்ந்திருந்தார்.

 

இந்தியாவின் மிகச்சிறந்த தலைவராகப் போற்றப்படும் டோணி, தென்னாபிரிக்காவில் 2007ஆம் ஆண்டு இடம்பெற்ற உலக இருபதுக்கு-20-ஐ இந்தியாவுக்குப் பெற்றிருந்ததுடன், இந்தியாவில் 2011ஆம் ஆண்டு இடம்பெற்ற உலகக் கிண்ணத்தையும், இங்கிலாந்தில் 2013ஆம் ஆண்டு இடம்பெற்ற சம்பியன்ஸ் கிண்ணத்தையும் பெற்றுக் கொடுத்திருந்தார்.

 

இந்தியாவுக்கு, 199 ஒருநாள் சர்வதேசப் போட்டிகளில் தலைமை தாங்கிய டோணி, 110 போட்டிகளில் வென்றதுடன் 74 போட்டிகளில் தோல்வியடைந்துள்ளார். இது தவிர, 72 இருபதுக்கு-20 சர்வதேசப் போட்டிகளில் இந்திய அணிக்கு தலைமை தாங்கி, 41 வெற்றிகளையும் 28 தோல்விகளையும் பெற்றுள்ளார். இந்தியாவின் வெற்றிகரமான டெஸ்ட் அணித்தலைவரான டோணி, 27 வெற்றி, 18 தோல்வி, 15 வெற்றிதோல்வியற்ற முடிவுகளைப் பெற்றுள்ளார்.

 

ஒருநாள் சர்வதேசப் போட்டிகளில், அணித்தலைவராக, 86 என்ற ஸ்ரைக் ரேட்டில்‌, 54 என்ற சராசரியில் 6,633 ஓட்டங்களைக் குவித்துள்ளதுடன், இருபதுக்கு-20 சர்வதேசப் போட்டிகளில், அணித்தலைவராக, 122.60 என்ற ஸ்ரைக் ரேட்டில் 1,112 ஓட்டங்களைக் குவித்துள்ளார். ‌

 

110 ஓட்டங்களுடன் சுருண்டது இலங்கை

 

தென்னாபிரிக்க, இலங்கை அணிகளுக்கிடையிலான மூன்று போட்டிகள் கொண்ட டெஸ்ட் தொடரில்,  கேப் டௌனில் நேற்று ஆரம்பமான இரண்டாவது போட்டியில், 110 ஓட்டங்களுடன் தமது முதலாவது இனிங்ஸில் இலங்கையணி சுருண்டுள்ளது.

 

துடுப்பாட்டத்தில், இலங்கையணி சார்பாக, உபுல் தரங்க ஆட்டமிழக்காமல் 26, டிமுத் கருணாரட்ன 24 ஓட்டங்களைப் பெற்றனர். பந்துவீச்சில், கஜிஸ்கோ றபடா, வேர்ணன் பிலாந்தர் ஆகியோர் தலா நான்கு விக்கெட்டுகளைக் கைப்பற்றினர்.

 

இதனைத் தொடர்ந்து, பொலோ ஓன் வழங்காது, தமது இரண்டாவது இனிங்ஸில் துடுப்பெடுத்தாடிவருகின்ற தென்னாபிரிக்க அணி, இன்றைய இரண்டாம் நாள் ஆட்ட முடிவில், விக்கெட் இழப்பின்றி 35 ஓட்டங்களைப் பெற்றுள்ளது.  தற்போது களத்தில், டீன் எல்கர் 19, ஸ்டீவன் குக் 15 ஓட்டங்களுடன் ஆட்டமிழக்காமல் உள்ளனர்.

 

முன்னதாக, முதலில் துடுப்பெடுத்தாடப் பணிக்கப்பட்டு, முதலாம் நாள் ஆட்ட முடிவில், ஆறு விக்கெட்டுகளை இழந்து  297 ஓட்டங்களைப் பெற்றிருந்த தென்னாபிரிக்க அணி, தமது முதலாவது இனிங்ஸில், சகல விக்கெட்டுகளையும் இழந்து 392 ஓட்டங்களைப் பெற்றது. முதலாம் நாள் ஆட்ட முடிவில், 68 ஓட்டங்களுடன் ஆட்டமிழக்காது இருந்த குயின்டன் டி கொக், நேற்று தனது மூன்றாவது டெஸ்ட் சதத்தைப் பூர்த்தி செய்து 101 ஓட்டங்களுடன் ஆட்டமிழந்தார். டி கொக் தவிர, முதல் நாளில் ஆட்டமிழந்த டீன் எல்கர் 129, அணித்தலைவர் பப் டு பிளெஸி 38, கேஷவ் மஹராஜ் ஆட்டமிழக்காமல் 32 ஓட்டங்களைப் பெற்றனர். பந்துவீச்சில், இலங்கையணி சார்பாக இளம் வேகப்பந்து வீச்சாளர் லஹிரு குமார ஆறு விக்கெட்டுகளைக் கைப்பற்றியதோடு, ரங்கன ஹேரத், சுரங்க லக்மால் ஆகியோர் தலா இரண்டு விக்கெட்டுகளைக் கைப்பற்றினர்.

 

கைல் அபொட்டின் விக்கெட்டினைக் கைப்பற்றியதோடு, 356 விக்கெட்டுகளைக் கைப்பற்றிய ரங்கன ஹேரத், இலங்கையணிக்காக அதிக டெஸ்ட் விக்கெட்டுகளைக் கைப்பற்றியவர்களில் இரண்டாமிடத்துக்கு முன்னேறினார். இதுவரை காலமும் இரண்டாமிடத்திலிருந்த சமிந்த வாஸ் 355 விக்கெட்டுகளைக் கைப்பற்றியிருந்ததோடு, முதலாமிடத்திலுள்ள முத்தையா முரளிதரன், 795 விக்கெட்டுகளைக் கைப்பற்றியிருந்தார்.