Category Archives: News

3 அணிகளினதும் தலைவராக டு பிளெஸி

 

தென்னாபிரிக்க கிரிக்கெட் அணியின் டெஸ்ட், இருபதுக்கு-20 சர்வதேசப் போட்டி அணிகளின் தலைவரான ஃபப் டு பிளெஸி, ஒருநாள் சர்வதேசப் போட்டி அணியின் தலைவராகவும் நியமிக்கப்பட்டுள்ளார். இதன்மூலம், தென்னாபிரிக்காவின் 3 வகையான போட்டிகளின் தலைவராகவும் அவர் செயற்படவுள்ளார்.

 

இதுவரை காலமும் ஒருநாள் சர்வதேசப் போட்டி அணியின் தலைவராகக் காணப்பட்ட ஏபி டி வில்லியர்ஸ், அண்மையில் அப்பதவியிலிருந்து விலகியிருந்த நிலையிலேயே, ஃபப் டு பிளெஸி நியமிக்கப்பட்டுள்ளார்.

 

2013ஆம் ஆண்டிலிருந்து இருபதுக்கு-20 சர்வதேச அணியின் தலைவராகச் செயற்பட்டுவரும் டு பிளெஸி, டெஸ்ட் அணியின் தலைவராக, கடந்தாண்டு ஓகஸ்டில் நியமிக்கப்பட்டார்.

 

அடுத்த உலகக் கிண்ணத்துக்கு, இன்னமும் 20 மாதங்களே உள்ள நிலையில், அந்த உலகக் கிண்ணத்தில், தென்னாபிரிக்க அணிக்குத் தலைமை தாங்குபவராக, டு பிளெஸியே இருப்பார் என எதிர்பார்க்கப்படுகிறது.

 

தென்னாபிரிக்காவின் அடுத்த தொடர், பங்களாதேஷ் அணிக்கெதிராக இடம்பெறவுள்ளது. இத்தொடரில் 2 டெஸ்ட் போட்டிகள், 3 ஒருநாள் சர்வதேசப் போட்டிகள், 2 இருபதுக்கு-20 சர்வதேசப் போட்டிகள் ஆகியன இடம்பெறவுள்ளன. எனவே, 3 வகையான போட்டிகளுக்கும், இத்தொடரிலிருந்தே அவர் தலைமை தாங்க ஆரம்பிக்கவுள்ளார்.

 

டு பிளெஸியின் நியமனம் தொடர்பாகக் கருத்துத் தெரிவித்த, தென்னாபிரிக்க கிரிக்கெட் சபையின் பிரதம நிறைவேற்று அதிகாரி ஹரூன் லோகார்ட், "உலக கிரிக்கெட்டில், மிகச்சிறந்த தலைவர்களுள் ஒருவராக, அவர் தன்னை நிலைநிறுத்திக் கொண்டுள்ளார். தற்போது, பாகிஸ்தானில் வைத்து இருபதுக்கு-20 தொடரில் விளையாடிவரும் உலக பதினொருவர் அணியின் தலைவராக அவர் நியமிக்கப்பட்டமையிலிருந்து வெளியாகிறது" எனத் தெரிவித்தார்.

 

தென்னாபிரிக்க அணியின் புதிய பயிற்றுநராக, ஒட்டிஸ் கிப்ஸன் நியமிக்கப்பட்டுள்ள நிலையில், புதிய தலைவர், புதிய பயிற்றுநர் ஆகியவற்றுடன், தென்னாபிரிக்க அணி, அடுத்த உலகக் கிண்ணத்துக்கான தயார்படுத்தல்களை ஆரம்பிக்கவுள்ளது என்பது குறிப்பிடத்தக்கது.

டெஸ்ட் குழாமில் மகமதுல்லா

 

பங்களாதேஷ் அணியின் டெஸ்ட் குழாமுக்கு, அவ்வணியின் சகலதுறை வீரர் மகமதுல்லா, மீண்டும் அழைக்கப்பட்டுள்ளார். தென்னாபிரிக்க அணிக்கெதிரான 15 பேர் கொண்ட குழாமிலேயே அவர் இடம்பெற்றுள்ளார்.

 

டெஸ்ட் போட்டிகளிலிருந்து விடுப்பு வழங்கப்பட்ட ஷகிப் அல் ஹஸன், அவுஸ்திரேலியாவுக்கெதிரான தொடரில் பிரகாசிக்கத் தவறிய நசீர் ஹொஸைன் ஆகியோர், இக்குழாமில் சேர்க்கப்படவில்லை.

 

அவுஸ்திரேலியத் தொடரில் தடுமாறிய இம்ருல் கைய்ஸ், சௌமியா சர்க்கார் ஆகியோருக்கு, மீண்டுமொரு வாய்ப்பு வழங்கப்பட்டுள்ளது.

 

குழாம்: முஷ்பிக்கூர் ரஹீம், தமிம் இக்பால், சௌமியா சர்க்கார், இம்ருல் கைய்ஸ், சபீர் ரஹ்மான், மகமதுல்லா, லிட்டன் தாஸ், மெஹிடி ஹஸன், தைஜுல் இஸ்லாம், முஸ்தபிஸூர் ரஹ்மான், றூபெல் ஹொஸைன், ஷபியூல் இஸ்லாம், தஸ்கின் அஹமட், சுபாஷிஸ் றோய், மொமினுல் ஹக்.

மீண்டும் ஸ்டெய்ன்

 

தென்னாபிரிக்க அணியின் வேகப்பந்து வீச்சாளர் டேல் ஸ்டெய்ன், பங்களாதேஷ் அணிக்கு எதிராக இடம்பெறவுள்ள டெஸ்ட் தொடரில் பங்குபற்றுவதற்கான முயற்சிகளில் ஈடுபட்டுள்ளார்.

 

தோட்பட்டையில் என்பு முறிவு ஏற்பட்டமையின் காரணமாக, கடந்தாண்டு நவம்பரின் பின்பு கிரிக்கெட் போட்டிகளில் பங்குபற்றியிருக்காத ஸ்டெய்ன், கடந்த மாதத்திலேயே, உபாதையிலிருந்து குணமாகியிருந்தார்.
நீண்டகாலப் போட்டிகளில் பங்குபற்றியிருக்காத நிலையில், உள்ளூர்ப் போட்டிகளில் பங்குபற்றி, தனது உடற்றகுதியை நிரூபிக்க வேண்டியுள்ளது. இதனால், உள்ளூர் அணியான டைட்டன்ஸ் சார்பாக அவர் விளையாடவுள்ளார்.

 

உள்ளூர்த் தொடரின் முதற்சுற்றில் மாத்திரமே அவரால் விளையாட முடியுமென்பதோடு, அவரோடு இணைந்து ஃபப் டு பிளெஸி, மோர்னி மோர்க்கல், டீன் எல்கர், ஹெய்னோ குன் ஆகிய சர்வதேச வீரர்களும் விளையாடவுள்ளமை குறிப்பிடத்தக்கது.

வென்றது அவுஸ்திரேலியா

 

இந்தியாவின் சென்னையில், இன்று இடம்பெற்ற இந்திய கிரிக்கெட் சபை பதினொருவர் அணியுடனான பயிற்சிப் போட்டியில் 103 ஓட்டங்களால் அவுஸ்திரேலிய அணி வென்றுள்ளது.

 

குறித்த போட்டியின் நாணயச் சுழற்சியில் வெற்றிபெற்ற அவுஸ்திரேலிய அணியின் தலைவர் ஸ்டீவ் ஸ்மித், தமது அணி முதலில் துடுப்பெடுத்தாடும் என அறிவித்தார்.

 

அந்தவகையில், முதலில் துடுப்பெடுத்தாடிய அவுஸ்திரேலியா, 50 ஓவர்கள் முடிவில், 7 விக்கெட்டுகளை இழந்து 347 ஓட்டங்களைக் குவித்தது. துடுப்பாட்டத்தில், மார்க்கஸ் ஸ்டொய்னிஸ் 76 (60), ட்ரெவிஸ் ஹெட் 65 (63), டேவிட் வோணர் 64 (48), ஸ்டீவ் ஸ்மித் 55 (68), மத்தியூ வேட் 45 (24) ஓட்டங்களைப் பெற்றனர். பந்துவீச்சில், வொஷிங்டன் சுந்தர், குஷங் பட்டேல் ஆகியோர் தலா 2 விக்கெட்டுகளைக் கைப்பற்றினர்.

 

பதிக்கு, 348 ஓட்டங்கள் என்ற வெற்றியிலக்குடன் துடுப்பெடுத்தாடிய இந்திய கிரிக்கெட் சபை பதிவொருவர் அணி, 48.2 ஓவர்கள் முடிவில், சகல விக்கெட்டுகளையும் இழந்து 244 ஓட்டங்களைப் பெற்று 103 ஓட்டங்களால் தோல்வியடைந்தது. துடுப்பாட்டத்தில், ஶ்ரீவட்ஸ் கோஸ்வாமி 43 (54), மயங் அகர்வால் 42 (47), குஷங் பட்டேல் ஆட்டமிழக்காமல் 41 (48), அக்‌ஷய் கர்னேவார் 40 (28) ஓட்டங்களைப் பெற்றனர். பந்துவீச்சில், அஸ்தன் அகர் 4 விக்கெட்டுகளையும் கேன் றிச்சர்ட்ஸன் 2 விக்கெட்டுகளையும் கைப்பற்றினர்.

சுதந்திரக் கிண்ணம் இன்று ஆரம்பிகிறது

 

பாகிஸ்தான், உலகப் பதினொருவர் அணிகளுக்கிடையிலான மூன்று இருபதுக்கு-20 போட்டிகளைக் கொண்ட சுதந்திரக் கிண்ணத் தொடர், லாகூரின் கடாபி அரங்கில், இலங்கை நேரப்படி, இன்று இரவு 7.30 மணிக்கு ஆரம்பமாகவுள்ள முதலாவது போட்டியுடன் ஆரம்பிக்கின்றது.

 

2009ஆம் ஆண்டு இலங்கை கிரிக்கெட் அணி பயணம் செய்த பஸ் மீது தாக்குதல் மேற்கொள்ளப்பட்டதைத் தொடர்ந்து, பாகிஸ்தானுக்கு சர்வதேச அணிகள் செல்லாத நிலையில், 2015ஆம் ஆண்டு சிம்பாப்வே மட்டும் சென்றிருந்ததுடன், பாகிஸ்தான் சுப்பர் லீக்கின் இறுதிப் போட்டி இவ்வாண்டு லாகூர் மைதானத்தில் இடம்பெற்றிருந்தது. அப்போட்டியில் சில சர்வதேச வீரர்கள் பங்கேற்றிருந்தனர்.

 

இந்நிலையிலேயே, சர்வதேச கிரிக்கெட்டை பாகிஸ்தானுக்கு மீண்டும் கொண்டு வரும் நோக்கிலேயே, குறித்த சுதந்திரக் கிண்ணத் தொடர் ஏற்பாடு செய்யப்பட்டுள்ளது.

 

இத்தொடரில், இங்கிலாந்து, அவுஸ்திரேலிய, நியூசிலாந்து, தென்னாபிரிக்க, மேற்கிந்தியத் தீவுகள், பங்களாதேஷ், இலங்கை அணி வீரர்கள், உலகப் பதினொருவர் அணிக்காக விளையாடவுள்ளனர். உலகப் பதினொருவர் அணி, தென்னாபிரிக்க அணியின் டெஸ்ட், இருபதுக்கு சர்வதேசப் போட்டிகளுக்கான தலைவர் பப் டு பிளெசியால் தலைமை தாங்கப்படுவதோடு, ஹஷிம் அம்லா, டரன் சமி, போன்றோரை உள்ளடக்கியுள்ளது.

 

இத்தொடரில் பங்கேற்கும் பாகிஸ்தான் குழாம், ஹஸன் அலி, மொஹமட் ஆமிர் எனப் பலமான வேகப்பந்து வீச்சு வரிசையைக் கொண்டிருப்பதுடன், ஷடாப் கான், மொஹமட் நவாஸ், இமாட் வசீம் என திறமையான சுழற்பந்துவீச்சாளர்களையும் கொண்டிருக்கின்றது. ஆக, அண்மைய வரவான பக்கார் ஸமனின் அதிரடியோடு, ஷோய்ப் மலிக், அணித்தலைவர் ஷப்ராஸ் அஹமட் ஆகியோரின் அனுபவம் கைகொடுக்கும் சந்தர்ப்பத்தில், உலகப் பதினொருவர் அணியை இலகுவாக வீழ்த்தக்கூடிய வாய்ப்பைக் கொண்டிருக்கிறது.

 

எவ்வாறெனினும், இத்தொடரின் முடிவுகளைத் தாண்டி, எவ்விதத் தடங்கலுமின்றி இத்தொடர் முழுமையாக நடைபெறுமிடத்து, அடுத்த மாதம் நடைபெறத் திட்டமிடப்பட்டுள்ள இலங்கை அணிக்கெதிரான இருபதுக்கு – 20 சர்வதேசப் போட்டி உட்பட வேறு சர்வதேசப் போட்டிகள் நடைபெறுவதற்கான முன்னுதாரணமாக அமையும் என எதிர்பார்க்கப்படுகிறது.

முன்னாள் வீரர்களை அணுகும் இலங்கை

 

இலங்கை கிரிக்கெட் அணியின் அண்மைய மோசமான செயற்பாடுகளைத் தொடர்ந்து, முன்னாள் வீரர்களான மஹேல ஜெயவர்தன, அரவிந்த டி சில்வா, றொஷான் மஹாநாம, பிரெண்டன் குருப்பு, கிறேமி லப்றோய் ஆகியோருடன் இணைந்து செயற்பட இலங்கை கிரிக்கெட் சபை எதிர்பார்த்துள்ளது.

 

இலங்கை கிரிக்கெட் சபை குறித்து மோசமான விமர்சனங்கள் முன்வைக்கப்படும் நிலையிலேயே, அதனை எதிர்கொள்ளும் விதமாகவே முன்னாள் வீரர்கள் அணுகப்படுகின்றனர். எவ்வாறெனினும் மேற்குறிப்பிட்ட முன்னாள் வீரர்கள் இலங்கை கிரிக்கெட் சபையுடன் இணைகின்றனரா என்பது சந்தேகத்துக்கிடமானதொன்றாகவே இருக்கின்றது.

 

மேற்குறிப்பிட்ட முன்னாள் வீரர்களில், லப்ரோயும் குருப்பும் மட்டுமே, இலங்கை கிரிக்கெட் சபை தம்மை அணுகியதை உறுதிப்படுத்தியுள்ள நிலையில், தான் இன்னும் அணுகப்படவில்லை என மஹாநாம தெரிவித்துள்ளார்.

முதலிடத்தில் அன்டர்சன்

 

சர்வதேச கிரிக்கெட் சபையின் டெஸ்ட் போட்டிகளுக்கான பந்துவீச்சாளர்களின் தரப்படுத்தலில், இங்கிலாந்து அணியின் வேகப்பந்துவீச்சாளர் ஜேம்ஸ் அன்டர்சன் முதலிடத்துக்கு முன்னேறியுள்ளார்.

 

35 வயதான ஜேம்ஸ் அன்டர்சன், 2009ஆம் ஆண்டு முத்தையா முரளிதரன் முதலிடம் பெற்ற பின்னர் முதலிடத்தைப் பிடிக்கும் வயதான பந்துவீச்சாளர் என்பதுடன், 2006ஆம் ஆண்டு கிளென் மக்ராத் முதலிடம் பெற்ற பின்னர் முதலிடத்தைப் பிடிக்கும் வயதான வேகப்பந்துவீச்சாளராவர்.

 

இதேவேளை, டெஸ்ட் போட்டிகளுக்கான சகலதுறை வீரர்களுக்கான தரப்படுத்தலில், மொயின் அலியை முந்தி, பென் ஸ்டோக்ஸ் நான்காமிடத்தைப் பிடித்துள்ளார். இதுதவிர, பந்துவீச்சாளர்களுக்கான தரவரிசையிலும் இரண்டு இடங்கள் முன்னேறி 21ஆவது இடத்தை பென் ஸ்டோக்ஸ் பிடித்துள்ளார்.

ஆஸிக்கெதிரான இந்தியக் குழாம் அறிவிப்பு

 

இந்திய, அவுஸ்திரேலிய அணிகளுக்கிடையிலான முதல் மூன்று ஒருநாள் சர்வதேசப் போட்டிகளுக்கான இந்தியக் குழாம் அறிவிக்கப்பட்டுள்ளது. அறிவிக்கப்பட்டுள்ள இக்குழாமிலும் இரவீந்திர ஜடேஜா, இரவிச்சந்திரன் அஷ்வின் ஆகியோருக்கு ஓய்வளிக்கப்பட்டுள்ள நிலையில், மொஹமட் ஷமி, உமேஷ் யாதவ் ஆகியோர் அறிவிக்கப்பட்டுள்ள குழாமில் இடம்பெற்றுள்ளனர்.

 

குழாம்: விராத் கோலி (அணித்தலைவர்), ரோஹித் ஷர்மா, ஷீகர் தவான், லோகேஷ் ராகுல், மனீஷ் பாண்டே, கேதார் யாதவ், அஜின்கியா ரஹானே, மகேந்திர சிங் டோணி (விக்கெட் காப்பாளர்), ஹர்டிக் பாண்டியா, அக்ஸார் பட்டேல், குல்தீப் யாதவ், யுஸ்வேந்திர சஹால், ஜஸ்பிரிட் பும்ரா, புவ்னேஷ்வர் குமார், உமேஷ் யாதவ், மொஹமட் ஷமி

சம்பியனானது ட்ரின்பாகோ நைட் றைடர்ஸ்

 

மேற்கிந்தியத் தீவுகளின் உள்ளூர் இருபதுக்கு – 20 தொடரான கரீபியன் பிறீமியர் லீக்கின் இறுதிப் போட்டியில் கெவோன் கூப்பர் அதிரடி காட்ட ட்ரின்பாகோ றைட் றைடர்ஸ் சம்பியனானது.

 

இலங்கை நேரப்படி, இன்று காலை இடம்பெற்ற குறித்த போட்டியின் நாணயச் சுழற்சியில் வென்ற ட்ரின்பாகோ நைட் றைடர்ஸ் அணியின் தலைவர் டுவைன் பிராவோ, சென். கிட்ஸ் அன்ட் நெவிஸ் பற்றியோட்ஸ் அணியை முதலில் துடுப்பெடுத்தாடப் பணித்தார்.

 

அந்தவகையில், முதலில் துடுப்பெடுத்தாடிய பற்றியோட்ஸ், தமது இனிங்ஸின் இறுதி ஓவர்களில், கார்லோஸ் பிறத்வெய்ட், மொஹமட் நபி ஆகியோர் அதிரடியாகப் பெற்ற ஓட்டங்கள் காரணமாக, 20 ஓவர்களில், 6 விக்கெட்டுகளை இழந்து, ஓரளவு நிதானமான 135 ஓட்டங்களைப் பெற்றது.

 

துடுப்பாட்டத்தில், கார்லோஸ் பிறத்வெய்ட் ஆட்டமிழக்காமல் 30 (25), ஜொனதன் கார்ட்ட்டர் 21 (30), பிரெண்டன் கின் 19 (21) மொஹமட் நபி ஆட்டமிழக்காமல் 18 (05), டெவொன் தோமஸ் 17 (09), எவின் லூயிஸ் 16 (16) ஓட்டங்களைப் பெற்றனர். பந்துவீச்சில், கெவோன் கூப்பர், ஜெவோன் சியேர்ள்ஸ் ஆகியோர் தலா 2 விக்கெட்டுகளையும் சுனில் நரைன், றொன்ஸ்ஃபோர்ட் பீட்டன் ஆகியோர் தலா ஒவ்வொரு விக்கெட்டையும் கைப்பற்றினர்.

 

பதிலுக்கு, 136 ஓட்டங்களை என்ற வெற்றியிலக்குடன் துடுப்பெடுத்தாடிய நைட்றைடர்ஸ், ஒரு கட்டத்தில், 90 ஓட்டங்களுக்கு 7 விக்கெட்டுகளை இழந்து, 13 பந்துகளில் 28 ஓட்டங்களைப் பெறவேண்டி இருந்தபோதும் கெவோன் கூப்ப்பரின் அதிரடி காரணமாக 19 ஓவர்களில் வெற்றியிலக்கை அடைந்தது.

 

துடுப்பாட்டத்தில், கெவோன் கூப்பர் ஆட்டமிழக்காமல் 29 (14), கொலின் மன்றோ 29 (23), டினேஷ் ராம்டீன் ஆட்டமிழக்காமல் 26 (31) ஓட்டங்களைப் பெற்றனர். பந்துவீச்சில், மொஹமட் ஹபீஸ், தப்ரையஸ் ஷம்சி, ஷெல்டன் கோட்ரல் ஆகியோர் தலா 2 விக்கெட்டுகளை வீழ்த்தினர்.

 

இறுதிப் போட்டியின் நாயகனாக, கெவோன் கூப்பர் தெரிவானதோடு, தொடரின் நாயகனாக சட்விக் வோல்டன் தெரிவானார்.

இலங்கைக்கு முதலாவது பகலிரவு டெஸ்ட்

 

ஐக்கிய அரபு அமீரகத்தில் இடம்பெறவுள்ள பாகிஸ்தானுக்கெதிரான இரண்டு போட்டிகள் கொண்ட டெஸ்ட் தொடரில், டுபாயில், தமது முதலாவது பகலிரவு டெஸ்ட் போட்டியை இலங்கை கிரிக்கெட் அணி விளையாடவுள்ளது.

 

குறித்த தொடரின் முதலாவது போட்டி, அபுதாபியில் இம்மாதம் 28ஆம் திகதி இடம்பெறவுள்ளதுடன், பகலிரவு டெஸ்ட், அடுத்த மாதம் ஆறாம் திகதி இடம்பெறவுள்ளது.

 

டெஸ்ட் தொடரைத் தொடர்ந்து, ஐந்து போட்டிகளைக் கொண்ட ஒருநாள் சர்வதேசப் போட்டித் தொடரும் மூன்று போட்டிகளைக் கொண்ட இருபதுக்கு – 20 சர்வதேசப் போட்டித் தொடரும் இடம்பெறவுள்ளது.

 

பாதுகாப்பு அனுமதி கிடைக்கும் பட்சத்தில், மூன்றாவது இருபதுக்கு – 20 சர்வதேசப் போட்டி, பாகிஸ்தானின் லாகூரில் இடம்பெறவுள்ளது.