All posts by Gopikrishna Kanagalingam

இப்போது நான் சிறந்த வீரர்: முபாரக்

முன்பை விட தற்போது தான் சிறந்த வீரராக இருப்பதாக இலங்கை அணியின் துடுப்பாட்ட வீரர் ஜெஹான் முபாரக் தெரிவித்துள்ளார்.

 

இலங்கை அணி சார்பாக இதற்கு முன்பு 10 டெஸ்ட் போட்டிகளிலும் 40 ஒருநாள் சர்வதேசப் போட்டிகளிலும் 16 இருபதுக்கு இருபது போட்டிகளிலும் பங்குபற்றியிருந்த ஜெஹான் முபாரக், அப்போட்டிகளில் போதுமான திறமையை வெளிப்படுத்தியிருக்கவில்லை. இதன் காரணமாக அவருக்கு சர்வதேச அணியில் நீண்டகாலமாக வாய்ப்புக்கள் கிடைத்திருக்கவில்லை.

 

இந்நிலையில் உள்ளூர்ப் போட்டிகளில் வெளிப்படுத்திய திறமைகள் காரணமாக, குமார் சங்கக்காரவின் இடத்துக்கு பாகிஸ்தானுக்கெதிரான மூன்றாவது போட்டியில் அவருக்கு வாய்ப்பு வழங்கப்பட்டிருந்தது.

 

இது தொடர்பாகக் கருத்துத் தெரிவித்த ஜெஹான் முபாரக், தனக்கு முன்னரே வாய்ப்புகள் வழங்கப்பட்டிருந்தாலும், எந்த வகையிலான போட்டியிலும் அணியில் தனது இடத்தைத் தக்க வைக்குமளவிற்கு பெறுபேறுகளை வெளிப்படுத்தியிருக்கவில்லை எனக் குறிப்பிட்டார்.

 

எனினும், ஏழு வருடங்களுக்கு முன்பிருந்ததை விட, தற்போது தான் சிறந்த வீரராக இருப்பதாகத் தெரிவித்த அவர், தன்னிடம் காணப்பட்ட பலவீனங்களை கழகப் போட்டிகளின் போது நிவர்த்தி செய்ததாகக் குறிப்பிட்டார்.

 

இந்தப் போட்டியின் இரண்டு இனிங்ஸ்களிலும் கடினமான சூழ்நிலையின் கீழ் துடுப்பெடுத்தாடக் களமிறங்கி, ஆரம்ப நிலையில் கடினமான உழைத்த பின்னர் ஆட்டமிழந்தமை ஏமாற்றமளிப்பதாக அவர் தெரிவித்தார்.

பங்களாதேஷ் – தென்னாபிரிக்கா இன்று

பங்களாதேஷுக்குக் கிரிக்கெட் சுற்றுப்பயணம் மேற்கொண்டுள்ள தென்னாபிரிக்க அணிக்கும் பங்களாதேஷ் அணிக்குமிடையிலான இரண்டு இருபதுக்கு இருபது போட்டிகள் கொண்ட தொடரின் முதலாவது போட்டி இன்றைய தினம் இடம்பெறவுள்ளது.

 

மிர்புர் ஷேரே பங்களா தேசிய விளையாட்டரங்கில் இடம்பெறவுள்ள இப்போட்டி, இலங்கை நேரப்படி இன்று நண்பகல் 12.30 மணிக்கு ஆரம்பிக்கவுள்ளது.

 

மஷ்ரபி மோர்தஷா தலைமையிலான பங்களாதேஷ் அணி அண்மைக்காலமாக பங்களாதேஷில் வைத்து சிறப்பான பெறுபேறுகளை வெளிப்படுத்தி வரும் நிலையில், இந்தப் போட்டியையும் நம்பிக்கையுடன் எதிர்கொள்கிறது.

 

மறுபுறத்தில், உலகக்கிண்ணத்துக்குப் பின்னர் போட்டிகளில் பங்குபற்றாது ஓய்வில் காணப்பட்ட தென்னாபிரிக்க அணி, ஃபப் டு பிளெஸிஸ் தலைமையில் உற்சாகத்துடன் களமிறங்கவுள்ளது.

 

இருபதுக்கு இருபது தரப்படுத்தலில் தென்னாபிரிக்கா 6ஆவது இடத்திலும் பங்களாதேஷ் 9ஆவது இடத்திலும் காணப்படுகின்றன. இத்தொடரை 2-0 என்ற கணக்கில் பங்களாதேஷ் வெற்றிகொள்ளுமாயின், பங்களாதேஷின் தரப்படுத்தல் இடம் மாறாது என்பதோடு, தென்னாபிரிக்க அணி 8ஆவது இடத்துக்குத் தள்ளப்படும்.

 

மறுபுறத்தில், இத்தொடரை தென்னாபிரிக்கா 2-0 என்ற கணக்கில் வெற்றிகொள்ளுமாயின் இரு அணிகளின் தரப்படுத்தல் இடங்களில் மாற்றமேற்படாது. இத்தொடர் 1-1 என்ற கணக்கில் நிறைவடையுமாயின், தென்னாபிரிக்க 7ஆவது இடத்துக்குப் பின்தள்ளப்படும்.

 

எதிர்பார்க்கப்படும் அணிகள்:

பங்களாதேஷ்: தமிம் இக்பால், லிற்றன் தாஸ், சௌமியா சர்கார், ஷகிப் அல் ஹசன், முஷ்பிகூர் ரஹீம், சபீர் ரஹ்மான், நசீர் ஹொசைன், சொஹக் கஸி, மஷ்ரபி மோர்தஷா, முஸ்தபிஸுர் ரஹ்மான், அரஃபாத் சணி.


தென்னாபிரிக்கா: குயின்டன் டீ கொக், றீலி றொஸோ, ஏபி.டி. வில்லியர்ஸ், ஃபப் டு பிளெஸிஸ், டேவிட் வில்லர், ஜேபி டுமினி, டேவிட் வியஸ், வெய்ன் பார்னெல், கைல் அபொட், ககிசோ றபடா, ஆரொன் ஃபங்கிசோ.

பாகிஸ்தான் தடுமாற்றம்

இலங்கைக்குக் கிரிக்கெட் சுற்றுப்பயணம் மேற்கொண்டுள்ள பாகிஸ்தான் அணிக்கும் இலங்கை அணிக்குமிடையிலான 3 போட்டிகள் கொண்ட டெஸ்ட் தொடரின் மூன்றாவதும் இறுதியுமான போட்டியின், இரண்டாம் நாள் முடிவில் இலங்கை அணி முன்னிலையைப் பெற்றுள்ளது.

 

தனது முதலாவது இனிங்ஸில் துடுப்பெடுத்தாடிவரும் பாகிஸ்தான் அணி, இரண்டாம் நாள் ஆட்ட முடிவில், 9 விக்கெட்டுக்களை இழந்து 209 ஓட்டங்களுடன் தடுமாறி வருகிறது.

 

முதலாவது விக்கெட்டை 32 ஓட்டங்களுக்கு இழந்த அவ்வணி, 3 விக்கெட்டுக்களை இழந்து 45 ஓட்டங்களுடன் தடுமாறியதோடு, 7 விக்கெட்டுக்களை இழந்து 152 ஓட்டங்களுடன் காணப்பட்டது. ஆனால் சப்ராஸ் அஹமட் போராடி, அவ்வணி 200 ஓட்டங்களைப் பெறுவதை உறுதி செய்தார்.

 

துடுப்பாட்டத்தில் பாகிஸ்தான் அணி சார்பாக சப்ராஸ் அஹமட் ஆட்டமிழக்காமல் 72 ஓட்டங்களையும் அஸார் அலி 52 ஓட்டங்களையும், அஹமட் ஷெஷாத் 21 ஓட்டங்களையும் பெற்றனர்.

 

பந்துவீச்சில் இலங்கை அணி சார்பாக நுவான் பிரதீப், தம்மிக்க பிரசாத் இருவரும் தலா 3 விக்கெட்டுக்களையும் தரிந்து கௌஷால் 2 விக்கெட்டுக்களையும் கைப்பற்றினர்.

 

முன்னதாக, 8 விக்கெட்டுக்களை இழந்து 272 ஓட்டங்களுடன் இன்றைய இரண்டாம் நாளை ஆரம்பித்த இலங்கை அணி, 278 ஓட்டங்களுக்குச் சகல விக்கெட்டுக்களையும் இழந்தது.

றயன் ஹரிஸ் அதிர்ச்சி ஓய்வு

சர்வதேசப் போட்டிகளிலிருந்து உடனடியாக அமுலுக்கு வரும் வகையில் ஓய்வுபெறுவதாக, அவுஸ்திரேலியாவின் வேகப்பந்து வீச்சாளர் றயன் ஹரிஸ் அறிவித்துள்ளார். 

 

இங்கிலாந்தில் ஆரம்பிக்கவுள்ள ஆஷஸ் தொடருக்கான அவுஸ்திரேலிய குழாமில் சேர்க்கப்பட்டிருந்த 35 வயதான றயன் ஹரிஸ், அத்தொடரின் முதலாவது பயிற்சிப் போட்டியில் பங்குபற்றியிருந்ததோடு, இரண்டாவது பயிற்சிப் போட்டிக்கு முன்னதாக உபாதைக்குள்ளானார்.

 

அவருக்கு நீண்ட காலமாக வலது முழங்காலில் காணப்பட்ட உபாதையில், புதிதாக உபாதை ஏற்பட்டுள்ளதாக மருத்துவ பரிசோதனைகள் வெளிப்படுத்தியிருந்தன. இதன் காரணமாக அவர் ஆஷஸ் தொடர் முழுவதிலும் பங்குபற்றமுடியாத நிலை ஏற்பட்டது.

 

இந்நிலையிலேயே, சர்வதேசப் போட்டிகளிலிருந்து உடனடியாக அமுலுக்கு வருமாறு தனது ஓய்வை அவர் அறிவித்துள்ளார்.

 

அவுஸ்திரேலியா சார்பாக 27 டெஸ்ட் போட்டிகளில் பங்குபற்றிய ஹரிஸ், 23.52 என்ற சராசரியில் 113 விக்கெட்டுக்களைக் கைப்பற்றியதோடு, 3 அரைச்சதங்கள் உள்ளடங்கலாக 21.53 என்ற சராசரியில் 603 ஓட்டங்களைப் பெற்றிருந்தார். தவிர, 21 ஒருநாள் சர்வதேசப் போட்டிகளில் 44 விக்கெட்டுக்களையும், 3 இருபதுக்கு இருபது போட்டிகளில் 4 விக்கெட்டுக்களையும் அவர் கைப்பற்றியிருந்தார்.

 

ஆஷஸ் தொடருக்காக, றயன் ஹரிஸின் இடத்தில் இளம் வீரர் பற் கமின்ஸ் சேர்க்கப்பட்டுள்ளார்.

நீதிமன்றில் ஜேம்ஸ் ஃபோக்னர்

அவுஸ்திரேலிய அணியின் சகலதுறை வீரர் ஜேம்ஸ் ஃபோக்னர், எதிர்வரும் 21ஆம் திகதி இங்கிலாந்திலுள்ள நீதிமன்றில் ஆஜராகவுள்ளார். குடித்துவிட்டு வாகனமோட்டியதன் காரணமாக அவர் மீது குற்றஞ்சாட்டப்பட்டுள்ளது.

 

இங்கிலாந்தின் லங்காஷையர் பிராந்திய அணிக்காக விளையாடிவரும் ஜேம்ஸ் ஃபோக்னர், நேற்றைய தினம் இரவு பொலிஸாரால் குற்றஞ்சாட்டப்பட்டார்.

 

பொலிஸார் அவரை அணுகி சோதனையிட்ட போது, அவரது குருதியில் 100 மைக்ரோகிராம்கள் அல்ககோல் காணப்பட்டிருந்தது. இது ஐக்கிய இராச்சியத்தில் அனுமதிக்கப்பட்ட அளவை விட கிட்டத்தட்ட இரண்டு மடங்காகும்.

 

இதனையடுத்து குற்றஞ்சாட்டப்பட்ட அவர், பிணையில் விடுவிக்கப்பட்டதுடன், எதிர்வரும் ஜூலை 21ஆம் திகதி நீதிமன்றில் ஆஜராக உத்தரவிடப்பட்டுள்ளது.

 

சட்ட நடவடிக்கைகளை விட, அவுஸ்திரேலிய கிரிக்கெட் சபையின் ஒழுக்கவிதிகளை மீறியமைக்கான நடவடிக்கைகளையும் எதிர்கொள்ளவுள்ளார்.

 

தனது நடவடிக்கைகளுக்காக மன்னிப்புக் கோரிய அவர், தனது நடவடிக்கைகளுக்காக சாக்குப் போக்குத் தெரிவிக்க விரும்பவில்லை எனவும், எடுக்கப்படவுள்ள சட்ட நடவடிக்கைகளையும் ஒழுங்கு நடவடிக்கைகளையும் ஏற்றுக் கொள்வதாகவும் தெரிவித்துள்ளார்.

பாகிஸ்தான் முன்னிலையில்

இலங்கைக்குக் கிரிக்கெட் சுற்றுப்பயணம் மேற்கொண்டுள்ள பாகிஸ்தான் அணிக்கும் பாகிஸ்தான் அணிக்குமிடையிலான 3 போட்டிகள் கொண்ட டெஸ்ட் தொடரின் மூன்றாவதும் இறுதியுமான போட்டியின் முதல் நாளில், பாகிஸ்தான் அணி முன்னிலை பெற்றுள்ளது.

 

பல்லேகல்ல சர்வதேச கிரிக்கெட் மைதானத்தில் இடம்பெற்றுவரும் இப்போட்டியில் நாணயச்சுழற்சியில் வெற்றிபெற்ற பாகிஸ்தான் அணி முதலில் பந்துவீசத் தீர்மானித்தது.

 

இதன்படி முதலில் துடுப்பெடுத்தாடிய இலங்கை அணி, இன்றைய நாள் ஆட்ட முடிவில் 8 விக்கெட்டுக்களை இழந்து 272 ஓட்டங்களைப் பெற்றுள்ளது.

 

முதலாவது விக்கெட்டை 15 ஓட்டங்களுக்கே இழந்த இலங்கை அணி சார்பாக, இரண்டாவது விக்கெட்டுக்காக 91 ஓட்டங்கள் பகிரப்பட்டன.  ஐந்தாவது விக்கெட்டுக்காக 67 ஓட்டங்கள் பகிரப்பட்டு, 4 விக்கெட்டுக்களை இழந்து 204 ஓட்டங்களுடன் காணப்பட்ட போதிலும், அதன் பின்னர் விக்கெட்டுக்கள் வீழ்த்தப்பட்டிருந்தன.

 

துடுப்பாட்டத்தில் திமுத் கருணாரத்ன 130 ஓட்டங்களையும் உபுல் தரங்க 46 ஓட்டங்களையும் ஜெஹான் முபாரக் 25 ஓட்டங்களையும் தினேஷ் சந்திமால் 24 ஓட்டங்களையும் பெற்றனர்.

 

பந்துவீச்சில் பாகிஸ்தான் அணி சார்பாக யசீர் ஷா 4 விக்கெட்டுக்களையும் அஸார் அலி, றஹாத் அலி இருவரும் தலா 2 விக்கெட்டுக்களையும் கைப்பற்றினர்.

 

ஏற்கனவே முடிவடைந்துள்ள 2 போட்டிகளில் இரு அணிகளும் தலா ஒரு போட்டியில் வெற்றிபெற்றுள்ளமை குறிப்பிடத்தக்கது.

பாகிஸ்தான் குழாம் அறிவிப்பு

இலங்கைக்கும் பாகிஸ்தானுக்குமிடையிலான ஐந்து போட்டிகள் கொண்ட ஒருநாள் சர்வதேசப் போட்டித் தொடருக்கான பாகிஸ்தான் குழாம் அறிவிக்கப்பட்டுள்ளது.

 

அஸார் அலி தலைமையிலான 16 பேர் கொண்ட குழாமாக இது அறிவிக்கப்பட்டுள்ளது.

 

அறிவிக்கப்பட்டுள்ள குழாமில், கடந்த தொடரில் இடம்பெற்றிருந்த ஹமாட் அஸாம், ஜுனைட் கான், மொஹமட் சமி ஆகியோர் நீக்கப்பட்டுள்ளனர். தவிர, வஹாப் றியாஸ், ஹரிஸ் சொஹைல் ஆகியோர் உபாதைகள் காரணமாக இக்குழாமில் இடம்பெறவில்லை.

 

உலகக்கிண்ணத்தின் போது ஏற்பட்ட உபாதை காரணமாக போட்டிகளில் பங்குபற்றாதிருந்த வேகப்பந்து வீச்சாளர் மொஹமட் இர்பான் இக்குழாமில் சேர்க்கப்பட்டுள்ளார்.

 

இரு அணிகளுக்குமிடையிலான தொடரின் முதலாவது போட்டி இம்மாதம் 11ஆம் திகதி ஆரம்பிக்கவுள்ளது.

 

அறிவிக்கப்பட்டுள்ள குழாம்:
அஸார் அலி, அஹமட் ஷெஷாத், மொஹமட் ஹபீஸ், முக்தர் அஹமட், அசத் ஷபீக், சொய்ப் மலிக், மொஹமட் றிஸ்வான், பாபர் அஸாம், சப்ராஸ் அஹமட், யசீர் ஷா, பிலாவல் ஆசிஃப், இமாட் வசீம், அன்வர் அலி, மொஹமட் இர்பான், றஹாத் அலி.

தென்னாபிரிக்காவை எச்சரித்த பங்களாதேஷ்

பங்களாதேஷுக்குக் கிரிக்கெட் சுற்றுப்பயணம் மேற்கொண்டுள்ள தென்னாபிரிக்க அணி, அங்கு வைத்து பங்களாதேஷ் பாதுகாப்புப் பிரிவினரால் எச்சரிக்கப்பட்டுள்ளது. 

 

தென்னாபிரிக்க அணி பயிற்சிகளில் ஈடுபட்டிருந்த போது, அதைப் படமெடுப்பதற்காக தென்னாபிரிக்க அணியின் ஊடகப் பிரிவினர் பயன்படுத்திய "ட்ரோன்" கருவி தொடர்பாகவே சர்ச்சை எழுந்திருந்தது.

 

பங்களாதேஷின் விதிகளின் படி, ஆட்களற்ற பறக்கும் கருவிகள் அந்நாட்டு வானில் பறப்பது தடை செய்யப்பட்டுள்ளது. இதன்படி, படமெடுப்பதற்காகப் பயன்படுத்தப்படும் "ட்ரோன்"களும் அனுமதியற்றுப் பறக்க முடியாது.

 

இந்நிலையில், தென்னாபிரிக்க அணியின் ஊடகப் பிரிவினர் பயன்படுத்திய "ட்ரோன்" கருவியைப் பார்வையிட்ட பங்களாதேஷ் கிரிக்கெட் சபை, அந்நாட்டின் விதி தொடர்பாகக் குறிப்பிட்டது.

 

இதனையடுத்து, குறித்த சம்பவத்துக்காக தென்னாபிரிக்க கிரிக்கெட் சபை மன்னிப்புக் கோரியுள்ளது.

குற்றச்சாட்டுக்களை மறுக்கிறார் பிராவோ

இந்தியன் பிறீமியர் லீக் போட்டிகளின் போது, சூதாடி ஒருவரிடமிருந்து பணத்தைப் பெற்றுக் கொண்டார் என்று எழுப்பப்பட்ட குற்றச்சாட்டுக்களை, சென்னை சுப்பர் கிங்ஸ், மேற்கிந்தியத் தீவுகள் அணிகளின் வீரர் டுவைன் பிராவோ மறுத்துள்ளார்.
 

சென்னை சுப்பர் கிங்ஸ் அணியின் வீரர்களான சுரேஷ் ரெய்னா, ரவீந்திர ஜடேஜா, டுவைன் பிராவோ ஆகியோர் சூதாடி ஒருவரிடமிருந்து பணங்களையோ அல்லது வேறு வகையான பரிசுகளைப் பெற்றுள்ளதாக, சர்வதேச கிரிக்கெட் சபையின் நிறைவேற்றுப் பணிப்பாளர் டேவ் றிச்சர்ட்ஸனிடம் ஐ.பி.எல் இன் முன்னாள் பணிப்பாளரான லலித் மோடி 2013ஆம் ஆண்டு முறையிட்டிருந்த தகவல் வெளியானதைத் தொடர்ந்து, சர்ச்சைகள் ஏற்பட்டிருந்தன.
 

கிரிக்கெட்டை எப்போதும் நீதியாகவும் நேர்மையாகவும் தூய்மையாகவும் விளையாடியிருப்பதாகத் தெரிவித்த டுவைன் பிராவோ, கிரிக்கெட்டை தான் மிகவும் நேசிப்பதாகவும் ஏராளமானவற்றை அது தனக்கு வழங்கியிருப்பதாகவும் தெரிவித்ததோடு, தனது விளையாட்டையோ அல்லது விளையாட்டு வாழ்வையோ குழப்பும் வகையான எந்தவொரு விடயத்திலும் ஈடுபட மாட்டார் எனக் குறிப்பிட்டார்.
 

குறித்த மூவர் தொடர்பாக லலித் மோடி முறையிட்டிருந்த தகவல் வெளியானதும், அது தொடர்பாக வழக்கமான நடைமுறைகளின் அடிப்படையில் நடவடிக்கை எடுக்கப்பட்டதாக சர்வதேச கிரிக்கெட் சபை தெரிவித்ததோடு, அவர்கள் மூவர் தொடர்பாக சர்வதேச கிரிக்கெட் சபை தங்களிடம் அறிக்கை சமர்ப்பிக்காததன் காரணமாக, அவர்கள் குற்றமற்றவர்கள் என்று முடிவு செய்யப்பட்டதாக இந்திய கிரிக்கெட் கட்டுப்பாட்டுச் சபை தெரிவித்திருந்தமை குறிப்பிடத்தக்கது.

அமெரிக்கா மீது ஐசிசி விமர்சனம்

ஐக்கிய அமெரிக்க கிரிக்கெட் சபையின் தேர்வுக் கொள்கைகளையும் வீரர்களை நடாத்தும் விதத்தையும் சர்வதேச கிரிக்கெட் சபை விமர்சித்துள்ளது. சர்வதேச கிரிக்கெட் சபையின் ஊழலுக்கெதிரான பிரிவுக்குக் கிடைத்த முறைப்பாட்டின் பின்னரே இந்த விமர்சனம் முன்வைக்கப்பட்டுள்ளது.
 

கடந்த வாரம் பார்படோஸில் இடம்பெற்ற சர்வதேச கிரிக்கெட் சபையின் வருடாந்த மாநாட்டில் ஐக்கிய அமெரிக்க கிரிக்கெட் சபையினை தடை செய்த நிலையிலேயே, தற்போது புதிய தகவல்கள் கிடைக்கப்பெற்றுள்ளன.
 

19 வயதுக்குட்பட்ட தேசிய அணியின் தெரிவில் 7 வீரர்கள் முறைகேடான முறையில் தெரிவு செய்யப்பட்டதாகவும், அவர்களுக்குப் பதிலாக, தெரிவுக்கான தகுதிகளையுடைய வீரர்கள் தெரிவுசெய்யப்பட வேண்டும் எனக் கோரி, தெரிவு செய்யப்படாத வீரரொருவரின் பெற்றோர் சர்வதேச கிரிக்கெட் சபையின் ஊழலுக்கெதிரான பிரிவுக்கு வழங்கிய முறைப்பாட்டின் பேரிலேயே விசாரணைகள் மேற்கொள்ளப்பட்டுள்ளன.
 

அந்த அறிக்கையில், பயிற்றுவிப்பாளர்கள் முறையான முறையில் தெரிவு செய்யப்படாமை குறித்தும் விமர்சனங்கள் முன்வைக்கப்பட்டுள்ளன.
 

அத்தோடு, வீரர்கள் சரியான முறையில் கவனிக்கப்படவில்லை எனவும், அமெரிக்காவிலும் வெளிநாடுகளிலும் இடம்பெற்ற சர்வதேச கிரிக்கெட் சபையின் தொடர்களில், வீரர்களுக்கான காப்பீடுகளை வழங்குவதற்கு அச்சபை தவறிவிட்டதாகவும் சுட்டிக்காட்டப்பட்டுள்ளது.