இலங்கை, மேற்கிந்திய ஒ.நா தொடர் முன்னோட்டம்

 

இலங்கை,மேற்கிந்திய தீவுகள் அணிகளுக்கிடையிலான ஒரு நாள் சர்வதேசப் போட்டித் தொடர் நவம்பர் மாதம் 01ஆம் திகதி ஆரம்பிக்கவுள்ளது. இலங்கை அணிக்கு வாய்ப்புகள் கூடிய தொடராக இந்த தொடரை கருத முடியும் என்று கூறினாலும், மேற்கிந்திய தீவுகள் அணி போராடும். இலகுவாக இலங்கை அணி இந்த தொடரை எடுத்துக்கொள்ளாமல் நியூசிலாந்து, இங்கிலாந்து நாடுகளுக்கான தயார்படுத்தலாக இந்த தொடரை பாவித்து அணியை தயார் செய்வதே நல்லது. டெஸ்ட் தொடரில் அவ்வாறான தயார்ப்படுத்தலில் வெற்றி கண்டுள்ளது.

 

மேற்கிந்தியதீவுகள் அணி சிறந்த ஒரு நாள் சர்வதேசப்போட்டிக்கான வீரர்கள் இருந்தும் அவர்கள் இல்லாத 7நிலையில் களமிறங்கவுள்ளது. அவர்களுக்கு நல்ல தலைவர் ஒருவர் கிடைத்துள்ளார் என அனைவரும் பாராடுகின்ற போதும் அவருக்கு ஏற்ற அணியில்லாமல் தடுமாறி வருகின்றார். இந்த மூன்று போட்டிகள் அடங்கிய தொடரில் அவரால் தனித்து நின்று எதனையும் செய்துவிடமுடியாது.

 

மேற்கிந்திய தீவுகள் அணி சிறந்த ஒரு நாள் சர்வதேசப் போட்டிக்கான வீரர்களை வைத்து உள்ள போதும் அவர்கள் யாரும் இல்லாதா நிலையில் இந்த அணி இலங்கை வந்துள்ளது. ஜேசன் ஹோல்டர் சிறந்த தலைவர் என பலரும் போற்றும் நிலையில் சிறந்த வீரர்கள் இல்லாமல் அவர் தனித்து நின்று எதுவும் செய்ய முடியாது. போட்டிகளை வென்று கொடுக்கவும் முடியாது. துடுப்பாட்டம் அவர்கள் பக்கமாக இல்லாத போதும் பந்துவீச்சு பலமாக உள்ளது. டெஸ்ட் போட்டிகள் போன்றே இலங்கை அணிக்கு சவால்களை வழங்கினாலும் வெல்லக்கூடிய நிலையை மேற்கிந்திய தீவுகள் அணி பெற்றுக்கொள்ள முடியாது. காலநிலை சீராக இருக்கும் என்ற நிலையில் இந்த எதிர்வு கூறல்களை கூறமுடியும். மழைக் குறுக்கீடு இருப்பின் தொடரில் எது வேணும் என்றாலும் நடக்கலாம்.

 

அணி விபரம்

 

இலங்கை அணி

 

திலகரட்ன டில்ஷான், குஷால் பெரேரா, லஹிறு திரிமான்னே, தினேஷ் சந்திமால், அஞ்சலோ மத்தியூஸ்(தலைவர்),மிலிந்த சிறிவர்த்தன, தனுஸ்க குணதிலக,அஜந்த மென்டிஸ்,லசித் மாலிங்க,சுரங்க லக்மால், துஸ்மாந்த சமீர,நுவான் குலசேகர, செகான் ஜெயசூரியா, சசித்திர சேனநாயக்க, ஜெப்ரி வன்டர்சே.

 

இறுதியாக பாகிஸ்தான் தொடரில் விளையாடிய குழுவில் இருந்து 6 வீரர்கள் வெளியேற்றப்பட்டு 6 புதிய வீரர்கள் அணிக்குள் உள் வாங்கப்பட்டுள்ளனர். ஒரே தொடரில் 6 வீரர்கள் மாற்றப்படும் நிலையில் இலங்கை அணியின் தெரிவு உள்ளது. இது இந்த தொடரில் மட்டுமல்ல அண்மைக்காலமாக இதே நிலைதான். துடுப்பாட்ட வரிசை ஓரளவு நிரந்தரமாகவுள்ளது. அண்மைக்காலமாக அதிகம் விமர்சிக்கப்பட்டு வரும் லஹிறு திரிமானே ஒரு நாள் சர்வதேசப் போட்டிகளில் சிறப்பாக ஓட்டங்களைப் பெற்றுள்ளார். குஷால் பெரேராவின் மீள் வருகை திருப்தியளிப்பதாக உள்ளது. முதல் ஐந்து வீரர்களும் நிரந்த வீரர்களாக உள்ளனர். மேலே கூறப்பட்ட ஒழுங்கில் துடுப்பாடுவார்கள். ஆறாமிடத்தில் மிலிந்த சிறிவர்த்தன நிரந்தரமாக இடத்தைப் பெற்றுள்ளார்.கடந்த ஒரு நாள் சர்வதேசத் தொடரிலும், மேற்கிந்திய தீவுகள் அணியுடனான டெஸ்ட் தொடரிலும் நிரூபித்துக் காட்டி நிலையான இடத்தைப் பெற்றுள்ளார்.

 

அறிவித்துள்ள அணியின் படி ஏழாமிடத்தில் இன்னுமொரு சுழற்பந்து வீசும் சகலதுறை வீரருக்கு இடம் உண்டு. அந்த இடம் தனுஸ்க குணதிலக பெற்றுக்கொள்ளும் வாய்பு உண்டு. மூன்று சகலதுறை வீரகளை கொண்ட அணியாக இலங்கை அணி இனி உருவெடுக்கும் வாய்ப்புகள் உண்டு. அப்படியான நிலை உருவாகினால், வெளிநாட்டு ஆடுகளங்களில் முழுநேர சுழற்பந்து வீச்சாளர் இல்லாமல் களமிறங்கும் நிலையை உருவாக்க முடியும். ஆனால் எந்த அணியும் துணிந்து அவ்வாறன முடிவை எடுக்குமா என்பது கேள்விக்குறியே. இந்த தொடரி;லசித் மாலிங்க மீண்டும் அணிக்குள் சேர்க்கப்பட்டுள்ளார். சுரங்க லக்மால், துஸ்மாந்த சமீர ஆகியோர் விளையாடும் வாய்புகள் உள்ளன. நுவான் குலசேகர மீண்டும் அணியில் இடம் பிடித்துள்ள போதும் அவர் விளையாடுவாரா இல்லையா என்பது போட்டிகளின் பின்னரே தெரிய வரும்.   

மீண்டும் லசித் மாலிங்க , நுவான் குலசேகர ஜோடி பந்துவீசினால் , விக்கெட்களை கைப்பற்றினால் ஒரு நாள் சர்வதேசப்போட்டிகளின் சிறந்த ஆரம்ப பந்துவீச்சு ஜோடி என்ற பலம் கிடைக்கும். ஆனால் இந்த ஜோடி எதிர்காலத்துக்கு எந்த அளவில் இலங்கை அணிக்கு கைகொடுக்கும் என்பதை உறுதியாக கூறமுடியாது. துஸ்மாந்த சமீர மிகப்பெரியளவில் எதனையும் செய்து காட்டாத போதும் இளைய வீரர். அவருக்கு போதியளவு வாய்ப்பு வழங்க வேண்டும். இலங்கை போன்ற நாடுகளில் வேகப்பந்துவீச்சாளர்கள் உருவாகுவது கடினம். இவரை உருவாக்கும் பொறுப்பு இலங்கை அணியிடம் உள்ளது. சுரங்க லக்மால் பெரியளவில் ஒரு நாள் சர்வதேசப்போட்டிகளில் அண்மைக்காலமாக எதனையும் செய்யவில்லை. நான்கு வேகப்பந்துவீச்சாளர்களில் மூவர் விளையாடுவது உறுதி.

 

இந்த அணியில் மூன்று வீரர்கள் புதிய வீரர்கள். மூவருமே சுழற்பந்து வீச்சுக்காக சேர்க்கப்பட்டுள்ளனர். முழு நேர சுழற்பந்து வீச்சாளராக ஜெப்ரி வன்டேர்சே இணைக்கப்பட்டுள்ளார். சசித்திர சேனநாயகவும் அணியில் உள்ளார். மூன்று பேரில் ஒருவர் மட்டும் விளையாடும் வாய்ப்புகளை கொண்டுள்ள நிலையில் ஏன் மூன்று சுழற்பந்து வீச்சாளர்கள் என கேள்வி எழுப்பும் நிலையும் உள்ளது. திலகரட்ன டில்ஷானும் சுழற்பந்து வீச்சாளர்.   இலங்கை அணி மீண்டும் ஒரு நல்ல சமநிலை அணியாக உருவாகும் நிலை உள்ளது. தெரிவுக்குழுவினர் மீண்டும் ஒரு தடவை இதே போன்ற பாரிய மாற்றங்கள் இல்லாத அணியை இந்த தொடரின் பின்னர் அறிவிக்க வேண்டும் ஆயின் வீர்கள் திறமையாக செயற்படவேண்டும்.

 

இந்த அணியில் மூன்று புதிய வீரர்கள் இணைக்கப்பட்டுள்ளனர். இவர்களில் செஹான் ஜெயசூரியா பாகிஸ்தான் அணியுடனான 20-20 போட்டியில் சர்வதேச அறிமுகத்தை மேற்கொண்டுள்ளார். மூன்றாமிலக்கதில் துடுப்பாடக்கூடிய சுழற்பந்து வீசும் சகலதுறை வீரர். 50 ஓவர்கள் கிரிக்கெட் போட்டியில் 57 இன்னிங்சில் 1710 ஓட்டங்களை 31.66 என்ற சராசரியில் 3 சதங்கள், 11 அரைச்சதங்களுடன் பெற்றுள்ளார்.  55 இன்னிங்சில் 50 விக்கெட்களை 31.32 என்ற சராசரியில் பெற்றுள்ளார். அண்மைக்காலமாக பந்துவீச்சில் சிறப்பாக செயற்பட்டு வருகின்றார். பந்துவீச்சுக்காகவே இவர் அணியில் இணைக்கப்பட்டுள்ளார். கடந்த முதலாம் திகதி நியூசிலாந்தில் நடைபெற்ற போட்டி ஒன்றில் 58 ஓட்டங்களையும், 7 விக்கெட்களையும் கைப்பற்றினார். நியூசிலாந்து A அணியுடன் நியூசிலாந்தில் நடைபெற்ற தொடரில் 4 போட்டிகளில் 74 ஓட்டங்களையும், 6 விக்கெட்களையும் கைப்பற்றினார்.

 

தனுஸ்க குணதிலக துடுப்பாட்ட வீரராகவே அணியில் இடம்பிடித்துள்ளார். ஆனால் 50 ஓவர்கள் போட்டியில் பந்துவீச்சில் நல்ல சராசரியைக் கொண்டுள்ள போதும் அண்மைக்கால போட்டிகளில் இவற்றின் பந்துவீச்சு பாவிக்கப்படவில்லை. நியூசிலாந்து சுற்றுப்பயணத்தில் நல்ல  முறையில் துடுப்பாடிய வீரர். 55 இன்னிங்சில் 1590 ஓட்டங்களை 36.13 என்ற சராசரியில் பெற்றுள்ளார். பந்துவீச்சில் 22 இன்னிங்சில் 23 விக்கெட்களை 26.43 என்ற சராசரியில் பெற்றுள்ளார். தனுஸ்க குணதிலக, செஹான் ஜெயசூரியா ஆகியோர் குஷால் பெரேரா, லஹிறு திரிமான்னே ஆகியோரை கருத்திற்கொண்டு மேலதிக வீரர்களாக அணியில் இணைக்கப்பட்டுள்ளார் என நம்பலாம். ஆனாலும்   மத்திய வரிசையில் இவர்களில் ஒருவர் விளையாடுவது நிச்சயம் என்ற நிலை உள்ளது.

 

பாகிஸ்தான் 20-20 தொடரில் சர்வதேச அறிமுகத்தை மேற்கொண்ட லெக்ஸ்பின் பந்துவீச்சாளர் ஜெப்ரி வன்டேர்சே. விக்கெட்களை கைப்பற்ற முடியவில்லை. 50 ஓவர்கள் போட்டியில் 7 போட்டிகளில் மாத்திரமே விளையாடி 6 விக்கெட்களை கைப்பற்றியுளார். 14 ட்வென்டி ட்வென்டி போட்டிகளில் 9 விக்கெட்களை கைப்பற்றிய நிலையில் 20-20 அணியில் இணைக்கப்பட்டு இருந்தார். தற்போது ஏன் பெரியளவில் எதனையும் சாதிக்காத நிலையில் இலங்கை குழுவில் என்ற கேள்வி நிச்சயம் உண்டு. முதற்தரப் போட்டிகளில் நல்ல முறையில் பந்து வீசியுள்ளார். டெஸ்ட் அணியில்தான் இவருக்கு இடம் வழங்க வேண்டும். அண்மையில் நடைபெற்ற எந்த 50 ஓவர்கள்  போட்டிகளிலும் இவர் அதிக விக்கெட்களை கைப்பற்றவும் இல்லை.

 

 

மேற்கிந்திய தீவுகள்

 

அணி விபரம்

 

ஜோன்சன் சார்லஸ், அன்றே பிளட்சர், டரன் பிராவோ, மார்லன் சாமுவேல்ஸ்,தினேஷ் ராம்டீன், ஜொனதன் கார்ட்டர்,அன்ட்ரே ரஸல்,ஜேசன் ஹோல்டர் (கப்டன்),சுனில் நரைன்,ரவி ராம்போல்,  ஜெரோம் டெய்லர் தேவேந்திர பிஷூ, ஜெர்மைன் பிளாக்வூட், கார்லோஸ் பிரத்வைட், ஜேசன் முகமட்.

 

மேற்கிந்திய தீவுகளின் அணியின் 11 பேரை தெரிவு செய்வது என்பது மிகக்கடினமே. பல வீரர்கள் உலகக்கிண்ண தொடருக்கு பின் வெளியேறியுள்ளார்கள். இறுதியாக உலகக்கிண்ண தொடரிலேயே ஒரு நாள் சர்வதேசப்போட்டிகளில் விளையாடியது. 8 வீரர்கள் அந்த அணியில் இருந்து விலக்கப்பட்டுள்ளனர். அவர்களில், க்ரிஸ் கெயில், டரின் சமி ஆகிய முக்கிய வீரர்கள் உபாதை காரணமாக அணியால் விலகியுள்ளனர். புதிய வீரர்களாக 8 வீரர்கள் அணிக்குள் மீண்டும் வந்துள்ளனர். இவர்களில் டரன் பிராவோ, சுனில் நரையன்  ஆகிய வீரர்கள் முக்கியமானவர்கள்.

 

க்றிஸ் கெயிலின் இடத்தை 15 போட்டிகளில் 254 ஓட்டங்களை பெற்றுள்ள அன்றே பிளட்சர் பெற்றுக்கொள்வார். உலகக்கிண்ண தொடரில் இணைந்த ஜோன்சன் சார்லஸ் இந்த வருடத்தில் 2 போட்டிகளில் மாத்திரமே விளையாடியுள்ளார். அவரை விட வேறு தெரிவு இல்லை. மூன்றமிடத்தை மீண்டும் அணிக்குள் வந்துள்ள டரன் பிராவோ பெற்றுக்கொள்வார். மார்லன் சாமுவேல்ஸ் அடுத்த இடத்தை நிச்சயம் பெறுவார். ஆனால் இவர்கள் இருவரினதும் போர்ம் மோசமாக உள்ளது. ஆனால் வேறு வழியில்லை. இவர்கள் செய்தாலும், இல்லாவிட்டாலும் அணியால் நீக்க முடியாது. ஐந்தாமிடத்தில்  விக்கெட் காப்பாளர் தினேஷ் ராம்டீன் ஐந்தாமிடத்தை பெற்றுக்கொள்வார். 10 போட்டிகளில் 193 ஓட்டங்களைப்பெற்ற ஜொனதன் காட்டரை விட வேறு வீரர்கள் இல்லை. ஆனால் டெஸ்ட் போட்டிகளில் நல்ல முறையில் துடுப்பாடி வரும் ஜெர்மைன் ப்ளக்வூட் ஐந்தாம் இடத்தில் துடுப்பாடுவது பொருத்தமாக இருக்கும். அப்படியானால் ஜொனதன் காட்டரை அணியால் நீக்க வேண்டும்.

 

அடுத்த இடத்தில் அன்றே ரசல் பெறுவார். 20-20 போட்டிகளில் போட்டிகளை மாற்றக்கூடிய ஒரு வீரராக இருந்து வருகின்றார். ஒரு நாள்ப்போட்டிகளில் இன்னிங்சை நிறைவு செய்யக்கூடிய அதிரடி துடுப்பாட்ட வீரர். வெகப்பந்துவீச்சாளர். அடுத்த இடம் அணியின் தலைவர். இவரையும் சகலதுறை வீரராக வர்ணிக்கமுடியும். சுனில் நரையன் பந்தை  எறிவதாக இந்திய சம்பியன் லீக் தொடரில் தடை செய்யப்பட்டதன் பின்னர் சர்வதேசப்போட்டிகளில் விளையாடவில்லை. இப்போது பந்துவீச்சில் மாற்றங்களை செய்து களமிறங்குகின்றார் என நம்பலாம். இவர் மீது நடுவர்கள் மிகக்கடுமையாக கவனம் செலுத்துவார்கள். ரவி ராம்போல் மீண்டும் அணிக்குள் உள்வாங்கப்பட்டுள்ளார். இவர் ஏன் உலகக்கிண்ண அணியால் நீக்கப்பட்டார்  என்பது தெரியவில்லை. இந்திய தொடர் சிக்கல் காரணமாக இருக்கலாம். ஜெரோம் டெய்ய்லர்  மேற்கிந்திய தீவுகள் அணியின் தற்போதைய  சிறந்த ஒரு நாள்   வேகப்பந்து வீச்சாளர். நல்ல உலகக்கிண்ண தொடர் இவருக்கு.

 

பந்துவீச்சு இலங்கை அணிக்கு நிச்சயம் அச்சுறுத்தலாக இருக்கும். அனுபவம் மிக்க பந்துவீச்சாளர்கள். நரையன் எப்படி பந்துவீசப் போகின்றார் என்பதை போட்டிகளின் போதே பார்க்க முடியும். அவரின் பந்துவீச்சில் சிக்கல்கள் இருந்தாலும் தொடர் முழுவதும் பந்து வீசமுடியும். இரண்டாவது சுழற்பந்துவீச்சு மேற்கிந்திய தீவுகளுக்கு சிக்கலே. சாமுவேல்ஸ் டெஸ்ட் போட்டியின் போது பந்தை வீசி எறிவதாக குற்றம் சுமத்தப்பட்டுள்ளது. தேவேந்திர பிசூ அணிக்குள் வரவேண்டுமாக இருந்தால் அன்றே ரசல் வெளியேற வேண்டும். வேகப்பந்துவீச்சில் ரெய்ளர், ராம்போல், ஹோல்டர், ரசல் என நால்வருமே பலமானவர்கள். ஆக இலங்கை அணிக்கு துடுப்பாட்டம் சிக்கல் இல்லை. இருப்பினும் இலங்கை அணியின் பந்துவீச்சும் முழுமையாக இல்லை என கூறலாம். மீண்டும் பந்துவீச்சு வரிசையினை அமைக்க வேண்டும். இலங்கை அணியின் துடுப்பாட்ட வீரர்கள் சரியாக செயற்பட்டால் சவால்கள் இல்லாமல் இலங்கை அணி வெல்ல  முடியும்.

 

இலங்கை அணிக்கு மூன்று போட்டிகளிலும் வெற்றி பெறும் வாய்ப்புகள் அதிகம் உள்ளன. மழை குறுக்கீடு மட்டுமே இந்த வெற்றி வாய்ப்புகளை இல்லாமல் செய்யும். இலங்கை அணி கடந்த காலங்களில் மேற்கிந்திய தீவுகள் அணியை வெற்றி'கொண்டது போல இம்முறை வெற்றி கொள்ள முடியாது.

 

கடந்த காலம்

 

இரு அணிகள் மட்டும் இலங்கையில் விளையாடும் மூன்றாவது ஒரு நாள் சர்வதேசப்போட்டித் தொடர் இது. 1993 ஆம் ஆண்டு ஆரம்பித்த தொடர் 1-1 என்ற சமநிலையில் நிறைவடைந்தது. பின்னர் 2010 ஆம் ஆண்டு நடைபெற்ற தொடரில் 2- 0 என இலங்கை தொடரைக் கைப்பற்றியது. இரண்டு தொடர்களிலும் ஒரு போட்டி மழை காரணமாக கை விடப்பட்டது. இரு அணிகளுக்குமிடையில் 11 போட்டிகள் இலங்கையில் நடைபெற்றுள்ளன. இவற்றில் 6 போட்டிகளில் இலங்கை அணி வெற்றி பெற்றுள்ளது. 3 போட்டிகளில் மேற்கிந்திய தீவுகள் அணி வெற்றி பெற்றுள்ளது. 2 போட்டிகள் கைவிடப்பட்டுள்ளன. இரு அணிகளுக்குமிடையில் 51 போட்டிகள் இதுவரையில் மொத்தமாக நடைபெற்றுள்ளன. இலங்கை அணி இவற்றுள் 21 போட்டிகளிலும், மேற்கிந்திய தீவுகள் அணி 27 போட்டிகளிலும் வென்றுள்ளன. 3 போட்டிகள் கைவிடப்பட்டுள்ளன.

தொடர்ச்சியாக ஆசியக்கிண்ணம் பங்களாதேஷில்

 

தொடர்ச்சியாக மூன்றாவது தடவையாக பங்களாதேஷில் ஆசியக் கிண்ணத்தை நடாத்துவது என சிங்கப்பூரில் இடம்பெற்ற கூட்டத்தில் முடிவெடுக்கப்பட்டுள்ளது.

 

ஐந்து நாடுகளைக் கொண்ட இந்தப் பிராந்திய கிரிக்கெட் தொடரில் போட்டியை நடாத்தும் நாடான பங்களாதேஷ், இந்தியா, பாகிஸ்தான், இலங்கை, ஒரு துணைக் கண்ட நாடு பங்கேற்கவுள்ளது.

 

இம்முறை தொடர் எதிர்வரும் பெப்ரவரி 24ஆம் திகதி ஆரம்பமாகவுள்ளதுடன், இறுதிப்போட்டி எதிர்வரும் மார்ச் மாதம் 6ஆம் திகதி இடம்பெறவுள்ளதாக அறிவிக்கப்பட்டுள்ளது.

 

இது தவிர, இத்தொடர் முடிந்து ஐந்து நாட்களில் உலக இருபது-20 தொடர் ஆரம்பிக்கவுள்ளமையால், எதிர்வரும் ஆசியக் கிண்ணத்தில் முதற்தடவையாக இருபது-20 போட்டிகளும் இடம்பெறவுள்ளன.

 

அடுத்த வருடம், ஆசியக் கிண்ணத்தை பங்களாதேஷ் நடாத்த வேண்டும் என்ற கோரிக்கையை பாகிஸ்தான் முன்வைத்ததாகவும், அதற்கு ஏனைய நாடுகள் அனைத்தும் இணங்கியதாக பங்களாதேஷ் கிரிக்கெட் சபைத்தலைவர் நஸ்முல் ஹஸன் தெரிவித்தார். இது தவிர, ஆசிய நாடுகளுக்கிடையே அதிகமான பத்தொன்பது வயதுக்குட்பட்டோருக்கான கிரிக்கெட் போட்டிகளை நடாத்துவது பற்றியும் கலந்துரையாடப்பட்டதாக தெரிவித்தார்.

 

டெஸ்ட் அந்தஸ்துள்ள நான்கு நாடுகளும் தொடருக்கு நேரடியாகத் தகுதி பெறுவதுடன், அடுத்த மாத இறுதியில் இடம்பெறும் தகுதிச்சுற்றுப் போட்டிகளில் ஆப்கானிஸ்தான், ஓமான், ஹொங்கொங், ஐக்கிய அரபு இராச்சியம் என்பன பங்கேற்று வெற்றி பெறும் அணி ஐந்தாவது அணியாக தொடரில் இடம்பெறும்.  

 

கடைசி இருமுறையும், 2014, 2012 ஆம் ஆண்டுகளில் பங்களாதேஷின் டாக்காவில் ஆசியக்கிண்ணபோட்டிகள் இடம்பெற்றதோடு முன்னர் 2000, 1988 ஆம் ஆண்டுகளிலும் பங்களாதேஷில் இடம்பெற்றிருந்தது.

ஜனவரிக்குப் பின்பே இலங்கைக்குப் பயிற்றுநர்?

 

இலங்கை கிரிக்கெட் அணிக்கான பயிற்றுநர், இலங்கை கிரிக்கெட் சபைக்கான தேர்தல்கள் முடிவடைந்த பின்னரே நியமிக்கப்படுவார் என எதிர்பார்க்கப்படுகின்றது. ஜனவரியிலேயே இத்தேர்தல் இடம்பெறவுள்ள நிலையில், அதற்குப் பின்னரே இது தொடர்பான முடிவு எடுக்கப்படுமெனத் தெரிகிறது.

 

இலங்கை அணியின் பயிற்றுநராக இருந்த மார்வன் அத்தப்பத்து பதவி விலகியதையடுத்து, புதிய பயிற்றுநருக்கான விண்ணப்பங்கள் கோரப்பட்டிருந்தன. அதில் கிடைக்கப்பெற்ற 5 விண்ணப்பங்களிலும் இலங்கை கிரிக்கெட் சபைக்கு திருப்தியிருக்காத நிலையில், வேறு இருவரை அச்சபை அணுகியுள்ளது.

 

எனினும், இடைக்கால நிர்வாகச் செயற்குழுவே தற்போது காணப்படும் நிலையில், இலங்கையின் பயிற்றுநராக வருவதில் அவர்களிருவரும் தயக்கம் காண்பிப்பதாக அறிவிக்கப்படுகின்றது. எனவே தான், புதிய நிர்வாக சபை தெரிவாகும் வரை, அது தொடர்பாக முடிவு எடுக்கப்படாது என்ற நிலைப்பாடு எட்டப்பட்டுள்ளதாதகத் தெரிகிறது.

 

இதன்படி, இலங்கையின் நியூசிலாந்துச் சுற்றுலாவுக்கும், இடைக்காலப் பயிற்றுநரான ஜெரோம் ஜயரத்னவே தொடர்ந்தும் பயிற்றுநராகச் செயற்படவுள்ளார்.

 

தொடரை மீண்டும் கைப்பற்றியது ஆப்கானிஸ்தான்

சிம்பாப்வேக்கு சுற்றுப்பயணம் மேற்கொண்டுள்ள ஆப்கானிஸ்தான் அணி, முதற்தடவையாக டெஸ்ட் அந்தஸ்துள்ள நாடொன்றை இரு தரப்பு ஒருநாள் சர்வதேசப் போட்டித் தொடரில் வென்ற முதலாவது துணை அங்கத்துவது நாடு என்ற சாதனையை ஏற்படுத்திய பங்களாதேஷ் அணி, சிம்பாப்வே அணிக்கெதிரான இரண்டாவது இருபது-20 போட்டியை வென்றதனூடு முதற்தடவையாக சர்வதேச இருபது-20 போட்டித் தொடரையும் வென்றுள்ளது.

புலவாயோவில் இடம்பெற்ற இப்போட்டியில் நாணயச் சுழற்சியில் வெற்றி பெற்று முதலில் துடுப்பெடுத்தாடிய சிம்பாப்வே அணி 7 விக்கெட்டுக்களை இழந்து 190 ஓட்டங்களை குவித்தது. அவ்வணி சார்பாக துடுப்பாட்டத்தில் சீன் வில்லியம்ஸ் 26 பந்துகளில் 8 நான்கு ஓட்டங்கள், 2 ஆறு ஓட்டங்கள் உள்ளடங்கலாக 54 ஓட்டங்களையும், ரிச்மொண்ட் முத்தும்பாமி 33 பந்துகளில் ஒரு நான்கு ஓட்டம், இரண்டு ஆறு ஓட்டம் உள்ளடங்கலாக 43 ஓட்டங்களைப் பெற்றனர். இதில் 21 பந்துகளில் அரைச்சதத்தை பூர்த்தி செய்த சீன் வில்லியம்ஸ் சிம்பாப்வே சார்பாக இருபது-20 போட்டிகளில் அதிவேக அரைச்சத சாதனையை சமப்படுத்தினார்.

பந்துவீச்சில் ஆப்கானிஸ்தான் அணி சார்பாக டவால்ட் ஸட்ரான், அமிர் ஹம்ஸா தலா இரண்டு விக்கெட்டுக்களை வீழ்த்தினர்.

191 ஓட்டங்களை வெற்றி இலக்காக கொண்டு துடுப்பெடுத்தாடிய ஆப்கானிஸ்தான் அணி ஒரு பந்து மீதமிருக்கையில் வெற்றியிலக்கை அடைந்தது. அவ்வணி சார்பாக துடுப்பாட்டத்தில் உஸ்மான் கானி 45 பந்துகளில் மூன்ரு ஆறு ஓட்டங்கள், ஆறு நான்கு ஓட்டங்கள் உள்ளடங்கலாக 65 ஓட்டங்களையும், குல்படின் நயிப் 31 பந்துகளில் 7 நான்கு ஓட்டங்கள் உள்ளடங்கலாக 56 ஓட்டங்களையும் பெற்றனர்.  

போட்டியின் நாயகனாக ஆப்கானிஸ்தான் அணியின் குல்படின் நயிப் தெரிவானார். முதலாவது போட்டியையும் வென்றிருந்த சிம்பாப்வே அணி தொடரை 2-0 என்ற கணக்கில் கைப்பற்றியது.   

இந்திய அணிக்கு இரசிகர்கள் ஆதரவளிக்க வேண்டும்: சச்சின்

 

இந்திய அணி சிறிது தடுமாற்றத்தை எதிர்கொண்டுவரும் நிலையில், இந்திய அணியின் இரசிகர்கள், அவ்வணிக்குத் தொடர்ந்து ஆதரவு வழங்க வேண்டுமென, இந்திய அணியின் முன்னாள் தலைவர் சச்சின் டென்டுல்கர் கேட்டுக் கொண்டுள்ளார்.

 

இந்திய, தென்னாபிரிக்க அணிகளுக்கிடையிலான ஒருநாள் சர்வதேசப் போட்டித் தொடரை இந்திய அணி இழந்துள்ள நிலையில், அவ்வணி மீது விமர்சனங்கள் எழுந்துள்ளன.

 

இந்நிலையிலேயே, 'எங்களிடம் சிறந்த அணியொன்று இருக்கிறது. ஒவ்வொரு அணியும், மாற்றங்களுக்குள்ளாகச் செல்லும். சில சந்தர்ப்பங்களில் நீங்கள் சிறப்பாக விளையாடுவீர்கள், சில சந்தர்ப்பங்களில் நிலைமை மிகவும் கடினமாகும் என்பதோடு, உங்கள் திட்டப்படி நிகழ்வுகள் நடக்காது. ஆனால் அதற்காக, ஒவ்வொரு வார இறுதியிலும் உங்களுடைய அணி மீது தீர்ப்பொன்றை வழங்கிக் கொண்டிருக்க வேண்டும் என அர்த்தப்படாது" என சச்சின் டென்டுல்கர் தெரிவித்துள்ளார்.

 

மேலும் கருத்துத் தெரிவித்த அவர், 'அவர்கள் சிறப்பாகச் செயற்பட்டால், அருமை, அவர்கள் மிகச்சிறப்பாகச் செயற்பட்டுள்ளார்கள், எனச் சொல்வதோடு, அடுத்த வாரத்தில் அவர்கள் மீது விமர்சனங்களை முன்வைக்கிறீர்கள். நாங்கள், சமநிலையொன்றை வெளிப்படுத்த வேண்டுமென நான் நினைக்கிறேன். நாமெல்லோரும் கிரிக்கெட்டில் அதீத விருப்பைக் கொண்டவர்கள், நாம் பொறுமையாகவும் இருக்க வேண்டும்" என்றார்.

 

இந்திய அணி மீது விமர்சனங்களை முன்வைப்பதிலிருந்து தவிர்த்துக் கொண்ட சச்சின், தென்னாபிரிக்க அணிக்கான தனது பாராட்டுக்களை வெளிப்படுத்தினார்.

 

குயின்டன் டீ கொக், பப் டு பிளெஸிஸ், ஏபி டி வில்லியர்ஸ் ஆகியோருக்குப் பாராட்டுக்களை வெளிப்படுத்திய அவர், ஏபி டி வில்லியர்ஸூக்கான விசேட பாராட்டுக்களை வெளிப்படுத்தினார்.

 

'அவரது கிரிக்கெட் வாழ்வின் உச்ச நிலையில் இருப்பதாக இருக்கலாம். அவர், மிகவும் மிகவும் நம்பமுடியாதளவுக்குத் துடுப்பெடுத்தாடிக் கொண்டிருக்கிறார்" என சச்சின் மேலும் தெரிவித்தார்.

 

பாகிஸ்தான் சுப்பர் லீக்கில் சங்கக்கார

 

பாகிஸ்தானின் உள்ளூர் இருபதுக்கு-20 தொடரான பாகிஸ்தான் சுப்பர் லீக்கில் , இலங்கை அணியின் முன்னாள் தலைவர் குமார் சங்கக்கார இணைந்துள்ளார்.

 

கிறிஸ் கெயில், கெரான் பொலார்ட், டுவைன் பிராவோ, கெவின் பீற்றர்சன், ஷகிப் அல் ஹசன் உள்ளிட்ட நூற்றுக்கும் மேற்பட்ட வீரர்களை, பாகிஸ்தான் கிரிக்கெட் சபை ஒப்பந்தம் செய்துள்ளது. இவர்கள், 5 அணிகளால் ஒப்பந்தம் செய்யப்படுவர்.

 

சங்கக்காரவின் ஒப்பந்தம் தொடர்பில் கருத்துத் தெரிவித்த பாகிஸ்தான் சுப்பர் லீக்கின் தலைவர் நஜம் சேதி, 'சங்கக்கார, உலகத்தரம் மிக்க ஒர வீரர். அவரை இணைத்துக் கொள்வதில் நாம் மகிழ்ச்சியடைகிறோம். ஏராளமான அனுபவத்தை அவர் இந்தத் தொடருக்குக் கொண்டு வருகின்றார். அவரது இணைப்பானது, தொடரின் வீரர் தெரிவை மேலும் சுவாரசியமாக்குகின்றது" என்றார்.

 

இதேவேளை, மற்றொரு இருபதுக்கு-20 தொடரான மாஸ்டர்ஸ் சம்பியன்ஸ் லீக் தொடரில் பங்குபற்றவும் சங்கக்கார இணைக்கப்பட்டுள்ளார்.

 

இரண்டு தொடர்களுமே ஏறத்தாழ ஒரே நேரத்தில் இடம்பெறவுள்ளதோடு, ஐக்கிய அரபு அமீரகத்திலேயே இடம்பெறவுள்ளன. ஆனால், வேறு வேறு மைதானங்களில் நடைபெறவுள்ளன.

 

இரண்டு தொடர்களும் ஒரே நேரத்தில் இடம்பெறுமாயின், பாகிஸ்தான் சுப்பர் லீக் தொடரை விட மாஸ்டர்ஸ் கிரிக்கெட் லீக்குக்கு அவர் முன்னுரிமை வழங்குவார் என அறிவிக்கப்பட்டுள்ளது.

 

முழுமையான உடற்தகுதியை நெருங்கியுள்ளேன்: அஷ்வின்

 

முழுமையான உடற்தகுதியை நெருங்கிவிட்டதாக, இந்திய அணியின் முதன்மைச் சுழற்பந்து வீச்சாளர் இரவிச்சந்திரன் அஷ்வின் தெரிவித்துள்ளார். அத்தோடு, தென்னாபிரிக்காவுக்கெதிரான தொடரில் சிறப்பாகச் செயற்படும் நம்பிக்கை காணப்படுவதாகவும் அவர் தெரிவித்துள்ளார்.

 

இந்திய, தென்னாபிரிக்க அணிகளுக்கிடையிலான முதலாவது ஒருநாள் சர்வதேசப் போட்டியின்போது காயமடைந்த அஷ்வின், அடுத்த 4 போட்டிகளிலும் பங்குபற்றியிருக்கவில்லை. இந்நிலையில், டெஸ்ட் போட்டிகளுக்கு முன்னதாக அவர் முழுமையான உடற்தகுதியை அடைவாரா என்ற சந்தேகம், இந்திய அணியிடம் காணப்பட்டது.

 

அவர் முழு உடற்தகுதியை அடைவதானது, இந்தியாவுக்கு முக்கியமானதாகும். குறிப்பாக, ஒருநாள் சர்வதேசப் போட்டியில் இந்திய அணியின் சுழற்பந்து வீச்சாளர்கள், அஷ்வின் அளவுக்குச் சிறப்பாகப் பந்துவீசியிருக்கவில்லை.

 

இது தவிர, இந்தியாவின் இரண்டாவது சுழற்பந்து வீச்சாளரான அமித் மிஷ்ரா, பெண்ணொருவரைத் தாக்கிய குற்றச்சாட்டில் கைது செய்யப்பட்டு, பிணையில் விடுவிக்கப்பட்டுள்ளார். அதனால், அவர் விளையாட முடியுமா என்ற கேள்வி காணப்படுகின்றது.

 

எனவே, முழு உடற்தகுதியை நெருங்கிவிட்டதாக அஷ்வின் தெரிவித்துள்ளமை, இந்தியாவுக்கு நிம்மதியை வழங்கியுள்ளதாகக் கருதப்படுகின்றது.

 

ஒலிம்பிக்கில் கிரிக்கெட் வேண்டும்; சச்சின்&வோர்ண்

 

ஒலிம்பிக் விளையாட்டுக்களில் இருபது-20 கிரிக்கெட்டை சேர்க்க வேண்டும் என கிரிக்கெட் உலகின் ஜாம்பவான்களாக கருதப்படும் சச்சின் டெண்டுல்கரும் ஷேன் வோர்ணும் கோரிக்கை விடுத்துள்ளனர்.

 

1900ஆம் ஆண்டு தொடக்கம் கிரிக்கெட்டானது ஒலிம்பிக் விளையாட்டுக்களில் இடம்பெற்றிருக்காத போதும் அடுத்த மாதம் சர்வதேச கிரிக்கெட் சபையும் சர்வதேச ஒலிம்பிக் செயற்குழுவும் கிரிக்கெட்டை சேர்ப்பது குறித்து சந்தித்து கலந்துரையாடவுள்ளன.

 

கிரிக்கெட்டை ஒலிம்பிக் விளையாட்டாக பார்க்க விரும்புவதாகவும், யாருக்குத் தெரியும், எதிர்காலத்தில் கிரிக்கெட், ஒலிம்பிக் விளையாட்டாக வரலாம் என ஷேன் வோர்ண் தெரிவித்துள்ளார்.

 

கிரிக்கெட், ஒலிம்பிக் விளையாட்டாவது சிறந்த யோசனை என்றும் இதற்கு இருபது-20 போட்டிகளே சிறந்ததாக இருக்கும் என சச்சின் டெண்டுல்கர் தெரிவித்துள்ளார். 

 

தங்களது புகழைப் பயன்படுத்தி கிரிக்கெட்டை பூகோள ரீதியாக எடுத்துச் செல்லும் பொருட்டு எதிர்வரும் வரும் மாதம் ஓய்வுபெற்றுள்ள முன்னாள் இந்திய அணியின் நட்சத்திர வீரரான சச்சின் டெண்டுல்கரும், அவுஸ்திரேலியாவின் முன்னாள் நட்சத்திர புறச் சுழற்பந்துவீச்சாளருமான ஷேன் வோணும் இணைந்து ஓல்ட் ஸ்டார் இருபது-20 போட்டிகளில் பங்கேற்கவுள்ளனர்.

 

ஒலிம்பிக் போட்டிகளில் கிரிக்கெட்டை சேர்ப்பதற்காக சச்சின், வோர்ண் கோரிக்கை விடுத்தமையை அடுத்து சர்வதேச கிரிக்கெட் சபை தனது நிலைப்பாட்டை மாற்றிக்கொள்ள வேண்டிய நிலையில் உள்ளது. ஒலிம்பிக்கில் கிரிக்கெட்டை சேர்ப்பததால் உலகக்கிண்ணம், உலக இருபது-20 பாதிக்கப்படும் என்ற கொள்கையை சர்வதேச கிரிக்கெட் சபை முன்னர் கொண்டிருந்தது.

 

எதிர்வரும் 2024ஆம் ஆண்டு கோடைகால ஒலிம்பிக்கின் போது இருபது-20 கிரிக்கெட் போட்டிகள் உள்ளடக்கப்பட வேண்டும் என கடந்த ஜூலை மாதம் மெர்லிபோன் கிரிக்கெட் கழகத்தின் உலக கிரிக்கெட் சபை தெரிவித்திருந்தது.

ஆடுகளப் பராமரிப்பாளரை தூஷித்த ரவி ஷாஸ்திரி

 

மும்பை வன்கெடே மைதானத்தில் ஆடுகளப் பராமரிப்பாளரை, இந்திய கிரிக்கெட் அணியின் பணிப்பாளர் ரவி ஷாஸ்திரி, தூஷித்துள்ளதாகக் குற்றஞ்சாட்டப்பட்டுள்ளது. இதுகுறித்த முறைப்பாட்டை ஆடுகளப் பராமரிப்பாளரான சுதிர் நாயக், மும்பை கிரிக்கெட் சங்கத்தில் மேற்கொண்டுள்ளார்.

 

இந்திய, தென்னாபிரிக்க அணிகளுக்கிடையிலான 5ஆவது ஒருநாள் சர்வதேசப் போட்டியில் இந்திய அணி, மோசமான பெறுபேறுகளை வெளிப்படுத்தியிருந்த நிலையிலேயே இச்சம்பவம் இடம்பெற்றுள்ளதாகத் தெரிவிக்கப்படுகின்றது.

 

இப்போட்டியில் முதலில் துடுப்பெடுத்தாடிய தென்னாபிரிக்க அணி, 50 ஓவர்களில் 4 விக்கெட்டுகளை இழந்து 438 ஓட்டங்களைப் பெற்றது. இந்திய அணியால், 224 ஓட்டங்களையே பெற முடிந்தது.

 

இந்நிலையில், தென்னாபிரிக்க அணியின் இனிங்ஸ் முடிவில் சுதிர் நாயக்கை நோக்கிச் சென்ற ரவி ஷாஸ்திரியும் இந்திய அணியின் பந்துவீச்சுப் பயிற்றுநர் பி. அருணும், அவர் மீது வசைமாரி பொழிந்ததாகவும் தூஷண வார்த்தைகளைப் பயன்படுத்தியதாகவும் தெரிவிக்கப்படுகின்றது.

 

இதில் ரவி ஷாஸ்திரி, 'நல்ல ஆடுகளம். சிறப்பாகச் செயற்பட்டீர்கள்" எனக் கேலியாகத் தெரிவித்ததோடு, அதன் பின்னர் தூஷித்ததாகக் குற்றஞ்சாட்டப்பட்டுள்ளது. இதனைத் தொடர்ந்து, வாக்குவாதம் ஏற்பட்டுள்ளதாகத் தெரிவிக்கப்பட்டுள்ளது.

 

இச்சம்பவம் தொடர்பான முறைப்பாடு கிடைக்கப்பெற்றுள்ளதை உறுதிப்படுத்தியுள்ள மும்பை கிரிக்கெட் சபை, அக்கடிதத்தை இந்திய கிரிக்கெட் சபைக்கு முன்னகர்த்துவதாக இல்லையா என்பது தொடர்பில் முடிவெடுக்கப்படும் என்றார்.

 

இது தொடர்பில் கருத்துத் தெரிவித்துள்ள இந்திய கிரிக்கெட் கட்டுப்பாட்டுச் சபை, என்ன நடந்தது தொடர்பான முழுமையான விவரங்களை அறிந்த பின்னரே, நடவடிக்கை எடுப்பதா இல்லையா என்பது தொடர்பில் முடிவெடுக்கப்படும் எனத் தெரிவித்துள்ளது.

 

எனினும், தவறான வார்த்தைகளைப் பயன்படுத்தினார் என்ற குற்றச்சாட்டை மறுத்துள்ள ரவி ஷாஸ்திரி, 'நல்ல ஆடுகளம். சிறப்பாகச் செயற்பட்டீர்கள்" என மட்டுமே தெரிவித்ததாகத் தெரிவித்துள்ளார்.

 

இச்சம்பவம் தொடர்பான தனது கருத்தை வெளியிட்டுள்ள கிரிக்கெட் நேர்முக வர்ணனையாளரும் இந்திய முன்னாள் வீரருமான சஞ்சய் மஞ்ரெக்கர், முன்னாள் கிரிக்கெட் வீரரான சுதிர் நாயக்கையும் அவரது வயதையும் மதிக்க ரவி ஷாஸ்திரி தவறிவிட்டதாகக் குற்றஞ்சாட்டியுள்ளார்.

 

வெற்றிபெற்றபின் கிறிஸ் கெய்ன்ஸ் கவலை- ஹரிஸ்

 

கிறிஸ் கெய்ன்ஸூக்கெதிரான வழக்கு விசாரணைகள் இடம்பெற்றுவரும் நிலையில், அவருக்கெதிரான வாக்குமூலங்கள் பதிவுசெய்யப்பட்டு வருகின்றன.

 

இதன் ஓர் அங்கமாக, நியூசிலாந்து அணியின் முன்னாள் சகலதுறை வீரர் கிறிஸ் ஹரிஸ், தனது வாக்குமூலத்தை வழங்கினார்.

 

இந்தியன் கிரிக்கெட் லீக் தொடரின் போட்டிகளில், ஹைதரபாத்தில் இடம்பெற்ற போட்டியொன்றில் தங்களுடைய அணி வெற்றிபெற்றபோது, கிறிஸ் கெய்ன்ஸ் மகிழ்ச்சியாக இருந்திருக்கவில்லை எனத் தெரிவித்தார்.

 

சண்டிகார் அணியின் விக்கெட் காப்பாளரான சரப்ஜிட் சிங், 22 பந்துகளில் ஆட்டமிழக்காமல் 41 ஓட்டங்களைக் குவித்து, 2 விக்கெட்டுகளால் வெற்றிபெற்றுக் கொடுத்த போது, கிறிஸ் கெய்ன்ஸின் முகத்தில் வழக்கத்துக்கு மாறான, விநோதமான முகபாகம் காணப்பட்டதாக ஹரிஸ் தெரிவித்தார்.

 

சண்டிகார் அணிக்கு வழங்கப்பட்ட 136 என்ற இலக்கு, ஓரளவு இலகுவானது என வர்ணித்த ஹரிஸ், 13ஆவது ஓவரின் முடிவில் 6 விக்கெட்டுகளை இழந்து 70 ஓட்டங்களுடன் தடுமாறிய சண்டிகார் அணியை, சரப்ஜிட் சிங், மிகச்சிறப்பான இனிங்ஸொன்றின் மூலம் காப்பாற்றியிருந்ததாக ஞாபமூட்டினார். அத்தோடு, அப்போட்டியில், சில விநோதமான சம்பவங்கள் இடம்பெற்றதாகவும் அவர் குறிப்பிட்டார்.

 

இதற்கு முன்னர் வாக்குமூலம் வழங்கியிருந்த லூ வின்சென்ட்-உம், குறித்த போட்டியை, போட்டி நிர்ணயம் மேற்கொள்ளப்பட்ட போட்டியென அடையாளம் கண்டிருந்தமை குறிப்பிடத்தக்கது.