Category Archives: Quotes

‘டெஸ்டில் ஸ்மித்; ஒருநாளில் கோலி’

 

டெஸ்ட் போட்டிகளில், அவுஸ்திரேலிய கிரிக்கெட் அணியின் ஸ்டீவ் ஸ்மித் சிறந்தவர் என்றும் ஒருநாள் சர்வதேசப் போட்டிகளில் இந்திய கிரிக்கெட் அணியின் தலைவர் விராத் கோலி சிறந்தவர் எனவும் அவுஸ்திரேலிய கிரிக்கெட் அணியின் முன்னாள் தலைவர் மைக்கல் கிளார்க் தெரிவித்துள்ளார்.

 

டெஸ்ட் போட்டிகளில், 59.66 என்ற சராசரியை ஸ்டீவ் ஸ்மித் கொண்டிருக்க, 49.55 என்ற சராசரியை விராத் கோலி கொண்டிருக்கிறார்.

 

ஒருநாள் சர்வதேசப் போட்டிகளில், 55.75 என்ற சராசரியை விராத் கோலி கொண்டிருக்கையில், 44.26 என்ற சராசரியை ஸ்டீவ் ஸ்மித் கொண்டிருக்கிறார்.

வெட்கமடைகிறார் லாரா

1980களின் இறுதியிலும் 1990களின் ஆரம்பத்திலும், மேற்கிந்தியத் தீவுகள் அணி விளையாடிய விதத்தைப் பற்றி வெட்கமடைவதாக, மேற்கிந்தியத் தீவுகள் அணியின் முன்னாள் தலைவர் பிரையன் லாரா தெரிவித்துள்ளார்.

 

புகழ்பெற்ற, எம்.சி.சி கிரிக்கெட் உணர்வுக்கான கௌட்ரி கிரிக்கெட் விரிவுரையை, லோர்ட்ஸ் மைதானத்தில் ஆற்றிய போதே அவர் இவ்வாறு தெரிவித்தார்.

 

முதல்நிலை அணியாக இருந்த மேற்கிந்தியத் தீவுகள், விளையாட்டு உணர்வுகளுடன் விளையாட வேண்டிய பொறுப்பைக் கொண்டிருந்ததாக அவர் தெரிவித்தார்.

 

தற்போதைய நிலையில், ஆட்டமிழந்த துடுப்பாட்ட வீரர்கள், நடுவரின் தீர்ப்புக்குக் காத்திருக்காமல் வெளியேற வேண்டும் என்று கோரிய அவர், முன்னணி அணிகள், கிரிக்கெட் எவ்வாறு விளையாடப்பட வேண்டுமென்பதைக் காட்ட வேண்டிய பொறுப்பைக் கொண்டுள்ளன என்று தெரிவித்தார்.

துடுப்பாட்டம் குறித்து உபுல் தரங்க ஏமாற்றம்

இந்திய அணிக்கெதிரான ஒருநாள் சர்வதேசப் போட்டித் தொடரை இழந்தமை குறித்துத் தனது வருத்தத்தை வெளிப்படுத்திய இலங்கை அணியின் தலைவர் உபுல் தரங்க, இலங்கையின் துடுப்பாட்டம் குறித்து ஏமாற்றத்தை வெளிப்படுத்தினார்.

 

இந்தத் தொடரில், இலங்கைக்கும் இந்தியாவுக்கும் இடையில் என்ன வித்தியாசத்தை அவர் உணர்ந்தார் என்று கேட்கப்பட்டபோது, “தொடர்ச்சியான பெறுபேறுகளை வெளிப்படுத்த நாம் தவறியிருந்தோம். நாங்கள் சிறப்பாகத் துடுப்பெடுத்தாடியிருக்கவில்லை. நாங்கள் சிறப்பாகப் பந்துவீசியிருக்கவில்லை. நாங்கள் சிறப்பாகக் களத்தடுப்பில் ஈடுபட்டிருக்கவில்லை. தொடரில் நாங்கள், முற்றுமுழுதாகத் தோற்கடிக்கப்பட்டோம்.

 


“துடுப்பாட்டம் குறித்து ஏமாற்றமடைகிறேன். இந்திய அணி, தொடர்ச்சியான பெறுபேறுகளை வெளிப்படுத்தியது. பெரிய ஓட்ட எண்ணிக்கையைப் பெறத் தவறினோம்” என்று தெரிவித்தார்.
துடுப்பாட்ட வரிசையாக, இலங்கை அணி சிறப்பாகச் செயற்படவில்லை என்று குறிப்பிட்ட அவர், 5 போட்டிகளின் பின்னரும் ஒரு தடவை தானும் 250 ஓட்டங்களைப் பெறவில்லை என்பதைச் சுட்டிக்காட்டினார்.

 

இந்தத் தொடரில், இலங்கை அணி வெள்ளையடிக்கப்பட்டுள்ள நிலையில், அணித்தலைமைப் பொறுப்பிலிருந்து விலகுவதற்குத் திட்டமிடுகிறாரா எனக் கேட்கப்பட்ட போது, அதற்கான தேவை கிடையாது என்று அவர் தெரிவித்ததோடு, அடுத்த கட்டமாக எவ்வாறு முன்னேறிச் செல்வது என்பதை, தேர்வாளர்களே முடிவுசெய்வர் என்று குறிப்பிட்டார்.

 

இதேவேளை, அடுத்த 6 மாதங்களுக்கு, டெஸ்ட் போட்டிகளில் பங்குபற்றப் போவதில்லை என, உபுல் தரங்க, இலங்கை கிரிக்கெட் சபைக்கு அறிவித்துள்ளார். ஒருநாள் சர்வதேச கிரிக்கெட் போட்டிகளில் கவனஞ்செலுத்துவதற்காகவே, அவர் இந்த முடிவை எடுத்துள்ளார் எனக் கருதப்படுகிறது.

 

’40 வயதுவரை ஏன் விளையாட முடியாது?’

இங்கிலாந்து அணியின் வேகப்பந்து வீச்சாளரான ஜேம்ஸ் அன்டர்சனுக்கு, தற்போது 35 வயதாகின்ற நிலையில், அவரது ஓய்வுக்காலம் குறித்து ஏனையோர் சிந்திக்க ஆரம்பித்துள்ள நிலையில், அதுபற்றிச் சிந்திக்க ஆரம்பிக்கவில்லை என, அவர் தெரிவித்துள்ளார்.

 

தற்போது 497 டெஸ்ட் விக்கெட்டுகளுடன் காணப்படும் அன்டர்சன், 500 டெஸ்ட் விக்கெட்டுகளைக் கைப்பற்றிய 3ஆவது வேகப்பந்து வீச்சாளராக மாறக் காத்திருக்கிறார்.

 

இந்நிலையில் கருத்துத் தெரிவித்துள்ள அவர், "40 வயதுவரை என்னால் விளையாட முடியாது என்பதற்கு, எந்தக் காரணமும் இல்லை. எனது கிரிக்கெட் வாழ்வில், நான் உச்சபட்ச திறமையுள்ள பந்துவீச்சாளராகவும் சிறப்பான தொடர்ச்சியுடன் பந்துவீசுபவராகவும், தற்போதே உள்ளேன். 

 

"2020-21இல் இடம்பெறவுள்ள ஆஷஸ் தொடரில் நான் விளையாட மாட்டேன் என, என்னால் கூற முடியாது. நான் கொண்டிருக்கும் உடலைக் கொண்டிருப்பதற்கு, நான் அதிர்ஷ்டசாலி" எனக் குறிப்பிட்டுள்ளார்.

ஜோடி குறித்து றென்ஷோவுக்கு நம்பிக்கை

அவுஸ்திரேலிய அணியின் ஆரம்பத் துடுப்பாட்ட வீரர்களான டேவிட் வோணர், மற் றென்ஷோ இருவரும், ஒருவருக்கொருவர் மாறுபட்ட விளையாடும் பாணியைக் கொண்டுள்ள போதிலும், இந்த ஜோடி குறித்து நம்பிக்கையுடன் இருப்பதாக, றென்ஷோ குறிப்பிட்டார்.

 

வோணர், மிகவும் அதிரடியாக விளையாடக் கூடியவர் என்பதோடு, குள்ளமானவர். றென்ஷோ, பொறுமையுடன் விளையாடக் கூடியவர் என்பதோடு, மிகவும் உயரமானவர்.

 

இந்த உயர மாற்றத்துக்கு ஏற்ப பந்துவீசுவது, பந்துவீச்சாளர்களுக்குக் கடினமாக இருக்குமென எதிர்பார்ப்பதாக, றென்ஷோ குறிப்பிட்டார்.

 

ஆஷஸ் தொடர், மிகவும் சுவாரசியமானதாக இருக்குமென எதிர்பார்க்கின்ற போதிலும், சிட்டகொங்கில் இடம்பெறவுள்ள அடுத்த டெஸ்ட் போட்டியில் வெற்றிபெறுவதைப் பற்றிக் கவனஞ்செலுத்த வேண்டியிருப்பதாகவும் அவர் குறிப்பிட்டார்.

‘தலைமை தாங்கத் தயார்’

3 வகையான கிரிக்கெட் போட்டிகளிலும் தலைமை தாங்கத் தயாராக இருப்பதாக, தென்னாபிரிக்க அணியின் தலைவர் ஃபப் டு பிளெஸி தெரிவித்துள்ளார்.

 

தென்னாபிரிக்க டெஸ்ட், இருபதுக்கு-20 சர்வதேசப் போட்டிகளின் அணித்தலைவராக, ஃபப் டு பிளெஸி செயற்பட்டு வருகிறார்.

 

ஒருநாள் சர்வதேசப் போட்டிகளின் தலைவர் ஏபி டி வில்லியர்ஸ், அப்பதவியிலிருந்து விலகுவதாக அறிவித்ததைத் தொடர்ந்து, அப்பதவிக்கு வெற்றிடம் ஏற்பட்டுள்ளது. அந்தப் பதவியை வகிக்கக் கூடிய அதிக வாய்ப்புள்ளவர்களில் ஒருவராக, ஃபப் டு பிளெஸி கருதப்படுகிறார்.

 

இந்நிலையிலேயே, 3 வகையான போட்டிகளிலும் தலைவராகச் செயற்படத் தயாராக இருப்பதாக, அவர் குறிப்பிட்டுள்ளார். 

 

அத்தோடு, தலைவராகச் செயற்படும் போது, தனது உச்சபட்ச திறமை வெளிப்படுவதாகவும் அவர் கூறியுள்ளார்.

‘திட்டப்படி எதுவும் நடக்கவில்லை’

இந்திய அணிக்கெதிரான 3ஆவது ஒருநாள் சர்வதேசப் போட்டியில், தாங்கள் வகுத்த திட்டப்படி எதுவும் நடக்கவில்லை என, அப்போட்டியில் இலங்கை அணியின் தலைவராகச் செயற்பட்ட சாமர கப்புகெதர தெரிவித்துள்ளார்.

 

பல்லேகெலவில் இடம்பெற்ற இப்போட்டியில், நாணயச் சுழற்சியில் வெற்றிபெற்று முதலில் துடுப்பெடுத்தாடிய இலங்கை அணி, 50 ஓவர்களில் 9 விக்கெட்டுகளை இழந்து 217 ஓட்டங்களை மாத்திரம் பெற்றது. லஹிரு திரிமான்ன மாத்திரம் போராடி, 80 ஓட்டங்களைப் பெற்றார். இந்தியாவின் பும்ரா, 5 விக்கெட்டுகளைக் கைப்பற்றினார்.

 

இந்திய அணி பதிலளித்தாடும் போது, 4 விக்கெட்டுகளை இழந்து 61 ஓட்டங்களுடன் சிறிதளவு தடுமாறிய போதிலும், றோகித் ஷர்மாவின் சதம், மகேந்திரசிங் டோணியின் அரைச்சதம் ஆகியவற்றின் உதவியுடன், 6 விக்கெட்டுகளால் வெற்றிபெற்றது.

 

தோல்வி தொடர்பாகக் கருத்துத் தெரிவித்த கப்புகெதர, “எங்கள் திட்டங்களுக்கேற்ப விடயங்கள் நடக்கவில்லை. மத்திய ஓவர்களில், ஓட்டங்கள் பெறப்படாத பந்துகளை அதிகம் விளையாடாமலிருக்கத் திட்டமிட்டோம். ஆனால், சரிவர நடக்கவில்லை. 260 தொடக்கம் 275 வரையான ஓட்டங்கள், சவால்மிக்க ஓட்டங்களாக அமைந்திருக்கும்” என்று தெரிவித்தார்.

 

வழக்கமான தலைவர் உபுல் தரங்கவுக்கு விதிக்கப்பட்ட 2 போட்டித் தடையைத் தொடர்ந்து, இந்தப் போட்டியில், முதன்முறையாக அணித்தலைமைப் பொறுப்பை ஏற்ற கப்புகெதர, தலைமைத்துவம் தொடர்பாகக் கருத்துத் தெரிவிக்கும் போது, “அணித்தலைமையை மகிழ்வாக உணர்ந்தேன். அழுத்தமாக இருந்தது, ஆனால் அதை நான் மகிழ்வுடன் அனுபவித்தேன். அடுத்த போட்டியில், நாங்கள் வெற்றிபெற முடியுமென நம்புகிறேன்” என்று தெரிவித்தார்.

 

ஏற்கெனவே, உபுல் தரங்க இல்லாமலுள்ள இலங்கை அணி, டெஸ்ட் அணியின் தலைவர் டினேஷ் சந்திமால், இப்போட்டியில் விரல் முறிவுக்கு உள்ளாகி, இந்தியாவுக்கு எதிரான தொடர் முழுவதும் பங்குபற்ற முடியாமல் போனதைத் தொடர்ந்து, அதிகரித்த அழுத்தத்தைச் சந்தித்துள்ளது.

 

ஆனால், 3-0 என்ற கணக்கில் இந்தத் தொடரில், அசைக்க முடியாத முன்னிலையைப் பெற்றுள்ள இந்திய அணி, அடுத்த போட்டிகளில், புதிய வீரர்களுக்கு வாய்ப்புகளை வழங்கலாம் என எதிர்பார்க்கப்படுகிறது. அவ்வாறான நிலையிலாவது, இலங்கை அணி, வெற்றியைப் பெற்றுக் கொள்ளுமா என, இரசிகர்கள் எதிர்பார்க்கின்றனர்.

சபையையும் தேர்வாளர்களையும் விமர்சிக்கிறார் இலங்கைப் பயிற்றுநர்

இலங்கை கிரிக்கெட் அணி, அண்மைக்காலமாகவே தோல்விகளைச் சந்தித்துவரும் நிலையில், அதன் நிலைமை குறித்து, அணியின் இடைக்காலப் பயிற்றுநர் நிக் போதாஸ், இலங்கை கிரிக்கெட் சபை, அணியின் தேர்வாளர்கள் ஆகியோர் மீது, கடுமையான விமர்சனங்களை முன்வைத்துள்ளார்.

 

இவ்வாண்டில், தென்னாபிரிக்காவில் வைத்து தென்னாபிரிக்காவுக்கு எதிராகத் தோல்வியடைந்த இலங்கை அணி, அதன் பின்னர் பங்களாதேஷ், சிம்பாப்வே அணிகளுக்கெதிராகவும் குறிப்பிடும் படியான தோல்விகளைப் பெற்றுக் கொண்டது. பின்னர், இந்தியாவுக்கெதிரான டெஸ்ட் தொடரை 0-3 என்ற கணக்கில் இழந்த அவ்வணி, தற்போது முதலாவது ஒருநாள் சர்வதேசப் போட்டியிலும் தோல்வியடைந்துள்ளது.

 

இந்நிலையில், அண்மையகாலத் தோல்விகள் தொடர்பில் கருத்துத் தெரிவித்த போதாஸ், "உங்களுக்குக் கோபம் வரும் தான். ஓட்டைக் கப்பலுக்கு ஒன்பது மாலுமிகள் என்பது, அநேகமாகப் பொருத்தமானது தான்" என, அதிக தலையீடு காணப்படுகிறது என்பதை அவர் வெளிப்படுத்தினார்.

 

"உங்களுக்கு எரிச்சல் வரும் தான். வீரர்களுடன் எனக்குக் கோபம் இருக்கிறதா? இல்லவே இல்லை. எவ்வளவு முடியுமோ, அவ்வளவுக்குக் கடினமாக அவர்கள் உழைக்கின்றனர். உதவும் பயிற்றுநர்கள், மிகச்சிறப்பாக உள்ளனர். திட்டமிடுதலுக்கும் வீரர்களுக்கு உதவுவதிலும், அவர்கள் அளவுகணக்கின்றிச் செயற்படுகின்றனர். அணி அறைக்குள் இருப்பவர்கள் யாரிலும் நீங்கள் குறைகாண முடியாது" என்று தெரிவித்தார்.

 

தொடர்ந்து கருத்துத் தெரிவித்த அவர், "இவர்கள், அற்புதமான திறமை படைத்த வீரர்கள். அவர்களுக்கு நீங்கள் சிறிதளவு நேரம் வழங்கி, சிறிதளவு அன்பு வழங்கி, சிறிதளவு பரிவு வழங்கி, அந்த நம்பிக்கையை வளர்த்தால், முடிவுகளை நீங்கள் பெற முடியும்" என்று குறிப்பிட்டார்.

 

கடந்தாண்டு மே மாதத்திலிருந்து, ஒருநாள் சர்வதேசப் போட்டிகளில், இலங்கை அணி சார்பாக 40 வீரர்கள் விளையாடியுள்ளனர். இது, வீரர்கள் அடிக்கடி மாற்றப்படுவதைக் காட்டுகிறது.

 

இது தொடர்பாகக் கருத்துத் தெரிவித்த போதாஸ், "அணி வீரர்கள் தெரிவில் தொடர்ச்சியான தன்மையை நீங்கள் பெற்றால், பெறுபேறுகளில் முன்னேற்றத்தைக் காண முடியும். ஒவ்வொரு போட்டியிலும், புதிய வீரர்களை நாங்கள் பெறும் போது, நம்பிக்கை என்ற விடயத்தில், அது கடினமாகப் போய்விடுகிறது. வீரர்களின் விடயத்தில், அது கடினமானது. பயிற்றுநர்கள் விடயத்திலும், அது கடினமானது" என்று தெரிவித்தார்.

 

இலங்கை அணியின் பயிற்றுநராக இருந்த கிரஹம் ஃபோர்ட், அணி முகாமைத்துவத்துடன் முரண்பட்டு, அண்மையில் தனது பதவியை இராஜினாமா செய்திருந்தார். அவரின் பின்னரேயே, நிக் போதாஸ் நியமிக்கப்பட்டார்.

 

தனக்குக் காணப்பட்ட பிரச்சினைகள் தொடர்பாக, வெளிப்படையாக ஃபோர்ட் கதைக்கவில்லை என்றாலும் கூட, நிக் போதாஸ், அவ்விடயம் தொடர்பாகக் கருத்து வெளியிட்டுள்ளமை குறிப்பிடத்தக்கது.

‘சமூக ஊடகத்தள விமர்சனங்களை கணக்கில் எடுக்காதீர்கள்’

 

அண்மைக்காலமாகத் தோல்விகளைச் சந்தித்துவரும் இலங்கை கிரிக்கெட் அணியின் வீரர்கள், சமூக ஊடக இணையத்தளங்களிலும் ஏனைய இணையத்தளங்களிலும் வெளிவரும் கேலிகளைப் பொருட்படுத்தக் கூடாது என, அணியின் வழிகாட்டியும் முன்னாள் தலைவருமான அரவிந்த டி சில்வா, அவ்வீரர்களுக்கு ஆலோசனை வழங்கியுள்ளார்.

 

தொடர்ச்சியான தோல்விகளுக்கு மத்தியில், இந்தியாவுக்கெதிரான 2ஆவது டெஸ்ட் போட்டியிலும், இலங்கை அணி ஓர் இனிங்ஸ் மற்றும் 53 ஓட்டங்களால் தோல்வியடைந்திருந்தது. முதலாவது போட்டியில், 304 ஓட்டங்களால் தோல்வியடைந்திருந்தது.

 

இந்நிலையில், 3ஆவது டெஸ்ட் போட்டிக்கு முன்னதான கலந்துரையாடல் ஒன்று, இலங்கை கிரிக்கெட் சபையில், நேற்று முன்தினம் மாலை இடம்பெற்றது.

 

அதன்போது கருத்துத் தெரிவித்த அரவிந்த டி சில்வா, நம்பிக்கையுடன் காணப்பட வேண்டுமெனவும், தங்களுக்கான பலத்தின் அடிப்படையில் விளையாட வேண்டுமெனவும் குறிப்பிட்டார். அத்தோடு, இளைய வீரர்களை, திறமையிலும் திறன்களிலும் கவனம் செலுத்துமாறும், சமூக ஊடக இணையத்தளங்கள் மூலமாகவும் "கொசிப்" இணையத்தளங்கள் மூலமாகவும் அவர்களை நம்பிக்கையிழக்கச் செய்யும் தரப்பினர் காரணமாக நம்பிக்கையிழக்க வேண்டாமெனவும் கூறினார். இது, அண்மைக்காலத்தில் இலங்கை அணி மீது அதிகரித்துள்ள அழுத்தத்தை வெளிக்காட்டுவதாக அமைந்திருந்தது.

 

குறிப்பாக, தேசிய கொள்கைகள் மற்றும் பொருளாதார விவகாரங்களுக்கான பிரதியமைச்சர் ஹர்ஷ டி சில்வா, இந்திய அணித் தலைவர் விராத் கோலியைச் சந்தித்த புகைப்படத்தைப் பகிர்ந்ததோடு, "அடுத்த டெஸ்டில், இலங்கை மீது சிறிது மென்மையாகச் செயற்படுமாறு, விராத் கோலியிடம் தெரிவித்தேன். 600 [ஓட்டங்கள்] என்பது சிறிது அதிகமானது" என்று குறிப்பிட்டிருந்ததார். இலங்கை அணிக்கெதிராக, இந்திய அணி, தொடர்ச்சியாக 600 ஓட்டங்களைப் பெற்று வருவதையே, அவர் அவ்வாறு சுட்டிக்காட்டினார்.

 

அவர் அதை நகைச்சுவைக்காகவே பகிர்ந்திருந்தாலும், சமூக ஊடக இணையத்தளங்களில், இலங்கை அணி, எந்தளவுக்குக் கேலியை எதிர்கொள்கிறது என்பதை, அந்தப் பகிர்வு வெளிப்படுத்தியிருந்தது. இந்நிலையில் தான், சமூக ஊடக இணையத்தளங்களைக் கணக்கிலெடுக்க வேண்டாம் என்ற அறிவுரை, வீரர்களுக்கு வழங்கப்பட்டுள்ளது.

‘விக்கெட்டுகளை கைப்பற்ற அவரால் முடியும்’

 

“டெஸ்ட் போட்டியொன்றில் நான்காவது இனிங்ஸில், நாங்கள் விக்கெட்டுகளைக் கைப்பற்ற வேண்டும் எனும் போது, அவரால் செய்ய முடியும்” என மொயின் அலியை, இங்கிலாந்தின் டெஸ்ட் போட்டிகளுக்கான அணித்தலைவர் ஜோ றூட் புகழ்ந்துள்ளார்.

 

மொயின் அலியின் ஹட்-ட்ரிக் உடன் தென்னாபிரிக்காவை வென்ற இங்கிலாந்து, நான்கு போட்டிகள் கொண்ட டெஸ்ட் தொடரில் 2-1 என்ற ரீதியில் முன்னிலை பெற்றுக் கொண்டது.

 

இரண்டாவது போட்டியில் 340 ஓட்டங்களால் தோல்வியடைந்ததைத் தொடர்ந்து, பலத்த விமர்சனங்களுக்கான இங்கிலாந்து அணி, இந்த வெற்றியுடன் தலைநிமிர்ந்து கொண்டது.

 

ஐக்கிய இராச்சியத் தலைநகர் இலண்டனில் அமைந்துள்ள, 127 ஆண்டு கால வரலாறு கொண்ட ஓவல் மைதானத்தில், தமது 100ஆவது டெஸ்ட் போட்டியில் இங்கிலாந்து விளையாடிய நிலையில், ஓவல் மைதானத்தில், டெஸ்ட் போட்டிகளில் கைப்பற்றப்பட்ட முதலாவது ஹட்-ட்ரிக்காக மொயின் அலியின் ஹட்ரிஜ் அமைந்தது.

 

இதேவேளை, எந்தவொரு கிரிக்கெட் போட்டிகளிலும் ஹட்-ட்ரிக்கைக் கைப்பற்றியிருக்காத மொயின் அலிக்கு, ஹட்-ட்ரிக்கை கைப்பற்றியமையானது, வித்தியாசமான அனுபவத்தை வழங்கியிருந்தது.

 

இந்நிலையில் கருத்துத் தெரிவித்த றூட், அழுத்தம் குறைந்த வேளைகளில் மொயின் அலி சிறப்பாகச் செயற்படுவதாகக் கூறியுள்ளார்.

 

இதுதவிர, இரண்டாவது போட்டியில் பெற்ற மோசமான தோல்வியைத் தொடர்ந்து வீரர்கள் மீண்டு வந்தமையையும் றூட் பாராட்டியுள்ளார். தவிர, இந்தப் பெறுபேறுகளை அடுத்த போட்டியில் தொடர வேண்டும் என றூட் கூறியுள்ளார்.