Category Archives: Specials

சம்பியன்ஸ் லீக்: இலங்கைக் குழாம் அறிவிப்பு

 

ங்கிலாந்திலும் வேல்ஸிலும் இடம்பெறவுள்ள சம்பியன்ஸ் லீக் கிரிக்கெட் தொடருக்காக இலங்கைக் குழாம் அறிவிக்கப்பட்டுள்ளது.

வழக்கமான தலைவர் அஞ்சலோ மத்தியூஸின் தலைமையில், 15 பேர் கொண்ட குழாமாக அறிவிக்கப்பட்டுள்ள இக்குழாமின் உப தலைவராக, உபுல் தரங்க நியமிக்கப்பட்டுள்ளார்.

குழாம்:

அஞ்சலோ மத்தியூஸ், உபுல் தரங்க, நிரோஷன் டிக்வெல்ல, குசல் ஜனித் பெரேரா, குசல் மென்டிஸ், சாமர கப்புகெதர, அசேல குணரட்ன, டினேஷ் சந்திமால், லசித் மலிங்க, சுரங்க லக்மால், நுவான் பிரதீப், நுவான் குலசேகர, திஸர பெரேரா, லக்‌ஷன் சந்தகான், சீக்குகே பிரசன்ன.

இவர்களுக்கு மேலதிகமாக, இத்தொடரில் டில்ருவான் பெரேரா, தனுஷ்க குணதிலக ஆகியோர், மேலதிக வீரர்களாகச் செயற்படுவர்.

இவர்கள் தவிர, விகும் சஞ்சய, லஹிரு குமார, சச்சித் பத்திரண, மிலிந்த சிரிவர்தன, அகில தனஞ்சய ஆகிய 5 வீரர்களும், மேலதிக வீரர்களாக, கொழும்பில் பயிற்சிகளைப் பெற்றுக் கொண்டிருப்பர். தேவையேற்படின், இங்கிலாந்து அல்லது வேல்ஸுக்கு அனுப்பிவைக்கப்படுவர்.

பி.சி.சி.ஐ தலைவர், செயலாளர் நீக்கம்

 

இந்திய கிரிக்கெட் கட்டுப்பாட்டுச் சபையின் (பி.சி.சி.ஐ) தலைவர் அநுரக் தாக்கூர், செயலாளர் அஜய் ஷேர்க்கே ஆகியோர், அவர்களது பதவிகளிலிருந்து அதிரடியாக நீக்கப்பட்டுள்ளனர். புதுடெல்லியில் இன்று காலை இடம்பெற்ற உச்சநீதிமன்ற அமர்விலேயே, உச்சநீதிமன்றத்தால் இவர்கள் நீக்கப்பட்டனர்.

 

"தற்போதிருந்து, இந்திய கிரிக்கெட் கட்டுப்பாட்டுச் சபையின் தலைவர், செயலாளர் ஆகியோர், சபையின் எந்தப் பணிகளிலும் ஈடுபடத் தடை விதிக்கப்படுவதற்கான உத்தரவை, உச்சநீதிமன்றம் விடுக்கிறது" என, தீர்ப்புத் தெரிவித்தது.

 

இந்திய கிரிக்கெட் கட்டுப்பாட்டுச் சபையின் சீர்திருத்தங்களை ஏற்படுத்துவதற்காக, அந்நீதிமன்றத்தால் நியமிக்கப்பட்ட லோதா செயற்குழுவால் முன்வைக்கப்பட்ட பரிந்துரைகளை ஏற்றுக் கொள்வதற்கு, கிரிக்கெட் சபை தயங்கி வந்தது. சில பரிந்துரைகளை ஏற்ற போதிலும், முக்கியமான சில பரிந்துரைகளையே, அச்சபை ஏற்க மறுத்தது.

 

குறிப்பாக, 70 வயதுக்கு மேற்பட்டோர், சபையிலோ அல்லது மாநில சபைகளிலோ பதவி வகிக்கக்கூடாது; இரண்டு தடவைகள் தொடர்ச்சியாகப் பதவி வகிக்கக்கூடாது; அரசியல் சார்புடையோர் பதவி வகிக்கக்கூடாது உள்ளிட்ட சில கோரிக்கைகள், அச்சபையினால் எதிர்க்கப்பட்டன.

 

இதைத் தொடர்ந்து, நீதிமன்ற உத்தரவைப் பின்பற்றாத குற்றச்சாட்டு, கிரிக்கெட் சபை மீது முன்வைக்கப்பட்டது. அதற்கான விசாரணைகள் இடம்பெறும் போது, மாநில சபைகளுக்கு நிதியளிப்புக்குத் தடை உள்ளிட்ட சில கட்டுப்பாடுகள் விதிக்கப்பட்ட போதிலும், நாளாந்த நடவடிக்கைகளுக்குத் தடை விதிக்கப்படவில்லை.

 

இந்நிலையில், இன்று இடம்பெற்ற அமர்வில், இது தொடர்பில் மீண்டும் ஆராயப்பட்டது. பிரதம நீதியரசர் டி.எஸ்.தாக்கூர், நீதியரசர்களான ஏ.எம்.கான்வில்கர், டி.வை.சந்திசூட் ஆகியோர் அடங்கிய அமர்வே, இந்த வழக்கை ஆராய்ந்தது.

 

இதன்போதே, லோதா செயற்குழுவின் பரிந்துரைகளை நிறைவேற்றுவதில் "தடையாக"ச் செயற்பட்ட தலைவரும் செயலாளரும் பதவி நீக்கப்பட வேண்டுமென்ற லோதா செயற்குழுவின் பரிந்துரை ஏற்கப்பட்டது.

 

குறித்த பரிந்துரைகள், நடைமுறைப்படுத்தப்பட வேண்டுமென நீதிமன்றம் அறிவித்த பின்னர், அதை நடைமுறைப்படுத்த வேண்டிய கடப்பாடு, இந்திய கிரிக்கெட் கட்டுப்பாட்டுச் சபைக்குக் காணப்பட்டதோடு, அதை மீறும் வகையில், அச்சபை செயற்பட்டு வந்தது.

 

தலைவரும் செயலாளரும் பதவி விலக்கப்பட்ட பின்னர், லோதா செயற்குழுவால் வழங்கப்பட்டுள்ள தகுதித் தேவைப்பாடுகளைப் பூர்த்திசெய்யும் சிரேஷ்ட உப தலைவர், புதிய இடைக்காலத் தலைவராகத் தெரிவுசெய்யப்பட வேண்டுமென, நீதிமன்றம் அறிவித்துள்ளது. இணை செயலாளராக இருந்த அமிதாப் சௌதரி, இடைக்காலச் செயலாளராகப் பதவியேற்க வேண்டும்.

 

ஆனால், இவர்களிருவரும் உத்தியோகபூர்வமாகப் பதவியேற்க முன்னர், லோதா செயற்குழுவின் பரிந்துரைகளை ஏற்க வேண்டுமென நீதிமன்றத்தால் வழங்கப்பட்ட உத்தரவைப் பின்பற்றவுள்ளதாக, அவர்கள் உறுதியளிக்க வேண்டுமென அறிவிக்கப்படுகிறது.

 

சபையின் பிரதம நிறைவேற்று அதிகாரி ராகுல் ஜோரி, சபையின் நாளாந்த நடவடிக்கைகளுக்குப் பொறுப்பாகச் செயற்படுவார். லோதா செயற்குழுவின் பரிந்துரைகள் அனைத்தும் நடைமுறைப்படுத்தப்பட்ட பின்னர், புதிய அதிகாரிகள் பதவியேற்பர். அவர்கள் பதவியேற்கும் வரை, பதவி வகிக்கவுள்ள நிர்வாகிகளைக் கண்காணிப்பதற்காக, குழுவொன்றும் நியமிக்கப்படவுள்ளது.

 

உச்சநீதிமன்றத்தில் இந்த அதிரடித் தீர்ப்பு, நாளாந்த கிரிக்கெட் நடவடிக்கைகளில் பாதிப்பை ஏற்படுத்தாது எனக் கருதப்படுகிறது. இங்கிலாந்துக்கெதிரான மட்டுப்படுத்தப்பட்ட ஓவர்கள் தொடர், ஜனவரி 15ஆம் திகதி ஆரம்பிக்கவுள்ளது. அதற்கான முழுமையான நிதி ஒதுக்கீடுகளும், நீதிமன்றத்தால் அங்கிகரிக்கப்பட்டுள்ளன.

 

இந்தத் தீர்ப்புத் தொடர்பாகக் கருத்துத் தெரிவித்த அநுரக் தாக்கூர், "இந்திய கிரிக்கெட்டுக்குச் சேவையாற்றும் கௌரவம், எனக்குக் காணப்பட்டது. கடந்த சில ஆண்டுகளாக, நிர்வாகம், விளையாட்டின் அபிவிருத்தி போன்வற்றைக் கருத்திற் கொள்ளும் போது, இந்திய கிரிக்கெட்டின் சிறப்பான காலங்களாக அமைந்தன. வரையறுக்கப்பட்டநடைமுறைகளைக் கொண்டு, நாட்டில் சிறப்பாக முகாமை செய்யப்படும் விளையாட்டு அமைப்பாக, இந்திய கிரிக்கெட் சபையே காணப்படுகிறது.

 

"என்னைப் பொறுத்தவரை. இது தனிப்பட்ட போராட்டமாக இருக்கவில்லை. விளையாட்டு அமைப்பொன்றின் சுயாதீனத்துக்கான போராட்டமே இல்லை. பிரஜை ஒருவர் செய்ய வேண்டியதைப் போன்று, உச்சநீதிமன்றத்தை நான் மதிக்கிறேன். ஓய்வுபெற்ற நீதிபதிகளின் கீழ், இந்திய கிரிக்கெட் சபை சிறப்பாகச் செயற்படுமென, உச்சநீதிமன்ற நீதியரசர்கள் உணர்கிறார்கள். அவர்களுக்கு எனது வாழ்த்துகள்" எனத் தெரிவித்தார்.

முதலிரு இடங்களில் சுழற்பந்துவீச்சு ஜோடி

 

இந்திய டெஸ்ட் அணியின் பிரதான சுழற்பந்து வீச்சாளர்களான இரவிச்சந்திரன் அஷ்வின், இரவீந்திர ஜடேஜா இருவரும், சர்வதேச கிரிக்கெட் சபையின் டெஸ்ட் பந்துவீச்சாளர்களுக்கான தரப்படுத்தலில், முதலிரு இடங்களையும் பிடித்துள்ளனர்.

 

இங்கிலாந்து அணிக்கெதிரான 5ஆவது டெஸ்ட் போட்டியில், ஜடேஜா கைப்பற்றிய 10 விக்கெட்டுகளைத் தொடர்ந்தே, இரண்டாவது இடத்தை அவர் பிடித்துள்ளார். இதன்மூலம், 1974ஆம் ஆண்டு பிஷன் சிங் பேடி, பக்வத் சந்திரசேகர் இருவரும் முதலிரு இடங்களையும் பிடித்த பின்னர், இந்திய வீரர்கள் இருவர் இவ்வாறு பந்துவீச்சில் முதலிரு இடங்களையும் பிடிப்பது, இதுவே முதன்முறையாகும்.

 

5ஆவது போட்டி ஆரம்பிக்கும் போது 6ஆவது இடத்தில் காணப்பட்ட ஜடேஜா, 4 இடங்கள் முன்னேறி, இந்த முன்னிலையைப் பெற்றுள்ளார்.

 

துடுப்பாட்ட தரவரிசை: (முதல் 10 இடங்கள்)
ஸ்டீவன் ஸ்மித், விராத் கோலி, ஜோ றூட், கேன் வில்லியம்ஸன், ஹஷிம் அம்லா, ஏபி.டி.வில்லியர்ஸ், டேவிட் வோணர், யுனிஸ் கான், செற்றேஸ்வர் புஜாரா, ஜொனி பெயர்ஸ்டோ.

 

பந்துவீச்சுத் தரவரிசை: (முதல் 10 இடங்கள்)
இரவிச்சந்திரன் அஷ்வின், இரவீந்திர ஜடேஜா, ரங்கன ஹேரத், டேல் ஸ்டெய்ன், ஜேம்ஸ் அன்டர்சன், மிற்சல் ஸ்டார்க், ஜொஷ் ஹேஸல்வூட், ஸ்டுவேர்ட் ப்ரோட், நீல் வக்னர், யாசீர் ஷா.

 

சகலதுறை வீரர்கள் தரவரிசை: (முதல் 5 இடங்கள்)
இரவிச்சந்திரன் அஷ்வின், ஷகிப் அல் ஹஸன், இரவீந்திர ஜடேஜா, பென் ஸ்டோக்ஸ், மொய்ன் அலி.

மே.தீவுகளுக்கெதிராக இலங்கைக்குத் த்ரில் வெற்றி

 

இலங்கை, சிம்பாப்வே, மேற்கிந்தியத் தீவுகள் பங்கேற்கும் முத்தரப்பு ஒருநாள் சர்வதேசப் போட்டித் தொடரில், இலங்கை – மேற்கிந்தியத் தீவுகள் அணிகளுக்கிடையே புலவாயோவில் இன்று புதன்கிழமை (23) இடம்பெற்ற போட்டியில், மயிரிழையில் ஓர் ஓட்டத்தால் வெற்றி பெற்ற இலங்கையணி, இத்தொடரின் இறுதிப் போட்டிக்குத் தகுதி பெற்றது.

 

நாணயச் சுழற்சியில் வெற்றி பெற்ற மேற்கிந்தியத் தீவுகளின் அணித்தலைவர் ஜேஸன் ஹோல்டர், தமது அணி முதலில் களத்தடுப்பில் ஈடுபடும் என அறிவித்தார்.

 

அந்தவகையில், முதலில் துடுப்பெடுத்தாடிய இலங்கையணி, 50 ஓவர்களில் ஏழு விக்கெட்டுகளையிழந்து 330 ஓட்டங்களைப் பெற்றது. துடுப்பாட்டத்தில், இலங்கையணி சார்பாக குசல் மென்டிஸ் 94(73), நிரோஷன் டிக்வெல்ல 94(106), தனஞ்சய டி சில்வா 58(60) ஓட்டங்களைப் பெற்றனர். பந்துவீச்சில், மேற்கிந்தியத் தீவுகள் அணி சார்பாக ஜேஸன் ஹோல்டர் மூன்று விக்கெட்டுகளைக் கைப்பற்றினார்.

 

331 ஓட்டங்கள் என்ற வெற்றியிலக்கோடு துடுப்பெடுத்தாடிய மேற்கிந்தியத் தீவுகள் அணி, 50 ஓவர்கள் முடிவில் ஒன்பது விக்கெட்டுகளையிழந்து 329 ஓட்டங்களை மாத்திரமே பெற்று ஓர் ஓட்டத்தால் தோல்வியடைந்தது.

 

இரண்டு விக்கெட்டுகள் கைவசம் இருந்த நிலையில், இறுதி ஓவரில் 10 ஓட்டங்களைப் பெற்றால் வெற்றி என இருந்தது. இறுதி ஓவரை நுவான் பிரதீப் வீசினார். யோக்கர் முறையான முதலாவது பந்தில் ஒரு ஓட்டத்தையே ஹோல்டர் பெற்றார். இரண்டாவது பந்தில் ஓட்டமெதுவையும் பெறாத சுலைமான் பென், மூன்றாவது பந்தில் ஆறு ஓட்டங்களைப் பெற்றார். எனவே மூன்று பந்துகளில் மூன்று ஓட்டங்களைப் பெற்றால் வெற்றி என்ற நிலை காணப்பட்டது.

 

இந்நிலையில், நான்காவது பந்தில் ஓட்டமெதுவையும் பெறாத பென், ஐந்தாவது பந்தில் ஆட்டமிழந்தார். ஆக, இறுதிப் பந்தில் மூன்று ஓட்டங்கள் பெற்றால் வெற்றி என்ற நிலை காணப்பட்டது. இந்த நிலையில், நடு விக்கெட்டினை இலக்கு வைத்து பிரதீப் வீசிய யோக்கர் முறைமையிலான பந்தில், ஹோல்டரினால் ஓர் ஓட்டம் மாத்திரமே பெறப்பட, ஓர் ஓட்டத்தினால் இலங்கையணி த்ரில் வெற்றி பெற்றது.

 

துடுப்பாட்டத்தில், மேற்கிந்தியத் தீவுகள் அணி சார்பாக, ஒருநாள் சர்வதேசப் போட்டிகளில் தனது முதலாவது சதத்தைப் பெற்ற எவின் லூயிஸ் 148(122) ஓட்டங்களைப் பெற்றார். பந்துவீச்சில், இலங்கையணி சார்பாக, சுரங்க லக்மால், நுவான் குலசேகர ஆகியோர் தலா இரண்டு விக்கெட்டுகளைக் கைப்பற்றினர்.

 

போட்டியின் நாயகனாக குசல் மென்டிஸ் தெரிவானார்.

தலைமைத்துவம் அற்றவர் டெய்லர்: டெய்லரை விமர்சிக்கிறார் மக்கலம்

 

நியூசிலாந்து அணியின் முன்னாள் தலைவர் றொஸ் டெய்லர் மீது, அவ்வணியின் மற்றொரு முன்னாள் தலைவரான பிரென்டன் மக்கலம், விமர்சனங்களை முன்வைத்துள்ளார். டெய்லரின் தலைமைத்துவம் தொடர்பாகவே, இந்த விமர்சனம் அமைந்துள்ளது.

 

பிரென்டன் மக்கலம் வெளியிட்டுள்ள அவரது சுயசரிதையில், "இடம்பெறாத அந்த சதித்திட்டம்" என்ற பிரிவில், இவ்விடயம் வெளிப்படுத்தப்பட்டுள்ளது.

 

நியூசிலாந்தின் தலைவராக இருந்த டானியல் விற்றோரி, 2011ஆம் ஆண்டு உலகக் கிண்ணத்துடன் ஓய்வுபெற்றதைத் தொடர்ந்து தலைவராகப் பதவி வகித்த றொஸ் டெய்லரிடமிருந்து அப்பதவி, திடீரெனப் பறிக்கப்பட்டு, 2012ஆம் ஆண்டு மக்கலத்திடம் வழங்கப்பட்டது.

 

மேற்கிந்தியத் தீவுகளுக்கெதிராக 2012ஆம் ஆண்டு இடம்பெற்ற தொடரின் மட்டுப்படுத்தப்பட்ட ஓவர்கள் தொடரில், மக்கலத்துக்கு ஓய்வு வழங்கப்பட்டது. ஆனால், டெய்லருக்கு உபாதை ஏற்படவே, அவசர நடவடிக்கையாக, அணியைத் தலைமை தாங்குவதற்காக, மக்கலம் அனுப்பி வைக்கப்பட்டார்.

 

எனினும், மக்கலம் அங்கு செல்வதற்கு முன்பாக முதலிரு போட்டிகளிலும் தலைமை தாங்கிய கேன் வில்லியம்ஸனே, ஏனைய போட்டிகளிலும் தலைமை தாங்குவார் என, அவருக்கு அறிவிக்கப்பட்டது. அந்தத் தொடரில், 2 டெஸ்ட்கள், 5 ஒருநாள் சர்வதேசப் போட்டிகள், 2 இருபதுக்கு-20 சர்வதேசப் போட்டிகள் காணப்பட்ட நிலையில், ஒரேயோர் ஒருநாள் சர்வதேசப் போட்டியில் மாத்திரம், நியூசிலாந்து அணி வென்றிருந்தது.

 

அது தொடர்பாகக் குறிப்பிடும் மக்கலம், தான் தலைமை தாங்குவதை றொஸ் டெய்லர் விரும்பியிருக்கவில்லை அல்லது பயிற்றுநர் ஜோன் ரைட்டின் ஒழுங்கமைப்புக் குறைபாடு என்பதே, அக்குழப்பத்துக்குக் காரணம் எனத் தெரிவிக்கிறார்.

 

அந்தத் தொடரின் பின்னர் ஜோன் ரைட், பயிற்றுநர் பதவியிலிருந்து நீக்கப்பட, மைக் ஹெஸன் நியமிக்கப்பட்டார். அவரது நியமனம், பிளவை மேலும் வலுப்படுத்தியது என, மக்கலம் குறிப்பிடுகிறார்.

 

ஆரம்பத்திலிருந்தே, ஹெஸனின் நோக்கங்கள் குறித்து, டெய்லருக்குச் சந்தேகம் காணப்பட்டது எனக் குறிப்பிடும் மக்கலம், ஹெஸனைப் பற்றி அறிவதற்கு முன்னரே, ஹெஸனை அவர் ஒதுக்கிவிட்டார் போன்று காணப்பட்டதாகத் தெரிவிக்கிறார்.

 

தனது நண்பரான ஸ்டீபன் பிளமிங், அப்போதைய தலைவராக றொஸ் டெய்லரை பதவியிலிருந்து விலக்குவதற்காகவே, தனது மற்றைய நண்பரான மைக் ஹெஸனை, பயிற்றுநர் பதவிக்கு அமர்த்தினார் என்ற வதந்தி காணப்பட்டதாகக் குறிப்பிடும் மக்கலம், பயிற்றுநர் பதவிக்கு, மத்தியூ மொட்-ஐயே, தான் பரிந்துரைத்ததாகக் குறிப்பிட்டார்.

 

அதன் பின்னர் இந்தியாவில் இடம்பெற்ற தொடரிலும் நியூசிலாந்து அணி தடுமாறிய போது, அணிக்கான கூட்டங்களை மைக் ஹெஸன் ஏற்பாடு செய்த போது, தங்களது கருத்துகளை அனைத்து வீரர்களும் தெரிவித்த போதிலும், தலைவரான றொஸ் டெய்லர், எதையுமெ தெரிவிக்க மாட்டார் என, மக்கலம் குறிப்பிடுகிறார்.

 

அத்தொடருக்குப் பின்னர் இலங்கையில் இடம்பெற்ற உலக இருபதுக்கு-20 தொடரிலும் மோசமான பெறுபேறுகளை வெளிப்படுத்திய நியூசிலாந்து, டெஸ்ட் தொடரிலும் ஆரம்பத்தில் தடுமாறியது. பின்னர் இரண்டாவது போட்டியில், சிறப்பான துடுப்பாட்டத்தை வெளிப்படுத்திய டெய்லர், அப்போட்டியை வென்று, தொடரைச் சமப்படுத்த உதவினார்.

 

ஆனால் அத்தொடர் முடிவடைந்ததும், மட்டுப்படுத்தப்பட்ட ஓவர்கள் போட்டிகளின் தலைவராகும் வாய்ப்பு, தனக்கு வழங்கப்பட்டதாகவும், அதை ஏற்றுக் கொள்வதற்கு நேரத்தைக் கோரியதாகவும் தெரிவிக்கும் மக்கலம், அது குறித்துத் தனது வழிகாட்டியான ஸ்டீபன் பிளமிங்குடன் கேட்ட போது, அதை ஏற்க வேண்டாமென அவர் அறிவுரை கூறியதாகவும் தெரிவித்தார்.

 

ஆனால், டெஸ்ட் தலைவராக மாத்திரம் இருப்பதற்கு, றொஸ் டெய்லர் மறுப்புத் தெரிவிக்க, மூன்று வகைப் போட்டிகளுக்குமான தலைமையும், தன்வசம் வந்ததாக, பிரென்டன் மக்கலம் குறிப்பிட்டுள்ளார்.

எங்கே செல்கிறது கிரிக்கெட் சபை?

 

அண்மைய சில நாட்களாக, இலங்கை கிரிக்கெட் சபை பற்றி வெளியாகிவரும் செய்திகள், பெருமளவில் நன்மைதரக் கூடியனவாக இருக்கவில்லை. கடந்த 7 நாட்களுக்குள் மாத்திரம், இலங்கை கிரிக்கெட் சபையின் நிர்வாகிகள் சிலர் மீது பாலியல் குற்றச்சாட்டுகள், மஹேல ஜெயவர்தனவின் அறக்கட்டளைக்கான நடைபயணத்துக்கு ஆதரவளிக்க மறுத்தமை ஆகிய குற்றச்சாட்டுகள் மேற்கொள்ளப்பட்டுள்ளன. அத்தோடு, சர்ச்சைக்குரிய விதத்தில், வீரர்களுக்கான வருடாந்த ஒப்பந்தமும் வழங்கப்பட்டுள்ளது.

 

தமிழ்மிரரின் சகோதரப் பத்திரிகையான டெய்லிமிரர் பத்திரிகையால் வெளியிடப்பட்ட பிரத்தியேகமான செய்தியின்படி, இலங்கை கிரிக்கெட் சபையில் பணிபுரிந்த பெண் ஊழியரொருவர், கிரிக்கெட் சபையில் நிலவுவதாகக் கூறப்படும் பாலியல் கலாசாரம் பற்றிய விடயங்களை வெளிப்படுத்தியிருந்தார், காயத்திரி விக்கிரமசிங்க என்ற அந்த முன்னாள் ஊழியர்.

 

பாலியல் ரீதியாக வசைகளுக்கு உள்ளானதாகத் தெரிவித்த அவர், ஒரு கட்டத்தில் உடல்ரீதியான தொல்லைகளுக்கும் உள்ளானதாகக் குற்றஞ்சாட்டினார். அதைவிட, தனது ஒப்பந்தம் புதுப்பிக்கப்படாமைக்கு, பாலியல் கோரிக்கைகளுக்கு இணங்காமையே காரணம் எனவும் அவர் தெரிவித்திருந்தார்.

 

அவரது இந்தக் குற்றச்சாட்டுகள், இதுவரை நிரூபிக்கப்படவில்லை என்பதால், கிரிக்கெட் சபையின் நிர்வாகிகள் மீது நம்பிக்கை கொள்ள வேண்டும் என்று சிந்தித்தாலும், இதற்கு முன்னரும் இவ்வாறான குற்றச்சாட்டுகள் காணப்பட்டன என்பது, நம்பிக்கை வைக்கவிடாமல் செய்கிறது. இலங்கை அணியின் வீராங்கனைகள் மீது, இவ்வாறான பாலியல் கோரிக்கைகள் முன்வைக்கப்பட்டதாகவே குற்றச்சாட்டுகள் காணப்பட்டு, அவை நிரூபிக்கப்பட்டதாக, விளையாட்டுத்துறை அமைச்சு அறிவித்தது. ஆகவே, இன்னும் எவ்வளவு அழுக்குகள், வெளிச்சத்துக்கு வருமென்பது தான் தெரியவில்லை.

 

இது இவ்வாறிருக்க, காலியில் புற்றுநோய் வைத்தியசாலைப் பிரிவு ஒன்றை அமைப்பதற்காக நிதிசேர்ப்பதற்கு, இலங்கை அணியின் முன்னாள் தலைவர் மஹேல ஜெயவர்தன மேற்கொண்டுவரும், வடக்கிலிருந்து தெற்குக்கான நடைபயணத்தின் பிற்பகுதி, கொழும்பிலும் அதனைச் சூழவுள்ள பகுதிகளுக்கும் வரவுள்ளது. அதில், இலங்கை கிரிக்கெட் அணியின் வீரர்களும் இணைந்து கொள்ள வைப்பதற்கான முயற்சி மேற்கொள்ளப்பட்டது.

 

இந்த நடைபயணத்துக்கு, உத்தியோகபூர்வமாக ஆதரவு தெரிவிப்பதற்கான இக்கோரிக்கையை, இலங்கை கிரிக்கெட் சபை நிராகரித்துள்ளது. இந்தப் பயணத்தில், முன்னாள் அணித்தலைவரான குமார் சங்கக்காரவும் அதிகளவில் ஈடுபட்டிருந்த நிலையில், அவர்களுக்கு மதிப்பளித்து, இந்தக் கோரிக்கையை, அச்சபை கையாண்டிருக்கலாம். ஆனால், ஜெயவர்தன மீது சபைக்குக் காணப்படும் வெறுப்புக் காரணமாகவே, இந்தக் கோரிக்கை, நிராகரிக்கப்பட்டிருக்கிறது என்பது தெளிவு.

 

மூன்றாவதாக, இலங்கை வீரர்களுக்கான ஒப்பந்தம், மலையக மக்களுக்கான கூட்டொப்பந்தம் போலவே, நீண்டகால இழுபறிக்குப் பின்னர், கடந்த வியாழக்கிழமை கைச்சாத்திடப்பட்டிருந்தது. அஞ்சலோ மத்தியூஸ், ரங்கன ஹேரத், டினேஷ் சந்திமால், திமுத் கருணாரத்ன, குசால் ஜனித் பெரேரா, சுரங்க லக்மால், லஹிரு திரிமான்ன, டில்ருவான் பெரேரா, குசால் மென்டிஸ், மிலிந்த சிரிவர்தன, நுவான் பிரதீப், கௌஷால் சில்வா, தனஞ்சய டி சில்வா, துஷ்மந்த சமீர, தனுஷ்க குணதிலக, ஜெப்றி வன்டர்சே, லக்‌ஷான் சந்தகன் ஆகியோருக்கு, இந்த ஒப்பந்தம் வழங்கப்பட்டுள்ளது. இதில், தம்மிக்க பிரசாத் என்ற பெயர் உள்ளடக்கப்பட்டிருக்கவில்லை.

 

தம்மிக்க பிரசாத்தை, கிரிக்கெட் சபை வேண்டுமானால் மறந்திருக்கலாம். ஆனால், கடந்தாண்டில் இலங்கைக்காக அதிக விக்கெட்டுகளை வீழ்த்திய வீரரை, இரசிகர்கள் மறந்திருக்க மாட்டார்கள். 9 டெஸ்ட் போட்டிகளில் விளையாடிய அவர், 24.95 என்ற சராசரியில் 41 விக்கெட்டுகளை வீழ்த்தியிருந்தார். இலங்கையின் நட்சத்திர சுழற்பந்து வீச்சாளர் ரங்கன ஹேரத் கூட, 10 போட்டிகளில் 37 விக்கெட்டுகளையே வீழ்த்தியிருந்தார்.
இவ்வாண்டில் தோட்பட்டை உபாதை காரணமாகப் பாதிக்கப்பட்டு, சத்திரசிகிச்சை மேற்கொண்ட பிரசாத், இவ்வாண்டில் போட்டிகள் எவற்றிலும் விளையாடியிருக்கவில்லை. ஆனால், கடந்தாண்டில் அவர் வெளிப்படுத்திய திறமைகள், அவருக்கென்று ஒப்பந்தம் கிடைப்பதை உறுதி செய்திருக்க வேண்டாமா? இல்லை, இவ்வாண்டில் விளையாடி, திறமைகளை வெளிப்படுத்தியிருக்க வேண்டும் என்றால், இவ்வாண்டில் 9 போட்டிகளில் மாத்திரம் பங்குபற்றி, 10.30 என்ற சராசரியில் ஓட்டங்களைப் பெற்ற லஹிரு திரிமான்னவுக்கு, எதன் அடிப்படையில் ஒப்பந்தம் வழங்கப்பட்டது? அண்மைக்காலத்தில், உள்ளூர்ப் போட்டிகளில் கூட அவர் ஒன்றும் வெளுத்து வாங்கவில்லை. 2, 27, 3, 4, 2, 21… இவை தான், அவரது இறுதி 6 இனிங்ஸ்களில் பெறப்பட்ட ஓட்டங்கள்.

 

நாட்டுக்காக விளையாடி, அதன் மூலம் காயத்தை ஏற்படுத்திக் கொண்ட வீரரொருவரை, இலங்கை கைவிடுதொன்றும் இது முதற்தடவையன்று. இதற்கு முன்னர், லசித் மலிங்கவுக்கு உபாதை ஏற்பட்டபோதும், அவரது ஒப்பந்தத்தை நிறுத்தி, அவரது மருத்துவ செலவுகளை அவரே ஏற்கும்படி வைத்தது தான் இச்சபை.
ஆக, இந்த 3 விடயங்களுமே, இலங்கை கிரிக்கெட் சபை, எந்தப் பாதையில் பயணிக்கிறது என்ற கேள்வியை எழுப்பிச் செல்கின்றன. பதில் சொல்லத் தான் எவருமில்லை.

ஓய்ந்தது டில்ஸ்கூப்

 

இலங்கை சார்பாக கிரிக்கெட் விளையாடி, ஜாம்பவான்களாகக் கருதப்படுவோர் என்ற பட்டியலொன்று வாசிக்கப்படுமாயின், முத்தையா முரளிதரன், குமார் சங்கக்கார, மஹேல ஜெயவர்தன, அரவிந்த டி சில்வா, சனத் ஜெயசூரிய என்ற பெயர்கள், நிச்சயமாகப் பேசப்படும் பெயர்களாகும். அதேபோல், சமிந்த வாஸ், லசித் மலிங்க, அர்ஜுன ரணதுங்க, ரொஷான் மஹாநாம என, வேறு சில பெயர்களும் முன்வைக்கப்படும். ஆனால், திலகரட்ண டில்ஷான் என்ற பெயர், அடிக்கடி அடிபடும் ஒன்று கிடையாது.

 

ஆனால், ஒருநாள் சர்வதேசப் போட்டிகளில், இலங்கை சார்பாகத் தோன்றிய, இரண்டாவது மிகப்பெரிய வீரராக, திலகரட்ண டில்ஷான் கருதப்பட முடியும் என்ற ஒரு கருத்தோடு, சர்வதேசப் போட்டிகளிலிருந்து டில்ஷானின் ஓய்வைப் பற்றி ஆராய முற்படுகிறது இக்கட்டுரை.

 

1976ஆம் ஆண்டு பிறந்த டில்ஷான், 1999ஆம் ஆண்டின் பிற்பகுதியில், தனது 23ஆவது வயதில், சர்வதேச கிரிக்கெட் போட்டிகளில் தனது அறிமுகத்தை மேற்கொண்டார். மத்தியவரிசைத் துடுப்பாட்ட வீரராகவே அவரது அறிமுகம் அமைந்தது.

 

சிம்பாப்வே அணிக்கெதிராக, மழை காரணமாகப் பெரிதும் பாதிக்கப்பட்ட டெஸ்ட் போட்டியிலே தனது அறிமுகத்தை மேற்கொண்ட அவர், ஒரே ஓர் இனிங்ஸில் துடுப்பெடுத்தாடி, 9 ஓட்டங்களை மாத்திரம் பெற்றார். பந்துவீசியிருக்கவில்லை. அதே சிம்பாப்வே அணிக்கெதிரான ஒருநாள் சர்வதேசப் போட்டியிலேயே தனது ஒருநாள் சர்வதேசப் போட்டி அறிமுகத்தை மேற்கொண்ட டில்ஷான், 6ஆம் இலக்கத் துடுப்பாட்ட வீரராகக் களமிறங்கி, 53 பந்துகளில் 56 ஓட்டங்களைப் பெற்றார். ஆனால், பதிலளித்தாடிய சிம்பாப்வே அணி, 14.5 ஓவர்கள் துடுப்பெடுத்தாடியிருந்த போது மழை குறுக்கிட, போட்டி கைவிடப்பட்டது.  இவ்வாறு, அவரது அறிமுகப் போட்டிகள் இரண்டுமே, மழையினால் குழப்பப்பட்ட போட்டிகளாக அமைந்தன.

 

ஆனால், தொடர்ந்தும் மத்திய வரிசையில், நிதானமான துடுப்பாட்டத்தை அவர் புரிந்துகொண்டார். குறிப்பாக, ரசல் ஆர்னல்டுடனான இணைப்பாட்டங்கள், அவரது ஆரம்பகட்ட வாழ்வில் முக்கியமானவை. டில்ஷானும் ஆர்னல்டும் இணைந்து, 77 ஒருநாள் சர்வதேசப் போட்டிகளில் விளையாடியிருந்தனர். அதில், 27 இனிங்ஸ்களில் இருவரும் இணைந்து, இணைப்பாட்டமொன்றைப் புரிந்திருந்தனர். அவர்களது இணைப்பாட்டச் சராசரி, 40.47 ஆகும். டில்ஷான், ஆரம்பத் துடுப்பாட்ட வீரராகக் களமிறங்காத சந்தர்ப்பங்களில், அவருடைய சிறப்பான இணைப்பாட்டப் பெறுபேறாக, ஆர்னல்டுடனான இணைப்பாட்டங்களே அமைந்திருந்தன.

 

இவ்வாறு ஓரளவு சிறப்பான பெறுபேறுகளைப் பெற்று வந்தாலும், இடையில் போர்ம் இல்லாது போக, அணியிலிருந்து நீக்கப்பட்டார் டில்ஷான். அதுவே அவருக்கான திருப்புமுனையாக அமைந்துபோனது. அதைத் தொடர்ந்து, அப்போதைய தலைவரான மஹேல ஜெயவர்தனவிடம், அணியின் ஆரம்பத் துடுப்பாட்ட வீரராகக் களமிறங்கப் போவதாக, டில்ஷான் கேட்டுக் கொண்டார். அந்த வாய்ப்பு வழங்கப்பட, 2008ஆம் ஆண்டு பெப்ரவரி 12ஆம் திகதி, சர்வதேசப் போட்டிகளில் முதன்முறையாக, ஆரம்பத் துடுப்பாட்ட வீரராகக் களமிறங்கினார்.

 

இந்தியாவுக்கெதிராக கன்பெராவில் இடம்பெற்ற அப்போட்டியில், 59 பந்துகளில் ஆட்டமிழக்காமல் 62 ஓட்டங்களைப் பெற்ற டில்ஷான், அப்போட்டியில் டக் வேர்த் லூயிஸ் முறையில் இலங்கை அணிக்கு இலகுவான வெற்றி கிடைப்பதற்கு வழிவகுத்தார். போட்டியின் நாயகனாகவும் தெரிவானார். அதைத் தொடர்ந்து, டெஸ்ட் போட்டிகளிலும் ஆரம்பத் துடுப்பாட்ட வீரராகக் களமிறங்கத் தொடங்கிய டில்ஷானின் கிரிக்கெட் வாழ்வு, முழுவதுமாக மாறிப் போனது.

 

அதுவரை காலமும், 133 ஒருநாள் சர்வதேசப் போட்டிகளில் விளையாடி, ஒரு சதம், 10 அரைச்சதங்கள் உள்ளடங்கலாக 29.47 என்ற சராசரியில் 2,594 ஓட்டங்களைப் பெற்றிருந்த டில்ஷான், அடுத்த 179 போட்டிகளில், 21 சதங்கள், 34 அரைச்சதங்கள் உள்ளடங்கலாக 46.04 என்ற சராசரியில் 7,367 ஓட்டங்களைக் குவித்தார். டெஸ்ட் போட்டிகளில் அதுவரை 55 போட்டிகளில் 8 சதங்கள், 12 அரைச்சதங்கள் உள்ளடங்கலாக 3,166 ஓட்டங்களைப் பெற்றிருந்த டில்ஷான், ஆரம்பத் துடுப்பாட்ட வீரராகக் களமிறங்கிய 29 போட்டிகளில், 8 சதங்களையும் 10 அரைச்சதங்களையும் பெற்றிருந்தார்.

 

இருபதுக்கு-20 சர்வதேசப் போட்டிகளில் 80 போட்டிகளில் ஒட்டுமொத்தமாக விளையாடினாலும், 66 போட்டிகளிலேயே ஆரம்பத் துடுப்பாட்ட வீரராகக் களமிறங்கினார். மத்திய வரிசையில் களமிறங்கிய 14 போட்டிகளிலும், சதத்தையோ அல்லது அரைச்சதத்தையோ அவர் பெற்றதில்லை. மாறாக, ஆரம்பத் துடுப்பாட்ட வீரராகக் களமிறங்கிய 66 போட்டிகளில், ஒரு சதத்தையும் 13 அரைச்சதங்களையும் பெற்றார்.

 

ஆனால், டில்ஷானின் பங்களிப்பு, வெறுமனே இலக்கங்களையும் தரவுகளையும் வைத்து மாத்திரம் கணிப்பிடக்கூடியதன்று. மத்திய வரிசையில் அவர் துடுப்பெடுத்தாடிய போது, அவர் களமிறங்கிய சூழ்நிலைகள் குறித்து எவ்வாறு கவனம் செலுத்தப்பட்டதோ, அவரது கிரிக்கெட் வாழ்வும் அவ்வாறு கருதப்பட வேண்டியதொன்று.

 

குறிப்பாக, அணித்தலைவர் பொறுப்பை ஏற்பதற்கு வேறு எவரும் தயாராக இருந்திருக்காத நிலையில், அணித்தலைமைப் பொறுப்புக்குப் பொருத்தமானவர் என்று எவருமே கருதியிருக்காத டில்ஷான், அணிக்காக அந்தப் பொறுப்பை ஏற்றுக் கொண்டிருந்தார். அந்தக் காலத்தில், வித்தியாசமான பாணியிலான தாடியையும் சிகை அலங்காரத்தையும் கொண்டிருந்த டில்ஷான், அணித்தலைவராக அறிவிக்கப்பட்டதும், உடனடியாகவே அணிக்காக, தன்னை மாற்றிக் கொண்டார்.

 

அவரது முதலாவது ஊடகவியலாளர் சந்திப்பிலேயே, அவருடைய தாடியும் சிகை அலங்காரமும் பெருமளவுக்கு மாறியது. தாடியும் சிகை அலங்காரமும் மாறினால் மாத்திரம், அணித்தலைமைக்காக அவர் முயல்கிறார் என்ற அர்த்தம் கிடையாது. ஆனால், அதுவரை காலமும் ஏனையோரின் கருத்துகள் தொடர்பாகக் கரிசனை செலுத்தாது, தனக்கு விரும்பிய பாணியில் இருந்து வந்த ஒருவர், நாட்டின் கிரிக்கெட் அணியின் தலைவர் என்ற உயர் பொறுப்பு வழங்கப்பட்டதும், அதற்காகத் தன்னை மாற்றிக் கொள்வதற்கு முயன்றார் என்பது, அந்தப் பணியை எவ்வளவு உயர்வாக எடுத்தார் என்பதை வெளிக்காட்டியது.

 

இலங்கை கிரிக்கெட் சபையில் அப்போது காணப்பட்ட குழறுபடிகள் காரணமாக, அப்போதைய தலைவரான குமார் சங்கக்கார, தனது பதவியிலிருந்து விலகியிருந்தார் என்ற பேச்சுக் காணப்பட்டது. அவருக்கு முன்னர் தலைவராக இருந்த மஹேலவுக்கும் கிரிக்கெட் சபைக்கும் இடையிலும் முரண்பாடுகள் காணப்பட்டன. இருவரும் பதவி விலகிய பின்னரே, அணித்தலைமைப் பதவி, டில்ஷானின் மீது திணிக்கப்பட்டிருந்தது.

 

இவ்வாறு, அணிக்காக விளையாடிய டில்ஷான், அந்தப் பதவியிலிருந்து தூக்கியெறியப்பட்டார். ஆம், டில்ஷானின் தலைமையில் 11 டெஸ்ட் போட்டிகளில் ஒரேயொரு போட்டியில் தான் இலங்கை வென்றது. ஆனால், 5 போட்டிகளில் வெற்றி – தோல்வியற்ற முடிவு கிடைத்தது. அந்த 11 போட்டிகளில் 8 போட்டிகள், இலங்கைக்கு வெளியே நடந்தவை. கிடைத்த அந்த வெற்றி, தென்னாபிரிக்க மண்ணில் வைத்து இலங்கை பெற்ற முதலாவது டெஸ்ட் வெற்றி. அணித்தலைவராக அவரது இரண்டாவது போட்டியில், 193 ஓட்டங்களைக் குவித்தாரே டில்ஷான்?
ஒருநாள் சர்வதேசப் போட்டிகளில் 21 போட்டிகளில் 8இல் வெற்றியும், இருபதுக்கு-20 சர்வதேசப் போட்டிகளில் 3 போட்டிகளில் 2 போட்டிகளில் வெற்றி கிடைத்தது.

 

டில்ஷானின் காலத்தில் இன்னும் வெற்றிகளைப் பெற்றிருக்கலாம், ஆனால் முரளியின் இறுதிக் காலம் அது. அதேபோல், மத்தியூஸின் உபாதை, அஜந்த மென்டிஸின் உபாதைகள், போர்ம் இழப்பு என, டில்ஷானுக்கு எதிராகவே அனைத்துமே காணப்பட்டன. இவ்வாறு, அவரது தலைமைத்துவத்தில், ஏராளமான சவால்களுக்கு மத்தியிலேயே, அவர் பணியாற்றினார்.

 

இவற்றையெல்லாம் சொல்வதால் மாத்திரம், டில்ஷான் மீது விமர்சனங்களே இல்லையென்று ஆகிவிடாது. 2010ஆம் ஆண்டில் சிம்பாப்வேக்குச் சென்றிருந்த போது, இரவு விடுதியொன்றில் தவறாக நடந்ததாக அவர் மீது குற்றச்சாட்டுகள் உள்ளன. அதேபோல், விரேந்தர் செவாக், 99 ஓட்டங்களுடன் காணப்பட்ட போது, அவரது சதத்தை இல்லாது செய்வதற்காக, முறையற்ற பந்தை வீசுமாறு சுராஜ் ரந்தீவுக்குச் சொன்னவரும் இதே
டில்ஷான் தான். அவ்வப்போது, மோசமான துடுப்பாட்டப் பிரயோகங்களை மேற்கொள்பவரும் அவர் தான்.

 

ஆனால், இலங்கை கிரிக்கெட்டுக்கு டில்ஷான் மேற்கொண்ட பங்களிப்புகள், கொஞ்ச நஞ்சம் கிடையாது. மத்திய வரிசைத் துடுப்பாட்ட வீரராகக் களமிறங்கிய அவரை, பந்துவீசுமாறு கேட்டார்கள் – செய்தார். ஆரம்பத் துடுப்பாட்ட வீரராகக் களமிறங்குமாறு கேட்டார்கள் – செய்தார். அணித்தலைவராகப் பதவியேற்பதற்கு யாருமே இல்லாத போது, அப்பதவியை ஏற்குமாறு சொன்னார்கள் – செய்தார். பதவியிலிருந்து விலகுமாறு சொன்னார்கள் – செய்தார். விக்கெட் காப்பில் ஈடுபடுமாறு சொன்னார்கள் – செய்தார். ஆரம்பப் பந்துவீச்சாளராகச் செயற்படுமாறு சொன்னார்கள் – செய்தார். பொய்ன்ட் திசையில் களத்தடுப்பில் ஈடுபடுபவரை, எல்லைக் கோட்டில் களத்தடுப்பில் ஈடுபடுமாறு சொன்னார்கள் – செய்தார்.

 

இவ்வாறு, அணிக்காகவே தன்னை மாற்றிக் கொண்ட முக்கியமான வீரரொருவர், தற்போது ஓய்வுபெற்றுச் சென்றிருக்கிறார். ஒருநாள் சர்வதேசப் போட்டிகளில் 10,000 ஓட்டங்களைக் கடந்த 4ஆவது இலங்கையர் அவர். ஆனால், அந்தப் பட்டியலில் அதிக சராசரியைக் கொண்ட இரண்டாவது இலங்கையர். மட்டுப்படுத்தப்பட்ட ஓவர்கள் கொண்ட கிரிக்கெட்டில், 13,430 ஓட்டங்கள், 323 விக்கெட்டுகளுடன், இலங்கையின் தலைசிறந்த வீரராக, சனத் ஜெயசூரியவே எப்போதும் இருப்பார். ஆனால், 10,290 ஓட்டங்கள், 106 விக்கெட்டுகள், 123 பிடிகள், களத்தடுப்பில் தடுக்கப்பட்ட பல நூற்றுக்கணக்கான ஓட்டங்கள் என, ஒருநாள் சர்வதேசப் போட்டிகளில், இலங்கைக்காக விளையாடிய இரண்டாவது முக்கிய வீரராகவே அவரே இருப்பார் என்பது, இக்கட்டுரையாளரின் கருத்து.

 

ஒருநாள் சர்வதேசப் போட்டிகளில் அதிக விக்கெட்டுகளைக் கைப்பற்றியுள்ள முரளிதரன் (534 விக்கெட்டுகள்), இரண்டாவது அதிக எண்ணிக்கையான ஓட்டங்களைக் கொண்டுள்ள குமார் சங்கக்கார (14,234) ஆகியோரைத் தாண்டி, இந்த இடத்துக்கு டில்ஷான் பொருத்தமானவர் என்ற வாதம் முன்வைக்கப்படுவதே, டில்ஷானின் தனிச்சிறப்பைக் காட்டுகிறது.

 

தனது பெயரில், கிரிக்கெட்டின் துடுப்பாட்டப் பிரயோகம் ஒன்றின் பெயரைக் (டில்ஸ்கூப்) கொண்ட ஒரேயொரு வீரராக டில்ஷானே இருப்பார் எனக் கருதப்படும் நிலையில், அவரது பெயர், வரலாறு தாண்டி நிலைத்து நிற்குமென்பதே, அனைவரதும் கருத்தும் விருப்பமும் எதிர்பார்ப்பும் ஆகும்.

 

டில்ஷானின் இறுதி சர்வதேசப் போட்டியில், துடுப்பாட்டத்தில் சறுக்கிய அவர், பந்துவீச்சில் 2 விக்கெட்டுகளைக் கைப்பற்றி, இலங்கைக்கு வெற்றி கிடைக்கக்கூடுமென்ற நிலையை ஏற்படுத்தி, இன்றுவரை, போட்டிகளின் முடிவுகளை மாற்றக்கூடிய சகலதுறைத் திறமை, தன்னிடமிருந்து மங்கிவிடவில்லை என்பதை நிரூபித்தார்.

 

அதன்போது, அங்கு பார்வையாளராக இருந்த பெண்ணொருவர் ஏந்தியிருந்த பதாகை, டில்ஷானை எவ்வளவு தூரம், இலங்கையின் இரசிகர்கள் இழந்து நிற்கிறார்கள் என்பதைக் காட்டியது. "என்னுடைய முன்னாள் காதலனை விட, டில்ஷானை நான் அதிகம் இழந்துநிற்பேன்” என்று அந்தப் பதாகை தெரிவித்தது. இலங்கையின் இரசிகர்கள் பலரும், ‘எங்களுக்கும் அவ்வாறே” என்று சொல்வதைத் தான் கேட்க முடிந்தது.

 

தொடரை வென்றது இங்கிலாந்து


 

இங்கிலாந்து, பாகிஸ்தான் அணிகளுக்கிடையிலான ஐந்து போட்டிகள் கொண்ட ஒருநாள் சர்வதேச போட்டித் தொடரின், நொட்டிங்ஹாமில் இடம்பெற்ற மூன்றாவது போட்டியில், உலக சாதனையுடன் வெற்றி பெற்ற இங்கிலாந்து, முதலிரண்டு போட்டிகளிலும் வெற்றி பெற்றிருந்த நிலையில், இன்னும் இரண்டு போட்டிகள் மீதமிருக்கையிலேயே, தொடரை 3-0 என்ற ரீதியில் கைப்பற்றியது.

 

இப்போட்டியின் நாணயச் சுழற்சியில் வெற்றி பெற்ற இங்கிலாந்து அணியின் தலைவர் ஒயின் மோர்கன், தமது அணி முதலில் துடுப்பெடுத்தாடும் என அறிவித்தார். அதன்படி, முதலில் துடுப்பெடுத்தாடிய இங்கிலாந்து, 50 ஓவர்களில் மூன்று விக்கெட்டுகளை இழந்து 444 ஓட்டங்களைக் குவித்தது.

 

மேற்படி ஓட்ட எண்ணிக்கையின் மூலம், ஒருநாள் சர்வதேசப் போட்டிகளில், இனிங்ஸொன்றில் அதிக ஓட்டங்களைக் குவித்த அணி என்ற சாதனையை இங்கிலாந்து ஏற்படுத்திக் கொண்டது.  இதற்கு முன்னர், 2006ஆம் ஆண்டு, நெதர்லாந்து அணிக்கெதிராக இலங்கையணி பெற்ற 443 ஓட்டங்களே சாதனையாக இருந்தது.

 

அவ்வணி சார்பாக துடுப்பாட்டத்தில், அலெக்ஸ் ஹேல்ஸ் 171(122), ஜொஸ் பட்லர் ஆட்டமிழக்காமல் 90(51), ஜோ ரூட் 85(86), ஒயின் மோர்கன் 57(27) ஓட்டங்களைப் பெற்றனர்.

 

இதில், அலெக்ஸ் ஹேல்ஸ் பெற்ற 171 ஓட்டங்களே, இங்கிலாந்து வீரரொருவரால், ஒருநாள் சர்வதேசப் போட்டிகளில் பெறப்பட்ட அதிகூடிய ஓட்டங்கள் ஆகும். இதற்கு முன்னர், 1993ஆம் ஆண்டு, அவுஸ்திரேலிய அணிக்கெதிராக றொபின் ஸ்மித்தால், ஆட்டமிழக்காமல் பெறப்பட்ட 167 ஓட்டங்களே அதிகூடிய ஓட்டங்களாக இருந்தது. இது தவிர, இப்போட்டியில், 22 பந்துகளில், பட்லர் அரைச்சதத்தை கடந்திருந்த நிலையில், இங்கிலாந்து வீரரொருவரால் பெறப்பட்ட வேகமாக அரைச்சதம் இதுவாகும். இதற்கு முன்னர், போல் கொலிங்வூட் 24 பந்துகளில் அரைச்சதம் பெற்றிருந்தார்.

 

பந்துவீச்சில், பாகிஸ்தான் அணி சார்பாக, ஹஸன் அலி இரண்டு விக்கெட்டுகளையும் மொஹமட் நவாஸ் ஒரு விக்கெட்டினையும் கைப்பற்றினர். வஹாப் றியாஸ், தனது 10 ஓவர்களில் 110 ஓட்டங்களை விட்டுக் கொடுத்து, ஒருநாள் சர்வதேசப் போட்டிகளில் இரண்டாவது மோசமான பந்துவீச்சுப் பெறுதியைப் பதிவு செய்து கொண்டார். இரண்டு அணிகளும் 400 ஓட்டங்கள் குவித்த, 2006ஆம் ஆண்டு இடம்பெற்ற போட்டியில், அவுஸ்திரேலியாவின் மைக் லூயிஸ் 113 ஓட்டங்களை விட்டுக் கொடுத்ததே மோசமான பெறுதி ஆகும்.

 

பதிலுக்கு, 445 என்ற வெற்றியிலக்குடன் துடுப்பெடுத்தாடிய பாகிஸ்தான் அணி, 42.4 ஓவர்களில் சகல விக்கெட்டுகளையும் இழந்து 275 ஓட்டங்களை மாத்திரமே பெற்று, 169 ஓட்டங்களால் தோல்வியடைந்தது. துடுப்பாட்டத்தில், மொஹமட் ஆமிர் 58(28), ஷர்ஜீல் கான் 58(30), சப்ராஸ் அஹமட் 38(43), மொஹமட் நவாஸ் 34(36) ஓட்டங்களைப் பெற்றனர். இதில், 22 பந்துகளில் அரைச்சதம் பெற்ற ஆமிர், 11ஆவது இலக்க வீரர் ஒருவரால் பெறப்பட்ட அதிகூடிய ஓட்டங்களைப் பதிவு செய்து கொண்டார். இதற்கு முன்னர், 2003ஆம் ஆண்டு உலகக் கிண்ணத்தில், இங்கிலாந்துக்கெதிராக ஷோய்ப் அக்தர் பெற்ற 43 ஓட்டங்களே அதிகூடிய ஓட்டங்களாக இருந்தது.

 

பந்துவீச்சில், இங்கிலாந்தி அணி சார்பாக, கிறிஸ் வோக்ஸ் நான்கு, அடில் ரஷீட் இரண்டு விக்கெட்டுகளைக் கைப்பற்றினர்.

 

போட்டியின் நாயகனாக அலெக்ஸ் ஹேல்ஸ் தெரிவானார்.

 

இலங்கையின் உலக சாதனையை தகர்த்தது இங்கிலாந்து

 

தற்போது ட்ரெண்ட் பிரிட்ஜ்ஜில் நடைபெற்றுக் கொண்டிருக்கும் இங்கிலாந்து, பாகிஸ்தான் அணிகளுக்கிடையிலான மூன்றாவது ஒருநாள் சர்வதேசப் போட்டியில், 50 ஓவர்களில் மூன்று விக்கெட்டுகளை இழந்து 444 ஓட்டங்களைக் குவித்துள்ள இங்கிலாந்து அணி, ஒருநாள் சர்வதேசப் போட்டிகளில் ஒரு அணி பெற்ற அதிகூடிய ஓட்ட எண்ணிக்கையாக, 2006ஆம் ஆண்டு நெதர்லாந்து அணிக்கெதிராக இலங்கை அணி குவித்த 443 ஓட்டங்கள் என்ற சாதனையை முறியடித்துள்ளது.

 

ஐந்து போட்டிகள் கொண்ட இத்தொடரில், ஏற்கெனவே முதலிரண்டு போட்டிகளிலும் வெற்றி பெற்றிருந்த இங்கிலாந்து அணி, இப்போட்டியின் நாணயச் சுழற்சியில் வெற்றி பெற்று முதலில் துடுப்பெடுத்தாடியிருந்தது. அந்தவகையில், ஆரம்பத் துடுப்பாட்ட வீரர் அலெக்ஸ் ஹேல்ஸ், 122 பந்துகளில், 4, ஆறு ஓட்டங்கள், 22, நான்கு ஓட்டங்கள் உள்ளடங்கலாக 171 ஓட்டங்களையும், ஜொஸ் பட்லர், 51 பந்துகளில், 7, ஆறு ஓட்டங்கள், 7, நான்கு ஓட்டங்கள் உள்ளடங்கலாக ஆட்டமிழக்காமல் 90 ஓட்டங்களையும், ஜோ ரூட், 86 பந்துகளில், 8, நான்கு ஓட்டங்களுடன் 85 ஓட்டங்களையும், அணித்தலைவர் ஒயின் மோர்கன், 27 பந்துகளில், 5, ஆறு ஓட்டங்கள், 3, நான்கு ஓட்டங்கள் உள்ளடங்கலாக ஆட்டமிழக்காமல் 57 ஓட்டங்களையும் பெற்றனர்.

 

பந்துவீச்சில், பாகிஸ்தான் அணி சார்பாக வஹாப் றியாஸ், தனது 10 ஓவர்களில் 110 ஓட்டங்களை விட்டுக் கொடுத்திருந்தார்.

அணித்தலைமையிலிருந்து நீக்கப்பட்டமை ‘வலித்தது’

 

இலங்கை அணியின் தலைவர் பதவியிலிருந்து நீக்கப்பட்டமையைத் தனிப்பட்ட விடயம் எனக் குறிப்பிட்ட திலகரட்ண டில்ஷான், அதுபோன்ற தனிப்பட்ட விடயங்கள் குறித்துக் கவலைப்பட்டிருக்கவில்லை எனத் தெரிவித்த போதிலும், அணித்தலைமையிலிருந்து நீக்கப்பட்டமை வலித்ததாகத் தெரிவித்தார்.

 

இலங்கையின் முன்னாள் தலைவரான திலகரட்ண டில்ஷான், ஒருநாள் சர்வதேசப் போட்டிகளிலிருந்து, நேற்று முன்தினம் இடம்பெற்ற இலங்கை – அவுஸ்திரேலிய அணிகளுக்கிடையிலான 3ஆவது போட்டியுடன் ஓய்வுபெற்றார். ஓய்வுபெற்ற பின்னர் கருத்துத் தெரிவிக்கையிலேயே அவர் இவ்வாறு தெரிவித்தார்.

 

இலங்கை அணியின் தலைமைப் பதவியிலிருந்து குமார் சங்கக்காரவும் மஹேல ஜெயவர்தனவும் விலகிய பின்னர், அந்தப் பதவி, திலகரட்ண டில்ஷானுக்கு வழங்கப்பட்டது. எனினும், அப்பதவிக்காகத் தான் திட்டமிட்டிருக்கவில்லை என அவர் தெரிவித்தார். "அணித்தலைமைப் பதவியைப் பெற்றுக் கொள்வதற்கு நான் திட்டமிட்டிருக்கவில்லை. ஆனால், இன்னொருவரைக் கண்டுபிடிக்கும் வரை, ஆறு மாதங்களுக்கு அப்பதவியை ஏற்குமாறு, இலங்கை கிரிக்கெட் சபையின் தலைவர் என்னிடம் கேட்டார்" என, டில்ஷான் தெரிவித்தார்.

 

தனது காலத்தில், தனது அதிர்ஷ்டம் இருந்திருக்கவில்லை எனக் குறிப்பிட்ட அவர், அதன்போது தற்போதைய தலைவர் அஞ்சலோ மத்தியூஸ் தொடர்பில் தெரிவித்த கருத்து, மத்தியூஸ் மீதான விமர்சனமா என்ற கேள்வியை எழுப்பியது.

 

"துரதிர்ஷ்டவசமாக, இரண்டு பந்துவீச்சாளர்களையும் நாம் இழந்திருந்திருந்தோம். முரளி ஓய்வுபெற்றிருந்தார். நுவான் குலசேகரவுக்குக் காயம் ஏற்பட்டிருந்தது. அஜந்த மென்டிஸூக்கும் காயம் ஏற்பட்டிருந்தது. சிறப்பான வளங்கள், எனக்கு இருந்திருக்கவில்லை. அஞ்சலோ மத்தியூஸூக்கு ஓராண்டாக கெண்டைக்கால் பின்தசை உபாதை ஏற்பட்டிருந்தது, அதனால் அவர் பந்துவீசியிருக்கவில்லை. அது என்னுடைய துரதிர்ஷ்டமாக இருக்க வேண்டும், ஏனென்றால் நான் பதவி விலகிய பின்னர், ஒரு வாரத்துக்குப் பின்னர் நாங்கள் அவுஸ்திரேலியாவுக்குச் சென்றோம். அந்த வாரத்தில், மத்தியூஸ் பந்துவீச ஆரம்பித்தார். மஹேலவின் நல்ல அதிர்ஷ்டம் காரணமாகத் தான் அது இருக்க வேண்டும்" என்று அவர் குறிப்பிட்டார்.

 

டில்ஷானின் தலைமைத்துவத்தின் கீழ், 9 போட்டிகளில் விளையாடிய மத்தியூஸ், 16 இனிங்ஸ்களில் 4 இனிங்ஸ்களில் மாத்திரமே பந்துவீசியிருந்தார். ஒருநாள் சர்வதேசப் போட்டிகளில் 22 போட்டிகளில் 12 போட்டிகளில் பந்துவீசிய மத்தியூஸ், இருபதுக்கு-20 சர்வதேசப் போட்டிகளில் 3 போட்டிகளில் எந்தவொரு போட்டியிலும் பந்துவீசியிருக்கவில்லை. ஆனால், டில்ஷானின் தலைமைத்துவத்தின் கீழ் மத்தியூஸ் விளையாடிய இறுதி 6 ஒருநாள் சர்வதேசப் போட்டிகளிலும் அவர் பந்துவீசியதோடு, இறுதி 5 டெஸ்ட்களில் ஒரே ஓர் இனிங்ஸைத் தவிர அனைத்து இனிங்ஸ்களிலும் அவர் பந்துவீசியிருந்தார். எனவே, மத்தியூஸ் வேண்டுமென்றே அவ்வாறு செயற்பட்டார் என, டில்ஷானின் கருத்தை எடுத்துக் கொள்ள முடியாது.

 

தென்னாபிரிக்க அணிக்கெதிராக 2011ஆம் ஆண்டு இறுதியிலும் 2012ஆம் ஆண்டு ஆரம்பத்திலும் இடம்பெற்ற தொடரின் முடிவில், அணித்தலைவர் பதவியிலிருந்து திடீரென நீக்கப்பட்ட டில்ஷான், அதுகுறித்தும் கருத்துத் தெரிவித்தார். "தென்னாபிரிக்கத் தொடரின் முடிவில், எல்லாவற்றையும் தூக்கி ஓரமாக வைத்தேன். அவுஸ்திரேலியாவுக்குச் சென்றேன், 500 ஓட்டங்களைப் பெற்றேன், தொடரின் நாயகனாகத் தெரிவானேன். யார் தலைவராக இருப்பது என்பது எனக்குத் தேவையில்லாதது. என்னை அணித்தலைவர் பதவியிலிருந்து யார் அகற்றினார் என்பது தொடர்பாக நான் கவனம் செலுத்தியிருக்கவில்லை. நான் எப்போதும் நாட்டுக்காக விளையாடுபவன். இவ்வாறான தனிப்பட்ட விடயங்கள் குறித்து நான் கவலைப்படவில்லை. ஆனால், எனக்கு அது வலித்தது" என்று தெரிவித்தார்.

 

இது தவிர, தலைவராக டில்ஷான் நியமிக்கப்பட்ட பின்னர் இடம்பெற்ற முதலாவது தொடரான இங்கிலாந்துக்கான இலங்கைத் தொடரில், இரண்டாவது டெஸ்ட் போட்டியில் 193 ஓட்டங்களைக் குவித்த டில்ஷான், அப்போட்டியில் விரலில் காயமடைந்தார். அதன் காரணமாக, அடுத்த போட்டியில் அவர் பங்குபற்ற முடியாது போக, அணித்தலைவர் பதவியை ஏற்பதற்கு எவரும் தயாராக இருந்திருக்கவில்லை என டில்ஷான் தெரிவித்தார். அப்போது, சனத் ஜெயசூரியவையோ அல்லது திலின கண்டம்பியையோ அணித்தலைவராக்கும் பேச்சும் காணப்பட்டதாகவும் டில்ஷான் தெரிவித்தார். அடுத்த போட்டியில், குமார் சங்கக்காரவே அணித்தலைவராகச் செயற்பட்டிருந்தார்.

 

தனது ஓய்வு குறித்துக் கருத்துத் தெரிவித்த டில்ஷான், ஓய்வுபெறுவதற்குத் திட்டமிட்டிருக்கவில்லை எனத் தெரிவித்த அவர், இன்னும் ஓர் ஆண்டுக்காவது விளையாடும் எதிர்பார்ப்பிலேயே இத்தொடரில் களமிறங்கியதாகவும், ஆனால், 25ஆம் திகதி நித்திரையிலிருந்து எழும் போது, ஓய்வுபெறுவதற்கான நேரம் இதுவென உணர்ந்ததாகவும் தெரிவித்தார்.

 

"உண்மையைச் சொல்வதானால், இன்னும் ஓர் அல்லது இரண்டு ஆண்டுகளுக்கு என்னால் விளையாட முடியும். ஆனால், எதிர்காலத்தைப் பற்றிப் பார்க்க வேண்டியுள்ளது. இரண்டு ஆண்டுகள் நான் விளையாடினால், அடுத்த உலகக் கிண்ணத்துக்கு, 18 மாதங்களே இருக்கும். அது, அணியைப் பொறுத்தவரை சரியானதன்று" என அவர் மேலும் தெரிவித்தார்.

 

ஒருநாள் சர்வதேசப் போட்டிகளிலிருந்து அவர் ஓய்வுபெற்றாலும், எதிர்வரும் 6ஆம், 9ஆம் திகதிகளில் இடம்பெறவுள்ள இருபதுக்கு-20 சர்வதேசப் போட்டிகளில், அவர் பங்குபற்றிய பின்னரே, அனைத்து வகையான போட்டிகளிலிருந்தும் ஓய்வுபெறவுள்ளமை குறிப்பிடத்தக்கது.