Category Archives: Blogs

இந்தியா எதிர் இங்கிலாந்து இ-20 ச.போ.தொ மீள்பார்வை

 

இந்தியா, இங்கிலாந்து அணிகளுக்கிடையிலான இருபதுக்கு-20 சர்வதேச போட்டித் தொடர், இந்திய அணிக்கு வெற்றியாக அமைந்தது. தோல்வியுடன் தொடரை ஆரம்பித்த இந்தியா அணி அடுத்த இரண்டு போட்டிகளிலும் வெற்றி பெற்று தொடரைக் கைப்பற்றியது.

 

ஒரு நாள் சர்வதேசப் போட்டிகளில் மிகவும் சிறப்பாக இங்கிலாந்து அணி விளையாடியது, இருபதுக்கு-20 சர்வதேச போட்டிகளில் அதிக விறுவிறுப்பைத் தரும் என்று எதிர்பார்த்த போதும் அந்த தொடரளவுக்கு, இந்த இருபதுக்கு-20 சர்வதேச போட்டித் தொடர் விறுவிறுப்பை தரவில்லை. இங்கிலாந்து அணி முதற் போட்டியில் இலகுவான வெற்றியையும், இறுதிப் போட்டியில் இந்தியா அணி இலகுவான வெற்றியையும் பெற்றுக்கொண்டன. இரண்டாவது போட்டி மிகுந்த விறுவிவிறுப்பை தந்தது. இந்தியா அணி 5 ஓட்டங்களினால் வெற்றி பெற்றது.

 

இருபதுக்கு-20 சர்வதேச போட்டித் தொடரிலும்  வெற்றிபெற்றதன் மூலம் முழுமையாக தலைமைப் பொறுப்பையேற்று, மூன்று வித தொடர்களையும் விராத் கோலி வெற்றிபெற்று வெற்றிகரமான தலைவராக தன்னை வெளிக்காட்டியுள்ளார். ஆனால் வெளிநாட்டுத் தொடர்களையும் வெற்றி பெறுவதன் மூலமாகவே அவர் தன்னை நிரூபித்துக்காட்ட வேண்டும். இந்த தொடரில் இங்கிலாந்து அணி வெற்றிபெறும் வாய்ப்புகளை முழுமையாகவே கொண்டிருந்தது. இரண்டாவது போட்டி முழுமையாக இங்கிலாந்து அணிக்கான வெற்றி வாய்ப்புகளை கொண்டிருந்தது. இந்திய அணியின் இறுதி நேர இறுக்கமான பந்துவீச்சு, நடுவரின் பிழையான தீர்ப்பு, நல்ல பந்துவீச்சு மாற்றங்கள் என்பன இந்திய அணியின் வெற்றிக்கு கைகொடுத்தன. விராத் கோலி தலைவராக பொறுப்பேற்றிருந்தாலும் கூட களத்தடுப்பு வியூகங்கள், சில பந்துவீச்சு மாற்றங்கள் என்பனவற்றில் தோனி தலையிட்டதும் அணியாக எல்லோரும் சேர்ந்து செயற்பட்ட விதமும் இந்தியா அணி முழுமையாக ஒற்றுமையான அணியாக செயற்படுகின்றது என்பதனை வெளிக்காட்டியது.

 

இங்கிலாந்து அணி இந்தளவுக்கு இந்திய ஆடுகளங்களில் விளையாடியது மிகச்சிறப்பானது. இங்கிலாந்து அணி பலமான அணியாக மாறியுள்ளது. இனிவரும் காலங்களில் தொடர்ச்சியாக ஆசிய ஆடுகளங்களில் போட்டிகளில் பங்குபற்றினால் ஒரு நாள் சர்வதேசப் போட்டிகள், இருபதுக்கு-20 சர்வதேசப் போட்டிகளில் ஆசிய அணிகளுக்கும் சிம்ம சொப்பனமாக விளங்குவார்கள் என்பதில் எந்த சந்தேகமும் இல்லை. நல்ல அதிரடி வீரர்கள், சிறந்த பந்துவீச்சு என சிறப்பான அணியாக தென்படுகின்றனர். இரு அணிவுகளுக்குமிடையிலான இருபதுக்கு-20 சர்வதேசப் போட்டிகளில் இங்கிலாந்து அணி பலமாகவே இருந்துள்ளது. முதற் தடவையாக இந்திய அணி இங்கிலாந்து அணியை பலமாக வெற்றிகொண்டுள்ளது.

 

இந்தத் தொடர் முடிவின் மூலம் தரப்படுத்தல்களில் எந்த மாற்றங்களும் ஏற்படவில்லை. இந்திய  அணி ஒரு புள்ளியை பெற்றுள்ள அதேவேளை, இங்கிலாந்து அணி ஒரு புள்ளியை இழந்துள்ளது. இந்திய அணி இரண்டாமிடத்திலும்  இங்கிலாந்து அணி ஐந்தாமிடத்திலுமே உள்ளன.

 

இந்திய அணி , இருபதுக்கு-20 சர்வதேசப்  போட்டிகளில் ஒரு புதிய அணியை உருவாக்கியுள்ளது. இந்த அணி இந்த தொடரை வெற்றி பெற்றுள்ளமை அவர்கள் அடுத்த அணியை சிறப்பாக உருவாக்கி வருகின்றார்கள் எனவும் கூறலாம். கடந்த வருடத்தில் அதிக வெற்றிகளை பெற்றுள்ள போதும் ஏன் இன்னுமொரு புதிய அணி? வெற்றிகளை பெற்றபோதும் வீரர்கள் தொடர்ச்சியாக மாறி வந்துள்ளார்கள். ஒரு நாள் சர்வதேசப்போட்டிகள் போன்றே 20-20 போட்டிகளிலும் ஆரம்ப இடம் பிரச்சினையாக இருந்துள்ளது. விராத் கோலி ஆரம்ப துடுப்பாட்ட வீரராக களமிறங்கினார். முழுமையாக ஏமாற்றிவிட்டார். லோகேஷ் ராகுல் அடித்த 71 ஓட்டங்கள் அவரை இனி ஆரம்ப வீராக தொடர்ந்து விளையாடும் வாய்ப்புகளை உருவாக்கும்.

 

சுரேஷ் ரெய்னா தனக்கு கிடைத்த வாய்ப்பைப் பாவித்துளார். இறுதிப் போட்டியில் அரைச்சதமடித்தார். தொடரில் 104 ஓட்டங்களைப் பெற்றுக்கொண்டார். ஒரு நாள் சர்வதேசப் போட்டிகளில் மிகச்சிறந்த மீள் வருகையை புரிந்த யுவராஜ் சிங் இந்த தொடரில் ஏமாற்றிவிட்டார். ஆனாலும் இறுதிப்போட்டியில் 10 பந்துகளில் அடித்த 27 ஓட்டங்கள் அவரை நம்பலாம் என்ற நிலையை ஏற்படுத்தியுள்ளது. தோனி இறுதிப் போட்டியில் நான்காமிடத்தில் களமிறங்கி தனது முதல் அரைச்சதத்தை பெற்றுக்கொண்டார். தோனியின் இடம் தொடர்ந்தும் அணிக்கு தேவை என்ற நிலை உள்ளது. அணியில் இன்னமும் சில காலம் விளையாட வேண்டும் என்பது இந்த தொடரில் தென்பட்டது.

 

மனிஷ் பாண்டே ஒரு நாள் சர்வதேசப்போட்டிங்களிலும் தன்னுடைய இடத்தை இழந்துவிட்டார். தற்போது இருபதுக்கு-20 சர்வதேசப் போட்டிகளிலும் தனது இடத்தை இழந்து விட்டார். ஒரு நாள் சர்வதேசப்போட்டிகளில் கேதார் ஜாதவ் அடித்த அடி பின் மத்திய வரிசையில் யாரும் அடிக்காத வேளையில் நினைவுக்கு வந்தார். இந்தளவுக்கு ஆக்ரோஷமாக வேகமாக அடித்தாடக் கூடிய வீரர் ஏன் இருபதுக்கு-20 சர்வதேசப் போட்டிகளில் சேர்க்கப்படக்கூடாது? அடுத்த தொடரில் நிச்சயம் சேர்க்கப்படுவார் என நம்பலாம். ஹர்டிக்   பாண்ட்யா அணிக்கு தேவையானவரே. ஆனால், சரியாக துடுப்பாட்டத்தில் அவரால் அடித்தாட முடியவில்லை. பந்துவீச்சில் அதிகம் வாய்ப்புகள் கிடைக்கவில்லை. ஆனால் அறிமுகத்தின் போது சிறப்பாகவே பந்துவீசினார். ஆனாலும் கோலி அவரை அதிகம் இந்த தொடரில் பாவிக்கவில்லை.

 

ஆசிஷ் நெஹ்ரா, ஜஸ்பிரிட் பும்ரா ஆகியோர் மிகவும் சிறப்பாகவே பந்துவீசினார்கள். இவர்களின் சிறந்த வேகப் பந்துவீச்சே இந்தியா அணிக்கு வெற்றியை பெற்றுக்கொடுத்தது. இந்திய ஆடுகளங்களில் இறுதி நேரத்தில் வேகப்பந்து வீசி வெற்றியைப் பெற்றுக் கொடுப்பது என்பது அபூர்வமான விடயமே. முதற் போட்டியில் இருவருமே விக்கெட்டுகளைக் கைப்பற்றவில்லை. அதனாலேயே இந்தியா அணி தோல்வியை சந்தித்தது.

 

இறுதிப் போட்டியில் ஆறு விக்கெட்களை கைப்பற்றி, இந்தியாவின் சிறந்த இருபதுக்கு-20 சர்வதேசப் போட்டி பந்துவீச்சுப் பெறுதியையும் இருபதுக்கு-20 சர்வதேசப் போட்டிகளில், மூன்றாவது சிறந்த பந்துவீச்சுப் பெறுதியையும் யுஸ்வேந்திர சஹால் பெற்றுக்கொண்டார். மிகவும் சிறப்பான மீள் வருகை. கடந்தாண்டு சிம்பாப்வே தொடரில் தனது அறிமுகத்தை மேற்கொண்டவர். இந்தத் தொடரில் மிகவும் சிறப்பாக தன்னை நிரூபித்துள்ளார்.  முதற் போட்டியிலும் சிறப்பாக பந்துவீசினார். இரண்டாவது போட்டியிலும் விக்கெட்களைக் கைப்பற்றாவிட்டாலும் இறுக்கமாகப் பந்துவீசினார். போட்டியின் தொடர் நாயகன் விருதையும் பெற்றுக்கொண்டார்.

 

இவரின் வருகை மூலம் இரவீந்திர ஜடேஜா அல்லது இரவிச்சந்திரன் அஷ்வின் ஆகியோரில், ஒருவரின் இடம் நிச்சயம் இல்லாமல் போகலாம். இவர்கள் இருவரும் டெஸ்ட் போட்டிகளில் அதிக கவனம் செலுத்துவதனாலும்  முக்கியத்துவம் வழங்குவதனாலும் இனி இருபதுக்கு-20 சர்வதேசப் போட்டிகளில் அதிகம் ஓய்வு வழங்கப்படும். எனவே இன்னுமொருவர் தேவை. இவர்கள் இருவரையும் சுழற்சி முறையில் பாவிப்பது நல்லது. அடுத்த தொடரில் இது ஓரளவு தெரிய வரும்.

 

அமித் மிஷ்ரா, தான் விளையாடிய இரு போட்டிகளிலும் அதிகம் ஓட்டங்களை வழங்கவில்லை. தலா ஒவ்வொரு விக்கெட்களை ஒவ்வொரு போட்டிகளிலும் கைப்பற்றிக்கொண்டார். முதற் போட்டியில் அறிமுகத்தை மேற்கொண்ட பர்வீஸ் ரசூல் ஒரு விக்கெட்டைக் கைப்பற்றிய போதும் அடுத்த போட்டியில் நீக்கப்பட்டு மிஸ்ரா சேர்த்துக்கொள்ளப்பட்டார். இந்த வாய்ப்பு தேவைதானா? நேரடியாக மிஷ்ரா விளையாடியிருந்தால் சிலவேளைகளில்  போட்டியில் முடிவும் கூட மாறியிருக்கலாம்.

 

ரிஷப் பண்ட் 19 வயதான விக்கெட் காப்பாளர். துடுப்பெடுத்தாடக் கூடியவர். மூன்றாவது போட்டியில் அறிமுகத்தை மேற்கொண்டார். ஆட்டமிழக்காமல் ஐந்து ஓட்டங்களைப் பெற்றுக்கொண்டார். தோனியின் இடத்துக்கு இவரையே வளர்க்கப் போகின்றார்கள் என்பது தெளிவாக தென்படுகின்றது. அடுத்த போட்டிகளில் வாய்ப்பு கிடைத்தால் என்ன செய்வார் என்பதனை பொறுத்திருந்து பார்க்கலாம்.

 

ஜேசன் ரோய், சாம் பில்லிங்ஸ் ஆகியோரின் ஆரம்பம் முதற் போட்டியில் ஓரளவு சிறப்பாகவே அமைந்தது. அதனாலேயே வெற்றி பெறமுடிந்தது. ஆனாலும் அடுத்த இரண்டு இடங்களிலும், ஜோ ரூட், ஒய்ன் மோர்கன் ஆகியோரின் துடுப்பாட்டம் சிறப்பாக அமைந்த்து. தொடரில் கூடுதல் ஓட்டங்களை பெற்றவர்கள் இவர்களே. இரண்டாவது போட்டியில் ஜோ றூட்டின் ஆட்டமிழப்பே தவறுதலாக வழங்கப்பட்டது. அந்த ஆட்டமிழப்பு போட்டியை  இந்திய அணிக்கு சாதகமாக மாற்றியது என்பது ஏற்றுக்கொள்ளக்கூடிய உண்மையே. பென் ஸ்டோக்ஸ் இரண்டாவது போட்டியில் தங்கள் அணியின் பக்கமாக போட்டியினை மாற்றிக்கொடுத்தார். மற்றைய வீரர்கள் சிறப்பாக துடுப்பெடுத்தாடமல் போனது இங்கிலாந்து அணிக்கு பின்னடைவைத் தந்தது. குறிப்பாக ஜொஸ் பட்லர் இரண்டு போட்டிகளிலும் ஏமாற்றினார்.

 

இங்கிலாந்து அணியின் வேகப்பந்து வீச்சு போதுமான அளவுக்கு சிறப்பாக அமையவில்லை. கிறிஸ் ஜோர்டான் 5 விக்கெட்களை கைபப்ற்றினார். லியாம் பிளங்கெட் பெரியளவில் கைகொடுக்கவில்லை. பென் ஸ்டோக்சும் பந்துவீச்சில் கைவிட்டார். வெற்றி பெற்ற முதற் போட்டியில்  மொய்ன் அலி சிறப்பாக பந்துவீசி போட்டி நாயகன் விருதைப் பெற்றுக்கொண்டார். ஆனால் அடுத்த இரண்டு போட்டிகளும் அதிக ஓட்டங்களை வழங்காமல் பந்துவீசினார். ஒரு விக்கெட்டை மாத்திரமே கைப்பற்றினார். அடில் ரஷீட் முதற் போட்டியில் பந்துவீசவில்லை. அடுத்த இரண்டு போட்டிகளிலும் மோசமாகவே அமைந்தது. சமநிலையான அணியாக நல்ல வீரர்கள் உள்ள அணியாக இங்கிலாந்து அணி விளையாடிய போதும் அந்த வீரர்கள் சரியாக சோபிக்க தவறிவிட்டாரக்ள்.

 

தொடரில் 50 ஓட்டங்களை தாண்டியவர்கள்

ஜோ றூட்                       3              3              126         46*         63.00     121         104.13                   0             

ஒய்ன் மோர்கன்            3              3              108         51           36.00     82           131.70                   1             

சுரேஷ் ரெய்னா             3              3              104         63           34.66     78           133.33                   1             

லோகேஷ் ராகுல்          3              3              101         71           33.66     74           136.48                   1             

MS  தோனி                     3              3              97           56           48.50     70           138.57                   1             

ஜேசன் றோய்               3              3              61           32           20.33     45           135.55                   0             

விராத் கோலி               3              3              52           29           17.33     45           115.55                   0             

(போட்டி, இனிங்ஸ், ஓட்டங்கள், கூடிய ஓட்டங்கள், சராசரி, எதிர்கொண்ட பந்துகள்,  ஸ்ட்ரைக் ரேட், அரைச்சதம்)

தொடரில் மூன்று விக்கெட்களுக்கு மேல் கைப்பற்றியவர்கள்

யுஸ்வேந்திர சஹால்      3              3              12.0        0              85           8              6/25       10.62     7.08       

ஜஸ்பிரிட் பும்ரா                3              3              9.4          0              60           5              3/14       12.00     6.20       

கிறிஸ் ஜோர்டான்             3              3              12.0        0              105         5              3/22       21.00     8.75       

மொய்ன் அலி                     3             3              12.0        0              71           3              2/21       23.66     5.91       

ஆஷிஷ் நெஹ்ரா               3              3              10.0        1              83           3              3/28       27.66     8.30       

டைமல் மில்ஸ்                   3              3              12.0        0              94           3              1/27       31.33     7.83       

(போட்டி, இன்னிங்ஸ், ஓவர்கள், ஓட்டமற்ற ஓவர்கள், வழங்கிய ஓட்டங்கள், விக்கெட்கள், சிறந்த பந்துவீச்சு, சராசரி, ஓட்ட சராசரி வேகம்)

அவுஸ்திரேலியா, நியூசிலாந்து தொடர் மீள்பார்வை

 

அவுஸ்திரேலியா, நியூசிலாந்து அணிகளுக்கிடையிலான ஒரு நாள் சர்வதேசப் போட்டித் தொடரில், நியூசிலாந்து அணியை அடித்து துவைத்து அவுஸ்திரேலியா அணி வெற்றி பெற்று மிகப்பெரிய மீள் வருகையை காட்டியுள்ளனர். அவுஸ்திரேலியா அணி, நியூசிலாந்து அணியுடனான ஒரு நாள் சர்வதேசப் போட்டித் தொடரில் 3-0 என வெள்ளையடிப்பு செய்து வெற்றி பெற்றுளளது. இது அவர்களுக்கான வெற்றி மட்டுமல்ல. மிக அபாரமான மீள் வருகை. அவுஸ்திரேலியா அணி அவர்களின் பாணியில் தங்கள் மீள் வருகையை மேற்கொண்டுள்ளளது.  தங்கள் நாட்டில் வெற்றி பெற்றாலும் கூட நியூசிலாந்த்து அணி பலமில்லாத அணி இல்லை. மிகவும் பலமான அணி. அயல் நாட்டு அணி. மைதான நிலைமைகள், காலநிலை என்ற புறக்காரணிகள் தாக்கம் செலுத்தும் எனக்கூறி விட முடியாது. இந்த தொடர் வெற்றியானது அவுஸ்திரேலியா அணிக்கு பலத்தை வழங்கும். மனதளவில் மீள் வருகையை ஏற்படுத்தி மனபலத்தை அதிகரிக்கும்.

 

அவுஸ்திரேலியா அணி இந்த தொடரில் வெற்றி பெற்றாலும் கூட துடுப்பாட்டம் இன்னமும் அணியாக ஒருமித்து முன்னேற்றமைடைய வேண்டும். வோணர், ஸ்மித் ஆகியோரே இந்த வெற்றிகளை பெற்றுக் கொடுத்துள்ளனர். இவர்கள் தனித்து நின்று பெற்றுக்கொடுத்த ஓட்டங்களே வெற்றிகளை பெற்றுக்கொடுத்துள்ளன.

 

நியூசிலாந்து அணியின் பந்து வீச்சு பலமானது. ஆனால் இந்த தொடரில் அவர்களின் பந்துவீச்சு சிறப்பாக அமையவில்லை.முதலிரு போட்டிகளிலும் 300 ஓட்டங்களை தாண்டிய அவுஸ்திரேலிய அணி மூன்றாவது போட்டியில் 250 ஓட்டங்களை தாண்டியது. முதலிரு போட்டிகளிலும் நியூசிலாந்து அணியின் துடுப்பாட்டம் ஓரளவு சிறப்பாக அமைந்தது. 250 ஓட்டங்களை தாண்டியிருந்தாலும் கூட அவுஸ்திரேலியா அணி பெற்ற ஓட்டங்களை தாண்ட முடியவில்லை. பந்துவீச்சில் இறுக்கத்தை ஏற்படுத்தியிருந்தால் நியூசிலாந்து அணி வெற்றியினை யோசித்திருக்க  முடியும்.  மூன்றாவது போட்டி நடைபெற்ற மைதானம் கடந்த போட்டிகள் போன்று இல்லாமல் ஓட்டங்களை பெறுவதற்கு கடினமான மைதானம். அதற்கு ஏற்றால் போல ஓட்டங்களும் குறைந்தன. ஆனாலும் நியூசிலாந்து அணியின் ஓட்டங்களும் மிக மோசமாகவும் குறைந்தன.

 

அவுஸ்திரேலியாவின் பந்துவீச்சு, குறிப்பாக வேகப்பந்துவீச்சு நியூசிலாந்து அணியின் துடுப்பாட்ட வீரர்களை திணறடித்துவிட்டது. ஆரம்ப விக்கெட்டுகள் வேகமாக வீழ்த்தப்பட்டமை நியூசிலாந்து அணிக்கு மிகப்பெரிய ஓட்ட எண்ணிக்கையை துரத்துவதில் சிக்கல் ஏற்பட்டது. ஓட்டங்களை வழங்கிவிட்டு பின்னர் துரத்தி அடித்தல் என்பது எல்லா வேளைகளிலும் சாத்தியமற்ற ஒன்று. அதுவும் அவுஸ்திரேலியா அணிக்கு எதிராக அது சாத்தியமற்ற ஒன்றே.

 

இந்த வெற்றியின் மூலம் அவுஸ்திரேலியா அணி தமது முதலிடத்தை தக்க வைத்துள்ளது. இப்போதைக்கு முதலிடம் பறிபோகும் வாய்ப்புகள் குறைவாகவே உள்ளன. 120 புள்ளிகளுடன் முதலிடத்தில் தொடர்கின்றது. இந்திய அணி இங்கிலாந்து அணியுடன் அனைத்துப்போட்டிகளிலும் வெற்றிபெற்று, அதேவேளை அவுஸ்திரேலிய அணி பாகிஸ்தான் அணியுடன் மோசமான தொடர் தோல்வியைச் சந்தித்தால் மட்டுமே அவுஸ்திரேலிய அணி முதலிடத்தை இழக்கும். அதற்கான வாய்ப்புகள் மிகவும் அரிதாகவே உள்ளன. நியூசிலாந்து அணி மூன்றாமிடத்தில் இருந்து நான்காமிடத்துக்கு பின் தள்ளப்பட்டுளள்து. மூன்று புள்ளிகளை இழந்து 109 புள்ளிகளைப் பெற்றுள்ளது.

முதலாவது போட்டி

அவுஸ்திரேலியா 324/8 (50 ஓவர்கள்)

ஸ்டீவன் ஸ்மித் 164, ட்ரெவிஸ் ஹெட் 52, மத்தியூ வேட் 38

மற் ஹென்றி 74/2(10), ட்ரெண்ட் போல்ட் 51/2(10), ஜேம்ஸ் நீஷம் 58/2(6)

நியூசிலாந்து 256/10 (44.2)

மார்ட்டின் கப்தில் 114, கொலின் மன்றோ 49, ஜேம்ஸ் நீஷம் 34

ஜொஷ் ஹேசில்வூட் 49/3(10), மிற்சல் மார்ஷ் 38/2(8.2), பற் கம்மின்ஸ் 62/2 (9), அடம் ஸாம்பா 66/2(10) 

 

இரண்டாவது  போட்டி

நாணயச் சுழற்சியில் வெற்றிபெற்று முதலில் நியூசிலாந்து அணி களத்தடுப்பை தெரிவு செய்தது. முதலில் துடுப்பெடுத்தாடிய அவுஸ்திரேலிய அணி 116 ஓட்டங்களினால் வெற்றிபெற்றது. போட்டியின் கூடுதல் ஓட்டங்களை பெற்ற டேவிட் வோணர்  போட்டியின் நாயகன் விருதை பெற்றார்.

அவுஸ்திரேலியா 378/5 (50 ஓவர்கள்)

டேவிட் வோணர் 119, மிற்சல் மார்ஷ் 76 (ஆ.இ),  ஸ்டீவன் ஸ்மித் 72, ட்ரெவிஸ் ஹெட் 57

டிம் சௌதி 63/2(10)

நியூசிலாந்து 262/10 (44.2)

கேன் வில்லியம்சன் 81,ஜேம்ஸ் நீஷம் 74,  மார்ட்டின் கப்தில் 45

பற் கம்மின்ஸ் 41/4 (10),  ஜொஷ் ஹேசில்வூட் 42/2(9), மிற்சல் ஸ்டார்க்  52/2(10), ஜேம்ஸ் போக்னர் 69/2(8.2)

 

மூன்றாவது போட்டி

நாணயச் சுழற்சியில் வெற்றிபெற்ற அவுஸ்திரேலிய அணி ,முதலில் துடுப்பெடுத்தாடி 117 ஓட்டங்களினால் வெற்றிபெற்றது. போட்டியின் நாயகனாகவும், தொடர் நாயகனாகவும் டேவிட் வோணர் தெரிவானார்.

அவுஸ்திரேலியா 264/8 (50 ஓவர்கள்)

டேவிட் வோணர் 156,  ட்ரெவிஸ் ஹெட் 37

ட்ரெண்ட் போல்ட் 49/3(10), மிற்சல் சான்ட்னெர் 45/2(9), கொலின் டி கிரான்ட்ஹோம் 50/2(10)

நியூசிலாந்து 147/10 (36.1)

மார்ட்டின் கப்தில் 34, டொம் லேதம் 28

மிற்சல் ஸ்டார்க்  34/3(10) பற் கம்மின்ஸ் 26/2 (5.1), ஜேம்ஸ் போக்னர் 26/2(7), ட்ரெவிஸ் ஹெட் 37/2(7)

 

தொடரில் 100ஓட்டங்களை தாண்டிய துடுப்பாட்ட வீரர்கள்

டேவிட் வோணர்     3        3              299         156         99.66     109.92   2           0             

ஸ்டீவன் ஸ்மித்       3        3              236         164         78.66     98.33     1           1             

மார்ட்டின் கப்தில்     3         3              193         114         64.33     110.28   1           0             

ட்ரெவிஸ் ஹெட்      3        3              146         57           48.66     90.12     0           2             

ஜேம்ஸ் நீஷம்           2        2              108         74           54.00     90.75     0           1             

கேன் வில்லியம்சன் 3        3              103         81           34.33     95.37     0           1             

(போட்டிகள், இனிங்ஸ், ஓட்டங்கள், கூடிய ஓட்டங்கள், சராசரி, ஸ்ரைக் ரேட், சதங்கள், அரைச்சதங்கள்)

 

தொடரில் நான்கு விக்கெட்களுக்கு மேல் கைப்பற்றியவர்கள்

 

பற் கம்மின்ஸ்                  3              3              24.1        129         8              4/41       16.12     5.33        18.1       

ஜொஷ் ஹேசில்வூட்       3              3              26.0        113         6              3/49       18.83     4.34        26.0       

மிற்சல் ஸ்டார்க்               3              3              27.0        123         6              3/34       20.50     4.55        27.0       

ட்ரெண்ட் போல்ட்              3              3              30.0        180         6              3/49       30.00     6.00        30.0       

ஜேம்ஸ் போக்னர்              2             2              15.2        95           4              2/26       23.75     6.19        23.0

(போட்டிகள், இனிங்ஸ், ஓவர்கள், வழங்கிய ஓட்டங்கள், விக்கெட்கள், சிறந்த பந்துவீச்சு, சராசரி, ஓட்ட சராசரி வேகம், ஸ்ரைக் ரேட்)

அவுஸ்திரேலியா, பாகிஸ்தான் டெஸ்ட் தொடர் முன்னோட்டம்

 

அவுஸ்திரேலியா மற்றும் பாகிஸ்தான் அணிகளுக்கிடையிலான டெஸ்ட் தொடர் இம்மாதம் ஆரம்பிக்கவுள்ளது. மூன்று டெஸ்ட் போட்டிகள். இரண்டு அடிபட்ட அணிகளுக்கிடையிலான தொடராக இந்த தொடர் அமையவுள்ளது. நியூசிலாந்தில் தொடர் தோல்வியுடன் பாகிஸ்தான் அணி அவுஸ்திரேலியா கண்டத்துக்கான தொடரை ஆரம்பித்துள்ளது. 7 வருடங்களின் பின்னர் அவுஸ்திரேலியாவுக்கு டெஸ்ட் தொடரில் பங்குபற்ற செல்கின்றது. 22 தொடர்களில் இரு அணிகளும் மோதியுள்ளன. இவற்றில் 11 தொடர்களில் அவுஸ்திரேலயா அணி வெற்றி பெற்றுள்ளது. 6 தொடர்களில் பாகிஸ்தான் அணி வெற்றி பெற்றுள்ளது. 6 தொடர்கள் சமநிலை முடிவை தந்துள்ளன. 95 ஆம் ஆண்டு வரை இரு அணிகளும் கிட்டத்தட்ட சமபல அணிகளாகவே இருந்துள்ளன. அதன் பின்னர் அவுஸ்திரேலியா அணி மிகச் சிறப்பாக வெற்றிகளை அள்ளிக்குவித்துள்ளது. கடந்த வருடம் ஐக்கிய அரபு ராடசியத்தில் நடைபெற்ற தொடரில் பாகிஸ்தான் அணி வெற்றி பெற்றதன் மூலம் 20 வருடத்திற்கு பின்னர் வெற்றியைப் பெற்று தொடர் தோல்விகளுக்கு முற்றுப்புள்ளி வைத்தது.

 

இரு அணிகளும் 59 போட்டிகளில் மோதியுள்ளன. இரண்டு மடங்கு வெற்றிகளை அதிகமாக அவுஸ்திரேலியா அணி பாகிஸ்தான் அணியைக் காட்டிலும் பெற்றுள்ளது. 28 போட்டிகளில் ஆஸ்திரேலியா அணியும், 14 போட்டிகளில் பாகிஸ்தான் அணியம் வெற்றி பெற்றுள்ளன. 17 போட்டிகள் சமநிலையில் நிறைவடைந்துளளன. அவுஸ்திரேலியாவுக்கு முதற் தடவை 1964 ஆம் ஆண்டு டெஸ்ட் போட்டிகளுக்காக பாகிஸ்தான் அணி சென்றது. ஒரு போட்டி தொடர் . சமநிலையில் நிறைவடைந்தது. 76 ஆம் ஆண்டு மூன்றாவது தொடரில் முதல் டெஸ்ட் வெற்றியை பெற்ற பாகிஸ்தான் அணி தொடரை 1-1 என சமன் செய்தது. 78 ஆம் ஆண்டு நடைபெற்ற தொடரும் சமநிலையில் நிறைவடைந்தது. அதன் பின்னர் தொடர்ச்சியாக 7 தொடர்களிலும் அவுஸ்திரேலியா அணி வெற்றி பெற்றுள்ளது. 95 ஆம் ஆண்டு நடைபெற்ற தொடரில் பாகிஸ்தான் அணி 1-2 என்ற தொடர் தோல்வியை சந்தித்தது. அதன் பின்னர் நடைபெற்ற மூன்று தொடர்களிலும் 3-0 என வெள்ளையடிப்பு செய்து வெற்றி பெற்றது. அவுஸ்திரேலியா அணி தனது நாட்டில் பாகிஸ்தான் அணியுடன் விளையாடிய 32 போட்டிகளில் 21 இல் வெற்றி பெற்றுள்ளன. 4 போட்டிகளில் மட்டுமே தோல்வியை சந்தித்து அவுஸ்திரேலியா அணி. 7 போட்டிகள் சமநிலையில் நிறைவடைந்துள்ளன.

 

அவுஸ்திரேலியா அணி அடுத்தடுத்த தொடர் தோல்விகளினால் தடுமாறியுள்ளது. இலங்கையில் வைத்து வெள்ளையடிப்பு தோல்வி. பின்னர் தென்னாபிரிக்கா அணியுடனான தொடர் தோல்வி. ஆனால் அவுஸ்திரேலியா அணி தென்னாபிரிக்கா அணியுடன் இறுதிப்போட்டியில் வெற்றி பெற்று தமது மீள் வருகையை ஏற்படுத்தியுள்ளது. இதனை அவர்கள் மீண்டும் தொடரும் வாய்ப்புகள் அதிகம் உள்ளன. பொதுவாக அவுஸ்திரேலியா அணி தோல்விகளில் இருந்து மீண்டு வந்து மீள் வருகையை ஏற்படுத்தினால் அது மிக அபாரமாக அமையும். இது மீள் வருகையா இல்லையா என்பது பாகிஸ்தான் தொடரிலேயே தெரிய வரும். பாகிஸ்தான் அணி அவுஸ்திரேலியா அணியின் இந்த வீழ்ச்சியை சரியாக பாவிக்க வேண்டும். பொதுவாக அவுஸ்திரேலியா அணி என்றால் மனதளவில் உருவாகும் பயத்தை அண்மைக்கால தோல்விகள் இல்லமால் செய்துள்ளன. பாகிஸ்தான் அணி இதனை சரியாக பாவித்து திடமாக விளையாடினாள் குறைந்தது தொடரை சமநிலை செய்ய முடியும். நீண்ட நாட்களுக்கு பின்னர் பாகிஸ்தான் டெஸ்ட் அணி பலமான அணியாக மாறி வந்துள்ளது. இந்த சந்தர்ப்பம் அவர்களுக்கான நல்ல சந்தர்ப்பம். ஆனால் பாகிஸ்தான் அணியின் ஏறுமுகம் நிறைவுக்கு வந்து இறங்கு முகத்தின் ஆரம்பமா என்பது இந்த தொடர் நிறைவிலேயே தெரிய வரும். பாகிஸ்தான் அணியை எதிர்வு கூறுவதும், கணிப்பதும் ஒன்றும் அவ்வளவு இலகுவானது அல்ல.

 

இரு அணிகளிலும் யூனுஸ் கானை தவிர்த்து வேற எந்த வீரரும் ஆஸ்திரேலியா பாகிஸ்தான் அணிகளுக்கிடையிலான தொடரில் அவுஸ்திரேலியாவில் வைத்து விளையாடியதில்லை. பாகிஸ்தான் அணி வீரர்களுக்கு இது மிகப்பெரிய பின்னடைவை உருவாக்கும். பழக்கமில்லாத ஆடுகளங்கள். அவுஸ்திரேலியா அணியின் வீரரக்ள் என்றாலும் தங்கள் சொந்த ஆடுகளங்கள் என்ற நம்பிக்கை உண்டு.

 

இரு அணிகளுக்குமிடையில் அவுஸ்திரேலியாவில் நடைபெற்ற போட்டிகளில் கூடுதல் ஓட்டங்களை பெற்றவர்கள்

கிரேக் சப்பல்                        1972-1984            14           22           1200       201         60.00     5              4             

ஷாகிர் அபாஸ்                     1972-1984            15           28           1097       101         40.62     1              10          

ஜாவிட் மியான்டாட்           1976-1990            16           28           1028       131         38.07     2              7             

ரிக்கி பொன்டிங்                   1999-2010            9              16           978         209         69.85     3              4             

அலன் போடர்                      1979-1990            13           20           923         118         57.68     3              5             

இம்ரான் கான்                      1976-1990            13           23           733         136         36.65     1              4             

மார்க் ரெய்லர்                       1990-1995            6              10           728         123         80.88     3              5             

ஜஸ்டின் லங்கர்                    1999-2005            6              10           721         191         72.10     3              3             

மஜீட் கான்                             1972-1981            11           21           716         158         35.80     2              2             

ஆஷிப் இக்பால்                     1964-1979            9              17           681         152*      45.40     3              1             

(வீரர், விளையாடிய காலம், போட்டிகள், இன்னிங்ஸ், ஓட்டங்கள், கூடிய ஓட்டங்கள், சராசரி, சதங்கள், அரைச்சதங்கள்)

 

இரு அணிகளுக்குமிடையில் அவுஸ்திரேலியாவில் நடைபெற்ற தொடரில் கூடுதல் விக்கெட்களை கைப்பற்றிய பந்துவீச்சாளர்கள்

டெனிஸ் லெல்லி          1972-1984            14           26           3821       1858       68           6/82       10/135  27.32   2.91               

ஷப்ராஸ் அஹமட்        1972-1984            12           22           3854       1573       50           9/86       11/125  31.46     2.44       

கிளன் மக்ரா              1995-2005            9              18           2177       995         47           8/24       9/68       21.17     2.74               

ஷேன் வோன்            1995-2005            9              15           2217       970         45           7/23       11/77     21.55     2.62       

இம்ரான் கான்            1976-1990            13           20           3038       1283       45           6/63       12/165  28.51     2.53       

வசீம் அக்ரம்               1990-1999            9              15           2091       866         36           6/62       11/160  24.05     2.48       

கால் ரெக்மான்            1983-1990            5              9              1151       434         26           6/86       11/118  16.69     2.26       

ஜெப் லோவ்சன்           1983-1984            5              9              1131       580         24           5/49       9/107     24.16     3.07       

தனிஷ் கனேரியா          2004-2010            5              10           1536       974         24           7/188     8/204     40.58     3.80       

முஷ்டாக் அஹமட்        1990-1999            4              8              1334       739         22           5/95       9/186     33.59     3.32       

(வீரர், விளையாடிய காலம், போட்டிகள், இன்னிங்ஸ், வீசிய பந்துகள், வழங்கிய ஓட்டங்கள், விக்கெட்கள், இன்னிங்ஸ் சிறந்த பந்துவீச்சு, போட்டி சிறந்த பந்துவீச்சு, சராசரி, ஓட்ஸ் சராசரி வேகம்)

 

பாகிஸ்தான் அணி விபரம்

மிஷ்பா உல் ஹக், அஸார் அலி, ஷமி அஸ்லாம், ஷர்ஜீல் கான், யூனுஸ் கான், ஆஷட் ஷபீக், பாபர் அஸாம், சப்ராஸ் அஹமட், மொஹமட் ரிஷ்வான், யசீர் ஷா, மொஹமட் நவாஸ், மொஹமட் அமீர், வஹாப் ரியாஸ், ரஹாத் அலி, சொஹைல் கான், இம்ரான் கான்

 

நியூசிலாந்து தொடரில் விளையாடிய அதே அணியே இந்த தொடருக்கும் மாற்றமின்றி தெரிவு செய்யப்பட்டுள்ளது.  நியூசிலாந்து தொடரில் பாகிஸ்தான் அணி இரண்டு போட்டிகளிலும் தோல்வியை சந்தித்திருந்தாலும் கூட தெரிவுக்குகுழுவினர் அதே அணி மீது நம்பிக்கையை வைத்துளள்னர். கம்ரன் அக்மல் உள்ளூர்ப்போட்டிகளில் கூடிய ஓட்டங்களை எடுத்த போதும் அவரை அணியில் சேர்க்கவில்லை. மொஹமட் ஹபீஸின் பந்து வீச்சு அனுமதியை சர்வதேசக் கிரிக்கெட் பேரவை அனுமத்தித்துள்ள போதும் அவரையும் மீண்டும் அணிக்குள் உள்வாங்கவில்லை.

 

அண்மைக்காலமாக வெற்றி பெற்ற தொடரிகளில் இந்த வீரர்களே அதிகம் விளையாடியுளளனர். எனவே அணியை மாற்றுவதும் சிறந்த முடிவு அல்ல. ஒரு தொடர் தோல்விக்காக அணியை மாற்றுவது அணியின் சமநிலையை குழப்பும்.

 

நியூசிலாந்து தொடரில்  விளையாடிய அணியில் பெரிய மாற்றங்கள் இடப்பெறாது. மிஸ்பா உல் ஹக் நியூசிலாந்து தொடரின் இரண்டாவது போட்டியில் விளையாடாத நிலையில் மொஹமட் ரிஷ்வான் தனது அறிமுகத்தை மேற்கொண்டார். முதல் இன்னிங்சில் ஓட்டம் எதனையும் பெறாமல் ஆட்டமிழந்தார். இரண்டாவது இன்னிங்சில் 13 ஓட்டங்களை ஆட்டமிழக்காமல் பெற்றுக்கொண்டார். அவர் மேலதிக சகலதுறை  வீரராக அணியில் இடம்பெறும் வாய்ப்பு உள்ளது ஒரு துடுப்பாட்ட வீரர் மாற்றப்படுவதாக இருந்தால் அவருக்கு வாய்ப்பு அதிகம் உண்டு. துடுப்பாட்ட வரிசையில் மாற்றங்கள் இருக்காது. அஸார் அலி, ஷமி அஸ்லாம், பாபர் அஸாம்,  யூனுஸ் கான், மிஷ்பா உல் ஹக், ஆஷட் ஷபீக், சப்ராஸ் அஹமட் ஆகியோர் துடுப்பாட்ட வரிசையில் மூன்று போட்டிகளிலும் விளையாடும் வாய்ப்புக்களை கொண்டவர்கள். யஸீர் ஷா சுழற்பந்து வீச்சாளராக அணியில் இடம் பெறவேண்டிய வீரர். நியூசிலாந்து தொடரின் முதற் போட்டியில் இவர் விளையாடவில்லை. இரண்டாவது போட்டியில் விக்கெட்களை கைப்பற்றவில்லை. ஆனாலும் வேகமாக விக்கெட்களை அள்ளிக் குவித்து வரும் ஒருவர். நிச்சயம் அணியில் தொடர வேண்டும். வேகப்பந்துவீச்சு இன்னமும் முழுமை பெறவில்லை. மொஹமட் அமீர் மட்டுமே நிரந்தரமானவர். மற்றைய இருவர் அல்லது மூவர் என்று பார்க்கும் வேளையில் இம்ரான் கான் தொடரை ஆரம்பிக்கும் வாய்ப்புகள் உள்ளன. நியூசிலாந்து தொடரின் இரண்டாவது போட்டியில் விளையாடி 6 விக்கெட்களை கைபப்ற்றினார். சொஹைல் கான் இரண்டு போட்டிகளிலும் 7 விக்ட்களை கைப்பற்றினார். முதற் போட்டியில் விளையாடிய ரஹாத் அலி 4 விக்கெட்களை கைப்பற்றினார். வஹாப் ரியாஸ் இரண்டாவது போட்டியில் 2 விக்கெட்களை கைப்பற்றினார். இதுவே வேகப்பந்து வீச்சின் நிலை. வேகப்பந்து வீச்சுக்கு சாதகம் தரும் மைதானங்களில் இவர்கள் சிறப்பாக பந்து வீசினால் அவுஸ்திரேலியா வீரர்களை தடுமாற வைக்கலாம்.

 

அவுஸ்திரேலியா அணி விபரம்

டேவிட் வோர்னர், மட் ரென்ஷோ, உஸ்மான் காவாஜா, ஸ்டீபன் ஸ்மித், பீட்டர் ஹான்டஸ்கோம்ப், நிக் மட்டின்சன், மத்தியூ வேட், மிட்செல் ஸ்டார்க், ஜோஷ் ஹஸ்ல்வூட், நேதன் லயோன், ஜக்ஸன் பேர்ட், சாட் சயேர்ஸ் 

 

அவுஸ்திரேலியா அணி தென்னாபிரிக்கா அணியுடனான தோல்வியுடன் அணியில் அதிரடி மாற்றங்களை செய்தது. அந்த தொடரின் இறுதிப்போட்டியில் மூன்று வீரர்களுக்கு அறிமுகம் வழங்கப்பட்டது. இன்னும் சில வீரர்களும் கூட மாற்றப்பட்டனர். அவுஸ்திரேலியா அணி வெற்றியைப்பெற்றது. அந்த போட்டியில் வெற்றி பெற்ற அதேயணி முதற்போட்டிக்கு அறிவிக்கப்பட்டுள்ளது. இந்த அணி முதற் போட்டியில் காட்டும் திறமைகளின் அடிப்படையில் அடுத்த இரண்டு போட்டிகளுக்குமான அணி தெரிவு செய்யப்படும்.

 

டேவிட் வோர்னர், மட் ரென்ஷோ ஆகியோர் ஆரம்ப துடுப்பாட்ட வீரர்கள். ரென்ஷோ கடந்த போட்டியில் அறிமுகம் மேற்கொண்ட வீரர். மிகச் சிறப்பான ஆரம்பம் இல்லை. முதல் இன்னிங்சில் 10 ஓட்டங்கள். இரண்டாம் இன்னிங்சில் ஆட்டமிழக்காமல் 34 ஓட்டங்கள். நிச்சயம் இந்த தொடரின் முதற் போட்டியில் வாய்ப்பு வழங்கப்படும். உஸ்மான் காவாஜா கடந்த போட்டியின் முதல் இன்னிங்சில் ஆரம்ப வீரராக களமிறங்க முடியாத நிலையில் களமிறங்கிய உஸ்மான் காவஜா மிக அபாரமாக துடுப்பாடினார்.  இரண்டாம் இன்னிங்சில் மூன்றாமிலக்கத்தில் துடுப்பாடி ஓட்டங்களை பெறாமல் ஆட்டமிழந்தார். ஆனால் இவர் தற்போது அவுஸ்திரேலியா அணியின் நம்பிக்கையான துடுப்பாட்ட வீரர். அடுத்த இடம் ஸ்டீபன் ஸ்மித். ஸ்மித் மற்றும் வோர்னர் ஆகியோர் மிக சிறப்பான போர்மில் உள்ளனர். அவர்களின் துடுப்பாட்டம் அவுஸ்திரேலியா அணிக்கு மிகக்பெரிய பலம். மத்திய வரிசையில் அறிமுகத்தை மேற்கொண்ட பீட்டர் ஹான்டஸ்கோம்ப் அறிமுக இன்னிங்சில் அரைச்சதமடித்து நம்பிக்கையை வழங்கினார்.

 

விக்கெட் காப்பாளர் மத்தியூ வேட் 3 1/2 வருடங்களின் பின்னார் மீள் வருகை வாய்ப்பை பெற்றார். ஆனால் துடுப்பாட்டம் சரியாக அமையவில்லை. இந்த தொடரின் முதற்போட்டி வாய்ப்பு நிச்சயம் உண்டு. ஆனால் அவுஸ்திரேலியாவில் விக்கெட்காப்பு நல்ல முறையில் செய்து ஓட்டங்களை பெற்றுக்கொடுக்க கூடிய நல்ல விக்கெட் காப்பாளர்கள் இல்லை என்பது மிகக்பெரிய குறையாகவே உள்ளது. இயன் ஹீலி விட்டுச் செல்லும் போது அடம் கில்கிறிஸ்ட் சரியான வகையில் இடத்தைப் பிடித்துக்கொண்டார். ஆனால் அவரின் பின்னர் மிக நம்பிக்கை தரும் விக்கெட் காப்பாளர் ஒருவர் அவுஸ்திரேலியா அணிக்கு கிடைக்கவில்லை என்பது உண்மை.

 

வேகப்பந்து வீச்சில் மிட்செல் ஸ்டார்க், ஜோஸ் ஹஸ்ல்வூட் ஆகியோர் மிக ந,நம்பிக்கையானவர்கள். மூன்றாமவராக ஜக்சன் போர்ட் கடந்த தென்னாபிரிக்கா போட்டியில் மீண்டும் அணிக்குள் சேர்க்கப்பட்டார்.   விக்கெட்களை கைபப்ற்றினார். அவர் நிச்சயம் விளையாடுவார் என்பது அறிவிக்கப்பட்டுள்ள அணியிலிருந்து தெளிவாக தென்படுகின்றது. மித வேகப்பந்து வீச்சாளரான சாட் சயேர்ஸ் அணியில் சேர்க்கப்பட்டுள்ளார். அவர்  வது வீரராகவே அணியில் இருக்கப்போகின்றார். சுழற் பந்துவீச்சாளராக நேதன் லயோன். மூன்று வேகப்பந்து வீச்சாளர்கள். ஒரு சுழற் பந்துவீச்சாளர். நான்கு பந்து வீச்சாளர்களுடன் மாத்திரம் களமிறங்கவுளள்து அவுஸ்திரேலியா அணி. சகலதுறை வீரர் ஒருவர் அணியில் இல்லாமை மாத்திரமே இவர்களுக்கு பின்னடைவு.

 

இந்த அணியை வைத்து பாகிஸ்தான் அணியின் விக்கெட்களை தகர்க்க வேண்டும். சாத்தியமா? தோல்விகளினால் பின்னடைவை சந்தித்துள்ள அவுஸ்திரேலியா அணி மிக ஆக்ரோஷமான மீள் வருகை ஒன்றுக்கு முயற்சிக்கும். அதனை பாகிஸ்தான் அணி சரியாக எதிர்கொள்ளுமா அல்லது அவுஸ்திரேலியா அணியிடம் மண்டியிடுமா? இறுக்கமான தொடராக   இந்த தொடர் அமையலாம். பாகிஸ்தான் அணிக்கு இந்த தொடரை சமன் செய்யும் வாய்ப்புகள் உள்ளன. ஆனால் சரியாக அவுஸ்திரேலியா அணியின் பின்னடைவை பாவித்து அடித்தால் பாகிஸ்தான் அணிக்கு சார்பான தொடராக இந்த தொடரை மாற்றலாம்.

 

 

முதற் போட்டி – டிசம்பரம் 15 – 19 – இலங்கை நேரம் காலை 8.30

பிறிஸ்பேர்ண் கிரிக்கெட் மைதானம், பிறிஸ்பேர்ண்

 

இரண்டாவது போட்டி – டிசம்பரம் 26 – 30 இலங்கை நேரம் அதிகாலை 5.00

மெல்பேர்ன் கிரிக்கெட் மைதானம், மெல்பேர்ன் 

 

மூன்றாவது போட்டி – ஜனவரி 3-7 , இலங்கை நேரம் அதிகாலை 5.00

சிட்னி கிரிக்கெட் மைதானம், சிட்னி

சமபல அண்டைய நாடுகளுக்கிடையிலான மோதல்

 

சமபலமாக உள்ள அயல் நாட்டு அணிகளுக்கிடையிலான மூன்று போட்டிகள் அடங்கிய தொடர் அவுஸ்திரேலியா, நியூசிலாந்து அணிகளுக்கிடையில் அவுஸ்திரேலியாவில் நடைபெறவுள்ளது. உலகக்கிண்ணத்தின் இறுதிப்போட்டி அணிகள் இரண்டும் மோதுகின்றன. இந்த இரு அணிகளும் விளையாடும் போட்டிகள், போட்டித்தன்மை மிக்கவையாக மாறியுள்ளன. நியூசிலாந்து அணி, ஒரு நாள் சர்வதேசப் போட்டிகளில் பலமான நிலையிலேயே  உள்ளது.

 

இந்த வருடத்தில் ஏற்கெனவே இரண்டு அணிகளும் மோதியுள்ளன. நியூசிலாந்தில் நடைபெற்ற மூன்று போட்டிகள் அடங்கிய தொடரில், 2-1 என்ற ரீதியில் நியூசிலாந்து அணி வென்றிருந்தது. இறுதியாக இந்தியாவில் நடைபெற்ற தொடரிலும் நியூசிலாந்து அணி சிறப்பாக விளையாடியது. தொடரில் தோல்வியைச் சந்தித்தாலும், இரண்டு போட்டிகளில் வெற்றி பெற்றிருந்தது.

 

இந்த வருடத்தில் 12 போட்டிகளில் விளையாடியுள்ள நியூசிலாந்து அணி ஏழு  போட்டிகளில் வெற்றி பெற்றுள்ளது. நான்கு போட்டிகளில் தோல்வியைச் சந்தித்துள்ளது. ஒரு போட்டி கைவிடப்பட்டது. எந்த அணிகளுக்கும், எந்த மைதானங்களிலும் அச்சுறுத்தும் அணியாக திகழும் நியூசிலாந்து அணி, அவுஸ்திரேலியா அணியை வெற்றி பெறும் வாய்ப்புகள் அதிகமுள்ளன.

 

அவுஸ்திரேலியா அணி உலக சம்பியனாக இருந்தாலும், அண்மைக் காலமாக போதியளவு சிறப்பாகச் செயற்படவில்லை. இந்தாண்டு 26 போட்டிகளில் விளையாடியுள்ள அவுஸ்திரேலியா அணி, 14 போட்டிகளில் வெற்றி பெற்றுள்ளது. 11 போட்டிகளில் தோல்வியைச் சந்தித்துள்ளது. ஒரு போட்டி கைவிடப்பட்டது.

 

தென்னாபிரிக்கா அணியுடனான ஒரு நாள் சர்வதேச போட்டித் தொடரில் வெள்ளையடிப்புச் செய்யப்பட்டு ஐந்து போட்டிகளிலும் தோல்வியைச் சந்தித்தது. அதற்கு  முன்னர்  இலங்கை அணியை இலங்கையில் வைத்து 4-1 என்ற ரீதியில் வெற்றி பெற்றது. அண்மைக்கால தோல்விகள், இவர்களை தடுமாற வைத்துள்ளது. அழுத்தத்துடன் இந்த தொடரில் களமிறங்கவுள்ளனர். எப்படியாவது வெல்லவேண்டும் என்ற நிலை உள்ளது. இல்லாவிட்டால் அணித் தலைவர், வீரர்கள் என சிலருக்கு சாவு மணி காத்திருக்கின்றது எனக்கூறலாம். இந்த நிலையில் நியூசிலாந்து அணியின் தொடர் இவர்களுக்கு கடினமாக அமைய  வாய்ப்புகள் உள்ளன.

 

அவுஸ்திரேலியா அணி தரப்படுத்தலில் முதலிடத்தை இழக்குமா என்ற நிலை உள்ளது. நியூசிலாந்து அணி 3 போட்டிகளிலும் வெற்றி பெற்றால், அவுஸ்திரேலியா அணி இரண்டாமிடத்துக்கு பின்தள்ளபப்டும். ஒரு போட்டியில் வெற்றி பெற்றாலும், முதலிடத்தை அவுஸ்திரேலியா அணி தக்க வைத்துக்கொள்ளும். மூன்றாமிடத்திலுள்ள நியூசிலாந்து அணி , மூன்று போட்டிகளிலும் வெற்றி பெற்றால் அவுஸ்திரேலியா அணியுடன் இணைந்து 115 புள்ளிகளைப் பெறும். நியூசிலாந்து அணி எந்த முடிவை பெற்றாலும் அவர்களின் இடத்தில் மாற்றம் ஏற்படாது. ஆனால் புள்ளிகளில் மட்டும் மாற்றம் ஏற்படும்.

 

ஒரு நாள் சர்வதேசப் போட்டி தரப்படுத்தல்

1              அவுஸ்திரேலியா               51           6023       118

2              தென்னாபிரிக்கா                52          6024       116

3              நியூசிலாந்து                       46           5133      112

4              இந்தியா                              53           5891       111

5              இங்கிலாந்து                       54           5804       107

6              இலங்கை                           60           6056       101

7              பங்களாதேஷ்                    30           2840       95

8              பாகிஸ்தான்                       51           4555       89

9              மேற்கிந்தியத் தீவுகள்       37           3168       86

10           ஆப்கானிஸ்தான்                26           1341       52

11           சிம்பாப்வே                           50           2409       48

12           அயர்லாந்து                          20           834        42

 

இரு அணிகளும் 130 போட்டிகளில் மோதியுள்ளன. இவற்றில் அவுஸ்திரேலியா அணி 87 போட்டிகளிலும், நியூசிலாந்து அணி 37 போட்டிகளிலும் வெற்றி பெற்றுள்ளன. ஆறு போட்டிகள் கைவிடப்பட்டுள்ளன.

 

ஒட்டு மொத்தமாக பார்க்கும் போது அவுஸ்திரேலியா அணி மிகப்பலமாகவே இருந்து வந்துள்ளது. கடந்த இரண்டு வருடங்களில் நியூசிலாந்து அணி மிகப் பலமாக மாறியுள்ளது. இதுதான் அவுஸ்திரேலியா அணிக்கான பெரிய சவால். அந்தச் சவாலை எப்படி முறியடிக்கப் போகின்றார்கள் என்பது முக்கிய விடயம். அவுஸ்திரேலிய அணியைப் பார்த்ததும் பயந்து போய் அழுத்தத்துக்கு உள்ளாகும் அணிகளில் நியூசிலாந்து அணியும் முக்கியமானதே. அந்த அழுத்தம் மட்டுமே நியூசிலாந்து அணியை பொறுத்தளவில் பின்னடைவைத் தரும் விடயம். இரண்டு அணிகளதும் அண்மைய பெறுபேறுகளை பார்க்கும்போது நியூசிலாந்து அணிக்கு இந்தத் தொடரில் வெற்றி பெறும் வாய்ப்புகள் அதிகமுள்ளன.

பாகிஸ்தான் – நியூசிலாந்து டெஸ்ட் தொடர்

 

பாகிஸ்தான், நியூசிலாந்து அணிகளுக்கிடையில் நியூசிலாந்தில் நடைபெற்ற இரண்டு போட்டிகள் அடங்கிய டெஸ்ட் தொடரில் நியூசிலாந்து அணி 2-0 என வெள்ளையடிப்புச் செய்து வெற்றி பெற்றுள்ளது. அண்மைக்காலங்களில் டெஸ்ட் போட்டிகளில் மிகச்சிறப்பாக செயற்பட்டு வந்த பாகிஸ்தான் அணி திடீரென மிக மோசமாக தோல்வியடைந்துள்ளது. சில மாதங்களுக்கு முன்னர் முதலிடத்திலிருந்த அணி இந்தத் தொடரின் பின்னர் நான்காமிடத்திலுள்ளது. பாகிஸ்தான் அணி, இலங்கையில் வைத்து 2014ஆம் ஆண்டு தோல்வியடைந்த பின்னர் தற்போதே தொடர் ஒன்றில் தோல்வியைச் சந்தித்துள்ளனர்.

 

இங்கிலாந்தில் வைத்து இரண்டு போட்டிகளில் வெற்றி பெற்ற பாகிஸ்தான் அணி, அவ்வளவு பலமில்லாத நியூசிலாந்து அணியிடம் தோல்வியடைந்துள்ளமை ஆச்சரியமே. நியூசிலாந்து அணிக்கு இது ஒரு நல்ல மீள் வருகை தொடர். கடந்த வருடம் இலங்கை அணியை தமது நாட்டில் வெற்றி பெற்ற பின்னர் நியூசிலாந்து அணி முக்கிய அணியுடனான தொடரை வென்றுள்ளது. அவுஸ்திரேலியா அணியுடன் சொந்த நாட்டில் தோல்வி. அதன்பின்னர் தொடர்ந்து வெளிநாட்டுத் தொடர்கள். சிம்பாப்வே அணியுடன் மாத்திரமே வெற்றி பெறமுடிந்தது.

 

பாகிஸ்தான் அணியை 32 வருடங்களின் பின்னர் தொடர் ஒன்றில் நியூசிலாந்து அணி வென்றுள்ளது. தங்கள் சொந்த நாட்டில் வைத்து 84ஆம் ஆண்டு பாகிஸ்தான் அணியை வென்ற பின்னர் தற்போதே நியூசிலாந்து அணி வெற்றி பெற்றுள்ளது. இந்த இரு தொடர்களுக்கும் இடையே 10 தொடர்கள் நியூசிலாந்தில் நடைபெற்றுள்ளன. இவற்றில் 7 தொடர்களில் பாகிஸ்தான் அணி வெற்றி பெற்றுள்ளது. அந்தளவுக்கு பாகிஸ்தான் அணி நியூசிலாந்தில் ஆதிக்கம் செலுத்தி வந்துள்ளது. அந்த ஆதிக்கத்துக்கு நியூசிலாந்து அணி தற்போது முற்றுப்புள்ளியை வைத்துள்ளது.

 

இரு அணிகளுக்குமிடையில் 55ஆம் ஆண்டு ஆரம்பித்த டெஸ்ட் தொடர்களில், மூன்றில் மட்டுமே நியூசிலாந்து அணி வெற்றி பெற்றுள்ளது. இரு அணிகளுக்குமிடையில் 22 டெஸ்ட் தொடர்கள் நடைபெற்றுள்ளன.  இவற்றில் 6 தொடர்கள் சமநிலையில் நிறைவடைந்துள்ளன. பாகிஸ்தான் அணி 13 தொடர்களில் வெற்றி பெற்றுள்ளது. இரண்டு அணிகளுக்குமிடையில் நியூசிலாந்தில் நடைபெற்ற 31 போட்டிகளில் பாகிஸ்தான் அணி 10 போட்டிகளிலும், நியூசிலாந்து அணி 7 போட்டிகளிலும் வெற்றிபெற்றுள்ளன. 14 போட்டிகள் சமநிலையில் நிறைவைடைந்துள்ளன. 55 போட்டிகளில் இரண்டு அணிகளும் மோதியுள்ளன. 24 போட்டிகளில் பாகிஸ்தான் அணியும், 10 போட்டிகளில் நியூசிலாந்து அணியும் வெற்றிபெற்றுள்ளன. 21 போட்டிகள் சமநிலையில் நிறைவடைந்தன.

 

மிகப் பலமாக நியூசிலாந்து அணி மீது ஆதிக்கம் செலுத்தி வந்த பாகிஸ்தான் அணியை நியூசிலாந்து அணி வெற்றி கொண்டது மிகப்பெரிய விடயமே. எப்போதும் ஆச்சரியப்பபடவும், அதிர்ச்சியடையவும் வைக்கும் அணி பாகிஸ்தான் அணியே. இந்தத் தொடரிலும் அதுதான் நடந்திருக்கின்றது. மிக அபாரமாக வெற்றிகளை அள்ளிக்குவிக்க ஆரம்பித்துள்ளனர் என்ற எதிர்பார்ப்பு இருக்க மீண்டும் பழைய நிலைக்கு அணி சென்றுவிட்டது.

 

இந்தத் தொடர் முழுக்க முழுக்க பந்து வீச்சாளர்களுக்கு சாதகத் தன்மையைத் தந்துள்ளது. பாகிஸ்தான் அணியிலும் பார்க்க நியூசிலாந்து அணிக்குப் பந்து வீச்சுப் பலம் அதிகம். அந்த வித்தியாசமே இந்தத் தொடரின் வெற்றியை தீர்மானித்துள்ளது. 80 விக்கெட்டுகளில் 67 விக்கெட்கள் வீழ்த்தப்பட்டுள்ளன. இவற்றில் 40 விக்கெட்டுகள் பாகிஸ்தான் அணியின் விக்கெட்டுகள். துடுப்பாட்ட வீரர்கள் அதிகமாக ஓட்டங்களை பெற முடியவில்லை. நியூசிலாந்து துடுப்பாட்ட வீரர்கள் பெற்ற ஓட்டங்களே அவர்களுக்கு வெற்றியைக் கொடுத்தது. முதற்போட்டியின் நான்காம் இனிங்ஸிலும், இரண்டாவது போட்டியின் மூன்றாம் இனிங்ஸிலும் நியூசிலாந்துத் துடுப்பாட்ட வீரர்கள் மிகச் சிறப்பாகச் செயற்பட்டனர். இந்த இரண்டு இனிங்ஸிலும் பாகிஸ்தான் பந்துவீச்சாளர்களினால் சிறப்பாகச் செயற்பட்டு நியூசிலாந்து அணியின் விக்கெட்டுகளை தகர்க்க முடியவில்லை.

 

வேகப்பந்து வீச்சாளர்கள் சிறப்பாக பந்துவீசியுள்ளனர். குறிப்பாக, நியூசிலாந்து அணியின் வேகப்பந்து வீச்சு மிக சிறப்பாக அமைந்தது. அவர்கள் விக்கெட்டுகளை அள்ளி எடுக்க, பாகிஸ்தான் அணியின் துடுப்பாட்ட வீரர்கள் போதியளவு ஓட்டங்களை எடுக்க இயலவில்லை. அண்மைக்காலமாக ஓட்டங்களை அள்ளிக் குவித்து வந்த யுனிஸ்ஸ் கான் கூட ஓட்டங்களைப் பெற முடியாமல் தடுமாறிப்போனார். முதற் போட்டியில் விளையாடிய மிஸ்பா உல் ஹக் கூட தடுமாறிப்போனார்.

 

இந்தத் தொடரில் நியூசிலாந்து அணி இரண்டு வீரர்களுக்கு அறிமுகத்தை வழங்கியது. இவர்கள் இருவருமே இந்தத் தொடர் வெற்றியில் முக்கிய பங்கு எடுத்துள்ளனர். ஆரம்பத் துடுப்பாட்ட வீரராக மார்ட்டின் கப்திலுக்குப் பதிலாக சேர்த்துக்கொள்ளபப்ட்ட ஜீட் றாவல் மூன்று அரைச்சதங்களைப் பெற்றார். கொலின் டி கிறான்ட்ஹொம், முதலாவது இனிங்ஸிலேயே ஆறு விக்கெட்களைக் கைப்பற்றியதோடு, போட்டியின் நாயகன் விருதையும் தனதாக்கினார்.  துடுப்பாட்டத்தில் ஓட்டங்களை பெற்றுக்கொடுத்தார். நியூசிலாந்து அணிக்கு சகலதுறை வீரர் ஒருவர் மீண்டும் கிடைத்துளார் எனக்கூறலாம்.  றொஸ் டெய்லர் சிறப்பாகத் துடுப்பெடுத்தாடினார். டிம் சௌதியின் பந்து வீச்சு பாகிஸ்தான் அணியின் விக்கெட்களை அள்ளி எடுத்துக்கொண்டது. 13 விக்கெட்டுகளை இவர் கைப்பற்றிக் கொண்டார்.

 

ஏழாமிடத்திலிருந்த  நியூசிலாந்து அணி இந்த வெற்றியின் மூலம் ஒரு இடம் முன்னோக்கி வந்துள்ளது. ஆனாலும் இந்த முன்னேற்றம் மற்றைய அணிகளுடன் ஓரளவுக்கு நெருக்கத்தை ஏற்படுத்தியுள்ளது. இன்னமும் ஒரு தொடர் வெற்றி இன்னமும் ஓரளவுக்கு முன்னேற்றத்தை தரலாம். ஆனால் பாகிஸ்தான் அணி முதலிடத்தை இழந்தது. நியூசிலாந்து அணியுடனான தொடரை இந்தியா அணி வெற்றி பெற்ற போது முதலிடத்தை இழந்தது. ஆனால் தற்போது நான்காமிடத்திலுள்ளது.

 

இந்த தொடர் முடிவில் தரப்படுத்தல்

 

1              இந்தியா                            29                           3328                      115

2              இங்கிலாந்து                     44                           4631                       105

3              அவுஸ்திரேலியா             40                           4189                      105

4              பாகிஸ்தான்                      32                           3274                      102

5              தென்னாபிரிக்கா               29                           2944                      102

6              நியூசிலாந்து                      38                           3666                       96

7              இலங்கை                          35                           3370                        96

8              மேற்கிந்தியத் தீவுகள்      30                           2077                        69

9              பங்களாதேஷ்                   15                             978                          65

10           சிம்பாப்வே                         10                              48                            5

 

தொடரில் 100 ஓட்டங்களை தாண்டியவர்கள்

 

றொஸ் டெய்லர்                   2              3              150         102*      75.00     81.08     1              0             

ஜீட் றாவல்                            2              4              148         55           49.33     42.89     0              2             

பாபர் அஸாம்                       2              4              142         90*         47.33     46.10     0              1             

ஷமி அஸ்லாம்                    2              4              122         91           30.50     33.79     0              1             

கேன் வில்லியம்சன்            2              4              120         61           30.00     54.05     0              1             

அஸார் அலி                         2              4              105         58           26.25     26.85     0              1             

 

தொடரில் 5 விக்கெட்களுக்கு மேல் கைப்பற்றியவர்கள்.

 

டிம் சௌதி                          2              4              87.4        213         13           6/80       8/140     16.38     2.42       

டி கிறான்ட்ஹொம்            2              4              50.5        110         9              6/41       7/64       12.22     2.16       

நீல் வக்னர்                         2            4              59.1        163         9              3/34       6/116     18.11     2.75       

மொஹமட் ஆமிர்             2              4              66.0        200         7              3/43       4/55       28.57     3.03       

சொஹைல் கான்               2              4              70.0        267         7              4/99       4/168     38.14     3.81       

இம்ரான் கான்                    1              2              41.1        128         6              3/52       6/128     21.33     3.10       

ட்ரெண்ட் போல்ட்               1           2              33.0        76           5              3/37       5/76       15.20     2.30       

சம்பியனானது இலங்கை

 

இலங்கை, சிம்பாப்வே, மேற்கிந்தியத் தீவுகள் அணிகள் பங்குபற்றிய முத்தரப்பு ஒரு நாள் சர்வதேசப் போட்டித் தொடரில்  இலங்கை அணி சம்பியனாகியது. இறுக்கமான தொடராகவே இந்தத் தொடர் நிறைவடைந்தது. ஆனால் இறுதிப் போட்டி இலங்கை அணிக்கு இலகுவாக அமைந்தது. இலங்கை அணி,  முழுமையான அணியாக இந்தத் தொடரில் பங்குபற்றவில்லை. புதிய வீரர்கள் அந்த வாய்ப்புகளை சரியாக பாவித்து தங்கள் வாய்ப்புகளை தக்க வைத்துக்கொள்ள இது நல்ல தொடராக அமைந்தது. அனுபவமற்ற வீரர்கள். சிரேஷ்ட வீரர்களிடமிருந்து இன்னும் பழகிக்கொள்ள வேண்டுமென்பது வெற்றிக்கிண்ணம் வழங்கும் போது விளங்கியது.

 

இலங்கை அணி இலகுவாக இறுதிப் போட்டிக்குள் வர முடியவில்லை. சிம்பாப்வே அணியுடன் முதற் போட்டியில் வெற்றிபெற்று, அடுத்த போட்டியில் மேற்கிந்தியத் தீவுகள் அணியிடம் தோல்வியடைந்தபோதும் பின்னர் மேற்கிந்திய தீவுகள் அணியை மீண்டும் வெற்றிபெற்று இறுதிப்போட்டியில் தனது இடத்தை ஓரளவுக்கு உறுதி செய்தது. சிம்பாப்வே அணியுடனான போட்டி மழை காரணமாகக் கைவிடப்பட்டது. இது, இலங்கை அணிக்கு அழுத்தத்தை வழங்கினாலும் மேற்கிந்தியத் தீவுகள் அணியுடனான வெற்றி  ஒரு ஓட்டத்தினால் மட்டுமே கிடைத்தது.

 

பலமாகத் தெரிந்த மேற்கிந்தியத் தீவுகள் அணி, மழை குழப்பிய போட்டியில் சிம்பாப்வே அணியுடன் தோல்வியைச் சந்தித்து, இறுதிப் போட்டி வாய்ப்பை இழந்தது. முன்னதாக இரண்டு அணிகளும் மோதிய போட்டி சமநிலையில் நிறைவடைந்தது. ஆக இந்தத் தொடர் மிகக் கடுமையான தொடராக அமைந்தது. இலங்கை அணியும் கூட மயிரிழையில் தப்பித்து தொடரைக் கைப்பற்றியது.

 

சிம்பாப்வே அணி மிகுந்த போட்டி ஒன்றை வழங்கியது. ஆனால் இலங்கை அணிக்கு அவர்களினால் பெரிய அழுத்தத்தை வழங்க முடியவில்லை. முதற் போட்டியும் இறுதிப் போட்டியும் மிக இலகுவாக இலங்கை அணிக்கு அமைந்தது. இலங்கை அணிக்கு அழுத்தத்தை வழங்கிய மேற்கிந்தியத் தீவுகள் அணி சிம்பாப்வே அணியுடன் தடுமாறிப்போனது. இந்தத் தொடரில் வெற்றி தோல்விகளைத் தாண்டி இலங்கை அணியின் வீரர்கள் எவ்வாறு செயற்பட்டுள்ளனர் என்பது முக்கியமாக அமைந்துள்ளது. பலமில்லாத அணிகளுடன் இரண்டாம் தர அணி விளையாடினாலும் கூட வெற்றிகள் என்பதும், வீரர்களின் பெறுதிகள் என்பதும் இங்கே முக்கியமாக அமைந்துள்ளது.

 

இலங்கை அணியைப் பொறுத்தளவில், டெஸ்ட் தொடர் போன்றே ஒரு நாள் போட்டித் தொடரிலும் அசேல குணரட்ன  நம்பிக்கையை ஏற்படுத்தியுள்ளார். சகலதுறை வீரர் ஒருவர் அணிக்குள் வந்துள்ளார் என்பது பலமே. இவரின் பந்து வீச்சு சிறப்பாக அமைந்துள்ளது. எட்டு விக்கெட்டுகளை இந்தத் தொடரில் கைப்பற்றியுளார். இவரின் பந்து வீச்சு மாற்றங்கள் சிறப்பாக அமைந்துள்ளன. அண்மைக்காலங்களில், மிதவேகப் பந்துவீச்சாளர்கள் சர்வதேசக் கிரிக்கெட்டில் பெரியளவில் பந்துவீச்சுக்காகப்  பயன்படுத்தப்படுவதில்லை. இதனைக் காரணமாக வைத்து இவரை அணியால் நீக்கலாம். ஆனால் இவ்வாறான பந்துவீச்சாளர்கள் அணிக்குத் தேவை. பின் மத்திய வரிசையில் இவ்வாறான வீரர் ஒருவர் தேவை. சரியாக துடுப்பாடவில்லை. இதனை காரணமாக வைத்தும் கூட அணியால் நிறுத்தலாம். அண்மைக்காலமாக எதற்க்காக அணியில் சேர்க்கிறார்கள், நிறுத்துகிறார்கள் என்பது தெரியாமலே உள்ளது.

 

இந்தத் தொடர் முழுவதும் ஆரம்பத் துடுப்பாட்டம் மிக மோசமாகவே அமைந்தது. குசல் பெரேரா நல்ல முறையில் துடுப்பெடுத்தாடவில்லை. தனஞ்சய டி சில்வா இரண்டு அரைச்சதங்களைப் பெற்றார். ஒரு நாள் சர்வதேசப் போட்டிகளுக்கு, குசல் பெரேராவுக்குப் பதிலாக இன்னுமொரு வீரரைத் தேட வேண்டி வருமோ என்ற சந்தேகம் நிச்சயம் உள்ளது. ஏன் அணிக்குள் தெரிவானார் என்று தெரியாமலே வந்த நிரோஷான் டிக்வெல்ல இந்தத் தொடரில் இலங்கை அணி சார்பாக கூடுதல் ஓட்டங்களைப் பெற்றவர். மூன்றாமிலக்கத்தில் துடுப்பெடுத்தாடியிருந்தாலும் கூட இவரும் ஆரம்ப துடுப்பாட்ட வீரரே. தெரிவுக்குழுவினர் அவரை தெரிவு செய்தமைக்கு சரியான காரணம் உள்ளது என நிரூபித்துள்ளனர்.

 

தொடர் நாயகன் விருதை குசல் மென்டிஸ் பெற்றுக்கொண்டார். தொடரில் நான்காவது கூடுதல் ஓட்ட எண்ணிக்கையைப் பெற்றாலும், கூடுதல் சராசரியைப் பெற்றுள்ளார். அஞ்சலோ மத்தியூஸ், தினேஷ் சந்திமால் ஆகியோர் மீண்டும் அணிக்குள் வர குசல் மென்டிஸ் மூன்றாமிலக்கத்துக்கு முன்னேறினால் யார் வெளியே போவது? குசல் பெரேராவா அல்லது நிரோஷான் டிக்வெல்லவா? உபுல் தரங்க அணிக்கு தலைமை தாங்கினார். உண்மையில் இளம் வீரர் ஒருவருக்கு தலைமைப் பொறுப்பை வழங்கியிருக்கலாம். இவர் அணியின் தலைவராக இருந்து அணியால் நீக்கப்படப்போகின்றாரா அல்லது இவரை ஆறாமிலக்க வீரராக அணியில் வைத்துக் கொண்டு இருக்கப்போகின்றார்களா? உபுல் தரங்கவின் துடுப்பாட்டம் மோசம் எனக் கூற முடியாது. அவரின் துடுப்பாட்டம் இந்தத் தொடரில் கைகொடுத்தது. ஆனால் அவர் பின் மத்திய வரிசைக்கு பொருத்தமானவரா என்பதுதான் மீண்டும் கேள்வி.

 

நான்கு பந்துவீச்சாளர்களில், நுவான் குலசேகர குலசேகர   எட்டு விக்கெட்களை கைப்பற்றியுள்ளார். இவரை அணியில் தொடர்ந்து வைத்திருக்க வேண்டும். வேறு யாருமில்லாமல் அணிக்குள் சேர்த்தார்கள். தன்னுடைய பங்கைச் சிறப்பாககச் செய்துள்ளார். இலங்கை அணி சார்பாக கூடுதல் விக்கெட்டுகளை கைபற்றிக்கொண்டார். சுரங்க லக்மால் ஏழு  விக்கெட்டுகளை கைபபற்றினார். இந்தத் தொடரில் வேகப்பந்து வீச்சாளர்களே சிறப்பாக பந்து வீசியுள்ளனர். இவர்கள் இருவரும் நிச்சயமாக தொடரும் பட்சத்தில் இன்னுமிரு சுழற்பந்து வீச்சாளர்களையும் அணியில் இணைக்கலாம். ஒரு சுழற்பந்து வீச்சாளர் மட்டும் விளையாடும் ஆடுகளங்களில் இன்னுமொரு வேகப்பந்து வீச்சாளரை இணைக்கலாம். துஸ்மந்த சமீர , தம்மிக பிரசாத் ஆகியோர் உபாதையிலிருந்து மீண்டு வந்தால் இலங்கை அணியின் வேகப்பந்து வீச்சு முழுமை பெறும். துஸ்மந்த சமீர, தம்மிக பிராசத், நுவான் குலசேகர, அசேல குணரட்ன ஆகியோருடன் அஞ்சலோ மத்தியூஸ் என்பது மிகச்சிறந்த கலவை.

 

இவர்களுடன் சச்சித் பத்திரண அணிக்கு தேவையானவர். இந்த தொடரில் அதிகம் விக்கெட்டுகளை கைப்பற்ற முடியாமல் போனாலும் இவரின் துடுப்பாட்டம் அணிக்கு பலத்தைத் தரும். வேகமாக அடித்தாடக்கூடியவர். நான்கு விக்கெட்டுகளை கைப்பற்றினார். ஜெப்றி வன்டேர்சே கிடைத்த வாய்ப்பைப் பாவித்து மூன்று விக்கெட்டுகளைக் கைப்பற்றி நம்பிக்கையை ஏற்படுத்தியுள்ளார்.   ஷெகான் ஜயசூரிய, கிடைத்த வாய்ப்பை தவறவிட்டுள்ளார். தனஞ்சய டி சில்வாவின் பந்து வீச்சும் அதிகம் பாவிக்கப்படவில்லை.

 

ஆக இலங்கை அணி முழுமை பெறும் ஒரு நிலை தென்படுகிறது. அடுத்த தொடர் தென்னாபிரிக்காவில். அந்தத் தொடருக்கு இந்த முழுமை போதாது. ஆனால் அணியை உருவாக்கும் முயற்சியில் இவை சாதரணமாக நடைபெறும். இனியாவது வீரர்களை மாற்றாமல் தொடர்ந்தால், ஓரளவு முன்னேற வாய்ப்புகள் உண்டு. ஆனால் அடுத்த அணித் தெரிவில் எத்தனை வீரர்கள் காணாமல் போவார்கள் எத்தனை புதிய வீரர்கள் அணிக்குள் வருவார்கள் என்பது தெரிவுக்குழுவுக்கே வெளிச்சம்.

 

இலங்கை அணியைத் தாண்டி, இந்தத் தொடர் மேற்கிந்திய தீவுகள் அணிக்கு சில புதிய வீரர்களை இனங்காட்டியுள்ளது. இந்திய அணிக்கு எதிரான இருபதுக்கு-20 சர்வதேசப் போட்டியில் சதமடித்த எவின் லூயிஸ், இந்தத் தொடரில் இலங்கை அணிக்கு எதிராக 147 ஓட்டங்களை பெற்றதுடன், தொடரில் கூடுதல் ஓட்டங்களை பெற்று ஆரம்ப இடத்தை உறுதி செய்துள்ளார். இந்த தொடரில் அறிமுகத்தை மேற்கொண்ட  ஷாய் ஹோப், இரண்டாவது கூடுதல் ஓட்டங்களை பெற்று விக்கெட் காப்பாளருக்கான இடத்தை உறுதி செய்துள்ளார். சுழற் பந்துவீச்சாளராக அறிமுகத்தை மேற்கொண்ட ஆஷ்லி நேர்ஸ் சுழற்பந்து வீச்சாளராக அணியில் இடத்தை உறுதி செய்துள்ளார்.

 

நல்ல பெறுதிகளை பெற்ற போதும் சிம்பாவே அணியுடனான தோல்வி, சமநிலை முடிவு காரணமாக இறுதிப்போட்டி வாய்ப்பை மேற்கிந்திய தீவுகள் அணி இழந்தது. ஆனாலும் கூட பழைய வீரர்களை இனியும் நம்பாமல் புதிய வீரர்களை முயற்சித்து இருக்கிறார்கள். ஆனாலும் இந்த வீரர்களுக்கும் பழைய வீரர்களுக்கான நிலை வராதா என்பது சந்தேகமே.

 

சிம்பாவே அணி இலகுவான அணியாக எடுக்க முடியாத அணி என்பதனை நிரூபித்துள்ளளது. இலங்கை அணி இலகுவாக வெற்றி பெற்றாலும் கூட இறுதிப்போட்டியில் ஆரம்ப விக்கெட்டுகளை வேகமாக கைப்பற்றி அழுத்தம் ஒன்றை ஏற்படுத்தினார். தவிர, மேற்கிந்திய தீவுகள் அணியுடன் சிறப்பான ஒரு வெற்றியையும் பெற்றுக்கொண்டதுடன், மேற்கிந்திய தீவுகள் அணியுடன் சமநிலையில் நிறைவு செய்த போட்டியில் மிகச்சிறப்பாக போராடியிருந்தது. இது போன்ற போட்டி வாய்ப்புகள் அவர்களுக்கு கிடைத்தால் முக்கிய அணிகளுக்கு சவால்களை வழங்கக் கூடிய அணியாக உருவாகும் வாய்ப்புகள் உள்ளன.

 

தொடரில் 100 ஓட்டங்களை பெற்றவர்கள்

எவின் லூயிஸ் (மே.இ)                  4           4              202         148         50.50     102.02   1              0             

ஷாய் ஹோப் (மே.இ)                      4           4              187         101         46.75     73.33     1              0             

நிரோஷான் டிக்வெல்ல (இல)        5           4              179         94           44.75     87.31     0              1             

குசல் மென்டிஸ்(இல)                     5           4              167         94           55.66     105.03   0              2             

சிகண்டர் ராசா (சிம்)                        5           5              163         77           54.33     77.99     0              2             

கிரேய்க் எர்வின் (சிம்)                     5           5              147         92           36.75     78.60     0              1             

தனஞ்சய டி சில்வா (இல)              5           4              139         78*         46.33     95.20     0              2             

ககிரேய்க் பிறாத்வெயிட் (மே.இ)   4           4              132         78           33.00     58.14     0              1             

ஜொனதன் காட்டர்(மே.இ)              4        4           104         54           34.66     83.87     0              1             

(வீரர், அணி, போட்டிகள், இனிங்ஸ், மொத்த ஓட்டங்கள், கூடுதல் ஓட்டங்கள், சராசரி, ஸ்ட்ரைக் ரேட், சதங்கள், அரைச்சதங்கள்)

 

தொடரில் 5 விக்கெட்களுக்கு மேல் கைப்பற்றியவர்கள்

ஜேசன் ஹோல்டர் (மே.இ)                 4    4    38.0      178         9              3/57       19.77     4.68

அசேல குணரட்ன (இல)                      5    4     30.0        118         8              3/10       14.75     3.93       

நுவான் குலசேகர(இல)                       5    5      40.0        180         8              2/23       22.50     4.50       

ஆஷ்லி நேர்ஸ் (மே.இ)                        4    4     38.0        186         8              3/27       23.25     4.89       

சுரங்க லக்மால்(இல)                            5    5     36.2        168         7              2/19       24.00     4.62       

சுலைமான் கப்றியல்(மே.இ)                3    3      23.1        105         6              3/31       17.50     4.53       

கார்லோஸ் பிறாத்வெயிட் (மே.இ)     4     4     34.0        198         6              4/48       33.00     5.82       

நுவான் பிரதீப்(இல)                               3    3        27.0        141         5              2/21       28.20     5.22       

(வீரர், அணி, போட்டிகள், இனிங்ஸ், ஓவர்கள், வழங்கிய ஓட்டங்கள், விக்கெட்டுகள் , சிறந்த பந்து வீச்சு ,சராசரி, ஓட்ட சராசரி வேகம்)

 

 

ஆச்சரியத்தை வழங்கியிருக்காத தென்னாபிரிக்காவின் வெற்றி

 

அவுஸ்திரேலியா அணியை, அவர்கள் நாட்டில் வைத்தே டெஸ்ட் தொடரில் தென்னாபிரிக்கா அணி வெற்றி பெற்றுள்ளது. 2-1 என்றவாறான தொடர் வெற்றியைப் பெற்றுளார்கள். அவுஸ்திரேலியா அணி, சொந்த நாட்டில் வைத்து டெஸ்ட் தொடரில் தோல்வியா? ஆச்சரியப்படக்கூடிய ஒன்றுதான். அதுவும் அடுத்தடுத்த தொடர்களில் தோல்வி. இலங்கையில் வைத்து இலங்கை அணி வெள்ளையடித்து அனுப்பியது. தங்கள் நாட்டில் வெள்ளையடிப்பு வாங்கப்போகின்றார்கள் என்று பார்த்தால் மூன்றாவது போட்டியில் வெற்றி பெற்றுத் தப்பித்தார்கள். 1986ஆம் ஆண்டுக்கு பின்னர் அடுத்தடுத்த இரு தொடர்களில் அவுஸ்திரேலியா அணி தோல்வியடைந்தது இது மூன்றாவது தடவை.

 

அவுஸ்திரேலியாவில் வைத்து தென்னாபிரிக்கா அணி தொடர் வெற்றியைப்பெற்றது ஒன்றும் புதிதுமல்ல. ஆச்சரியப்படும் ஒன்றுமல்ல. தென்னாபிரிக்கா அணியின் இறுதி மூன்று தொடர்களிலும் வெற்றியைப்பெற்றுளளது. அவுஸ்திரேலியா அணி 2005ஆம் ஆண்டு தென்னாபிரிக்கா அணியை தங்கள் நாட்டில் வெற்றி கொண்டது. அதற்கு பின்னர் தொடர்ச்சியாக மூன்று தொடர்களிலும் தென்னாபிரிக்கா அணி வென்றுளள்து. அவுஸ்திரேலியா அணியும் அதே போன்றே தென்னாப்பிரிக்காவில் தாங்கள் விளையாடிய இரு தொடர்களிலும் வெற்றி பெற்றுள்ளது. ஆக இரு அணிகளும் தங்கள் நாட்டிலும் பார்க்க மற்றைய நாட்டிலேயே வெற்றிபெறுவதில் குறியாக உள்ளனர்.

 

இலங்கையில் வைத்து தொடர் தோல்வியைச் சந்தித்த வேளையில் இலங்கை ஆடுகளங்கள் புதியவை. அனுபவமற்ற வீரர்களுடன் அவுஸ்திரேலிய அணி விளையாடியமையினால் தோல்வியடைந்தது என்ற கருத்துக்கள் இருந்தாலும், இந்த தொடர் தோல்வி அவுஸ்திரேலிய அணி பலமிழந்து இருக்கின்றது என்ற கருத்தை ஏற்படுத்தியுள்ளது. பொதுவாக அவுஸ்திரேலிய அணி இவ்வாறான தோல்விகளைச் சந்திக்கும் வேளையில் அணியிலும், முகாமைத்துவத்திலும் கூட அதிரடி மாற்றங்கள் நிகழும்.

 

இரண்டாவது போட்டியில் பெற்ற தோல்வியுடன் தெரிவுக்குழுவின் தலைவர் றொட்னி மார்ஷ் தன்னுடைய பதவியிலிருந்து விலகுவதாக அறிவித்தார். தோல்விக்கு தான் சரியான அணியை தெரிவு செய்யவில்லை என்பதே உள்க் காரணம். இறுதிப்போட்டியில் ஐந்து வீரர்கள் நீக்கப்பட்டு வேறு வீரர்கள் சேர்க்கப்பட்டனர். அவுஸ்திரேலியா அணி வெற்றி பெற்றது. இதுவே இனி அவுஸ்திரேலியா அணியின் நடவடிக்கையாக இருக்கும். சில வீரர்கள் இனிமேல் அணிக்குள் வர மாட்டார்கள். முழுமையாக நீக்கப்படுவார்கள். புதியவர்கள் அணிக்குள் உள்வாங்கப்படுவர்.

 

கடந்த வருடம் தென்னாபிரிக்கா அணிக்கு டெஸ்ட் போட்டிகளில் நல்ல முறையில் அமையவில்லை எனக்கூறலாம். ஆனால் அடுத்தடுத்த இரு தொடர் வெற்றிகள் அவர்கள் மீண்டும் வெற்றிப்பாதைக்குள் வருவதனை நிரூபித்துள்ளது. குறிப்பாக அவர்களின் தலைவரும் முக்கிய துடுப்பாட்ட வீரருமான ஏ.பி.டி வில்லியர்ஸ் இல்லாமல் அவுஸ்திரேலியாவில் வைத்துத் தொடரை வெல்வது என்பது பெரிய விடயமே. அதுமட்டுமல்லாமல் அவர்களின் முக்கிய பந்துவீச்சாளர் டேல் ஸ்டெய்ன் முதல் இனிங்ஸிலேயே உபாதையடைந்தார். இவர்கள் இருவரும் இல்லாமல் அவுஸ்திரேலியாவில் வைத்து வெற்றி பெறுவது ஒன்றும் இலகுவானது அல்ல. பப் டு பிளெஸியின் தலைமையில் தென்னாபிரிக்கா அணி சாதித்துக்காட்டியுள்ளது. சில மாற்றங்களுடன் மீண்டும் முழுமை பெற்ற அணியாக தென்னாபிரிக்கா அணி மாறி வருகின்றது.

 

இந்தத் தொடரில் கூடுதல் ஓட்டங்களை பெற்றவரும், கூடுதல் விக்கெட்டுகளை கைப்பற்றியவரும் அவுஸ்திரேலியர்களே. ஆனால், தென்னாபிரிக்கா அணி வெற்றி பெற்றுள்ளது. அணி வீரர்கள் எல்லோரும் இணைந்து சிறப்பாக செயற்பட்டமையினாலேயே தென்னாபிரிக்கா அணி வெற்றி பெற்றது. துடுப்பாட்டம், பந்து வீச்சு என எல்லோருமே சிறப்பாகச் செயற்பட்டுள்ளனர்.

 

அஸ்திரேலியாஅணியின் சில வீரர்கள் செயற்பட, மற்றவர்கள் சரியாக செயற்படாமல் போக அணி முழுமையாக இணைந்து செயற்படாமல் போனது போல ஆகிவிட்டது. குறிப்பாக அவுஸ்திரேலியா அணியின் துடுப்பாட்டம் மிக மோசமாக அமைந்தது. இரண்டாவது போட்டியில் அவர்கள் 85 ஓட்டங்களுக்கு சகல விக்கெட்டுகளையும்  இழந்தனர். இரண்டாவது இனிங்ஸில் 161 ஓட்டங்கள். மூன்றாவது போட்டியில் துடுப்பாட்டம் சிறப்பாக அமைந்தது. வெற்றி பெற்றார்கள்.

 

அவுஸ்திரேலியா அணி சார்பாக துடுப்பாட்டத்தில் அவர்களின் முக்கிய துடுப்பாட்ட வீரர்கள் மூவருமே அதிகமாக ஓட்டங்களைப் பெற்றனர். உஸ்மான் கவாஜா, டேவிட் வோணர், ஸ்டீவன் ஸ்மித் ஆகியோரே அவர்கள். மற்றைய துடுப்பாட்ட வீர்ரகள் கைகொடுக்காமையே அவர்கள் ஓட்டங்களை குறைவாக பெறக் காரணமாக அமைந்தது. இரண்டாவது போட்டியில் இவர்களும் கைவிட்டனர். அணிக்கு ஓட்டங்கள் வரவில்லை.

 

பந்துவீச்சிலும் அதே நிலைதான். ஜொஸ் ஹெசில்வூட், மிற்சல் ஸ்டாக், நேதன் லயன் ஆகியோர் மட்டுமே மூன்று போட்டிகளிலும் விளையாடியவர்கள். இவர்களில் முதலிருவரும் சிறப்பாகவே பந்து வீசினார்கள். ஆனால் இவர்கள் இருவரினாலும் ஒட்டுமொத்தமாக தென்னாபிரிக்கா அணியின் விக்கெட்டுகளைத் தகர்க்க முடியவில்லை. ஆனாலும் தென்னாபிரிக்கா அணி மூன்று இனிங்ஸில் சகல விக்கெட்டுகளையும் இழந்தது. ஒரு இனிங்ஸில் எட்டு விக்கெட்டுகள், மற்றைய இனிங்ஸில் ஒன்பது விக்கெட்கள். ஆக, அவுஸ்திரேலிய அணியின் பந்து வீச்சில் இன்னுமொருவர் கைகொடுத்திருந்தால் கூட தென்னாபிரிக்கா அணியை இன்னும் கொஞ்சமாவது தடுமாற வைத்திருக்கலாம்.

 

தென்னாபிரிக்கா அணியின் துடுப்பாட்டத்தில் 100 ஓட்டங்களைத் தாண்டியவர்கள் 7 பேர். இது போதாதா. ஒருவர் இல்லாவிட்டால் இன்னுமொருவர் என ஓட்டங்களைக் குவித்துள்ளனர். இதுதான் அவர்களின் பலமாக அமைந்தது. ஆரம்பம் முதல் பின்வரிசை வரை சராசரியான இணைப்பாட்டங்கள் பெறப்பட்டுள்ளன. முதற் போட்டியில் பெறப்பட்ட 540 ஓட்டங்களைத் தவிர மற்றைய இனிங்ஸில் பெறப்பட்ட ஓட்டங்கள் வெற்றிக்கு போதுமானவை எனக் கூறிவிட முடியாது.

 

ஆனால் பந்து வீச்சு சிறப்பாக அமைந்தது. அவுஸ்திரேலியா அணியின் துடுப்பாட்ட வீரர்களைக் கட்டுப்படுத்த முடிந்தது. பந்துவீச்சில் கஜிஸ்கோ றபடா, கைல் அபொட், வேர்ணன் பிளாந்தர் ஆகியோர் சிறப்பாக பந்து வீசினார்கள். கைல் அபொட் மீண்டும் ஒரு தடவை தன்னை நிரூபித்துக்காட்டியுள்ளார். சிறந்த மீள்வருகை இவருக்கு கிடைத்துள்ளது. ஸ்டெய்ன் மீண்டும் வரும் வரை அணியில் வாய்ப்பு உண்டு. அதற்கு பின்னர்? சந்தேகமே. ஸ்டெய்ன் உபாதையடைந்து அணியால் விலகியதை மிக சிறப்பாக மீள் நிரப்புகை செய்துவிட்டார்.

 

சுழற் பந்து வீச்சாளர்கள் பெரியளவில் எதனையும் செய்யவில்லை. நேதன் லயன் மூன்று போட்டிகளில் ஆறு விக்கெட்டுகளை கைப்பற்றினார். கேஷவ் மஹராஜ், தப்ரயாஸ் ஷம்ஷி ஆகிய இருவரும் இணைந்து ஆறு விக்கெட்களைக் கைப்பற்றினர். இரு அணிகளது பந்துவீச்சையும் பார்க்கும்போது, மூன்றாவது பந்துவீச்சாளர் கைப்பற்றிய விக்கெட்டுகளே இங்கே வித்தியாசத்தைத் தந்துள்ளது.

 

இலங்கை அணியுடனான தோல்வியின் மூலம் முதலிடத்தை இழந்த அவுஸ்திரேலிய அணி, இந்தத் தொடர் தோல்வியின் மூலம் புள்ளிகளை இழந்துள்ளது. தென்னாபிரிக்க அணி புள்ளிகளை அதிகரித்துள்ளது. முதலித்திலுள்ள இந்திய அணியைத் தவிர, மற்றைய நான்கு அணிகளுக்கிடையில் கடும் போட்டியொன்று உருவாகியுள்ளது. அவுஸ்திரேலியா, தென்னாபிரிக்கா, பாகிஸ்தான், இங்கிலாந்து அணிகளே அவை. நான்கு அணிகள் மூன்று புள்ளிகளுக்குள் தங்கள் வித்தியாசங்களை கொண்டுள்ளன.

 

தொடரில் 100 ஓட்டங்களைத் தாண்டியவர்கள்

உஸ்மான் கவாஜா               3              6              314         145         52.33     47.93      1              2             

குயின்டன் டி கொக்              3              5              281         104         56.20     71.50      1              2             

டேவிட் வோணர்                  3              6              236         97           39.33     81.09      0              1             

ஸ்டீவன் ஸ்மித்                    3              6              212         59           42.40     50.23     0              1             

பப் டு பிளெஸி                       3              5              206         118*      51.50     58.35       1              0             

ஜீன் போல் டுமினி                 3              5              184         141         36.80     55.25     1              0             

ஸ்டீபன் குக்                           3              5              179         104         35.80     40.04     1              0             

டெம்பா பவுமா                       3              5              162         74           32.40     43.43     0              2             

டீன் எல்கர்                              3              5              161         127         32.20     38.42     1              0             

வேர்ணன் பிளாந்தர்               3              5              136         73           27.20     55.28     0              1             

(போட்டிகள், இனிங்ஸ், ஓட்டங்கள், கூடிய ஓட்டங்கள், சராசரி, ஸ்ட்ரைக் ரேட், சதங்கள், அரைச்சதங்கள்)

தொடரில் 05 விக்கெட்களை கைப்பற்றியவர்கள்

 

ஜொஸ் ஹெசில்வூட்      3              5              126.5     375         17           6/89       6/89       22.05     2.95       

கஜிஸ்கோ றபடா             3            6              108.1     336         15           5/92       7/170     22.40     3.10       

மிற்சல் ஸ்டாக்                 3              5              120.0     422         14           4/71       6/158     30.14     3.51       

கைல் அபொட்                   2              4              74.5        193         13           6/77       9/118     14.84     2.57       

வேர்ணன் பிளாந்தர்          3              6              103.3     283         12           5/21       5/52       23.58     2.73       

நேதன் லயன்                     3              5              97.0        346         6              3/60       4/105     57.66     3.56       

(போட்டிகள், இனிங்ஸ், ஓவர்கள், வழங்கிய  ஓட்டங்கள், விக்கெட்டுகள், இனிங்ஸ் சிறந்த பந்துவீச்சு, போட்டி சிறந்த பந்துவீச்சு,   சராசரி, ஸ்ட்ரைக் ரேட்)

இலங்கை அணியின் வெற்றி

 

சிம்பாப்வே அணிக்கெதிரான தொடரை 2-0 என்ற ரீதியில் இலங்கை அணி கைப்பற்றியுள்ளது. இந்த வெற்றி எதிர்பார்க்கப்பட்ட வெற்றியே. ஆனால் இந்த வெற்றி, இலங்கை அணிக்கு புதிய பலத்தை தந்துள்ளதா/ புதிய வீரர்கள் சரியாக இடங்களை பிடித்துள்ளார்களா? இலங்கை அணியின் முக்கிய வீரர்கள் மீண்டும் அணிக்குள் வந்ததும் இலங்கை டெஸ்ட் அணி முழுமை பெறுமா? இப்படியான முக்கிய விடயங்களே இங்கே கவனிக்க வேண்டியவை.

 

இந்தத் தொடர் இலங்கை அணிக்கான இலகுவான தொடர் எனக் கூற முடியாது. வெற்றி பெற்றாலும் கூட போராடிப் பெற்ற வெற்றிகள் என்றே கூற வேண்டும். சிம்பாப்வே அணியும் முழுமையான அணி இல்லை. சில முக்கிய வீரர்கள் இல்லாமலேயே அவர்களும் விளையாடியுள்ளனர். சிலர் இலங்கை அணிக்கு பெரும் தலையிடியாக இருந்துள்ளனர். இலங்கை அணி இலகுவாக வெற்றி பெறப்போகின்றது என்ற நேரத்தில் பெரிய தலையிடியினை வழங்கினர். முதற் போட்டியில் இலங்கை அணி மயிரிழையில் வெற்றி பெற்றது. சிம்பாப்வே அணியின் பின் வரிசைத் துடுப்பாட்ட வீரர்கள் சமநிலை முடிவுக்கு போராடினர். எட்டு ஓவர்கள் மீதமிருக்கவே இலங்கை அணி வெற்றி பெற்றது.

 

இலங்கை அணியின் ஆரம்பம் தொடர் பிரச்சினை கதையாகவே உள்ளது. ஆரம்பத் துடுப்பாட்ட வீரர் திமுத் கருணாரட்ன போர்முக்குத்  திரும்பியுள்ளார். தொடரில் கூடுதலான ஓட்டங்களை பெற்றுக்கொண்ட கருணாரட்ன தொடர் நாயகனாகவும் தெரிவானார். ஆனால் கௌஷால் சில்வா இந்தத் தொடரில் கைவிட்டு விட்டார். நீண்ட நாளாகவே இவர்கள் இருவரும் ஒருமித்து சிறப்பாகத் துடுப்பெடுத்தாடுவது குறைவாகவே உள்ளது.

 

மூன்றாமிடத்தில், குசல் பெரேரா கன்னிச் சதத்தைப் பெற்றார். நான்காமிடத்தில் குஷால் மென்டிஸ் துடுப்பாடினார். குஷால் மென்டிஸ் இந்தத் தொடரில் அதிக ஓட்டங்களை பெற்றிருக்க வேண்டும். இவர் மீது முழுமையான நம்பிக்கையை வைத்து எதிர்கால வீரராக வர்ணிக்க முடியுமா? இன்னமும் அவர் செய்து காட்ட வேண்டும். இவ்வாறான சிறிய அணிகள் கிடைக்கும் போது வெளுத்து வாங்க வேண்டும். சிறிய அணிகளுக்கு எதிராக பெரிய ஓட்ட எண்ணிக்கைகளைப் பெறும்போது நம்பிக்கை கிடைக்கும். அடுத்த இடங்களில் துடுப்பெடுத்தாடிய இருவரும் அதையே செய்துள்ளனர். உபுல் தரங்க மீண்டும் அணிக்குள் அழைக்கப்பட்டார். அடித்த சதம், மத்திய வரிசையில் அவருக்கான இடத்தை உறுதி செய்துள்ளது. இந்தத் தொடரை வைத்து அணியைத் தெரிவு செய்தால், சந்திமால், மத்தியூஸ் மீண்டும் அணிக்குள் வரும் போது குஷால் மென்டிஸ் தான் அணியால் நீக்கப்படும் தெரிவு.

 

இந்தத் தொடரில் முக்கிய வீரர்கள் இருவர். தனஞ்சய டி சில்வா, அசேல குணரட்ன ஆகியோரே  அவர்கள்.  இருவரும் சதங்களை அடித்துள்ளதுடன் சராசரியாக ஓட்டங்களைப் பெற்றுள்ளார்கள். தனஞ்சய டி சில்வா ஏற்கெனவே டெஸ்ட் போட்டிகளில் ஓட்டங்களைக் குவித்து வரும் வேளையில் அணியில் புதிதாக இணைக்கப்பட்ட அசேல குணரட்ன ஓட்டங்களைப் பெற்றமை எதிர்கால வீரர் ஒருவர் தயாராக இருக்கின்றார் என்பதனை நிரூபித்துள்ளது.

 

ஆனால் இவரின் பந்து வீச்சை ஏன் பாவிக்கவில்லை என்பது இங்கே யோசிக்க வைக்கின்றது. இவர் ஒரு மித வேகப்பந்து வீசும் சகலதுறை வீரர். முதற் தர போட்டிகளின் பெறுதிகள்  இவரை ஒரு முழுமையான சகலதுறை வீரராகவே காட்டுகின்றன. இவரின் மித வேகப்பந்து வீச்சு சரியாக பாவித்தால் இலங்கை அணியின் பந்து வீச்சு மேலதிக பலம் பெறும். தனஞ்சய டி சில்வா, அசேல குணரட்ன ஆகியோரின் பந்துவீச்சை சரியாக இலங்கை அணி பாவிக்க வேண்டும். ரங்கன ஹேரத் நான்கு இனிங்ஸிலும் கூடிய ஓவர்கள் வீசியுள்ளார். ஓய்வு தேவையான வீரர். வயதானவர். இவ்வாறான போட்டிகளில் தன்னுடைய பந்து வீச்சை குறைத்து இள வயது வீரர்களை, புதிய வீரர்களை பந்து வீச்சு வாய்ப்புகளை வழங்கி அவர்களுக்கான நம்பிக்கையை வழங்க வேண்டும்.

 

பந்துவீச்சில், வழமை  போன்றே ரங்கன ஹேரத் விக்கெட்டுகளை அள்ளிக் குவித்துள்ளார். சிறந்த பந்து வீச்சுப் பெறுதியை இரண்டாவது போட்டியில் பெற்றுக்கொண்டார். போட்டியில் 13 விக்கெட்களையும், இனிங்ஸில் எட்டு விக்கெட்டுகளையும் பெற்றார். அணியின் தலைவராக ஒரு போட்டியில் 13 விக்கெட்டுகளை கைப்பற்றிய மூன்றாவது வீரர் இவர். ஓர் இனிங்ஸில், தலைவராக ஒன்பது விக்கெட்டுகளை கபில் தேவ் கைப்பற்றியுள்ளார். எட்டு விக்கெட்டுகளை ஏற்கெனவே இருவர் கைப்பற்றியுள்ளார்கள். இலங்கை சார்பாக இது புதிய மைல் கல்லாக அமைந்துள்ளது.

 

அணியின் தலைவராக இருந்து 10 விக்கெட்களுக்கு மேல் ஓர் இனிங்ஸில் கைப்பற்றியவர்கள்

கொட்னி வோல்ஷ்               36.0        15           55           13           1.52        மேற்கிந்தியத் தீவுகள் எதிர்                 நியூசிலாந்து               10 Feb 1995        Test # 1289

வக்கார் யுனிஸ்     56.0        15           135         13           2.41        பாகிஸ்தான் எதிர் சிம்பாப்வே   1 Dec 1993           Test # 1237

ரங்கன ஹேரத்                        49.0        10           152         13           3.10        இலங்கை எதிர் சிம்பாப்வே          6 Nov 2016                Test # 2231

பஷால் மொஹமட்             45.3        19           100         12           2.19        பாகிஸ்தான் எதிர் மேற்கிந்தியத்  தீவுகள்             6 Mar 1959          Test # 471

இம்ரான் கான்                            32.2        10           79           11           2.44        பாகிஸ்தான் எதிர் இந்தியா           23 Dec 1982                Test # 942

ஆர்தூர் கிலிகன்                      34.3        10           90           11           2.60        இங்கிலாந்து எதிர் தென்னாபிரிக்கா     14 Jun 1924               Test # 153

அலன் போடர்                           44.4        13           96           11           2.14        அவுஸ்திரேலியா எதிர் மேற்கிந்தியத் தீவுகள்             26 Jan 1989         Test # 1113

இம்ரான் கான்                            37.2        2              121         11           3.24        பாகிஸ்தான் எதிர் மேற்கிந்தியத் தீவுகள்                2 Apr 1988           Test # 1095

இந்திகாப் அலாம்                   39.4×8   5              130         11           2.46        பாகிஸ்தான் எதிர் நியூசிலாந்து                7 Feb 1973              Test # 712

பஸ்டர் நுப்பன்                          51.4        4              150         11           2.90        தென்னாபிரிக்கா    எதிர் இங்கிலாந்து 24 Dec 1930              Test # 200

இம்ரான் கான்                            55.5        15           180         11           3.22        பாகிஸ்தான் எதிர் இந்தியா           3 Jan 1983                Test # 945

 

டில்ருவான் பெரேரா, சுரங்க லக்மால் ஆகியோர் சராசரியாக பந்து வீசியுள்ளனர். எதிர்பார்ப்புடன் அறிமுகத்தை மேற்கொண்ட லஹிரு குமார எதிர்பார்ப்பை பூர்த்தி செய்யவில்லை. வேகமாக பந்து வீசுவார் என எதிர்பார்க்கப்பட்டவர் குமார. நேர்த்தியாக பந்து வீச வேண்டும்.  இவருக்கான காலம் இன்னமும் இருக்கின்றதா? நம்பிக்கை வைத்து தொடர்ந்து சில வாய்ப்புகளை வழங்கினால் மாற்றங்கள் ஏற்படலாம்.

 

இலங்கை அணியின் இவ்வளவு சிறந்த பெறுபேறுகளுக்கு மத்தியில் சிம்பாவே அணியின் தலைவர் கிறேமி கிறீமர் தனித்து நின்று போராடினார். முதற் போட்டியில் அவரின் துடுப்பாட்டம் மிகச் சிறப்பாக அமைந்தது. எட்டாமிலக்கத்தில் துடுப்பெடுத்தாட களமிறங்கி தன்னுடைய கன்னிச் சதத்தைப் பெற்றுக் கொண்டார். இரண்டாவது இனிங்ஸில் சமநிலை முடிவுக்கு தனித்து நின்று போராடினார். எனினும் இரண்டாவது போட்டியில் சோபிக்கத் தவறினார். ஆனால் அவரின் சுழற்பந்து வீச்சு சிறப்பாக அமைந்தது. தொடரில் 11 விக்கெட்டுகளை கைப்பற்றினார். ஒரு நல்ல சகலதுறை வீரராக கிரிக்கெட்டில் தொடர்வாரா என்ற நம்பிக்கையை உருவாக்கியுள்ளார்.  

 

இலங்கை அணி டிசெம்பர் மாதத்தில்  அடுத்த டெஸ்ட் தொடருக்காக தென்னாபிரிக்கா செல்லவுள்ளது. அந்த  தொடருக்கு இந்தத் தொடர் நல்லதொரு முன்னோடித் தொடர். புதிய வீரர்களை இனங்காணக்கூடியதாக அமைந்தது. தென்னாபிரிக்கத் தொடருக்கு முழுமை பெற்ற ஒரு அணி இலங்கைக்கு கிடைத்துள்ளது. இதுவே இந்த தொடரிலும் எதிர்பார்க்கப்பட்டது.

 

 

தொடரில் கூடுதல் ஓட்டங்களைப் பெற்றவர்கள்

திமுத் கருணாரட்ன            2              4              280         110         70.00                     52.43     1              2             

தனஞ்சய டி சில்வா             2              4              225         127         56.25                     49.34     1              1             

அசேல குணரட்ன                2              4              225         116         75.00                     55.01     1              1             

உபுல் தரங்க                         2              4              207         110*      69.00                     53.62     1              1             

குஷால் பெரேரா                  2              4              193         110         48.25                     83.91     1              1             

கிறேமி கிறீமர்                     2              4              153         102*      51.00                     41.23     1              0             

ஷோன் வில்லியம்ஸ்        2              4              153         58           38.25                     62.19     0              1             

(போட்டிகள், இன்னிங்ஸ், ஓட்டங்கள், கூடிய ஓட்டங்கள், சராசரி, ஸ்ட்ரைக் ரேட், சதங்கள், அரைச்சதங்கள்)

 

தொடரில் கூடுதல் விக்கெட்களை கைப்பற்றியவர்கள்

 

ரங்கன ஹேரத்                        2              4              116.0     287         19           8/63       13/152  15.10     2.47       

கிறேமி கிறீமர்                          2              4              117.4     436         11           4/91       7/227     39.63     3.70       

டில்ருவான் பெரேரா                 2              4              59.3        193         8              3/34       5/100     24.12     3.24       

கார்ல் மும்பா                            2              4              77.5        298         8              4/50       5/151     37.25     3.82       

சுரங்க லக்மால்                        2              4              82.0        225         7              3/69       5/112     32.14     2.74       

கிறிஸ் மெபு                              2              4              91.0        281         5              2/96       3/138     56.20     3.08       

(போட்டிகள், இன்னிங்ஸ், ஓவர்கள், வழங்கிய   ஓட்டங்கள், விக்கெட்கள், சிறந்த இன்னிங்ஸ் பந்து வீச்சு, சிறந்த போட்டி பந்து வீச்சுசராசரி, ஓட்ட சராசரி வேகம்)

இந்தியா எதிர் நியூசிலாந்து ஒ.நா.ச.போ தொடர்

 

இந்தியா, நியூசிலாந்து அணிகளுக்கிடையிலான ஒரு நாள் சர்வதேசப் போட்டித் தொடர், எதிர்பார்த்தது போன்றே இறுக்கமாக முடிவடைந்துள்ளது. இந்திய அணி தொடரை 3-2 என்ற ரீதியில் கைப்பற்றியுள்ளது. டெஸ்ட் போட்டிகளில் இந்தியா அணி இலகுவாக வெற்றி பெற்ற போதும் ஒரு நாள் சர்வதேசப் போட்டிகளில் அந்தளவுக்கு இலகுவாக வெற்றி பெற முடியவவில்லை. வெற்றி தோல்வி என மாறி மாறி சென்ற தொடரின் ஐந்தாவது போட்டியில் வெற்றி பெற்றே தொடரை இந்திய அணியால் கைப்பற்ற முடிந்தது.

 

இந்த இறுக்கமான தொடருக்கான காரணங்களாக பல விடயங்கள் உள்ளன. நியூசிலாந்து அணி பலமான ஒரு நாள் சர்வதேச போட்டி அணி. உலககிண்ண தொடரின் இறுதி போட்டி அணி. வீரர்களும் ஒரு நாள் சர்வதேசப் போட்டிகளில் சிறப்பாக விளையாடக் கூடியவர்கள். இந்திய அணி, நியூசிலாந்து அணியை இலகுவாக எடுத்துவிட்டதோ என்றும் யோசிக்கத் தோன்றுகின்றது.

 

முக்கிய மூன்று பந்து வீச்சாளர்களுக்கும் ஐந்து போட்டிகளிலும் ஒரே நேரத்தில் ஓய்வு வழங்கப்பட்டது. பலமான ஒரு அணியை எதிர்கொள்ளும் போது இவ்வாறு ஓய்வு தேவைதானா? அடுத்து இங்கிலாந்து அணியுடனான 5 டெஸ்ட் போட்டிகள் அடங்கிய தொடர் ஆரம்பிக்கவுள்ளது. ஓய்வு வழங்கப்பட்ட மொஹமட் ஷமி, அஷ்வின், ஜடேஜா ஆகியோர் டெஸ்ட் போட்டிகளுக்கு முக்கியமானவர்களே. அவர்களுக்கு ஓய்வு நிச்சயம் தேவை. ஆனால் சுழற்சி முறையில் ஓய்வை வழங்கியிருக்கு முடியும். இந்திய அணியின் பந்துவீச்சு பலமாக இருந்திருந்தால் அனைத்து போட்டிகளிலும் கூட வெற்றி பெற்று இருக்க முடியும்.தொடர் வெற்றி கிடைத்துள்ளது.  அது போதும் என்ற நிலை போதுமானதுதானா?

 

நியூசிலாந்து அணியைப் பொறுத்தளவில் தொடர் தோல்வி என்றாலும் கூட நல்ல ஒரு தொடர் என வர்ணிக்க முடியும். இந்தியாவில் விளையாடிய ஐந்து தொடர்களில்  மூன்று தொடர்கள் 3-2 என்ற முடிவையே தந்துள்ளன.  இறுதிப்போட்டியில் இந்திய அணியுடனான மோசமான தோல்வியை பெற்று இருந்தாலும் கூட இந்திய அணியுடன் மிக இறுக்கமாகவும் வெற்றி பெறக்கூடிய நிலையிலும் நியூசிலாந்து அணி விளையாடி இருந்தது. கடந்த தொடர் 5-0 என்ற தோல்வி. எனவே அவர்களுக்கு இது சிறந்த மீள் வருகைத்தொடர்.  

 

இந்தியாவில் வைத்து இதுவரை தொடரை வெல்லாத நியூசிலாந்து அணி இந்த தொடரிலும் அதற்கான வாய்ப்பை இழந்துள்ளது.  நியூசிலாந்து அணி இந்த தொடரில் இரண்டு போட்டிகளில் போதுமான துடுப்பாட்டம் இல்லாமையாலும் ஒரு போட்டியில் மோசமான பந்துவீச்சாலும் தோல்வியை தழுவிக்கொண்டுள்ளது. வெற்றி பெற்ற இரண்டு போட்டிகளிலும் பந்து வீச்சு சிறப்பாக அமைந்தது.

 

தோல்விகளை சந்தித்த போட்டிகளில் பந்துவீச்சு சிறப்பாக அமையவில்லை. துடுப்பாட்டத்தில் இணைப்பாட்ட தொடர்ச்சி இல்லாமல் போனமை முக்கியமான காரணமாக கூறலாம். ஓரிரு துடுப்பாட்ட வீரர்களே ஓட்டங்களை எடுத்துக்கொடுத்தனர். குறிப்பாக பின் மத்திய வரிசை சிறப்பாக அமையாமல் போனமை துடுப்பாட்டத்தில் பாரிய பின்னடைவை தந்தது. அத்துடன் சுழற்பந்து வீச்சு சரியாக அமையாமல் போனமையும் கூட அணிக்கு பின்னடைவைத் தந்தது.

 

இந்தத் தொடரை தீர்மானித்தது சுழற் பந்து வீச்சு என்றே கூறலாம். அந்த வித்தியாசமே இரு அணிகளுக்குமிடையிலான முக்கிய வித்தியாசமாக தென்படுகின்றது. டெஸ்ட் போட்டிகளில் ஓரளவு தானும் அச்சுறுத்திய சுழற்பந்து வீச்சாளர்கள் ஒரு நாள் சர்வதேசப்போட்டிகளில் அந்தளவுக்கு அழுத்தங்களை வழங்கவில்லை.

 

நியூசிலாந்து அணியின் துடுப்பாட்டத்தில் அவர்களின் முக்கிய துடுப்பாட்ட வீரர் மார்ட்டின் கப்தில் எதிர்பார்த்தளவு சிறப்பாக துடுப்பாடவில்லை என்பது நியூசிலாந்து அணிக்கு பாரிய பின்னடைவை தந்தது. ரொம் லெதாம் டெஸ்ட் தொடர் போன்றே சராசரியாக தொடர்ச்சியாக ஓட்டங்களை பெற்றுக்கொடுத்தார். நல்ல ஆரம்பத்தை அனைத்து போட்டிகளிலும் வழங்கினார். கேன் வில்லியம்சன் ஒரு சதத்தை பெற்ற போதும் மற்றைய போட்டிகளில் பெற்ற ஓட்ட எண்ணிக்கைகள் போதும் என கூறிவிட முடியாது. ரொஸ் ரெய்லர் மிக மோசமான துடுப்பாட்டம். ஒரு அரைச்சதத்தை கூட பெற முடியவில்லை. அடுத்த இடத்தில் ஜேம்ஸ் நீஷம் 57 ஓட்டங்களை மூன்றாவது போட்டியில் பெற்றுக்கொண்டார். மற்றைய போட்டிகள்  சிறப்பாக அமையவில்லை. பந்துவீச்சில் நான்கு போட்டிகளில் நான்கு விக்கெட்டுகள் மட்டுமே. அடுத்த இடத்தில இரண்டு விக்கெட் காப்பாளர்களும் முழுமையாகக் கைவிட்டனர்.

 

கொரி அன்டர்சன், நான்கு போட்டிகளில் 37 ஓட்டங்களையே பெற்றுக்கொண்டார். உபாதை காரணமாக தனியே துடுப்பாட்ட வீரராகவே இவர் இந்தத் தொடரில் விளையாடினார். இறுதிப் போட்டியில் பந்தும் வீசினார். இவரின் துடுப்பாட்டம் எடுபடாமல் போனமையும் கூட நியூசிலாந்து அணிக்கு பின்னடைவை தந்தது. லுக் ரொங்கி, முதல் மூன்று போட்டிகளிலும் 7 ஓட்டங்களை பெற்றுக்கொண்டார். இவர் டெஸ்ட் போட்டிகளில் ஓரளவு சிறப்பாக துடுப்பாடியவர். இவரை நீக்கி இறுதி இரு போட்டிகளிலும் பிரட்லீ வொட்லிங்கை அணியில் சேர்த்த போதும் அவர் இரு போட்டிகளிலும் 14 ஓட்டங்களை மட்டுமே பெற்றுக்கொண்டார். ஓட்டங்கள் ஆக மத்திய வரிசையில் பெறப்படவில்லை. ஆனால் பின் வரிசை வீரர்கள் ஓரளவு கைகொடுத்தமையினாலேயே ஓரளவு சிறந்த ஓட்ட எண்ணிக்கைகளை நியூசிலாந்து அணியால் பெற முடிந்தது. 

 

டிம் சௌதி, மற் ஹென்றி ஆகியோர் துடுப்பாட்டத்தில் ஓரளவு பங்களிப்பை செய்தனர். பந்துவீச்சில் டிம் சௌதி, ட்ரெண்ட் போல்ட் ஆகியோர் ஓரளவு சிறப்பாக பந்துவீசினார்கள். நியூசிலாந்து அணி வெற்றி பெற்ற இரண்டு போட்டிகளிலும் இருவரும் இணைந்து 5 விக்கெடிட்களை இரண்டு போட்டிகளிலும் கைப்பற்றி இருந்தனர். எனவே மற்றவர்கள் பந்துவீச்சில் கைகொடுக்கவில்லை என்பது வெளிப்படையாகத் தெரிகின்றது. எதிர்பார்க்கப்பட்ட மிற்செல் சான்ட்னர், ஐந்து போட்டிகளிலும் நான்கு விக்கெட்டுகளையே கைப்பற்றினார். இஷ் சோதி மூன்று போட்டிகளில் மாத்திரமே விளையாடி இருந்தார். நான்கு விக்கெட்களை கைப்பற்றினார். இவரை அனைத்து போட்டிகளிலும் விளையாட வைத்திருந்தால் இன்னும் கொஞ்சம் பந்து வீச்சில் அழுத்தங்களை கொடுத்திருக்க முடியும்.

 

இந்திய அணியின் ஆரம்பம் மிகச்சிறப்பாக அமைந்திருக்கவில்லை. வழமையான ஆரம்பத் துடுப்பாட்ட வீரர் ஷீகர் தவான் அணியில் இல்லாத நிலையில் அஜிங்கையா ரஹானே ஆரம்பத் துடுப்பாட்ட வீரராக களமிறங்கினர். தனக்கு கிடைத்த வாய்ப்பினை முழுமையாக அவர் பாவிக்கவில்லை. ஒரு நாள் சர்வதேச அணியில் நிரந்தர இடம் பிடிக்காத ரஹானே இந்த வாய்ப்பை பாவித்து நிலையான ஆரம்ப இடத்தை பிடிப்பார் என்ற எதிர்பார்ப்பு இருந்த போதும் மீண்டும் அவரின் இடம் மேலதிக வீரராகவே தொடர்வார் போல் தென்படுகின்றது.

 

விராத் கோலி ஒரு நாள் சர்வதேசப் போட்டிகளிலின் தலை சிறந்த வீரர் என்பதனை தொடர்ந்து நிரூபித்து வருகின்றார். 358 ஓட்டங்களை 119.33 என்ற சராசரியில் குவித்துளார். நான்காமிடத்தில், முதலிரு போட்டிகளுக்கு பின்னர் தோனி களமிறங்கினார். இந்தத் தொடர், அவருக்கு துடுப்பாட்டத்தில் ஓரளவு ஓட்டங்களை தந்து அவர் மீதான அழுத்தத்தை குறைத்துள்ளது. ஒரு வருடத்துக்கு பின்னர் ஒரு அரைச்சதம் அவருக்கு கிடைத்துளளது. சராசரியான ஓட்டங்களையே அவரால் பெற முடிந்தது. தோனியின் துடுப்பாட்டம் இன்னமும் சிறப்பாக அமைந்திருந்தால் தோல்வியடைந்த போட்டிகளில் வெற்றி பெற்று இருக்க முடியும். தோனியின் துடுப்பாட்டம் அந்தளவுதானா ? இனி இவரின் காலம் முடிகின்றதா? என்ற கேள்விகளுக்கான பதிலை அவர் இந்தத் தொடரில் வழங்கவில்லை. மாறாக அதிகரிக்க செய்துள்ளார் என்றே கூற வேண்டும்.

 

இப்படியே சென்றால் அடுத்த உலகக் கிண்ணம் விளையாடலாம் என்ற நிலையில் இருந்து மாறி ஓய்வு பெறவேண்டும் என்ற நிலை ஏற்படலாம். விராத் கோலி டெஸ்ட் போட்டிகளில் காட்டி வரும் சிறந்த தலைமைத்துவம் அவரை விரைவில் ஒரு நாள் சர்வதேசப்போட்டிகளுக்கும் தலைவராக்க வேண்டும் என்ற ஆசையை அனைவருக்கும் ஏற்படுத்தியுள்ளது. இது டோணிக்கான அழுத்தமாக அமைகின்றது.

 

கேதார் யாதவ், நம்பிக்கையை  அணிக்குள் ஏற்படுத்தியுள்ளார். சகலதுறை வீரராக அணிக்குள் தொடரும் வாய்ப்புகள் இவருக்கு அதிகமுண்டு. இவருக்கு அணியில் இடம் கிடைத்தால் மனிஷ் பாண்டே அணியால் வெளியேற வேண்டி வரும். ஹர்டிக் பாண்டியா, ஆட்ட நாயகன் விருதுடன் அபாரமாக தனது அறிமுகத்தை மேற்கொண்டாலும் அதனைத் தொடர முடியவில்லை. முதற் போட்டியில் 3 விக்கெட்டுட்கள். பின்னர் , நான்கு போட்டிகளில்  நான்கு விக்கெட்டுகள். இரண்டாவது போட்டியில் இவர் அடித்த 36 ஓட்டங்கள் இவரை சகலதுறை வீரராக அணிக்குள் தொடரலாம் என்ற நம்பிக்கையை ஏற்படுத்தினாலும் அவரே அதனை கெடுத்துவிட்டார்.

 

இந்திய அணியின் பந்து வீச்சு சிறப்பாகவே அமைந்திருந்தது. தோல்வியடைந்த போட்டிகளில் கூட பந்து வீச்சு மோசமாக அமையவில்லை. அமித் மிஷ்ரா, 15 விக்கெட்டுகளைக் கைப்பற்றி, இரவீந்தர ஜடேஜாவுக்கு மிகப்பெரிய அழுத்தத்தை ஏற்படுத்தியுள்ளார். தனக்கு கிடைத்தை வாய்ப்பை மிக அபாரமாக பாவித்துளார். வேகப்பந்து வீச்சில் உமேஷ் யாதவ், ஜஸ்பிரிட் பும்ரா ஆகியோர் சிறப்பாக செயற்பட்டுள்ளார். அக்ஷார் பட்டேல் நான்கு விக்கெட்டுகளை மாத்திரமே கைப்பற்றினார். ஓய்வில் இருந்த மூன்று வீரர்களும் இந்த அணிக்குள் வந்தால் யார், யார் வெளியே போக வேண்டும் என்பதே இங்கே முக்கிய விடயம். பட்டேலின் இடம் பிரச்சினை இல்லை. மூன்று வேகப்பந்து வீச்சாளர்கள் தேவை என்ற நிலையில் ஷமி அணிக்குள் வந்தால் வேகப்பந்து வீச்சு முழுமை பெறும்.

 

பின்மத்திய வரிசை, இப்போதைக்கு இந்திய அணிக்கு முழுமை பெறவில்லை. தற்போது போட்டி ஒன்று நிலவுகின்றது. அடுத்த தொடரில் அந்த போட்டி ரஹானே, மனிஷ் பாண்டே, கேதார் யாதவ், ஹர்டிக் பாண்டயா, சுரேஷ் ரெய்னா ஆகியோருக்கிடையில் நிலவும். இரு இடங்களுக்கு இவர்கள் போராடுவார்கள். இவர்களுள் ரஹானே, கேதார் யாதவ் ஆகியோருக்கு அதிகம் வாய்ப்புகள் உள்ளன என நம்பலாம்.

 

இந்த தொடர் இந்தியாவுக்கு வெற்றியை தந்திருந்தாலும் கூட அணியின் விடயங்கள் தொடர்பிலும் தரப்பப்படுத்தல்கள் தொடர்பிலும் பார்க்கும் போது அவர்களுக்கு வெற்றியளிக்கவில்லை. முக்கியமாக எதிர்கால வீரர்கள் தொடர்பில் அவர்களுக்கு தோல்வியே கிடைத்துளளது. ஒரு நாள் சர்வதேசப்போட்டிகள் தொடர்பில் இந்திய அணி கவனம் செலுத்தி அடுத்த கட்டம் நோக்கி நகர வேண்டிய காலம் வந்துள்ளது. இங்கிலாந்து அணியுடனான தொடர் அவர்களுக்கு அந்த வாய்ப்பை ஏற்படுத்தும். அந்த தொடரிலும் இதே நிலை தொடர்ந்தால் மிகப்பெரிய மாற்றங்கள் நோக்கி நகரும் நிலை உருவாகும்.

 

தொடரில் 100 ஓட்டங்களை தாண்டியவர்கள்

 

விராத் கோலி                       5              5              358         154*      119.33   100.84     1              2             

டொம் லதாம்                      5              5              244         79*         61.00     89.37       0              2                             

கேன் வில்லியம்சன்          5              5              211         118         42.20     80.22        1              0

மகேந்திர சிங் டோணி        5              5              192         80           38.40     71.11       0              1             

அஜிங்கையா  ரஹானே     5              5              143         57           28.60     70.79       0              1

ரோஹித் ஷர்மா                 5              5              123         70           24.60     77.84        0              1             

றொஸ் டெய்லர்                 5              5              119         44           23.80     62.63        0              0             

மார்ட்டின் கப்தில்               5              5              111         72           22.20     90.98         0              1             

 

தொடரில் ஐந்து விக்கெட்களுக்கு மேல் கைப்பற்றியவர்கள்

அமித் மிஷ்ரா            5              5              44.5        215         15           5/18       14.33     4.79       

உமேஷ் யாதவ்         5              5              41.0        236         8              3/75       29.50     5.75       

டிம் சௌதி                 5              5              47.3        260         7              3/40       37.14     5.47       

கேதார் யாதவ்             5              4              18.0        73           6              3/29       12.16     4.05       

ஜஸ்பிரிட் பும்ரா         4              4              32.4        132         6              3/35       22.00     4.04       

ட்ரெண்ட் போல்ட்      4              4              39.4        198         6              2/25       33.00     4.99       

(போட்டிகள், இனிங்ஸ், ஓவர்கள் , வழங்கிய ஓட்டங்கள், விக்கெட்டுகள்சிறந்த பந்து வீச்சு , சராசரி, ஓட்ட சராசரி வேகம்)

இலங்கையின் சிம்பாப்வே சுற்றுப் பயணம்

 

இலங்கை அணி, சிம்பாப்வே நாட்டுக்கான கிரிக்கெட் சுற்றுப் பயணத்தை ஆரம்பித்துள்ளது. சிம்பாப்வே அணியுடன் இரண்டு டெஸ்ட் போட்டிகளும், சிம்பாப்வே, மேற்கிந்தியத் தீவுகள் அணியுடன் முக்கோண ஒருநாள் சர்வதேச போட்டித் தொடரில் விளையாடவுள்ளது. இலங்கை அணி 12 வருடங்களுக்கு பின்னர் சிம்பாப்வே அணியுடன் டெஸ்ட் தொடர் ஒன்றில் விளையாடவுளள்து.

 

மார்வன் அத்தப்பத்துவின் தலைமையில்யில், இலங்கை அணி மிகப்பலமாக இருந்த வேளையில், சிம்பாப்வே சென்று சிம்பாப்வே அணியைப் பிரித்து மேய்ந்து விட்டு வந்திருந்தனர். ஆனால் தற்போது அது சாத்தியமா? சிம்பாப்வே அணியும் கூட கொஞ்சம் சவால் விடும் நிலையில் உள்ளது. அவுஸ்திரேலிய அணியை இலங்கையில் வைத்து வெள்ளையடிப்புச் செய்து வெற்றியீட்டி இலங்கை பலமாகவே உள்ளது. சிம்பாப்வே அணியிடம் தோல்விகளைச் சந்தித்து வருமளவுக்கு இலங்கை அணி ஒன்றும் மோசமாக இல்லை.

 

உபாதையடைந்த வீரர்களைத் தவிர்த்து  பலமான அணியாகவே அணி தெரிவு செய்யப்பட்டுள்ளது. தலைவர் அஞ்சலோ மத்தியூஸ் உபாதையடைந்துள்ள நிலையில் அணிக்கு பாதிப்பு என்றே கூறலாம். ஏனெனில் தினேஷ் சந்திமாலும் உபாதையிலிருந்து குணமாகி வருவததால் தலைமையிடம் பின்னடைவாகவே உள்ளது. இவர்களைத்   தவிர்த்து மற்றைய முக்கிய வீரர்கள் யாவரும் இந்த தொடரில் விளையாடவுள்ளனர். இந்தத் தொடர் இலங்கை அணிக்கு நல்லதொரு பயிற்சித்  தொடராக அமையவுள்ளது. இந்தத் தொடர் நிறைவடைந்த பின்னர் இலங்கை அணி தென்னாபிரிக்காவுக்கான தொடரை  மேற்கொள்ளவுள்ளது. இது நல்ல களத்தினை இலங்கை அணிக்கு வழங்கும். தென்னாபிரிக்காவின் அண்டைய நாட்டில் இந்த்த தொடர்  நடைபெறுவதனால் இலங்கை அணி வீரர்கள் காலநிலையை பழகிக் கொள்ளும் வாய்ப்புகள் நிறையவே உள்ளன. அத்துடன் ஒரு நாள் சர்வதேசப்போட்டி தொடரில் மேற்கிந்திய தீவுகள் அணியும் பங்குபற்றுவதானால் இலங்கை அணி நல்ல பயிற்சிகளை மேற்கொள்ள முடியும்.

 

அவுஸ்திரேலிய அணிக்கெதிரான டெஸ்ட் தொடரில் இலங்கை அணி ஓரளவு வீரர்கள் தயார் செய்யப்பட்டு விட்டாலும் பந்துவீச்சாளர்கள் இன்னமும் முழுமையாகத் தயாராகவில்லை. சுழற்பந்து வீச்சாளர்களில் எந்தப் பிரச்சினையும் இல்லை. தென்னாபிரிக்காவில் நடைபெறும் போட்டிகளில் வேகப்பந்து வீச்சாளர்கள் முக்கிய இடம் பிடிப்பார்கள். இந்த நிலையில் வேகப்பந்து வீச்சாளர்கள் தயாராக இல்லை என்பது இலங்கை அணிக்கு பெரும் பின்னடைவே. தம்மிக்க பிராசத், துஸ்மந்த சமீர ஆகியோர் உபாதையடைந்துள்ள நிலையில் இவர்கள் இந்தத் தொடரிலும் மீள முடியவில்லை. எனவே இவர்கள் இருவரும் அடுத்த தொடரில் விளையாட முடியுமா என்பது கேள்வியே. மீண்டும் அணிக்குள் வந்தாலும் மேலதிகமாக இன்னுமொரு வேகப்பந்து வீச்சாளர் தேவை. மேலதிகமாக அணியில் இரண்டு வேகப்பந்து வீச்சாளர்கள் தேவை என்ற நிலையில் தெரிவுக்குகுழுவினர் அதற்கேற்றபடி அணியை தெரிவு செய்துள்ளனர்.

 

இலங்கை அணி விபரம்

குஷால் பெரேரா, குஷால் மென்டிஸ், கெஷால் சில்வா, திமுத் கருணாரட்ன, தனஞ்சய டி சில்வா, நிரோஷான் டிக்கவெல்ல, ரங்கன ஹேரத்(தலைவர்), டில்ருவான் பெரேரா, லக்ஷான் சன்டகான், கஸூன் மதுசங்க, லஹிரு குமார, சுரங்க லக்மால், அசேல குணரட்ன, உப்புல் தரங்க 

 

இரு முக்கிய மாற்றங்கள் இடம்பெற்றுள்ளன. அஞ்செலோ மத்தியுஸுக்கு காலில் ஏற்பட்டுள்ள உபாதைகள் காரணமாக,  அணியில் இருந்து விலகியுள்ளார். இவருக்கு பதிலாக உப்புல் தரங்க அணியில் சேர்க்கப்பட்டுள்ளார். தரங்க மத்திய வரிசையில் விளையாடுவார் என நம்பலாம். தினேஷ் சந்திமால் அணியில் இடம் பிடிக்கவில்லை. அவரின் பெருவிரலில் செய்துகொண்ட சத்திர சிகிச்சை முழுமையாக குணமடையாத நிலையில் அவருக்கு பதிலாக நிரோஷான் டிக்கவெல்ல அணியில் சேர்க்கப்பட்டுள்ளார். துடுப்பாட்ட வீரர். அத்துடன் விக்கெட் காப்பாளர். விக்கெட் காப்பாளர் அணிக்கு தேவையில்லை. ஏற்கனவே  3 விக்கெட் காப்பளர்கள் அணியில் உள்ளனர். இவர் அணியில் தொடர்ச்சியாக அணியில் இடம் பிடித்துவரும் ஒருவர். ஆனால் இவரின் தெரிவில் குழப்பங்கள் இல்லாமல் இல்லை. இவரிலும் பார்க்க சிறப்பாக ஓட்டங்களை குவித்து வரும் வீரர்கள் உள்ள போதும் இவருக்கு இடம் வழங்கப்படுகின்றது. அண்மையில் இடம்பெற்ற முதற் தரப்போட்டிகளிலும் ஓட்டங்களை பெரிதாக இவர் பெறவில்லை. இப்படி எல்லாம் எழுதியபடி கொஞ்சம் கடந்த முதற்தர போட்டிகளில் ஓட்டங்களை பெற்றவர்களை பார்த்தால் இவரே கூடிய ஓட்டங்களை பெற்றவர் இவரே.

 

திமுத் கருணாரட்ன அடுத்த வீரர். அவர் அணியில் தொடர்கிறார். ஆக மத்திய வரிசையின் முக்கிய இரு வீரர்களும், இலங்கை அணியின் முக்கியமான இரண்டு துடுப்பாட்ட வீரர்களும் இல்லாத நிலையில் இலங்கை அணியின் துடுப்பாட்ட பலம் இழந்துள்ளதாகவே கூற வேண்டும். தலைவராக முதற் தடவையாக ரங்கன ஹேரத் பொறுப்பேற்றுள்ளார். இவருக்கு எல்லாமே காலம் தாமதமாகியே கிடைத்து வந்துளளது. தலைமைப் பொறுப்பை இவாறு செய்து காட்டப் போகின்றார்? பொறுத்து இருந்து பார்க்கலாம்.

 

திமுத் கருணாரட்ன டெஸ்ட் போட்டிகளில் அண்மைய போட்டிகளில் மோசமாகவே துடுப்பாடியுளார். ஆனாலும் கடந்த காலங்களில் இவர் சிறப்பாக செயற்பட்டமையும், அண்மைய முதற் தர போட்டிகளில் சதமடித்துள்ளமையும் இவருக்கு வாய்ப்புகளை தந்துள்ளது. இவரை விட வேற எந்த தெரிவும் தெரிவுக்குழுவினருக்கு இல்லை. மற்றைய துடுப்பாட்ட இடங்கள் சரியாக இருக்கின்றன. தினேஷ் சந்திமாலின் இடத்திற்கு டிக்வெல்ல விளையாடுவார். ஆனாலும் அணியில் இடம் பிடித்துள்ள அசேல குணரட்ன அந்த இடத்தில விளையாடுவது இலங்கை அணிக்கு பலமாக அமையும். மித வேகப்பந்து வீசும் சகலதுறை வீரர் இவர்.  மத்தியூஸ் இல்லாத நிலையில் சகலதுறை வீரர் அணிக்கு தேவை என்ற நிலையில் அசேல குணரட்ன விளையாடும் வாய்ப்புகள் அதிகம் உள்ளன. அப்படி பார்த்தல் டிக்வெல்ல, தரங்க ஆகியோருக்கிடையில் ஒரு போட்டி நிலவலாம்.

 

பந்துவீச்சில் ரங்கன ஹேரத் , டில்ருவான் பெரேரா ஆகியோர் அணியில் நிச்சயம் விளையாடக் கூடியவர்கள். ஒரு சுழற்பந்து வீச்சாளருடன் விளையாடுவதாக இருந்தால் ரங்கன ஹேரத் மட்டும் விளையாடுவார்.மூன்றாவது சுழற் பந்துவீச்சாளர் லக்ஷான் சன்டகான் அணியில் சேர்க்கப்பட்டுள்ளார்.   வேகப்பந்து வீச்சாளர்களில் சுரங்க லக்மால் நிச்சயமானவர். அவுஸ்திரேலிய அணியுடன்  அறிமுகத்தை மேற்கொண்ட விஸ்வ பெர்னாண்டோ அணியால் நீக்கப்பட்டுள்ளார். 2 ஓவர்கள் பந்து வீசி 1 விக்கெட்டை கைபப்ற்றினார். பின்னர் இவருக்கு பந்து வீசும் வாய்ப்பு கிடைக்கவே இல்லை. சுழற் பந்துவீச்சாளர்கள் விக்கெட்டுகளை கைப்பற்றினர். மூன்றாவது போட்டியில் விளையாட வாய்ப்பு கிடைக்கவில்லை. இந்த தொடரில் அணியில் இல்லை. என்ன தெரிவு இதுவென புரியவில்லை. இந்த நிலையில் புதிய பந்துவீச்சாளர்கள் அணியில் இணைக்கப்பட்டுள்ளனர். விஸ்வ பெர்னாண்டோ இடதுகர வேகப்பந்து வீச்சாளர். இது இன்னுமொரு பலம். ஒரு நாள் சர்வதேசப்போட்டிகளில் விளையாடியுள்ள லஹிரு கமகே அணியில் சேர்க்கப்பட்டுள்ளார். அண்மைய முதற் தர போட்டிகளில் ஓரளவு சிறப்பாக பந்துவீசியுள்ளார்.

 

வேகப்பந்து வீச்சாளராக அணியில் இணைக்கப்பட்டுள்ள லஹிரு குமார அதிகம் பேசபப்டுபவராக உள்ளார். 19 வயதான கண்டியை சேர்ந்த இவர் அண்மையில் நடைபெற்ற 19 வயதுக்குட்பட்ட டெஸ்ட் போட்டிகளில்   மிக சிறப்பாக பந்துவீசியுளார். இங்கிலாந்து 19 வயதுக்குட்ப்பட்ட அணிக்கெதிராக 7 விக்கெட்டுகளையும்,  நான்கு விக்கெட்களையும் கைப்பற்றி இலங்கை அணியின் வெற்றிக்கு முக்கியமான காரணமாக அமைந்துள்ளார். இதனை தொடர்ந்து இலங்கை A அணியில் இவர் இணைக்கப்பட்டார். ஆனால் 2 போட்டிகளில் 3 விக்கெட்டுகளை மாத்திரமே கைப்பற்றினார். ஆனாலும் இவர் மீது தெரிவுக்குழுவினர் நம்பிக்கை வைத்து தெரிவு செய்துள்ளனர். இவரின்  உடல்வாகும் வேகப்பந்து வீச்சுக்கு ஏற்றால் போல் சிறப்பாக அமைந்துள்ளதாக கூறப்படுகின்றது. சிம்பாப்வே அணியுடன் இவருக்கு அறிமுகம் நிச்சசயம் வழங்கப்படும். சிறப்பாக செயற்பட்டால் அவருக்கு அணியில் வாய்ப்புகள் தொடரும். 19 வயதுக்குட்பட்ட ஒரு நாள் போட்டிகளிலும் சிறப்பாக பந்துவீசியுள்ளமையினால் ஒரு நாள் தொடரிலும் கூட இவருக்கு வாய்ப்புகள் கிடைக்கலாம்.

 

வேகப்பந்து வீச்சாளர்களில் கஸூன் மதுசங்கவும் அணியில் இடம் பிடித்துள்ளார். இவர் 86 முதற் தர இனிங்சில் 139 விக்கெட்டுகளை கைப்பற்றியுளார். 25 வயதான இலங்கை அணியின் தெரிவில் நம்பிககையை ஏற்படுத்தியுள்ள ஒருவர். சுரங்க லக்மாலுடன் இன்னுமிருவர் விளையாடும் வாய்ப்புகள் உள்ளனவென்றால் இவர்கள் இருவருக்கும் அறிமுகம் கிடைக்கும். அசேல குணரட்ன அணியில் இணைக்கப்பட்டால் இவர்களில் ஒருவர் மட்டும் விளையாடும் வாய்ப்புகள் கிடைக்கும்.

 

இலங்கை அணி  துடுப்பாட்டத்தில் சிறந்த நிலையை அடைந்து வருகின்றது. வேகப்பந்து வீச்சு மட்டுமே இலங்கை அணிக்கு பிரச்சினை தரும் விடயமாக இருந்துளளது. இந்த தொடரில் அதனை சீர்செய்த்துக்கொண்டாள் பலமான தென்னாபிரிக்கா அணியை அவர்கள் நாட்டில் நம்பிக்கையாக எதிர்கொள்ள முடியும்.

 

இலங்கை, சிம்பாப்வே அணிகளுக்கிடையில் இதுவரையில் 15 போட்டிகள் நடைபெற்றுள்ளன. இவற்றுள் 10 போட்டிகளில் இலங்கை அணி வெற்றி பெற்றுளளது. 5 போட்டிகள் சமநிலையில் நிறைவைடைந்துள்ளன. இந்த 5 போட்டிகளைத்தான் கவனிக்க வேண்டும். சிம்பாப்வே தங்கள் நாட்டில் கொஞ்சம் பலமாகவே செயற்படுவார்கள். அண்மைக்காலங்களில் நியூசிலாந்து, தென்னாபிரிக்கா அணிகள் சிம்பாப்வே சென்ற வேளைகளில் சிம்பாப்வே அணி தோல்விகளையே சந்தித்தது.

 

2013 ஆம் ஆண்டு பாகிஸ்தான் அணியுடன் 1-1 என்ற தொடர் சமநிலை முடிவை 3 போட்டிகளால் பெற்றுக்கொண்டது. 1994ஆம் ஆண்டு ஒக்டோபர் மாதத்தில் சென்ற முதற் தொடரில் மழை குறுக்கிட, சிம்பாப்வே அணி ஆதிக்கம் செலுத்தி தொடரை சமன் செய்தது. 1999ஆம் ஆண்டு நடைபெற்ற தொடரில் 1-0 என்ற வெற்றியை இலங்கை அணி பெற்றுக் கொண்டது. 2004ஆம் ஆண்டு நடைபெற்ற தொடரில் 2-0 என்ற வெற்றியினை இலங்கை அணி மிகப்பெரிய ஆதிக்கம் செலுத்தி வெற்றி பெற்றது. எனவே கடந்த கால தொடர்களின் பாடங்களின் அடிப்படையில் இலங்கை அணி செயற்படவேண்டும்.

 

போட்டி அட்டவணை

முதற் போட்டி – ஒக்டோபர் 29 – நவம்பர் 02 – பிற்பகல் 1.00 மணி

ஹராரே விளையாட்டுக்கழக மைதானம்.

இரண்டாவது போட்டி – நவம்பர் 06  – நவம்பர் 10 – பிற்பகல் 1.00 மணி

ஹராரே விளையாட்டுக்கழக மைதானம்.