Category Archives: Featured

மலிங்கவுக்கு மஹேல ஆதரவு

 

இலங்கை கிரிக்கெட் அணியின் வேகப்பந்து வீச்சாளர் லசித் மலிங்கவுக்கு, இலங்கை கிரிக்கெட் சபையால் விதிக்கப்பட்டுள்ள தடையை, இலங்கை அணியின் முன்னாள் தலைவர் மஹேல ஜெயவர்தன கண்டித்துள்ளார். 

 

இலங்கை அணியின் வீரர்களின் உடற்றகுதி தொடர்பாக, விளையாட்டுத்துறை அமைச்சர் தயாசிறி ஜயசேகர முன்வைத்த விமர்சனத்துக்கு, மறைமுகமாகப் பதிலளித்திருந்த லசித் மலிங்க, கிளியின் கூடு பற்றி, குரங்குக்கு என்ன தெரியும் எனக் கேள்வியெழுப்பியிருந்தார். 

 

சம்பியன்ஸ் கிண்ணத் தொடரிலிருந்து நாடு திரும்பிய பின்னர், தனது ஒப்பந்தத்துக்கு முரணாக, மலிங்க நடந்துகொண்ட 2ஆவது தடவை இதுவெனத் தெரிவித்த இலங்கை கிரிக்கெட் சபை, அது தொடர்பாக விசாரிக்க, விசாரணைக் குழுவை அமைத்தது. 

 

விசாரணைக் குழு முன் ஆஜராகிய மலிங்க, தன் மீதான குற்றச்சாட்டுகளை ஏற்றுக் கொண்டதோடு, உத்தியோகபூர்வமான மன்னிப்பைச் சமர்ப்பித்தார். அதைத் தொடர்ந்து, 6 மாதங்களுக்கு ஒத்திவைக்கப்பட்ட, ஒரு வருடத் தடை, அவருக்கு விதிக்கப்பட்டது. அத்தோடு, அவரது அடுத்த ஒருநாள் சர்வதேசப் போட்டி ஊதியத்தின் 50 சதவீதம், அபராதமாக விதிக்கப்பட்டது. 

 

இந்நிலையில், டுவிட்டர் இணையத் தளத்தில், மஹேலவிடம் கருத்தொன்றை முன்வைத்த இரசிகரொருவர், “வீரர்களைக் கேலியாகப் பேசுவதற்கு விளையாட்டுத்துறை அமைச்சருக்கு அனுமதியுண்டு. ஆனால், வீரர் கருத்துத் தெரிவித்தால், அவருக்கு 6 மாதத் தடை (குறிப்பு: இரசிகரின் கருத்தில், தண்டனை பற்றித் தவறாகக் குறிப்பிடப்பட்டது) விதிக்கப்படுமா? இலங்கை கிரிக்கெட் சபை, அதன் மோசமான நிலையில்” என்று கூறியிருந்தார். அவரது கருத்தை ஆமோதித்த மஹேல, “இதனோடு முழுவதுமாக ஒத்துப் போகிறேன்” என்று குறிப்பிட்டார். 

 

அத்தோடு, விளையாட்டுத்துறை அமைச்சரின் நடத்தையை விமர்சித்து, எமது சகோதரப் பத்திரிகையான டெய்லிமிரரின் வெளியான கேலிச் சித்திரத்தையும், மஹேல மீளப் பகிர்ந்திருந்தார். 

 

தான் விளையாடும் காலத்திலேயே, இலங்கை கிரிக்கெட் சபையுடன் முரண்பாடுகளைக் கொண்டிருந்த மஹேல, ஓய்வுபெற்ற பின்னரும், அந்த விமர்சனங்களைத் தொடர்கிறார். இந்தியன் பிறீமியர் லீக்கின் மும்பை இந்தியன்ஸ் அணியில் லசித மலிங்க விளையாடியிருந்த நிலையில், அவ்வணியின் பயிற்றுநராக, மஹேல ஜெயவர்தன செயற்பட்டிருந்தார்.

சங்காவின் அதிரடி தொடர்கிறது

 

இங்கிலாந்தின் பிராந்திய கிரிக்கெட் போட்டிகளில், சரே அணிக்காக விளையாடிவரும், இலங்கையின் முன்னாள் தலைவர் குமார் சங்கக்கார, இந்தப் பருவகாலத்தில் 1,000 ஓட்டங்களைக் கடந்த முதல் வீரர் என்ற சாதனையைப் படைத்துள்ளார்.

 

பலமிக்க யோர்க்‌ஷையர் அணிக்கெதிராக, லீட்ஸில் இடம்பெற்றுவரும் போட்டியிலேயே, இந்தச் சாதனையை அவர் படைத்தார்.

 

பகல் – இரவுப் போட்டியாக, மென்சிவப்புப் பந்தைப் பயன்படுத்தி இடம்பெற்றுவரும் இப்போட்டியில், அதிரடியாகத் துடுப்பெடுத்தாடிய குமார் சங்கக்கார, 183 பந்துகளில் ஆட்டமிழக்காமல் 180 ஓட்டங்களைக் குவித்தார். தனது சதத்தை 136 பந்துகளில் கடந்த அவர், அதன் பின்னர் மேலும் அதிரடியாகத் துடுப்பெடுத்தாடியிருந்தார்.

 

மழையால் பாதிக்கப்பட்ட 2ஆவது நாளில், சரே அணி பெற்ற 142 ஓட்டங்களில் 98 ஓட்டங்களை, சங்கக்காரவே குவித்திருந்திருந்தார்.

 

இந்தப் போட்டியில் அவர் பெற்ற சதத்துடன், இந்தப் பருவகாலத்தில், 6 சதங்களை அவர் குவித்துள்ளார். மேலதிகமாக, 2 அரைச்சதங்களையும் பெற்றுள்ளார். இதன்படி, 7 போட்டிகளில், 11 இனிங்ஸ்களில் துடுப்பெடுத்தாடி, 108.6 என்ற சராசரியில் 1,086 ஓட்டங்களை அவர் குவித்துள்ளார்.

 

இந்தப் பருவகாலமே, முதற்தரப் போட்டிகளில் தனது இறுதிப் பருவகாலம் என அறிவித்துள்ள குமார் சங்கக்கார, மிகச்சிறப்பான ஃபோர்மை வெளிப்படுத்தியுள்ளார். அத்தோடு, இப்பருவகாலத்தில் தொடர்ச்சியாக 5 சதங்களைக் குவித்த அவர், 6ஆவது சதத்தைக் குவிக்கும் வாய்ப்பை, 16 ஓட்டங்களால் தவறவிட்டிருந்தார்.

 

இதைத் தவிர, ஒரு போட்டிக்கு முன்னதாக அவர், அனைத்து வகையான தொழில்முறையான போட்டிகளில், 100 சதங்களைக் கடந்திருந்தார். தற்போது அவர், 101ஆவது சதத்தையும் பெற்றுள்ளார்.

 

இப்போட்டியில் சரே அணி, 7 விக்கெட்டுகளை இழந்து 516 ஓட்டங்களைக் குவித்து, பலமான நிலையில் காணப்படுகின்றமை குறிப்பிடத்தக்கது.

இந்தியாவை தோற்கடித்துச் சம்பியனானது பாகிஸ்தான்

 

இங்கிலாந்தில் இடம்பெற்றுவந்த சம்பியன்ஸ் கிண்ணத் தொடரில், பாகிஸ்தான் சம்பியனாகியுள்ளது. ஐக்கிய இராச்சியத் தலைநகர் இலண்டனிலுள்ள ஓவல் மைதானத்தில் இடம்பெற்ற இறுதிப் போட்டியில், இந்தியாவைத் தோற்கடித்தே பாகிஸ்தான் சம்பியனாகியுள்ளது.

 

இன்று (18) இடம்பெற்ற மேற்படி போட்டியின் நாணயச் சுழற்சியில் வெற்றிபெற்ற, இந்திய அணியின் தலைவர் விராட் கோலி, பாகிஸ்தான் அணியை, முதலில் துடுப்பெடுத்தாட அழைத்தார்.

 

அந்தவகையில், முதலில் துடுப்பெடுத்தாடிய பாகிஸ்தான், அதிரடியாக ஆரம்பித்தது. ஆரம்பத் துடுப்பாட்ட வீரர்களான, ஃபக்கார் ஸமனும் அஸார் அலியும், 23 ஓவர்களில் 128 ஓட்டங்களைப் பகிர்ந்தனர். பின்னர், இனிங்ஸின் நடுப்பகுதியிலும் வேகமாக ஓட்டங்களைப் பெற்றதுடன், ஐந்தாவது விக்கெட்டுக்காக, 7.3 ஓவர்களில், மொஹமட் ஹபீஸும் இமாட் வசீமும், பிரிக்கப்படாத 71 ஓட்டங்களைப் பகிர, 50 ஓவர்களில், 4 விக்கெட்டுகளை இழந்து 338 ஓட்டங்களைப் பெற்றது.

 

துடுப்பாட்டத்தில், ஃபக்கார் ஸமான் 114 (106), அஸார் அலி 59 (71), மொஹமட் ஹபீஸ் ஆட்டமிழக்காமல் 57 (37), பாபர் அஸாம் 46 (52), இமாட் வசீம் ஆட்டமிழக்காமல் 25 (21) ஓட்டங்களைப் பெற்றனர். பந்துவீச்சில், புவ்னேஷ்வர் குமார், ஹர்டிக் பாண்ட்யா, கேதார் யாதவ் ஆகியோர் தலா ஒவ்வொரு விக்கெட்டைக் கைப்பற்றினர். இதில் சதம் பெற்ற ஸமான், வெறும் 3 ஓட்டங்களைப் பெற்றபோது, பும்ராவின் முறையற்ற பந்தொன்றில், மகேந்திர சிங் டோணியிடம் பிடியெடுப்பொன்றை வழங்கியிருந்தார் என்பது குறிப்பிடத்தக்கது.

 

339 ஓட்டங்களை வெற்றியிலக்காகக் கொண்டு துடுப்பெடுத்தாடிய இந்திய அணி, மொஹமட் ஆமிரின் அபார பந்துவீச்சுக்கு எதிர்கொள்ள முடியாமல், முதலாவது ஓவரிலேயே ரோஹித் ஷர்மாவை இழந்தது. மூன்றாவது ஓவரின் மூன்றாவது பந்தில், கோலி வழங்கிய பிடியெடுப்பை அஸார் அலி தவறவிட்டபோதும், அடுத்த பந்திலேயே, ஷடாப் கானிடம் பிடிகொடுத்து ஆட்டமிழந்தார். அதன்பின்னர், ஒன்பாதாவது ஓவர் முடிவில், ஷீகர் தவானையும் இழந்து, 33 ஓட்டங்களுக்கு 3 விக்கெட்டுகளை இழந்து தடுமாறியது.

 

பின்னர், 13ஆவது ஓவர் முடிவில் யுவ்ராஜ் சிங்கை இழந்த இந்தியா, அடுத்த ஓவரின் மூன்றாவது பந்திலேயே, மகேந்திர சிங் டோணியையும் இழந்து, 55 ஓட்டங்களுக்கு 5 விக்கெட்டுகளை இழந்து தடுமாறியது. இதற்குப் பின்னர், ஹர்டிக் பாண்ட்யா அதிரடியாகத் துடுப்பெடுத்தாடியபோதும், “ரண் அவுட்” முறையில் அவர் ஆட்டமிழந்ததோடு, மிகுதி விக்கெட்டுகளையும் இழந்த இந்தியா, 30.3 ஓவர்களில் சகல விக்கெட்டுகளையும் இழந்து 158 ஓட்டங்களைப் பெற்று, 180 ஓட்டங்களால் தோல்வியடைந்தது.

 

துடுப்பாட்டத்தில், ஹர்டிக் பாண்ட்யா 76 (43) ஓட்டங்களைப் பெற்றார். பந்துவீச்சில், மொஹமட் ஆமிர், ஹஸன் அலி ஆகியோர் தலா 3 விக்கெட்டுகளைக் கைப்பற்றியதோடு, ஷடாப் கான் 2 விக்கெட்டுகளைக் கைப்பற்றினர்.

 

மேற்படி போட்டியில், 180 ஓட்டங்களால் இந்தியா தோல்வியடைந்த நிலையில், சர்வதேச கிரிக்கெட் சபையின் இறுதிப் போட்டியொன்றில், அதிக ஓட்டங்களால் பெறப்பட்ட தோல்வியாக இது அமைந்தது. இதற்கு முன்னர், 2003ஆம் ஆண்டு உலகக் கிண்ண இறுதிப் போட்டியில், அவுஸ்திரேலியாவிடம் 125 ஓட்டங்களால் இந்தியா தோல்வியடைந்தமையே, அதிக ஓட்டங்களால், சர்வதேச கிரிக்கெட் சபையின் இறுதிப் போட்டியில் பெறப்பட்ட தோல்வியாக இருந்தது.

 

இறுதிப் போட்டியின் நாயகனாக ஃபக்கார் ஸமான் தெரிவானார். தொடரின் நாயகனாக, ஹஸன் அலி தெரிவானார். இத்தொடரில் 13 விக்கெட்டுகளைக் கைப்பற்றிய ஹஸன் அலி, அதிக விக்கெட்டுகளைக் கைப்பற்றியவர்களுக்கான தங்கப் பந்தையும் வென்றிருந்தார். இத்தொடரில், 338 ஓட்டங்களைப் பெற்ற ஷீகர் தவான், அதிக ஓட்டங்களைப் பெற்றவர்களுக்கான தங்கத் துடுப்பு மட்டையை வென்றார்.

 

உலக இருபதுக்கு -20-இல் 2009ஆம் ஆண்டு சம்பியனான பாகிஸ்தான், எட்டு ஆண்டுகளின் பின்னர் உலகத் தொடரொன்றில் தற்போது சம்பியனாகியுள்ள பாகிஸ்தான், 50 ஓவர் உலகத் தொடரொன்றில், 1992ஆம் ஆண்டு உலகக் கிண்ணத்தில் வென்ற பின்னர், 25 ஆண்டுகளின் பின்னர் 50 ஓவர் உலகத் தொடரொன்றில் சம்பியனாகியுள்ளது.

 

இங்கிலாந்தை வென்று இறுதியில் பாகிஸ்தான்

 

இங்கிலாந்தில் இடம்பெற்றுவருகின்ற சர்வதேச கிரிக்கெட் சபையின் சம்பியன்ஸ் கிண்ணத் தொடரின் இறுதிப் போட்டிக்கு பாகிஸ்தான் தகுதி பெற்றுள்ளது.

 

கார்டிப்பில், இன்று (14) இடம்பெற்ற முதலாவது அரையிறுதிப் போட்டியில், இங்கிலாந்தைத் தோற்கடித்தே, இறுதிப் போட்டிக்கு பாகிஸ்தான் தகுதி பெற்றுள்ளது.

 

இப்போட்டியின் நாணயச் சுழற்சியில் வெற்றிபெற்ற பாகிஸ்தான் அணியின் தலைவர் சஃப்ராஸ் அஹமட், இங்கிலாந்து அணியை, முதலில் துடுப்பெடுத்தாடப் பணித்தார். உபாதை காரணமாக, பாகிஸ்தான் அணியின் வேகப்பந்து வீச்சாளர் மொஹமட் ஆமிர் பங்கேற்காத நிலையில், அவருக்குப் பதிலாக, ருமான் றயீஸ் அணியில் இடம்பெற்று, ஒருநாள் சர்வதேசப் போட்டிகளில் அறிமுகத்தை மேற்கொண்டார். சகலதுறை வீரர் ஃபாஹிம் அஷ்ரப்புக்குப் பதிலாக, ஷடாப் கான் அணியில் இடம்பெற்றார். இங்கிலாந்து அணியில், ஜேஸன் றோய்க்குப் பதிலாக, ஜொனி பெயர்ஸ்டோ அணியில் இடம்பெற்றார்.

 

அந்தவகையில், முதலில் துடுப்பெடுத்தாடிய இங்கிலாந்து அணி, மெதுவான ஆடுகளத்தில், பாகிஸ்தானின் ஆக்ரோஷமான வேகப்பந்து வீச்சை எதிர்கொள்ள முடியாமல் தடுமாறி, தொடர்ச்சியாக விக்கெட்டுகளை இழந்து, 49.5 ஓவர்களில் சகல விக்கெட்டுகளையும் இழந்து 211 ஓட்டங்களைப் பெற்றது.

 

துடுப்பாட்டத்தில், இங்கிலாந்து அணி சார்பாக, ஜோ றூட் 46 (56), ஜொனி பெயார்ஸ்டோ 43 (57), பென் ஸ்டோக்ஸ் 34 (64), அணித்தலைவர் ஒய்ன் மோர்கன் 34 (53) ஓட்டங்களைப் பெற்றனர். பந்துவீச்சில், ஹஸன் அலி 3, ஜுனைட் கான், ருமான் றயீஸ் ஆகியோர் தலா 2, ஷடாப் கான் 1 விக்கெட்டினைக் கைப்பற்றினர்.

 

பதிலுக்கு, 212 ஓட்டங்கள் என்ற வெற்றியிலக்கோடு துடுப்பெடுத்தாடிய பாகிஸ்தான், 37.1 ஓவர்களில், இரண்டு விக்கெட்டுகளை மட்டும் இழந்த நிலையில், வெற்றியிலக்கை அடைந்து, எட்டு விக்கெட்டுகளால் வெற்றிபெற்றது.

 

துடுப்பாட்டத்தில், பாகிஸ்தான் அணி சார்பாக, அஸார் அலி 76 (100), ஃபக்கார் ஸமன் 57 (58), பாபர் அஸாம் ஆட்டமிழக்காமல் 38 (45), மொஹமட் ஹபீஸ் 31 (21) ஓட்டங்களைப் பெற்றனர். பந்துவீச்சில், ஜேக் போல், அடில் ரஷீட் ஆகியோர் தலா ஒவ்வொரு விக்கெட்டினைக் கைப்பற்றினர்.

 

இப்போட்டியின் நாயகனாக, ஹஸன் அலி தெரிவானார்.

இலங்கையை வென்று அரையிறுதியில் பாகிஸ்தான்

இங்கிலாந்தில் இடம்பெற்றுவரும் சர்வதேச கிரிக்கெட் சபையின் சம்பியன்ஸ் கிண்ணத் தொடரின் அரையிறுதிப் போட்டிக்கு பாகிஸ்தான் தகுதிபெற்றுள்ளது. கார்டிப்பில், இன்று இடம்பெற்ற இலங்கை அணிக்கெதிரான தமது இறுதி குழுநிலைப் போட்டியில் வெற்றிபெற்றே, குழு பி-இலிருந்து இரண்டாவது அணியாக அரையிறுதிப் போட்டிக்கு பாகிஸ்தான் தகுதிபெற்றுள்ளது.

 

இப்போட்டியின் நாணயச் சுழற்சியில் வெற்றிபெற்ற பாகிஸ்தான் அணியின் தலைவர் சஃப்ராஸ் அஹமட், இலங்கை அணியை முதலில் துடுப்பெடுத்தாடப் பணித்தார்.

 

அந்தவகையில், முதலில் துடுப்பெடுத்தாடிய இலங்கை அணி, ஆரம்பத் துடுப்பாட்ட வீரர் நிரோஷன் டிக்வெல்ல, அணித்தலைவர் அஞ்சலோ மத்தியூஸின் இணைப்பாட்டம் காரணமாக சிறந்ததோர் அடித்தளத்தைப் பெற்றபோதும், இவர்களிருவரினதும் விக்கெட்டுகள் வீழ்த்தப்பட்டதைத் தொடர்ந்து, தொடர்ச்சியாக விக்கெட்டுகளை இழந்தது. பின்னர், பின்வரிசையில், அசேல குணரட்ன, சுரங்க லக்மால் பெற்ற ஓட்டங்களின் மூலமே, 49.2 ஓவர்களில் சகல விக்கெட்டுகளையும் இழந்து 236 ஓட்டங்களைப் பெற்றது.

 

துடுப்பாட்டத்தில், நிரோஷன் டிக்வெல்ல 73 (86), அஞ்சலோ மத்தியூஸ் 39 (54), குசல் மென்டிஸ் 27 (29), அசேல குணரட்ன 27 (44), சுரங்க லக்மால் 26 (34) ஓட்டங்களைப் பெற்றனர். பந்துவீச்சில், ஜுனைட் கான், ஹஸன் அலி ஆகியோர் தலா 3 விக்கெட்டுகளையும் மொஹமட் ஆமிர், ஃபாஹிம் அஷ்ரப் ஆகியோர் தலா 2 விக்கெட்டுகளையும் கைப்பற்றினர்.

 

பதிலுக்கு, 237 ஓட்டங்களை வெற்றியிலக்காகக் கொண்டு துடுப்பெடுத்தாடிய பாகிஸ்தான், பக்கார் ஸமனின் அதிரடி ஆரம்பத்தைப் பெற்றாலும், பின்னர் விக்கெட்டுகள் வீழ்த்தப்பட நெருக்கடி நிலைக்கு வந்தபோதும், பிடியெடுப்புகள் தவறவிடப்பட, சஃப்ராஸ் அஹமட்டின் வழிகாட்டலில், 44.5 ஓவர்களில் ஏழு விக்கெட்டுகளை இழந்த நிலையில் வெற்றியிலக்கை அடைந்தது.

 

துடுப்பாட்டத்தில், சஃப்ராஸ் அஹமட் ஆட்டமிழக்காமல் 61 (79), பக்கார் ஸமர் 50 (36), அஸார் அலி 34 (50), மொஹமட் ஆமிர் ஆட்டமிழக்காமல் 28 (43) ஓட்டங்களைப் பெற்றனர். பந்துவீச்சில், நுவான் பிரதீப் 3 விக்கெட்டுகளையும், சுரங்க லக்மால், லசித் மலிங்க, திஸர பெரேரா ஆகியோர் தலா ஒவ்வொரு விக்கெட்டினைக் கைப்பற்றினர்.

 

போட்டியின் நாயகனாக, சஃப்ராஸ் அஹமட் தெரிவானார்.   

தொடரைக் கைப்பற்றியது இந்தியா

 

இந்தியா, இங்கிலாந்து அணிகளுக்கிடையிலான மூன்று போட்டிகள் கொண்ட இருபதுக்கு-20 சர்வதேசப் போட்டித் தொடரை இந்திய அணி கைப்பற்றியுள்ளது.

 

முதலிரண்டு போட்டிகளிலும் இரண்டு அணிகளும் தலா ஒவ்வொரு போட்டியில் வென்றிருந்த நிலையில், பெங்களூரில், இன்று (01) இடம்பெற்ற தீர்க்கமான மூன்றாவது போட்டியில், 75 ஓட்டங்களால் வெற்றிபெற்ற இந்திய அணி, 2-1 என்ற ரீதியில் தொடரைக் கைப்பற்றியது.

 

நாணயச் சுழற்சியில் வெற்றிபெற்ற இங்கிலாந்து அணியின் தலைவர் ஒயின் மோர்கன், இந்திய அணியை முதலில் துடுப்பெடுத்தாடப் பணித்தார். இந்திய அணி சார்பாக, றிஷாப் பண்ட் அறிமுகத்தை மேற்கொண்டிருந்தார்.

 

முதலில் துடுப்பெடுத்தாடிய இந்திய அணி, 20 ஓவர்களில் ஆறு விக்கெட்டுகளை இழந்து 202 ஓட்டங்களைக் குவித்தது.

 

இந்திய அணியின் தலைவர் விராத் கோலி, அணியின் ஓட்ட எண்ணிக்கை நான்கு ஆக இருக்கும்போதே ஆட்டமிழந்தபோதும், இந்திய அணியின் இரண்டாவது விக்கெட்டுக்காக ஜோடி சேர்ந்த லோகேஷ் ராகுலும் சுரேஷ் ரெய்னாவும் 61 ஓட்டங்களை பகிர்ந்ததுடன், மூன்றாவது விக்கெட்டுக்காக ஜோடி சேர்ந்த ரெய்னாவும் மகேந்திர சிங் டோணியும் 55 ஓட்டங்களைப் பகிர்ந்ததுடன், நான்காவது விக்கெட்டுக்காக ஜோடி சேர்ந்த டோணியும் யுவ்ராஜ் சிங்கும் 57 ஓட்டங்களைப் பகிர்ந்திருந்தனர். இந்திய அணியின் இனிங்ஸின் 18ஆவது ஓவரை கிறிஸ் ஜோர்டான் வீசியிருந்த நிலையில், மூன்று, 6 ஓட்டங்கள், ஒரு 4 ஓட்டங்கள் உள்ளடங்கலாக, 23 ஓட்டங்களை அந்த ஓவரில் யுவ்ராஜ் சிங் பெற்றிருந்தார்.

 

துடுப்பாட்டத்தில், இந்திய அணி சார்பாக, சுரேஷ் ரெய்னா 63(45), மகேந்திர சிங் டோணி 56(36), யுவ்ராஜ் சிங் 27(10), லோகேஷ் ராகுல் 22(18) ஓட்டங்களைப் பெற்றனர். இதில், தனது 76ஆவது இருபதுக்கு-20 சர்வதேசப் போட்டியில் விளையாடிய டோணி, இருபதுக்கு-20 சர்வதேசப் போட்டிகளில் தனது முதலாவது அரைச்சதத்தைப் பெற்றுக் கொண்டார்.

 

பந்துவீச்சில், இங்கிலாந்து அணி சார்பாக, தைமல் மில்ஸ், பென் ஸ்டோக்ஸ், லியாம் பிளங்கெட், கிறிஸ் ஜோர்டான் ஆகியோர் தலா ஒவ்வொரு விக்கெட்டினைக் கைப்பற்றினார்.

 

பதிலுக்கு, 203 ஓட்டங்கள் என்ற வெற்றியிலக்குடன் துடுப்பெடுத்தாடிய இங்கிலாந்து அணி, 16.3 ஓவர்களில் சகல விக்கெட்டுகளையும் இழந்து 127 ஓட்டங்களை மாத்திரமே பெற்றுத் தோல்வியடைந்தது.

 

இங்கிலாந்து அணியின் இரண்டாவது விக்கெட்டுக்காகவும், மூன்றாவது விக்கெட்டுக்காகவும், முறையே 47, 64 ஓட்டங்களைப் பகிரப்பட்டபோதும், இறுதி எட்டு விக்கெட்டுக்களையும் எட்டு ஓட்டங்களுக்கு, 18 பந்துகளில் இழந்திருந்தது.

 

துடுப்பாட்டத்தில், இங்கிலாந்து அணி சார்பாக, ஜோ றூட் 42(37), ஒயின் மோர்கன் 40(21), ஜேசன் றோய் 32(23) ஓட்டங்களைப் பெற்றனர்.

 

பந்துவீச்சில், இந்திய அணி சார்பாக, யுஸ்வேந்திர சஹால், நான்கு ஓவர்களில், 25 ஓட்டங்களை மட்டுமே விட்டுக்கொடுத்து ஆறு விக்கெட்டுகளைக் கைப்பற்றினார். இருபதுக்கு-20 சர்வதேசப் போட்டிகளில், மூன்றாவது சிறந்த பந்துவீச்சுப் பெறுதி இதுவாகும். சஹால் தவிர, ஜஸ்பிரிட் பும்ரா மூன்று விக்கெட்டுகளைக் கைப்பற்றியதோடு, அமித் மிஷ்ரா ஒரு விக்கெட்டினைக் கைப்பற்றினார்.

 

போட்டியின் நாயகனாகவும் தொடரின் நாயகனாகவும் சஹால் தெரிவானார்.

 

அந்தவகையில், டெஸ்ட் தொடரில், 4-0 என்ற ரீதியில் தோற்ற இங்கிலாந்து, ஒருநாள் சர்வதேசப் போட்டித் தொடரில், 2-1 என்ற ரீதியில் தோற்று, தற்போது இருபதுக்கு-20 சர்வதேச போட்டித் தொடரிலும் தோற்று, எல்லா வகையான தொடரிலும் தோற்று வெற்றுக்கையுடன் இந்தியாவை விட்டு இங்கிலாந்து செல்கிறது.

சசெக்ஸில் டேவிட் விஸே; மீண்டுமொரு கொல்பாக்

 

தென்னாபிரிக்க கிரிக்கெட் அணியின் சகலதுறை வீரர் டேவிட் விஸே, தனது நாட்டுக்காக விளையாடுவதை விடுத்து, “கொல்பாக்” வீரராக, இங்கிலாந்துப் பிராந்திய அணியான சசெக்ஸ் அணியில் ஒப்பந்தம் செய்துள்ளார்.

 

தென்னாபிரிக்காவுக்காக 6 ஒருநாள் சர்வதேசப் போட்டிகளிலும் 20 இருபதுக்கு-20 சர்வதேசப் போட்டிகளிலும் இதுவரை விளையாடியுள்ள டேவிட் விஸே, இருபதுக்கு-20 சர்வதேசப் போட்டிகளில் 23 ஓட்டங்களுக்கு 5 விக்கெட்டுகள் என்ற சிறப்பான பெறுபேற்றைக் கொண்டுள்ளார். 

 

இலங்கைக்கெதிரான 2ஆவது டெஸ்டின் முடிவில், அவ்வணியின் வேகப்பந்து வீச்சாளர் கைல் அபொட், துடுப்பாட்ட வீரர் றீலி றொஸோ ஆகியோர், கொல்பாக் முறையில் ஹம்ப்ஷையர் அணிக்காக ஒப்பந்தம் செய்யப்பட்டுள்ளதாக அறிவிக்கப்பட்டிருந்தது.  இந்நிலையிலேயே, டேவிட் விஸேவின் அறிவிப்பும் வெளியாகியுள்ளது.  31 வயதான டேவிட் விஸே, இலங்கைக்கெதிரான இருபதுக்கு-20 சர்வதேசப் போட்டித் தொடருக்கான குழாமில் சேர்க்கப்படுவதாக இருந்த போதிலும், அவரது இந்த அறிவிப்புக் காரணமாக, அக்குழாமிலிருந்து அவர் நீக்கப்பட்டே, அக்குழாம் அறிவிக்கப்பட்டது. 

 

கொல்பாக் வீரர்களைத் தவிர, ஏனைய வீரர்களான ஃபப் டு பிளெஸி, ஹஷிம் அம்லா, குயின்டன் டீ கொக், ஏபி டி வில்லியர்ஸ், ஜே.பி.டுமினி, கஜிஸ்கோ றபடா ஆகியோருக்கு ஓய்வு வழங்கப்பட்டுள்ளது. காயம் காரணமாக டேவ் ஸ்டெய்ன், கிறிஸ் மொறிஸ் ஆகியோர் சேர்க்கப்படவில்லை. அணியின் தலைவராக, ஃபர்ஹான் பெஹர்டியன் செயற்படவுள்ளார்.   

லக்மால் முன்னேற்றம்; மத்தியூஸ் பின்னடைவு

 

சர்வதேச கிரிக்கெட் சபையினால், டெஸ்ட் வீரர்களுக்கான புதிய தரப்படுத்தல்கள் வெளியிடப்பட்டுள்ளன. அவுஸ்திரேலியா எதிர் பாகிஸ்தான் (3ஆவது டெஸ்ட்), தென்னாபிரிக்கா எதிர் இலங்கை (2ஆவது டெஸ்ட்) ஆகிய போட்டிகளின் முடிவிலேயே, இத்தரப்படுத்தல்கள் வெளியிடப்பட்டுள்ளன.

 

துடுப்பாட்ட வீரர்களுக்கான தரப்படுத்தலில், முதல் 6 இடங்களிலும் மாற்றங்கள் ஏற்படுத்தப்படவில்லை. ஸ்டீவன் ஸ்மித், விராத் கோலி, ஜோ றூட், கேன் வில்லியம்ஸன், டேவிட் வோணர், அஸார் அலி ஆகியோரே, முதல் 6 இடங்களில் காணப்படுகின்றனர்.

 

14ஆவது இடத்தில் காணப்பட்ட யுனிஸ் கான், 7ஆவது இடத்துக்கு முன்னேறியுள்ளார். தொடர்ந்து குயின்டன் டீ கொக் (9இலிருந்து 8க்கு), ஏபி டி வில்லியர்ஸ் (8இலிருந்து 9க்கு), ஹஷிம் அம்லா (7இலிருந்து 10க்கு) ஆகியோர் காணப்படுகின்றனர்.

 

3ஆவது போட்டிக்கு முன்னர் 11ஆவது இடத்தில் காணப்பட்ட இலங்கை அணித்தலைவர் அஞ்சலோ மத்தியூஸ், 3ஆவது போட்டியில் போதிய திறமைகளை வெளிப்படுத்தாதன் காரணமாக, 14ஆவது இடத்துக்குப் பின்தள்ளப்பட்டுள்ளார். 23ஆவது இடத்தில் காணப்பட்ட சந்திமால் 26ஆவது இடத்துக்கும், 31ஆவது இடத்தில் காணப்பட்ட தனஞ்சய டி சில்வா 33ஆவது இடத்துக்கும் பின்தள்ளப்பட்டுள்ளனர்.

 

பந்துவீச்சாளர்களில் முதலிரு இடங்களிலும் இரவிச்சந்திரன் அஷ்வின், இரவீந்திர ஜடேஜா இருவரும் காணப்படுகின்றனர். 5ஆவது இடத்தில் காணப்பட்ட ஜொஷ் ஹேஸல்வூட், பாகிஸ்தானுக்கெதிராகச் சிறப்பாகச் செயற்பட்டு, 3ஆவது இடத்துக்கு முன்னேறியுள்ளார்.

 

ரங்கன ஹேரத்துக்குச் சுழற்சியை வழங்கக்கூடாது என, தென்னாபிரிக்க ஆடுகளங்களை, வேகப்பந்து வீச்சாளர்களுக்குச் சாதகமான ஆடுகளங்களாக அந்நாட்டு ஆடுகள மேற்பார்வையாளர்கள் மாற்றியிருந்த நிலையில், விக்கெட்டுகளைக் கைப்பற்றத் தவறிய ஹேரத், 3ஆவது இடத்திலிருந்து 4ஆவது இடத்துக்குப் பின்தள்ளப்பட்டுள்ளார்.

 

தொடர்ந்து வரும் இடங்களில் டேல் ஸ்டெய்ன் (4இலிருந்து 5க்கு), ஜேம்ஸ் அன்டர்சன், ஸ்டுவேர்ட் ப்ரோட், கஜிஸ்கோ றபடா (17இலிருந்து 8க்கு), வேர்ணன் பிலாந்தர், மிற்சல் ஸ்டார்க் (8இலிருந்து 10க்கு) ஆகியோர் காணப்படுகின்றனர்.

 

தென்னாபிரிக்காவுக்கு எதிரான 2ஆவது போட்டியில் சிறப்பாகப் பந்துவீசியிருந்த இலங்கையின் சுரங்க லக்மால், லஹிரு குமார இருவரும், தங்கள் வாழ்நாளின் சிறந்த அடைவைப் பெற்றுள்ளனர். இப்போட்டிக்கு முன்பாக 36ஆவது இடத்தில் காணப்பட்ட லக்மால், 30ஆவது இடத்துக்கு முன்னேறியுள்ளார். தனது 3ஆவது டெஸ்ட் போட்டியில் விளையாடிய குமார, முதலிரு போட்டிகளின் பின்னர் முதல் 100 பேரில் ஒருவராக இடம்பெற்றிருக்காத நிலையில், 7 விக்கெட்டுகளைக் கைப்பற்றியமை காரணமாக, 67ஆவது இடத்தைப் பிடித்துள்ளார்.

‘டோணி தான் எப்போதும் தலைவர்’

 

இந்திய அணியின் மட்டுப்படுத்தப்பட்ட போட்டிகளுக்கான புதிய தலைவராக நியமிக்கப்பட்டுள்ள விராத் கோலி, தனது தலைவராக, எப்போதும் மகேந்திரசிங் டோணியே இருப்பார் எனக் குறிப்பிட்டுள்ளார்.

 

மட்டுப்படுத்தப்பட்ட ஓவர்கள் கொண்ட அணிகளின் தலைவராக இருந்த டோணி, கடந்த வாரம் ஓய்வுபெற்றதைத் தொடர்ந்து, புதிய தலைவராக, கடந்த வெள்ளிக்கிழமையன்று, கோலி உறுதிப்படுத்தப்பட்டார். ஏற்கெனவே டெஸ்ட் தலைமைத்துவத்தை வகிக்கும் கோலி, தற்போது ஒட்டுமொத்த அணியின் தலைமைத்துவத்தையும் ஏற்பது தொடர்பாகவும் டோணி தொடர்பாகவும் கருத்துத் தெரிவித்தார்.

 

"தலைமைத்துவம், என்னைச் சரியான விதத்தில் நடத்திக் கொள்ளுதல் ஆகிய விடயங்களில், அவரிடமிருந்து (டோணி), நான் ஏராளமானவற்றைக் கற்றுக் கொண்டேன். 'டோணி' என்று நீங்கள் நினைக்கும் போது, மனதில் முதலாவதாக வருவது 'அணித்தலைவர்' என்பது தான்.

 

"என்னைப் பொறுத்தவரை, எனது அணித்தலைவராக அவரே எப்போதும் இருப்பார். ஏனென்றால், எனது கிரிக்கெட் வாழ்வு, அவரது தலைமைத்துவத்தின் கீழேயே ஆரம்பித்தது. என்னை வழிநடத்திய, எனக்கு வாய்ப்புகளை வழங்கிய, கிரிக்கெட் வீரராக நான் வளர்வதற்கு எனக்கு வாய்ப்புகளையும் நேரங்களையும் வழங்கியவராக, அணியிலிருந்து நான் நீக்கப்படுவதைத் தடுத்த ஒருவராக, டோணியே இருப்பார்" என்று கோலி குறிப்பிட்டார்.

 

இருவருக்குமிடையில் இருதரப்பு மரியாதை காணப்படுவதாகக் குறிப்பிட்ட கோலி, "நாம் இருவரும் அற்புதமான நட்பைக் கொண்டுள்ளோம். அவரது கருத்துகளை எனதருகே கொண்டிருப்பதற்கு, நான் மிகவும் அதிர்ஷ்டசாலி" என்றும் குறிப்பிட்டார்.

 

டெஸ்ட் போட்டிகளிலிருந்து டோணி திடீரென ஓய்வுபெற்றபோது, 2015ஆம் ஆண்டு ஜனவரியில், அதற்கான தலைமைத்துவத்தைப் பொறுப்பேற்ற கோலி, அப்போது இருந்ததை விட, இப்போது அதிகம் தயாராக இருப்பதாகத் தெரிவித்தார். டெஸ்ட் போட்டிகளில் டோணி விளையாட மாட்டாரென, போட்டிக்கு முதல்நாளே தனக்கு முன்னர் அறிவிக்கப்பட்டதாகவும், திடீரென அணித்தலைவராக விளையாட வேண்டியேற்பட்டதாகவும், கோலி குறிப்பிட்டார்.

 

கோலியின் கீழ், 2019ஆம் ஆண்டுக்கான உலகக் கிண்ணத்துக்கான தயார்படுத்தல்களில் இந்திய அணி ஈடுபடவுள்ள நிலையில், அந்தத் தொடருக்காக அணியை வழிநடத்துதல், தனது வாழ்வின் மிகப்பெரிய அடைவாக அமையுமென, கோலி மேலும் குறிப்பிட்டார்.

மீண்டும் வெள்ளையடித்தது நியூசிலாந்து

 

நியூசிலாந்து, பங்களாதேஷ் அணிகளுக்கிடையிலான 3 போட்டிகள் கொண்ட இருபதுக்கு-20 சர்வதேசப் போட்டித் தொடரின் 3ஆவது போட்டியிலும் வெற்றிபெற்ற நியூசிலாந்து அணி, வெள்ளையடிப்புச் செய்துள்ளது.

 

பே ஓவல் மைதானத்தில் இன்று இடம்பெற்ற இப்போட்டியில், நாணயச் சுழற்சியில் வெற்றிபெற்ற பங்களாதேஷ் அணி, முதலில் களத்தடுப்பில் ஈடுபடத் தீர்மானித்தது. இதன்படி துடுப்பெடுத்தாடக் களமிறங்கிய நியூசிலாந்து அணி, 20 ஓவர்களில் 4 விக்கெட்டுகளை இழந்து 194 ஓட்டங்களைக் குவித்தது. 6.1 ஓவர்களில் 3 விக்கெட்டுகளை இழந்து 41 ஓட்டங்களைப் பெற்றுத் தடுமாறிவந்த நியூசிலாந்து அணிக்காக, 4ஆவது விக்கெட்டுக்காக இணைந்த கேன் வில்லியம்ஸ், கொரி அன்டர்சன் இருவரும், 12 ஓர்களில் 124 ஓட்டங்களைக் குவித்தனர். பின்னர், இறுதி நேரத்தில் அதிரடியை வெளிப்படுத்திய அன்டர்சன், 200க்கு அண்மையான ஓட்டங்களைப் பெறுவதை உறுதிப்படுத்தினார்.

 

துடுப்பாட்டத்தில் அன்டர்சன், 41 பந்துகளில் 2 நான்கு ஓட்டங்கள், 10 ஆறு ஓட்டங்கள் உள்ளடங்கலாக ஆட்டமிழக்காமல் 94 ஓட்டங்களைக் குவித்தார். கேன் வில்லியம்ஸன், 57 பந்துகளில் 60 ஓட்டங்களைப் பெற்றார்.
பந்துவீச்சில் றுபெல் ஹொஸைன், 3 விக்கெட்டுகளைக் கைப்பற்றினார்.

 

195 ஓட்டங்களை வெற்றியிலக்காகக் கொண்டு களமிறங்கிய பங்களாதேஷ் அணி, 20 ஓவர்களில் 6 விக்கெட்டுகளை இழந்து 167 ஓட்டங்களை மாத்திரம் பெற்று, 27 ஓட்டங்களால் தோல்வியடைந்தது. ஒரு கட்டத்தில் 8.1 ஓவர்களில் ஒரு விக்கெட்டை இழந்து 82 ஓட்டங்களுடன் பலமாகக் காணப்பட்ட அவ்வணி, இறுதி நேரத்தில் விக்கெட்டுகளை இழந்தமையால், ஓட்டங்களைப் பெறத் தவறியிருந்தது. துடுப்பாட்டத்தில் சௌமியா சர்கார் 42 (28), ஷகிப் அல் ஹஸன் 41 (34) ஓட்டங்களைப் பெற்றனர். பந்துவீச்சில் இஷ் சோதி, ட்ரென்ட் போல்ட் இருவரும் தலா 2 விக்கெட்டுகளைக் கைப்பற்றினர்.

 

போட்டியின் நாயகனாக, அன்டர்சன் தெரிவானார்.

 

ஏற்கெனவே, 3 போட்டிகள் கொண்ட ஒருநாள் சர்வதேசப் போட்டித் தொடரை, நியூசிலாந்து அணி வெள்ளையடித்திருந்த நிலையில், தற்போது இருபதுக்கு-20 சர்வதேசப் போட்டித் தொடரையும் வெள்ளையடித்துள்ளமை குறிப்பிடத்தக்கது.