Category Archives: News

அப்ரிடி அதிரடிச் சதம்

பாகிஸ்தான் அணியின் முன்னாள் தலைவரும் அதிரடித் துடுப்பாட்ட வீரருமான ஷஹிட் அப்ரிடி, இங்கிலாந்தின் உள்ளூர் இருபதுக்கு-20 தொடரான நற்வெஸ்ட் இ20 பிளாஸ்ட் தொடரின் காலிறுதிப் போட்டியில், அதிரடியான சதத்தைப் பெற, அவரது அணியான ஹம்ப்ஷையர் அணி, அரையிறுதிப் போட்டிக்குத் தகுதிபெற்றது.

 

டேர்பிஷையர் மைதானத்தில் இடம்பெற்ற இப்போட்டியில், நாணயச் சுழற்சியில் வெற்றிபெற்ற டேர்பிஷையர் அணி, முதலில் களத்தடுப்பில் ஈடுபடத் தீர்மானித்தது.  துடுப்பெடுத்தாடக் களமிறங்கிய ஹம்ப்ஷையர் அணி சார்பாக, ஆரம்பத் துடுப்பாட்ட வீரராகக் களமிறங்கிய அப்ரிடி, அதிரடியாகத் துடுப்பெடுத்தாடிச் சதம் பெற, 20 ஓவர்களில் 8 விக்கெட்டுகளை இழந்து 249 ஓட்டங்களை, அவ்வணி வெற்றது.

 

இருபதுக்கு-20 போட்டிகளில், தனது முதலாவது சதத்தை, அப்ரிடி பெற்றார். அவரது சதத்துக்கு, வெறுமனே 42 பந்துகளை மாத்திரம் அவர் எடுத்துக் கொண்டமை, இங்கு முக்கியமானதாக அமைந்தது. அவர், அடுத்த பந்திலேயே 101 ஓட்டங்களுடன் ஆட்டமிழந்தார்.  தவிர, அணித் தலைவர் ஜேம்ஸ் வின்ஸ் 55 (36), ஜோர்ஜ் பெய்லி 27 (11) ஓட்டங்களைப் பெற்றனர். பந்துவீச்சில் மற் கிறிற்ச்லி 3, பென் கொட்டன் 2 விக்கெட்டுகளைக் கைப்பற்றினர்.

 

250 ஓட்டங்கள் என்ற கடினமான இலக்கை நோக்கித் துடுப்பெடுத்தாடிய டேர்பிஷையர் அணி, 19.5 ஓவர்களில் சகல விக்கெட்டுகளையும் இழந்து 148 ஓட்டங்களை மாத்திரம் பெற்று, 101 ஓட்டங்களால் தோல்வியடைந்தது.  துடுப்பாட்டத்தில் பென் கொட்டன் 30 (21) ஓட்டங்களைப் பெற்றார்.  

 

பந்துவீச்சில், கைல் அபொட், லியம் டவ்ஸன் இருவரும் தலா 3 விக்கெட்டுகளையும், மேஸன் கிறேன் 2 விக்கெட்டுகளையும் கைப்பற்றினர்.

 

இப்போட்டியின் நாயகனாக, ஷஹிட் அப்ரிடி தெரிவானார்.

உலக பதினொருவர் அணியின் தலைவராக அம்லா?

பாகிஸ்தானில் எதிர்வரும் செப்டெம்பரில் இடம்பெறவுள்ள, உலக பதினொருவர் அணியின் தலைவராக, தென்னாபிரிக்க அணியின் ஹஷிம் அம்லா அல்லது அவ்வணியின் டெஸ்ட் தலைவர் ஃபப் டு பிளெஸி ஆகியோர் செயற்படுவர் என, பாகிஸ்தான் கிரிக்கெட் சபை வட்டாரங்கள் நேற்று (22) தெரிவித்தன.

 

இந்தத் தொடர் பற்றிய உத்தியோகபூர்வமான அறிவிப்பு, நேற்று முன்தினம் வெளியிடப்பட்டது.
அந்த அறிக்கையில், உலகின் முன்னணி வீரர்கள், இந்தத் தொடரில் பங்குபற்றுவர் என, பாகிஸ்தான் கிரிக்கெட் சபையின் தலைவர் நஜம் சேதி தெரிவித்த போதிலும், அவர்களின் பெயர் விவரங்களை, விரைவில் வெளியிடுவதாகவே அறிவித்தார்.

 

இந்நிலையிலேயே, இது தொடர்பான விவரங்கள் வெளியாகி வருகின்றன. இங்கிலாந்து, நியூசிலாந்து, மேற்கிந்தியத் தீவுகள், இலங்கை, பங்களாதேஷ், ஆப்கானிஸ்தான், சிம்பாப்வே ஆகிய அணிகளைச் சேர்ந்த வீரர்கள், இந்தத் தொடரில் விளையாடச் சம்மதித்துள்ளதாக அவர் தெரிவித்திருந்தார். ஆனால், ஹஷிம் அம்லாவும் ஃபப் டு பிளெஸியும், இந்தத் தொடரில் விளையாடச் சம்மதித்துள்ளதாகத் தெரிவிக்கப்படுகிறது.

 

இதேவேளை, இந்தத் தாடருக்கான நிதி ஏற்பாடுகள் தொடர்பாகவும் காப்புறுதி சம்பந்தமான விடயங்கள் தொடர்பாகவும், சர்வதேச கிரிக்கெட் சபையும் பாகிஸ்தான் கிரிக்கெட் சபையும், இறுதிக்கட்டப் பேச்சுவார்த்தைகளின் ஈடுபட்டு வருகின்றன என, தகவல்கள் தெரிவிக்கின்றன.
செப்டெம்பர் 10ஆம் திகதி ஆரம்பிக்கும் இந்தத் தொடர் முடிவடைந்ததும், இலங்கை அணியும், பாகிஸ்தானில் போட்டிகளில் பங்குபற்றுமென எதிர்பார்க்கப்படுகிறது.

 

அதன் பின்னர், பாகிஸ்தான் – மேற்கிந்தியத் தீவுகள் அணிகள் மோதும், 3 போட்டிகள் கொண்ட இருபதுக்கு-20 சர்வதேசப் போட்டித் தொடரை, பாகிஸ்தானில் நடத்துவதற்கான முனைப்புகளுக்கு, மேற்கிந்தியத் தீவுகள் கிரிக்கெட் சபையும் சம்மதம் தெரிவித்துள்ளதாகக் கூறப்படுகிறது.

 

எனவே, அடுத்த சில மாதங்கள், பாகிஸ்தான் கிரிக்கெட் வரலாற்றில், முக்கியமான காலப்பகுதிகளாக மாறவுள்ளன.

CPL: இறுதிச் சுற்றில் பட்ரியட்ஸ் அணி

கரீபியன் பிறீமியர் லீக் தொடரின் இறுதிச் சுற்றுக்கு, சென். கிற்ஸ் மற்றும் நெவிஸ் பட்ரியட்ஸ் அணி தகுதிபெற்றுள்ளது. ஜமைக்கா தலவாஸ் அணிக்கு எதிரான போட்டியில் வெற்றிபெற்றே, தமது இடத்தை, பட்ரியட்ஸ் அணி உறுதிப்படுத்தியது.

 

நாணயச் சுழற்சியில் வெற்றிபெற்ற தலவாஸ் அணி, முதலில் களத்தடுப்பில் ஈடுபடத் தீர்மானித்தது.
இதன்படி முதலில் துடுப்பெடுத்தாடிய பட்ரியட்ஸ் அணி, 20 ஓவர்களில் 3 விக்கெட்டுகளை இழந்து 208 ஓட்டங்களைக் குவித்தது. முதலாவது விக்கெட்டுக்காக, 12.3 ஓவர்களில் 110 ஓட்டங்களைக் குவித்த அவ்வணி, இறுதி 21 பந்துகளில் 57 ஓட்டங்களைக் குவித்திருந்தது.

 

துடுப்பாட்டத்தில் கிறிஸ் கெயில் 71 (55), எவின் லூயிஸ் 69 (39), மொஹமட் நபி 29 (12), கார்லொஸ் பிறெத்வெய்ட் 26 (13) ஓட்டங்களைக் குவித்தனர்.

 

209 ஓட்டங்கள் என்ற, சவாலான வெற்றியிலக்கை நோக்கித் துடுப்பெடுத்தாடிய தலவாஸ் அணி, 20 ஓவர்களில் 7 விக்கெட்டுகளை இழந்து 171 ஓட்டங்களை மாத்திரம் பெற்று, 37 ஓட்டங்களால் தோல்வியடைந்தது.

 

முதலாவது விக்கெட்டுக்காக 64 ஓட்டங்கள் பகிரப்பட்ட போதிலும், அதற்கு 8.5 ஓவர்கள் எடுத்துக் கொண்டது. அதன் பின்னர், அடித்தாட வேண்டிய சூழ்நிலையில், விக்கெட்டுகள் தொடர்ச்சியாக விழ, தேவையான இலக்கை அடைய முடிந்திருக்கவில்லை.

 

துடுப்பாட்டத்தில் ட்ரெவன் கிரிபித் 42 (32), றொன்வன் பவல் 31 (19), கிளென் ஃபிலிப்ஸ் 31 (27) ஓட்டங்களைப் பெற்றனர்.

 

பந்துவீச்சில் தப்ராஸ் ஷம்ஸி, 3 விக்கெட்டுகளைப் பெற்றார்.

 

இப்போட்டியின் நாயகனாக, எவின் லூயிஸ் தெரிவானார்.

பயிற்சிப் போட்டி இரத்து

பங்களாதேஷில் வைத்து 2 டெஸ்ட் போட்டிகள் கொண்ட தொடரில் பங்குபற்றுவதற்காக அங்கு சென்றுள்ள அவுஸ்திரேலிய, தொடருக்கு முன்பாக விளையாடவிருந்த பயிற்சிப் போட்டியை இரத்துச் செய்துள்ளது. மோசமான வானிலை காரணமாக, மைதானம் தயாராக இல்லாத காரணத்தாலேயே, இந்தப் பயிற்சிப் போட்டி இரத்துச் செய்யப்பட்டுள்ளது.

 

பதுல்லாவில் இடம்பெறவிருந்த இப்போட்டி, இன்று ஆரம்பிக்கவிருந்தது. ஆனால், கடுமையான மழை காரணமாக, மைதானத்தில் நீர் தேங்கிக் காணப்படுவதோடு, விளையாட முடியாத நிலை காணப்படுகிறது.

 

ஏற்கெனவே, ஒப்பந்தப் பிரச்சினை காரணமாக, போட்டிகளில் பங்குபற்றாமலிருந்த அவுஸ்திரேலிய வீரர்கள், தற்போது பயிற்சிப் போட்டியையும் இழந்துள்ளனர்.

செப்டெம்பரில் ‘உலக பதினொருவர்’ தொடர்

உலக பதினொருவர் அணி பங்குகொள்ளும் கிரிக்கெட் தொடர், எதிர்வரும் செப்டெம்பர் மாதம், பாகிஸ்தானின் லாகூர் நகரில் நடைபெறும் என, பாகிஸ்தான் கிரிக்கெட் சபை உறுதிப்படுத்தியுள்ளது.

 

இத்தொடரில் பங்குகொள்ளும் வீரர்களுக்கு, ஜனாதிபதிக்கு வழங்கப்படும் அளவு பாதுகாப்பு வழங்கப்படுமென, பஞ்சாப் மாநில அரசாங்கம் உறுதிப்படுத்தியுள்ளதைத் தொடர்ந்தே, இத்தொடர் உறுதிசெய்யப்பட்டுள்ளது.

 

டெஸ்ட் விளையாடும் நாடுகளைச் சேர்ந்த 15 பேர் கொண்ட கிரிக்கெட் குழாமொன்று, பயிற்றுநர் அன்டி ஃபிளவரின் பயிற்றுவிப்பின் கீழ் செயற்படவுள்ளது. இவ்வாறு தெரிவுசெய்யப்படும் குழாம், துபாயில் 7 நாட்களுக்குப் பயிற்சியில் ஈடுபடும்.

 

அதன் பின்னர், செப்டெம்பர் 10ஆம் திகதி முதல், 3 போட்டிகள் கொண்ட இருபதுக்கு-20 தொடர் ஆரம்பிக்கும்.

சபையையும் தேர்வாளர்களையும் விமர்சிக்கிறார் இலங்கைப் பயிற்றுநர்

இலங்கை கிரிக்கெட் அணி, அண்மைக்காலமாகவே தோல்விகளைச் சந்தித்துவரும் நிலையில், அதன் நிலைமை குறித்து, அணியின் இடைக்காலப் பயிற்றுநர் நிக் போதாஸ், இலங்கை கிரிக்கெட் சபை, அணியின் தேர்வாளர்கள் ஆகியோர் மீது, கடுமையான விமர்சனங்களை முன்வைத்துள்ளார்.

 

இவ்வாண்டில், தென்னாபிரிக்காவில் வைத்து தென்னாபிரிக்காவுக்கு எதிராகத் தோல்வியடைந்த இலங்கை அணி, அதன் பின்னர் பங்களாதேஷ், சிம்பாப்வே அணிகளுக்கெதிராகவும் குறிப்பிடும் படியான தோல்விகளைப் பெற்றுக் கொண்டது. பின்னர், இந்தியாவுக்கெதிரான டெஸ்ட் தொடரை 0-3 என்ற கணக்கில் இழந்த அவ்வணி, தற்போது முதலாவது ஒருநாள் சர்வதேசப் போட்டியிலும் தோல்வியடைந்துள்ளது.

 

இந்நிலையில், அண்மையகாலத் தோல்விகள் தொடர்பில் கருத்துத் தெரிவித்த போதாஸ், "உங்களுக்குக் கோபம் வரும் தான். ஓட்டைக் கப்பலுக்கு ஒன்பது மாலுமிகள் என்பது, அநேகமாகப் பொருத்தமானது தான்" என, அதிக தலையீடு காணப்படுகிறது என்பதை அவர் வெளிப்படுத்தினார்.

 

"உங்களுக்கு எரிச்சல் வரும் தான். வீரர்களுடன் எனக்குக் கோபம் இருக்கிறதா? இல்லவே இல்லை. எவ்வளவு முடியுமோ, அவ்வளவுக்குக் கடினமாக அவர்கள் உழைக்கின்றனர். உதவும் பயிற்றுநர்கள், மிகச்சிறப்பாக உள்ளனர். திட்டமிடுதலுக்கும் வீரர்களுக்கு உதவுவதிலும், அவர்கள் அளவுகணக்கின்றிச் செயற்படுகின்றனர். அணி அறைக்குள் இருப்பவர்கள் யாரிலும் நீங்கள் குறைகாண முடியாது" என்று தெரிவித்தார்.

 

தொடர்ந்து கருத்துத் தெரிவித்த அவர், "இவர்கள், அற்புதமான திறமை படைத்த வீரர்கள். அவர்களுக்கு நீங்கள் சிறிதளவு நேரம் வழங்கி, சிறிதளவு அன்பு வழங்கி, சிறிதளவு பரிவு வழங்கி, அந்த நம்பிக்கையை வளர்த்தால், முடிவுகளை நீங்கள் பெற முடியும்" என்று குறிப்பிட்டார்.

 

கடந்தாண்டு மே மாதத்திலிருந்து, ஒருநாள் சர்வதேசப் போட்டிகளில், இலங்கை அணி சார்பாக 40 வீரர்கள் விளையாடியுள்ளனர். இது, வீரர்கள் அடிக்கடி மாற்றப்படுவதைக் காட்டுகிறது.

 

இது தொடர்பாகக் கருத்துத் தெரிவித்த போதாஸ், "அணி வீரர்கள் தெரிவில் தொடர்ச்சியான தன்மையை நீங்கள் பெற்றால், பெறுபேறுகளில் முன்னேற்றத்தைக் காண முடியும். ஒவ்வொரு போட்டியிலும், புதிய வீரர்களை நாங்கள் பெறும் போது, நம்பிக்கை என்ற விடயத்தில், அது கடினமாகப் போய்விடுகிறது. வீரர்களின் விடயத்தில், அது கடினமானது. பயிற்றுநர்கள் விடயத்திலும், அது கடினமானது" என்று தெரிவித்தார்.

 

இலங்கை அணியின் பயிற்றுநராக இருந்த கிரஹம் ஃபோர்ட், அணி முகாமைத்துவத்துடன் முரண்பட்டு, அண்மையில் தனது பதவியை இராஜினாமா செய்திருந்தார். அவரின் பின்னரேயே, நிக் போதாஸ் நியமிக்கப்பட்டார்.

 

தனக்குக் காணப்பட்ட பிரச்சினைகள் தொடர்பாக, வெளிப்படையாக ஃபோர்ட் கதைக்கவில்லை என்றாலும் கூட, நிக் போதாஸ், அவ்விடயம் தொடர்பாகக் கருத்து வெளியிட்டுள்ளமை குறிப்பிடத்தக்கது.

இலங்கைக்கு மீண்டும் தோல்வி; இரசிகர்கள் இரகளை

தம்புள்ளையில் நேற்று முன்தினம் இடம்பெற்ற போட்டியில், இந்திய அணியிடம் 9 விக்கெட்டுகளால் இலங்கை அணி தோல்வியடைந்தமையைத் தொடர்ந்து, அவ்வணியின் இரசிகர்கள், தமது எதிர்ப்பை வெளிப்படுத்தினர்.

 

தோல்வியைத் தொடர்ந்து, மைதானத்திலிருந்து புறப்பட முயன்ற பஸ்ஸை, இரசிகர்கள் மறிந்ததோடு, வீரர்களின் திறமை வெளிப்பாடு தொடர்பாகவும், தமது எதிர்ப்பை வெளிப்படுத்தினர்.

 

"எங்கள் கிரிக்கெட், எங்களுக்கு வேண்டும்", "கிரிக்கெட்டில் அரசியல் வேண்டாம்" போன்ற சுலோகங்களை எழுப்பிய அந்த இரசிகர்கள், தொடர்ச்சியாக எதிர்ப்பை வெளியிட்டனர். சுமார் 50 இரசிகர்கள், இவ்வாறு எதிர்ப்பை வெளிப்படுத்தினர்.

 

இதைத் தொடர்ந்து, கலகமடக்கும் பொலிஸார் அங்கு அழைக்கப்பட்ட  பின்னரேயே, நிலைமை கட்டுப்பாட்டுக்குள் கொண்டுவரப்பட்டது.

 

இந்த நிலைமை காரணமாக, மைதானத்திலிருந்து புறப்பட வேண்டிய இலங்கை அணியின் பஸ், சுமார் 30 நிமிடங்களால் பிந்தியது.

இலங்கையை வெள்ளையடித்தது இந்தியா

 

இலங்கை, இந்திய அணிகளுக்கிடையிலான மூன்று போட்டிகள் கொண்ட டெஸ்ட் தொடரில், பல்லேகலவில் இடம்பெற்ற மூன்றாவதும் இறுதியுமான டெஸ்ட் போட்டியையும் இனிங்ஸால் வென்ற இந்தியா, இத்தொடரில், 3-0 என்ற ரீதியில் இலங்கையை வெள்ளையடித்தது.

 

பொலோ ஒன் முறையில், இரண்டாவது இனிங்ஸில் துடுப்பெடுத்தாடிய இலங்கை, ஒரு விக்கெட்டை இழந்து 19 ஓட்டங்களுடன் இன்றைய மூன்றாவது நாளை ஆரம்பித்திருந்த நிலையில், தேநீர் இடைவேளைக்கு முன்பதாகவே சகல விக்கெட்டுகளையும் இழந்து, 181 ஓட்டங்களை மாத்திரமே பெற்று, இனிங்ஸாலும் 171 ஓட்டங்களாலும் தோல்வியைத் தளுவியது.

 

துடுப்பாட்டத்தில், நிரோஷன் டிக்வெல்ல 41, அணித்தலைவர் டினேஷ் சந்துமால் 36, அஞ்சலோ மத்தியூஸ் 35 ஓட்டங்களைப் பெற்றனர். பந்துவீச்சில், இரவிச்சந்திரன் அஷ்வின் 4, மொஹமட் ஷமி 3, உமேஷ் யாதவ் 2 விக்கெட்டுகளைக் கைப்பற்றினர்.

 

தமது முதலாவது இனிங்ஸில் சகல விக்கெட்டுகளையும் இழந்து 135 ஓட்டங்களை இலங்கை பெற்றிருந்தது. துடுப்பாட்டத்தில், டினேஷ் சந்திமால் 48, நிரோஷன் டிக்வெல்ல 29 ஓட்டங்களைப் பெற்றனர். பந்துவீச்சில், குல்தீப் யாதவ் 4, மொஹமட் ஷமி, இரவிச்சந்திரன் அஷ்வின் ஆகியோர் தலா 2 விக்கெட்டுகளைக் கைப்பற்றினர்.

 

இந்திய அணி, தமது முதலாவது இனிங்ஸில், சகல விக்கெட்டுகளையும் இழந்து 487 ஓட்டங்களைப் பெற்றது.  துடுப்பாட்டத்தில், ஷீகர் தவான் 119, ஹர்டிக் பாண்டியா 108, லோகேஷ் ராகுல் 85 ஓட்டங்களைப் பெற்றனர். பந்துவீச்சில், லக்ஷான் சந்தகான் 5, மலிந்த புஷ்பகுமார 3 விக்கெட்டுகளைக் கைப்பற்றினர்.

 

இப்போட்டியின் நாயகனாக, ஹர்டிக் பாண்டியா தெரிவானதோடு, தொடரின் நாயகனாக ஷீகர் தவான் தெரிவானார்.

 

இந்நிலையில், இப்போட்டியின் பின்னர் கருத்துத் தெரிவித்த இலங்கை அணியின் தலைவர் டினேஷ் சந்திமால், நாணயச் சுழற்சியை நீங்கள் கட்டுப்படுத்த முடியாது எனவும் ஓரணியாக கடினமான தொடரெனவும் தமது துடுப்பாட்டமும் பந்துவீச்சும் மிகவும் மோசமாக இந்தத் தொடரில் இருந்ததாகவும் கூறினார்.

 

இலங்கை, இந்திய அணிகளுக்கிடையிலான, ஐந்து போட்டிகள் கொண்ட ஒருநாள் சர்வதேசப் போட்டித் தொடர், தம்புள்ளையில், எதிர்வரும் ஞாயிற்றுக்கிழமை இடம்பெறவுள்ள முதலாவது போட்டியுடன் ஆரம்பிக்கவுள்ளது.

மூன்றாவது டெஸ்டில் தடுமாறுகிறது இலங்கை

 

இலங்கை, இந்திய அணிகளுக்கிடையிலான மூன்று போட்டிகள் கொண்ட டெஸ்ட் தொடரில், பல்லேகலவில் நேற்று ஆரம்பமான மூன்றாவது டெஸ்ட் போட்டியின் இன்றைய இரண்டாம் நாள் ஆட்டமுடிவில் இலங்கை தடுமாறுகிறது.

 

நேற்று ஆரம்பித்த இப்போட்டியில் முதலில் துடுப்பெடுத்தாடிய இந்திய அணி, இன்றைய இரண்டாம் நாளை 6 விக்கெடுகளை இழந்து 329 ஓட்டங்களைப் பெற்றவாறு ஆரம்பித்து, முதல் மணித்தியாலத்தில் 3 விக்கெட்டுகளை இழந்தபோதும், ஹர்டிக் பாண்டியாவின் அதிரடியான 108 ஓட்டங்களின் துணையோடு, தமது முதலாவது இனிங்ஸில், சகல விக்கெட்டுகளையும் இழந்து 487 ஓட்டங்களைப் பெற்றது.

 

துடுப்பாட்டத்தில், ஷீகர் தவான் 119, ஹர்டிக் பாண்டியா 108, லோகேஷ் ராகுல் 85 ஓட்டங்களைப் பெற்றனர். பந்துவீச்சில், லக்‌ஷான் சந்தகான் 5, மலிந்த புஷ்பகுமார 3 விக்கெட்டுகளைக் கைப்பற்றினர்.

 

பதிலுக்கு, தமது முதலாவது இனிங்ஸில் துடுப்பெடுத்தாடிய இலங்கை, சகல விக்கெட்டுகளையும் இழந்து 135 ஓட்டங்களை மாத்திரமே பெற்றது. துடுப்பாட்டத்தில், டினேஷ் சந்திமால் 48, நிரோஷன் டிக்வெல்ல 29 ஓட்டங்களைப் பெற்றனர். பந்துவீச்சில், குல்தீப் யாதவ் 4, மொஹமட் ஷமி, இரவிச்சந்திரன் அஷ்வின் ஆகியோர் தலா 2 விக்கெட்டுகளைக் கைப்பற்றினர்.

 

தொடர்ந்து, ஃபொலோ ஒன் முறையில் இரண்டாவது இனிங்ஸில் துடுப்பெடுத்தாடப் பணிக்கப்பட்ட இலங்கை, நேற்றைய ஆட்டநேர முடிவின்போது, ஒரு விக்கெட் இழப்புக்கு 19 ஓட்டங்களைப் பெற்று, இந்திய அணியின் முதலாவது இனிங்ஸை விட 333 ஓட்டங்கள் பின்தங்கியுள்ளது. வீழ்த்தப்பட்ட விக்கெட்டை உமேஷ் யாதவ் கைப்பற்றினார்.

 

மூன்றாவது டெஸ்ட் நாளை

 

இலங்கை, இந்திய அணிகளுக்கிடையிலான மூன்று போட்டிகள் கொண்ட டெஸ்ட் தொடரின் மூன்றாவதும் இறுதியுமான போட்டி, பல்லேகலவில் நாளை காலை 10 மணிக்கு ஆரம்பிக்கவுள்ளது.

 

இத்தொடரின் முதலிரண்டு போட்டிகளையும் வென்ற இந்திய அணிம் 2-0 என்ற அசைக்க முடியாத முன்னிலையைப் பெற்றுள்ள நிலையில், குறித்த போட்டியின் முடிவு, இந்திய அணி தொடரைக் கைப்பற்றுவதைப் பாதிக்காது என்பதுடன், டெஸ்ட் போட்டிகளுக்கான அணிகளின் தரவரிசையிலும் எந்தப் பாதிப்பையும் ஏற்படுத்தாது.

 

குறித்த போட்டியில் என்ன முடிவு பெறப்பட்டாலும், முதல்நிலை அணியாக இந்தியா தொடரவுள்ளதோடு, ஏழாம் நிலை அணியாக இந்தியா தொடரவுள்ளது.

 

எவ்வாறெனினும், கொழும்பு எஸ்.எஸ்.சி மைதானத்தில் இடம்பெற்ற இரண்டாவது டெஸ்ட்டின் இரண்டாவது இனிங்ஸில், டிமுத் கருணாரட்ன, குசல் மென்டிஸ் ஆகியோரின் சதங்களுடன் ஓரளவான பெறுபேற்றை வெளிப்படுத்திய இலங்கை அணிக்கு, அதன் தொடர்ச்சியை மீண்டும் வெளிப்படுத்தி, அணியை முன்னோக்கி நகர்த்துவதற்கு, இப்போட்டியிலும் பெறுபேற்றை வெளிப்படுத்துவது அவசியமானதொன்றாக காணப்படுகிறது.

 

இப்போட்டியிலிருந்து, இலங்கை அணியின் சிரேஷ்ட வீரரான ரங்கன ஹேரத்துக்கு ஓய்வளிக்கப்பட்டுள்ளது. இந்நிலையில், ஹேரத்தின் இடத்தை, ஏறத்தாழ அவரை மாதிரியான பந்துவீச்சுப் பாணியைக் கொண்ட மலிந்த புஷ்பகுமார நிரப்புவார் என எதிர்பார்க்கப்படுகிறது. ஆனால், இலங்கையிலுள்ள ஆடுகளங்களில், வேகப்பந்துவீச்சுக்கு ஒத்துழைக்கக் கூடிய ஆடுகளமாக பல்லேகல விளங்குவதால், விக்கெட்டுகளைக் கைப்பற்றக் கூடிய சுழற்பந்துவீச்சாளரே தெரிவாக இருந்தால், லக்‌ஷன் சந்தகான் அணியில் இடம்பெறுவார்.

 

மறுபக்கம், இலங்கை அணி சார்பாக சிறப்பாகச் செயற்பட்ட வேகப்பந்துவீச்சாளரான நுவான் பிரதீப் காயமடைந்துள்ள நிலையில், லஹிரு குமாரவும் விஷ்வ பெர்ணான்டோவும் வேகப்பந்து வீச்சுக் கூட்டணியை அமைப்பர் என எதிர்பார்க்கப்படுகிறது.

 

இந்திய அணியின் முக்கியமான வீரரான இரவீந்திர ஜடேஜா, தடை காரணமாக, இப்போட்டியில் பங்குபற்ற முடியாமல் போயுள்ள நிலையில், ஏற்கெனவே குழாமில் இடம்பெற்றுள்ள இன்னொரு இடதுகை சுழற்பந்துவீச்சாளரான குல்தீப் யாதவ்வே அணியில் இடம்பெறுவார் என்று எதிர்பார்க்கப்படுகிறது. ஜடேஜாவுக்குப் பதிலாக குழாமில் இணைத்துக் கொள்ளபட்ட, ஏறத்தாழ அவரைப் போன்ற அக்ஸார் பட்டேல், டெஸ்ட் போட்டிகளில் அறிமுகத்தை மேற்கொள்வதற்கான வாய்ப்புகள் குறைவாகவே காணப்படுகின்றன.