Category Archives: headline story

இந்தியாவின் சம்பியன்ஸ் கிண்ண குழாம்

சம்பியன்ஸ் கிண்ண கிரிக்கெட் தொடரின் நடப்புச் சம்பியன்களான இந்திய அணியின், சம்பியன்ஸ் கிண்ணத்துக்கான குழாம் அறிவிக்கப்பட்டுள்ளது. பெரிதும் எதிர்பார்ப்பை ஏற்படுத்திய இந்த அறிவிப்பு, பெருமளவு ஆச்சரியங்களின்றியே அமைந்தது.

 

இந்தத் தொடரில், இந்தியா பங்குபற்றுமா என்ற கேள்வி காணப்பட்ட நிலையில், பங்குபற்றுமென, நேற்று முன்தினம் உறுதிப்படுத்தப்பட்டது. இதைத் தொடர்ந்து, இந்திய கிரிக்கெட் அணியின் தேர்வாளர்கள், டெல்லியில் நேற்றுக் கூடி ஆராய்ந்தனர்.

 

இதைத் தொடர்ந்து, இத்தொடருக்கான குழாம் அறிவிக்கப்பட்டுள்ளது. அணியின் தலைவர் விராத் கோலியின் தலைமையின் கீழ், 15 பேர் கொண்ட குழாமாக அறிவிக்கப்பட்டுள்ளது.

 

இந்தக் குழாமில், வேகப்பந்து வீச்சாளர் மொஹமட் ஷமி, மீள அழைக்கப்பட்டுள்ளார். அவர் இறுதியாக, 2015ஆம் ஆண்டு உலகக் கிண்ணத்தின் போதே, ஒருநாள் சர்வதேசப் போட்டிகளில் பங்குபற்றியிருந்தார்.

 

தவிர, அண்மைக்காலத்தில் காயங்களால் அவதிப்பட்ட றோகித் ஷர்மா, இரவிச்சந்திரன் அஷ்வின் ஆகியோரும் சேர்க்கப்பட்டுள்ளனர். இதில் ஷர்மா, ஐ.பி.எல் போட்டிகளில் பங்குபற்றிவருகின்ற போதிலும், ஒருவகைக் குடலிறக்க நோயால் பாதிக்கப்பட்ட அஷ்வின், இன்னமும் குணமடைந்து வருகிறார்.

 

இன்னொரு சுழற்பந்து வீச்சாளராக, இரவீந்திர ஜடேஜா சேர்க்கப்பட்டுள்ளார்.ஐ.பி.எல் போட்டிகளில் பிரகாசித்துக் கொண்டிருக்கும் யஷ்வேந்திர சஹால், குல்தீப் யாதவ் போன்ற புறச்சுழல் பந்துவீச்சாளர்களுக்கு வாய்ப்புக் கிடைத்திருக்கவில்லை. சிரேஷ்ட புறச்சுழல் பந்துவீச்சாளரான அமித் மிஷ்ராவுக்கும் இடம் கிடைக்கவில்லை.

 

ஐ.பி.எல் போட்டிகளில் பிரகாசித்துக் கொண்டிருக்கும் றிஷாப் பான்ட், டினேஷ் கார்த்திக், சுரேஷ் ரெய்னா ஆகியோரோடு, குல்தீப் யாதவ், ஷார்டுல் தாக்கூர் ஆகியோர், தயார் நிலையில் வைக்கப்படவுள்ளனர்.

 

குழாம்: விராத் கோலி, றோகித் ஷர்மா, ஷீகர் தவான், அஜின்கியா ரஹானே, மனிஷ் பாண்டே, யுவ்ராஜ் சிங், கேதார் யாதவ், மகேந்திரசிங் டோணி, இரவீந்திர ஜடேஜா, இரவிச்சந்திரன் அஷ்வின், ஹார்டிக் பாண்டியா, உமேஷ் யாதவ், ஜஸ்பிரிட் பும்ரா, புவனேஷ்வர் குமார், மொஹமட் ஷமி.

ஹட்-ட்ரிக் சாதனை புரிந்தார் ஹேரத்

இலங்கை அணியின் நட்சத்திரச் சுழற்பந்து வீச்சாளர் ரங்கன ஹேரத், டெஸ்ட் போட்டிகளில் ஹட்-ட்ரிக் சாதனை புரிந்த இரண்டாவது இலங்கையர் என்ற சாதனையைப் புரிந்துள்ளார். இலங்கை அணிக்கும் அவுஸ்திரேலிய அணிக்குமிடையில் காலியில் இடம்பெற்றுவரும் டெஸ்ட் போட்டியிலேயே இச்சாதனையை அவர் புரிந்தார்.

 

இப்போட்டியின் இரண்டாவது நாளான இன்று, போட்டியின் 25ஆவது ஓவரின் முதலாவது பந்தில், அடம் வோஜஸை ஆட்டமிழக்கச் செய்த ஹேரத், அடுத்த பந்தில், பீற்றர் நெவிலை ஆட்டமிழக்கச் செய்தார். ஹட்-ட்ரிக் பந்தில், ஹேரத்தின் பந்தை எதிர்கொண்ட வேகப்பந்து வீச்சாளர் மிற்சல் ஸ்டார்க்கின் காலில் பந்து அடித்தது. ஆனால், அது ஆட்டமிழப்புக் கிடையாது என நடுவர் அறிவித்தார்.
எனினும், தீர்ப்பு மறுபரிசீலனைத் திட்டம் மூலமாக அந்தத் தீர்ப்பை, இலங்கைத் தலைவர் அஞ்சலோ மத்தியூஸ், மறுபரிசீலனை செய்ய, அது ஆட்டமிழப்பு என அறிவிக்கப்பட்டது. எனவே, ரங்கன ஹேரத்தின் ஹட்-ட்ரிக் உறுதிப்படுத்தப்பட்டது.


நுவான் சொய்ஸாவுக்குப் பின்பு, டெஸ்ட் போட்டிகளில் ஹட்-ட்ரிக் சாதனை புரிந்த இலங்கையர் என்ற பெருமை, ரங்கன ஹேரத்துக்குக் கிடைத்தது.

மீண்டும் வருகிறார் பற் கமின்ஸ்

 

அவுஸ்திரேலிய அணியின் வேகப்பந்து வீச்சாளரான பற் கமின்ஸ், நீண்டகாலத்துக்குப் பின்னர், தொழில்முறைக் கிரிக்கெட் போட்டிகளில் மீண்டும் பங்குபற்றவுள்ளார். அவுஸ்திரேலிய 'ஏ" சார்பான போட்டியிலேயே அவர் பங்குபற்றவுள்ளார்.

 

அவுஸ்திரேலியாவின் எதிர்காலத்துக்கான சிறந்த பந்துவீச்சாளராகக் கருதப்பட்ட பற் கமின்ஸ், தொடர்ச்சியாகக் காயங்களுக்கு உள்ளாகி வருவதன் காரணமாக, 5 ஆண்டுகளில் ஒரேயொரு டெஸ்ட் போட்டியிலும் 18 ஒருநாள் சர்வதேசப் போட்டிகளிலும் 15 இருபதுக்கு-20 சர்வதேசப் போட்டிகளிலும் மாத்திரம் பங்குபற்றியுள்ளார்.

 

இறுதியாக, கடந்தாண்டு செப்டெம்பரில் அவருக்கு வழமையாக ஏற்படும் முதுகு உபாதை காரணமாக அவுஸ்திரேலியக் குழாமிலிருந்து வெளியேற்றப்பட்ட பற் கமின்ஸ், தனது உபாதையிலிருந்து குணமடைந்து வந்ததோடு, தனது உடல் வலிமையை அதிகரிக்கும் பயிற்சிகளில் ஈடுபட்டு வந்தார்.

 

தற்போது 23 வயதான பற் கமின்ஸ், அவஸ்திரேலிய கிரிக்கெட் நிர்வாகத்தில் உள்ளவர்களால், உயர்ந்தளவில் மதிக்கப்படுவதன் காரணமாக, அவருக்குத் தேவையான காலத்தை வழங்கி, அவரது உடல் வலிமைப்படுத்தலில் அதிக கவனம் செலுத்தப்பட்டிருந்தது.

 

இந்நிலையிலேயே, தென்னாபிரிக்க 'ஏ" அணிக்கெதிராக ஜூலை 30ஆம் திகதி ஆரம்பிக்கவுள்ள தொடருக்காக, அவுஸ்திரேலிய 'ஏ" குழாமில், பற் கமின்ஸ் சேர்க்கப்பட்டுள்ளார். பற் கமின்ஸ் தவிர, அலெக்ஸ் றொஸ், ட்ரவிஸ் டீன், அவுஸ்திரேலியப் பயிற்றுநர் டெரன் லீமனின் மகனான ஜேக் லீமன் ஆகியோரும், இக்குழாமில் சேர்க்கப்பட்டுள்ளனர்.

 

ஜேர்மனியில் அதிகரித்துள்ள கிரிக்கெட் ஆர்வம்

 

பல்வேறு காரணங்களுக்காக, ஜேர்மனியை நோக்கிப் படையெடுக்கும் அகதிகளின் வருகை காரணமாக, அந்நாட்டில் கிரிக்கெட் ஆர்வம் மிகவும் அதிகரித்துள்ளதாக அறிவிக்கப்படுகிறது. இதன் காரணமாக, புதிய அணிகளை உருவாக்குவதற்கான கோரிக்கைகள் அதிகமாகக் கிடைத்துவருவதாக அறிவிக்கப்பட்டுள்ளது.

 

ஜேர்மனியில் கடந்தாண்டில் அகதிக் கோரிக்கையை விடுத்த 476,649 பேரில் 31,902 பேர், ஆப்கானிஸ்தானைச் சேர்ந்தவர்கள் எனவும் 8,47 பேர் பாகிஸ்தானைச் சேர்ந்தவர்களெனவும் அறிவிக்கப்படுகிறது. கிரிக்கெட் ஆர்வமிகுந்த இந்த நாடுகளைச் சேர்ந்தோரால், ஜேர்மனியிலும் கிரிக்கெட் விளையாடும் ஆர்வம் வெளிப்படுத்தப்பட்டுள்ளது. ஜேர்மனி கிரிக்கெட் சம்மேளனத்தின் இணையத்தளத்தினூடாக 'நான் எங்கே விளையாட முடியும்?" என்ற கேள்வியே, அதிகமாகக் கேட்கப்படும் ஒன்றாக மாறியுள்ளது.

 

2012ஆம் ஆண்டில் 70 அணிகளில் 1,500 கிரிக்கெட் வீரர்கள் காணப்பட்ட நிலையில், தற்போது 205 அணிகளில், பதிவுசெய்யப்பட்ட 4,000 கிரிக்கெட் வீரர்கள் காணப்படுகின்றனர். இந்நிலையில், எதிர்காலத்தில், பலமான அணிகளுள் ஒன்றாக ஜேர்மனி மாறுவதற்கான சந்தர்ப்பங்கள் காணப்படுகின்றன.

 

 

எம்.சி.சி தலைவராக மத்தியூ பிளெமிங் தெரிவு

 

கிரிக்கெட் விதிகளை உருவாக்கும் பொறுப்பை வகிக்கும் மரில்லிபோன் கிரிக்கெட் கழகத்தின் (எம்.சி.சி) தலைவராக, இங்கிலாந்து அணியினதும் கென்ற் அணியினதும் முன்னாள் சகலதுறை வீரரான மத்தியூ பிளெமிங் தெரிவுசெய்யப்பட்டுள்ளார். 51 வயதான பிளெமிங், இவ்வாண்டு ஒக்டோபர் முதலாம் திகதியிலிருந்து, தனது தனது பொறுப்பை ஏற்கவுள்ளார்.

 

லோர்ட்ஸில் இடம்பெற்ற கழகத்தின் வருடாந்த பொதுக் கூட்டத்தின்போது, தற்போதைய தலைவரான றொஜர் நைட்டினால் பிரேரிக்கப்பட்டதையடுத்தே, தலைவர் பதவியை மத்தியூ பிளெமிங் ஏற்கவுள்ளார்.

 

எம்.சி.சியின் கிரிக்கெட்டுக்கான தலைவராகத் தற்போது பதவி வகிக்கும் மத்தியூ பிளெமிங், கடந்த 36 ஆண்டுகளில், அக்கழகம் சார்பாகப் பதவியேற்கும் இளைய தலைவராகத் தெரிவாகவுள்ளமை குறிப்பிடத்தக்கது.

 

பாகிஸ்தான் சுப்பர் லீக்கால் $2.6 மில்லியன் இலாபம்

 

பாகிஸ்தான் கிரிக்கெட் சபையால் நடாத்தப்பட்ட இருபதுக்கு-20 தொடரான பாகிஸ்தான் சுப்பர் லீக் தொடரால், அந்த கிரிக்கெட் சபைக்கு, 2.6 மில்லியன் அமெரிக்க டொலர்கள் இலாபமாகப் பெறப்பட்டுள்ளதாக அறிவிக்கப்படுகிறது.

 

பாகிஸ்தானில் கிரிக்கெட் போட்டிகள் இடம்பெறாத நிலையில், ஐக்கிய அரபு இராச்சியத்தில் இடம்பெற்ற இந்தத் தொடரில், 5 அணிகள் பங்குபற்றியிருந்தன. இந்நிலையிலேயே, 2.6 மில்லியன் அமெரிக்க டொலர்களை கிரிக்கெட் சபை இலாபமாகப் பெற்றதாகத் தெரிவித்த அந்த லீக்கின் தலைவர் நஜம் சேதி, அதை வரவேற்கத்தக்க விடயமெனத் தெரிவித்தார்.

 

தொலைக்காட்சி ஒளிபரப்பு உரிமை, மைதான நுழைவுச்சீட்டு ஆகியவற்றின் மூலமாக மாத்திரம், 6 மில்லியன் அமெரிக்க டொலர்கள், வருமானமாக ஈட்டப்பட்டதாக அவர் குறிப்பிட்டார். எனினும், இந்தத் தொடரில் பங்குபற்றிய அணிகள், நட்டத்தை எதிர்கொண்டதன் காரணமாக, இலாபத்தில் 2 மில்லியன் அமெரிக்க டொலர்களை, அவ்வணிகளுக்கு வழங்கியுள்ளதாகவும், இதனால் 0.6 மில்லியன் அமெரிக்க டொலர்களே, கிரிக்கெட் சபைக்கு இலாபமாக ஈட்டப்பட்டுள்ளதாகவும் அவர் குறிப்பிட்டார்.

 

பாகிஸ்தானில் நிலவும் பாதுகாப்புத் தொடர்பான அச்சம் காரணமாக, அங்கு சர்வதேசப் போட்டிகள் இடம்பெறுவது அரிதானது என்ற நிலையில், ஐக்கிய அரபு இராச்சியத்தில் இடம்பெற்ற இத்தொடரில், கிறிஸ் கெயில், டெரன் சமி, ஷேன் வொற்சன், கெவின் பீற்றர்சன், ஷகிப் அல் ஹசன், லூக் ரைட் போன்ற பிரபலமான வெளிநாட்டு வீரர்கள் பங்குபற்றியிருந்தமை குறிப்பிடத்தக்கது.

 

நீதியரசர்கள் பழி: மனைவி காட்டம்

 

இந்திய கிரிக்கெட் கட்டுப்பாட்டுச் சபையில் கட்டமைப்புரீதியான மாற்றங்களை ஏற்படுத்துவதற்காக உருவாக்கப்பட்ட லோதா செயற்குழுவின் பரிந்துரைகள் தொடர்பாக, இந்திய உச்சநீதிமன்றத்தில் இடம்பெற்றுவரும் விசாரணைகளின் போது, அச்சபையின் முன்னாள் தலைவரான ஜக்மோகன் டால்மியாவை உதாரணமாகக் காட்டி, பிரதம நீதியரசர் டி.எஸ் தாகூர், நீதியரசர் இப்ராஹமிம் கலிபுல்லா ஆகியோர் தெரிவித்த கருத்துக்கு, டால்மியாவின் மனைவி கண்டனம் வெளியிட்டுள்ளார்.

 

லோதா செயற்குழுவின் பரிந்துரைகளில் ஒன்றாக, இந்திய கிரிக்கெட் கட்டுப்பாட்டுச் சபையின் தலைவர், செயலாளர் உட்பட முக்கிய பொறுப்பிலிருக்கும் அனைவருக்கும், அதிகபட்ச வயதாக 70 வயதை அறிவித்தல் காணப்படுகிறது. இதற்கு, இந்திய கிரிக்கெட் கட்டுப்பாட்டுச் சபை, எதிர்ப்பை வெளியிட்டு வருகிறது.

 

இது தொடர்பான நீதிமன்ற நடவடிக்கை இடம்பெறும் போது, பிரதம நீதியரசரும் மற்றைய நீதியரசரும், அச்சபையின் முன்னாள் தலைவரான ஜக்மோகன் டால்மியாவை உதாரணமாகக் காட்டியுள்ளனர். இரண்டாவது தடவையாக, மார்ச் 2015ஆம் ஆண்டில் பதவியேற்ற டால்மியா, அப்பதவியிலிருக்கும் போதே செப்டெம்பர் மாதத்தில் தனது 75ஆவது வயதில் உயிரிழந்திருந்தார்.

 

'பேச முடியாத, தொடர்பாட முடியாத தலைவரொருவரை நீங்கள் கொண்டிருந்தீர்கள். அவரைத் தெரிவுசெய்தவர்கள், யாரைத் தெரிவுசெய்கிறார்கள் என்பதைப் பார்க்கவில்லையா? இந்த நாட்களில், அரசியலில் கூட ஓய்வுபெறுகிறார்கள்" எனத் தெரிவித்துள்ளனர். அத்தோடு, 'பதவியில் ஏன் அவ்வளவு நீண்டகாலம் இருக்க வேண்டுமென்கிறீர்கள்? உச்சநீதிமன்ற நீதிபதிகள்கூட, 65 வயதில் ஓய்வுபெறுகிறார்கள்" எனவும் தெரிவித்துள்ளனர்.

 

இதற்கே கண்டனம் தெரிவித்துள்ள டால்மியாவின் மனைவி, இறந்த ஒருவரைப் பற்றித் தவறாக உரைப்பது ஏற்றுக் கொள்ள முடியாது எனவும் எந்தவொரு நபரின் சான்றிதழும் டால்மியாவுக்குத் தேவையில்லை எனத் தெரிவித்துள்ளார்.

 

முக்கோண தொடரில் காயமடைந்த ஹேஸ்டிங்ஸ் இல்லை

 

கணுக்கால் காயம் காரணமாக மேற்கிந்தியத் தீவுகளில் இடம்பெறவுள்ள முக்கோணச் சுற்றுத் தொடரிலிருந்து அவுஸ்திரேலிய அணியின் வேகப்பந்துவீச்சாளரான ஜோன் ஹேஸ்டிங்ஸ் வெளியேற்றப்பட்டுள்ளார்.

 

இந்நிலையில், ஜோன் ஹேஸ்டிங்ஸுக்கு பதிலாக கடந்த அவுஸ்திரேலிய கோடைகாலத்தின் போது இந்தியாவுக்கெதிராக ஒருநாள் சர்வதேசப் போட்டிகளில் அறிமுகத்தை மேற்கொண்ட விக்டோரியா மாநில அணியின் சக வேகப்பந்துவீச்சாளர் ஸ்கொட் போலண்ட் இணைத்துக் கொள்ளப்பட்டுள்ளார்.

 

இந்தியன் பிறீமியர் லீக் அணியான கொல்கத்தா நைட்ரைடேர்ஸ் அணிக்காக போட்டியொன்றுக்கு முன் பயிற்சியில் ஈடுபட்டிருந்த போது இடது கணுக்காலில் காயமடைந்த ஜோன் ஹேஸ்டிங்ஸ், இம்மாத ஆரம்பத்தில் அவுஸ்திரேலியாவுக்கு திரும்பியிருந்தமை குறிப்பிடத்தக்கது.

 

2015-16 அவுஸ்திரேலிய கோடை பருவகாலம், ஜோன் ஹேஸ்டிங்ஸுக்கு மீள் எழுச்சியாக அமைந்திருந்தது. நான்கு வருடங்களுக்கு பிறகு, 2015ஆம் ஆண்டு இங்கிலாந்தில் இடம்பெற்றிருந்த ஒருநாள் சர்வதேசப் போட்டித் தொடரில் அவுஸ்திரேலிய அணிக்கு திரும்பியிருந்த ஹேஸ்டிங்ஸ், பின்னர் அவுஸ்திரேலியாவில் இடம்பெற்ற இந்தியாவுக்கெதிரான தொடரில் அதிக விக்கெட்டுகளை கைப்பற்றியவராக இருந்தார்.  

மன்னிப்புக் கோரினார் யுனிஸ் கான்

 

பாகிஸ்தான் அணியின் சிரேஷ்ட வீரரும் முன்னாள் தலைவருமான யுனிஸ் கான், பாகிஸ்தானின் உள்ளூர்த் தொடரான பாகிஸ்தான் கிண்ணப் போட்டிகளில் தான் நடந்துகொண்ட விதம் தொடர்பாக மன்னிப்புக் கோரியுள்ளார்.

 

அத்தொடரில் கைபெர் பக்துங்க்வா அணியின் தலைவராகச் செயற்பட்ட யுனிஸ் கான், நடுவர்களின் தீர்ப்புத் தொடர்பாக அதிருப்தி வெளியிட்டு, நடுவர்களுடன் வாக்குவாதத்தில் ஈடுபட்டதோடு, போட்டி மத்தியஸ்தரால் விசாரணைக்கு அழைக்கப்பட்டபோது, அதற்குச் சென்றிருக்கவில்லை. இதன் காரணமாக, போட்டி ஊதியத்தின் 50 சதவீதம், அவருக்கு அபராதமாக விதிக்கப்பட்டது. விசாரணைக்குச் சமுகமளிக்காததோடு, இந்தத் தொடரிலிருந்து விலகுவதாக யுனிஸ் கான் அறிவித்தார்.

 

இந்நிலையிலேயே, பாகிஸ்தான் கிரிக்கெட் சபையின் தலைவர் ஷஹாரியார் கானுடன் தொலைபேசியில் தொடர்புகொண்டுள்ள யுனிஸ் கான், இடம்பெற்ற சம்பவத்துக்காக மன்னிப்புக் கோரியதுடன், தொடர்ந்துவரும் போட்டிகளில் விளையாடும் தனது ஆர்வத்தையும் வெளிப்படுத்தியுள்ளார். அவர் இவ்வாறு மன்னிப்புக் கோரியுள்ள போதிலும், அபராதத்துக்கு மேலதிகமாக அவர் மீது மேற்கொள்ளப்பட்டுவரும் விசாரணைகள், தொடர்ந்தும் இடம்பெறுமென அறிவிக்கப்படுகிறது.

 

நமீபியாவுக்கெதிராக ஆப்கானிஸ்தானுக்கு இனிங்ஸ் வெற்றி

 

இந்தியாவின் உத்தரப் பிரதேச மாநிலத்தின் கிரேட்டர் நொய்டாவிலுள்ள கிரேட்டர் நொய்டா விளையாட்டுத் தொகுதி மைதானத்தில் ஆப்கானிஸ்தான், நமீபியா அணிகளுக்கிடையிலான போட்டியில் ஆப்கானிஸ்தான் அணி ஒரு இனிங்ஸ் மற்றும் 36 ஓட்டங்களால் ஆப்கானிஸ்தான் அணி வெற்றி பெற்றது.

 

நான்கு நாட்களைக் கொண்ட இப்போட்டியானது கடந்த ஞாயிற்றுக்கிழமை (10) ஆரம்பித்திருந்தது. நாணயச்சுழற்சியில் வெற்றி பெற்ற நமீபியா அணி முதலில் துடுப்பெடுத்தாடத் தீர்மானித்து சகல விக்கெட்டுகளையும் இழந்து 172 ஓட்டங்களைப் பெற்றது. துடுப்பாட்டத்தில் அவ்வணி சார்பாக பிக்கி யா பிரான்ஸ் 46 ஓட்டங்களைப் பெற்றார். பந்துவீச்சில் ஆப்கானிஸ்தான் அணி சார்பாக மொஹம்மட் நபி ஐந்து விக்கெட்டுகளையும் ஸஹிர் கான் மூன்று விக்கெட்டுகளையும் டவால்ட் ஸட்ரான், ரஹ்மட் ஷா ஆகியோர் தலா ஒவ்வொரு விக்கெட்டினையும் கைப்பற்றினர்.

 

பதிலுக்குத் துடுப்பெடுத்தாடிய ஆப்கானிஸ்தான் அணி, சகல விக்கெட்டுகளையும் இழந்து 334 ஓட்டங்களைப் பெற்றது. துடுப்பாட்டத்தில் அவ்வணி சார்பாக மொஹம்மட் ஷஷாட் 139 ஓட்டங்களையும் அஃப்ஸர் ஸஸாய் ஆட்டமிழக்காமல் 49 ஓட்டங்களையும் அஸ்கர் ஸ்டனிஸ்காய் 37 ஓட்டங்களையும் நூர் அலி ஸட்ரான் 29 ஓட்டங்களையும் டவால்ட் ஸட்ரான் 27 ஓட்டங்களையும் மொஹம்மட் நபி 20 ஓட்டங்களையும் பெற்றனர். பந்துவீச்சில் நமீபீயா அணி சார்பாக ஜெர்ரி ஸைன்மன் நான்கு விக்கெட்டுகளை கைப்பற்றினார்.

 

பதிலுக்கு தமது இரண்டாவது இனிங்ஸில் ஆடிய நமீபிய அணி, 126 ஓட்டங்களுக்கு சகல விக்கெட்டுகளையும் இழந்து ஒரு இனிங்ஸ் மற்றும் 36 ஓட்டங்களால் தோல்வியடைந்தது. துடுப்பாட்டத்தில் அவ்வணி சார்பாக பிக்கி யா பிரான்ஸ் 40 ஓட்டங்களையும் ஜெர்ஹார்ட் இரஸ்மஸ் 35 ஓட்டங்களையும் பெற்றனர். பந்துவீச்சில் ஆப்கானிஸ்தான் அணி சார்பாக ஸஹிர் கான் ஐந்து விக்கெட்டுகளையும் டவால்ட் ஸட்ரான் மூன்று விக்கெட்டுகளையும் மொஹம்மட் நபி இரண்டு விக்கெட்டுகளையும் கைப்பற்றினர்.

 

இப்போட்டியின் நாயகனாக மொஹம்மட் ஷஷாட் தெரிவானதோடு, ஆப்கானிஸ்தான் அணிக்கு 20 புள்ளிகள் கிடைக்கப்பெற்றிருந்தது.