Category Archives: Results

பெண்கள் உலகக் கிண்ணம்: இறுதிப் போட்டியில் இங்கிலாந்து

இங்கிலாந்தில் இடம்பெற்றுவரும் சர்வதேச கிரிக்கெட் சபையின் பெண்கள் உலகக் கிண்ணத் தொடரின் இறுதிப் போட்டிக்கு இங்கிலாந்து தகுதிபெற்றுள்ளது.   

 

பிறிஸ்டலில், நேற்று இடம்பெற்ற முதலாவது அரையிறுதிப் போட்டியில், தென்னாபிரிக்காவை வென்றே, இறுதிப் போட்டிக்கு இங்கிலாந்து தகுதிபெற்றது.   

 

இப்போட்டியின் நாணயச் சுழற்சியில் வெற்றிபெற்ற தென்னாபிரிக்க அணியின் தலைவி டனி வான் நிக்கெரெக், தமது அணி முதலில் துடுப்பெடுத்தாடும் என அறிவித்தார்.   

 

அந்தவகையில், முதலில் துடுப்பெடுத்தாடிய தென்னாபிரிக்கா, 50 ஓவர்களில், 6 விக்கெட்டுகளை இழந்து 218 ஓட்டங்களைப் பெற்றது. துடுப்பாட்டத்தில், மிக்னொன் டு பிறிஸ் ஆட்டமிழக்காமல் 76 (95), லாரா வொல்வார்ட் 66 (100) ஓட்டங்களைப் பெற்றனர். பந்துவீச்சில், ஆன்யா ஷேர்ஷோபிள், அணித்தலைவி ஹீதர் நைட், ஜெனி குன், நட்டாலி ஷிவர் ஆகியோர் தலா ஒவ்வொரு விக்கெட்டைக் கைப்பற்றினர்.   

 

பதிலுக்கு, 219 ஓட்டங்கள் என்ற வெற்றியிலக்குடன் துடுப்பெடுத்தாடிய இங்கிலாந்து, 49.4 ஓவர்களில், 8 விக்கெட்டுகளை இழந்த நிலையில் வெற்றியிலக்கையடைந்து, 2 விக்கெட்டுகளால் வெற்றியீட்டியது.

 

மூன்றாவது விக்கெட்டுக்காக ஜோடி சேர்ந்த சாரா டெய்லர், ஹீதர் நைட்டின் துடுப்பாட்டத்தால், இலகுவாக வெற்றிபெறும் நிலையில் இருந்தபோதும், குறிப்பிட்ட இடைவெளியில் மூன்று விக்கெட்டுகளை இழந்து, 5 விக்கெட்டுகளை இழந்து 145 ஓட்டங்கள் என்றவாறு காணப்பட்டது. ஆனால், நீண்ட துடுப்பாட்ட வரிசையைக் கொண்டிருப்பதன் காரணமாக, இறுதி ஓவரில் வெற்றியிலக்கை அடைந்தது.   

 

துடுப்பாட்டத்தில், சாரா டெய்லர் 54 (76), ஃபிரன்ட் வில்சன் 30 (38), ஹீதர் நைட் 30 (56), ஜெனி குன் ஆட்டமிழக்காமல் 27 (27) ஓட்டங்களைப் பெற்றனர். பந்துவீச்சில், அயபொங்கா கஹா, சுனே லுஸ் ஆகியோர் தலா 2 விக்கெட்டுகளையும் மரிஸன்னே கப், மொசெலின் டானியல்ஸ், ஷப்னிம் இஸ்மயில் ஆகியோர் தலா ஒவ்வொரு விக்கெட்டைக் கைப்பற்றினர்.   

 

போட்டியின் நாயகியாக, சாரா டெய்லர் தெரிவானார்.   

 

இந்நிலையில், அவுஸ்திரேலியா, இந்தியா இடையிலான இரண்டாவது அரையிறுதிப் போட்டி, டேர்பியில், இலங்கை நேரப்படி இன்று பிற்பகல் 3 மணிக்கு ஆரம்பமாகவுள்ளது.     

சிம்பாப்வேயை வென்றது இலங்கை

இலங்கை, சிம்பாப்வே அணிகளுக்கிடையிலான, ஒற்றை டெஸ்ட் போட்டியில், சாதனை வெற்றியைப் பெற்றுக் கொண்ட இலங்கை அணி, சிம்பாப்வே அணியிடம் தோற்பதிலிருந்து தப்பித்ததோடு மாத்திரமல்லாது, வரலாற்றுப் புத்தகங்களிலும் இடம்பிடித்துக் கொண்டது.  

 

கொழும்பு ஆர். பிரேமதாச விளையாட்டரங்கில் இடம்பெற்ற இப்போட்டியின் 5ஆவது நாளான நேற்று, 388 என்ற இலக்கை நோக்கி, 3 விக்கெட்டுகளை இழந்து 170 ஓட்டங்களுடன், இலங்கை அணி தொடர்ந்தது. நாளை ஆரம்பித்த துடுப்பாட்ட வீரர்களான குசல் மென்டிஸ், அஞ்சலோ மத்தியூஸ் ஆகியோரை, விரைவாகவே இழந்த இலங்கை, 5 விக்கெட்டுகள் கைவசமிருந்த நிலையில், 185 ஓட்டங்களைப் பெற வேண்டியிருந்தது.  

 

அப்போது இணை சேர்ந்த நிரோஷன் டிக்வெல்லவும் அசேல குணரட்னவும், விரைவாகவும் பொறுப்பாகவும் விளையாடி, 121 ஓட்டங்களைப் பகிர்ந்தனர். டிக்வெல்ல ஆட்டமிழந்த பின்னர், அசேலவுடன் இணை சேர்ந்த டில்ருவான் பெரேரா, பிரிக்கப்படாத 67 ஓட்டங்களைப் பகிர்ந்து, இலங்கையின் வெற்றியை உறுதிப்படுத்தினார்.  

 

இலங்கை அணி, மிகச்சிறப்பான துடுப்பாட்டத்தை வெளிப்படுத்திய போதிலும், அதிர்ஷ்டமும் இலங்கை அணியின் வசமிருந்தது. சிம்பாப்வே அணி தவறவிட்ட வாய்ப்புகளைத் தவிர, நிரோஷன் டிக்வெல்ல, 37 ஓட்டங்களுடன் காணப்பட்ட போது, ஸ்டம்பிங் வாய்ப்பொன்று, 3ஆவது நடுவரிடம் கோரப்பட்டது. மீள் ஒளிபரப்புக் காட்சிகளின் போது, டிக்வெல்ல ஆட்டமிழந்துவிட்டார் என்றே கருதப்பட்ட போதிலும், சர்ச்சைக்குரிய விதத்தில், அது ஆட்டமிழப்புக் கிடையாது என, 3ஆவது நடுவர் அறிவித்தார்.  

 

ஆனால், அதிர்ஷ்டங்களுக்கு மத்தியில், டெஸ்ட் போட்டிகளில் பெரிதளவுக்கு அனுபவம் இல்லாத வீரர்களான டிக்வெல்லவும் அசேலவும் விளையாடிய விதம், அணியின் சிரேஷ்ட வீரர்களுக்குப் பாடம் கற்பிப்பது போன்று அமைந்திருந்தது.  

 

இலங்கை அணியின் இந்த வெற்றி, இலங்கையில் மாத்திரமன்றி, ஆசியக் கண்டத்திலேயே, 4ஆவது இனிங்ஸில் அதிக ஓட்டங்கள் துரத்தியடிக்கப்பட்ட சந்தர்ப்பம் என்ற சாதனையைப் படைத்தது. அதேபோல், டெஸ்ட் வரலாற்றிலேயே, 4ஆவது இனிங்ஸில்  துரத்தியடிக்கப்பட்டதில், 5ஆவது அதிக ஓட்டங்கள் என்ற சாதனையையும், இலங்கை படைத்தது.  

 

அத்தோடு, இந்தப் போட்டியின் அனைத்து இனிங்ஸ்களிலும், இரண்டு அணிகளுமே, 300க்கும் 400க்கும் இடைப்பட்ட ஓட்டங்களைப் பெற்றுக் கொண்டன. இவ்வாறான சந்தர்ப்பம், டெஸ்ட் வரலாற்றிலேயே 3ஆவது தடவையாக இப்போட்டியில் இடம்பெற்றது.    

ஸ்கோர் விவரம்…

 

நாணயச் சுழற்சி: சிம்பாப்வே

 

சிம்பாப்வே: 356/10 (94.4 ஓவ.) (துடுப்பாட்டம்: கிறெய்க் ஏர்வின் 160, மல்கொம் வோலர் 36, சீகன்டர் ராஸா 36 ஓட்டங்கள். பந்துவீச்சு: ரங்கன ஹேரத் 5/116, அசேல குணரட்ன 2/28, லஹிரு குமார 2/68)

 

இலங்கை: 346/10 (102.3 ஓவ.) (துடுப்பாட்டம்: உபுல் தரங்க 71, டினேஷ் சந்திமால் 55, அசேல குணரட்ன 45, அஞ்சலோ மத்தியூஸ் 41, டில்ருவான் பெரேரா 33 ஓட்டங்கள். பந்துவீச்சு: கிறேம் கிறீமர் 5/125, ஷோன் வில்லியம்ஸ் 2/62)

 

சிம்பாப்வே: 377/10 (107.1 ஓவ.) (துடுப்பாட்டம்: சீகன்டர் ராஸா 127, மல்கொம் வோலர் 68, கிறேம் கிறீமர் 48, பீற்றர் மூர் 48 ஓட்டங்கள். பந்துவீச்சு: ரங்கன ஹேரத் 6/133, டில்ருவான் பெரேரா 3/95)

 

இலங்கை: 391/6 (114.5 ஓவ.) (துடுப்பாட்டம்: நிரோஷன் டிக்வெல்ல 81, அசேல குணரட்ன ஆ.இ 80, குசல் மென்டிஸ் 66, திமுத் கருணாரத்ன 49 ஓட்டங்கள். பந்துவீச்சு: கிறேம் கிறீமர் 4/150, ஷோன் வில்லியம்ஸ் 2/146)

 

போட்டியின் நாயகன்: அசேல குணரட்ன

 

தொடரின் நாயகன்: ரங்கன ஹேரத்

 

தொடர்: இலங்கை 1-0

இங்கிலாந்தை இலகுவாக வீழ்த்தியது தென்னாபிரிக்கா

இங்கிலாந்து, தென்னாபிரிக்க அணிகளுக்கிடையிலான, 4 போட்டிகள் கொண்ட டெஸ்ட் தொடரின் 2ஆவது போட்டியில், தென்னாபிரிக்க அணி, இலகுவான வெற்றியைப் பெற்றுக் கொண்டது. 
ட்ரென்ட் பிரிட்ஜில் இடம்பெற்ற இப்போட்டியின் 4ஆவது நாளான நேற்றே, போட்டி நிறைவடைந்தது.

 

474 ஓட்டங்கள் என்ற வெற்றியிலக்கு நிர்ணயிக்கப்பட்ட இங்கிலாந்து அணி, விக்கெட் எதனையும் இழக்காது ஓர் ஓட்டத்துடன், நேற்றைய நாளை ஆரம்பித்தது. ஆரம்பத்திலேயே முதலாவது விக்கெட்டை இழந்த இங்கிலாந்து அணி, சீரான இடைவெளியில் விக்கெட்டுகளை இழந்தது. எனினும், 3 விக்கெட்டுகளை இழந்து 72 ஓட்டங்களுடன் காணப்பட்ட அவ்வணி, போராட்டத்தை வெளிப்படுத்துமென எதிர்பார்க்கப்பட்டது.

 

ஆனால், 4ஆவது விக்கெட்டாக அலஸ்டெயர் குக் வீழ்த்தப்பட்ட பின்னர், தொடர்ச்சியாக விக்கெட்டுகளை இழந்த இங்கிலாந்து அணி, 133 ஓட்டங்களுக்குச் சகல விக்கெட்டுகளையும் இழந்து, 340 ஓட்டங்களால் படுதோல்வியடைந்தது. அவ்வணியின் இறுதி 5 விக்கெட்டுகளும், 11 ஓட்டங்களுக்கு வீழ்த்தப்பட்டன.

 

துடுப்பாட்டத்தில் அலஸ்டெயர் குக் 42, மொய்ன் அலி 27 ஓட்டங்களைப் பெற்றனர்.
பந்துவீச்சில் கேஷவ் மஹராஜ், வேர்ணன் ஃபிலாந்தர் இருவரும் தலா 3 விக்கெட்டுகளையும், டுவன்னே ஒலிவியர், கிறிஸ் மொறிஸ் இருவரும் தலா 2 விக்கெட்டுகளையும் கைப்பற்றினர்.

 

இப்போட்டியில் முதல் இனிங்ஸில், தென்னாபிரிக்க அணி, 335 ஓட்டங்களைப் பெற்றது. இங்கிலாந்து அணி பதிலளித்து 205 ஓட்டங்களைப் பெற, தென்னாபிரிக்க அணி, 9 விக்கெட்டுகளை இழந்து 343 ஓட்டங்களைப் பெற்றுக் கொண்டமை குறிப்பிடத்தக்கது.

 

இப்போட்டியின் நாயகனாக, வேர்ணன் ஃபிலாந்தர் தெரிவானார்.

 

இந்தத் தொடரின் முதலாவது போட்டியில் இங்கிலாந்து அணி வெற்றிபெற்ற நிலையில், தற்போது தென்னாபிரிக்க அணி வென்றுள்ள நிலையில், தொடர் நிலை, 1-1 என்ற நிலையில் காணப்படுகின்றமை குறிப்பிடத்தக்கது.

போராடுகிறது இலங்கை; முன்னிலையில் சிம்பாப்வே

இலங்கை, சிம்பாப்வே அணிகளுக்கிடையிலான, ஒற்றை டெஸ்ட் போட்டியின் 4ஆவது நாள் முடிவில், மிகப்பெரிய இலக்கை நோக்கித் துடுப்பெடுத்தாடிவரும் இலங்கை அணி, குசல் மென்டிஸின் சிறப்பான துடுப்பாட்டத்தோடு, போராட்டத்தை வெளிப்படுத்தியுள்ளது. ஆனால், சிம்பாப்வே அணி, முன்னிலையைக் கொண்டுள்ளது.

 

சிம்பாப்வே அணியால் வழங்கப்பட்ட 388 ஓட்டங்கள் என்ற இலக்கை நோக்கித் துடுப்பெடுத்தாடிவரும் இலங்கை அணி, நேற்றைய நாள் முடிவில், 3 விக்கெட்டுகளை இழந்து 170 ஓட்டங்களுடன் காணப்படுகிறது.

 

முதலாவது விக்கெட்டுக்காக 58 ஓட்டங்களைப் பகிர்ந்த இலங்கை அணி, 2ஆவது விக்கெட்டுக்காக 50 ஓட்டங்களைப் பகிர்ந்தது. 3ஆவது விக்கெட்டுக்காக, 25 ஓட்டங்கள் மாத்திரமே பகிரப்பட்ட நிலையில், 3 விக்கெட்டுகளை இழந்து 133 ஓட்டங்கள் என்ற தடுமாற்றமான நிலையில் காணப்பட்டது. ஆனால், இளம் வீரர் குசல் மென்டிஸும் முன்னாள் அணித்தலைவர் அஞ்சலோ மத்தியூஸும், பிரிக்கப்படாத 37 ஓட்டங்களைப் பகிர்ந்து, இலங்கை அணிக்குப் போராட்டத்தை ஏற்படுத்தக்கூடிய நிலையை ஏற்படுத்தினர்.

 

இதன்படி, 7 விக்கெட்டுகள் கைவசமுள்ள நிலையில், 218 ஓட்டங்களைப் பெற்றால் வெற்றி என்ற நிலையில், இலங்கை அணி காணப்படுகிறது.

 

துடுப்பாட்டத்தில் குசல் மென்டிஸ், ஆட்டமிழக்காமல் 60 ஓட்டங்களைப் பெற்றார். தவிர, திமுத் கருணாரத்ன 48, உபுல் தரங்க 27, அஞ்சலோ மத்தியூஸ் ஆட்டமிழக்காமல் 17 ஓட்டங்களைப் பெற்றனர்.

 

பந்துவீச்சில் சிறப்பாகச் செயற்பட்ட அணித்தலைவர் கிறேம் கிறீமர், 2 விக்கெட்டுகளைக் கைப்பற்றினார்.

 

முன்னதாக, 6 விக்கெட்டுகளை இழந்து 252 ஓட்டங்களுடன் நேற்றைய நாளை ஆரம்பித்த சிம்பாப்வே அணி, சகல விக்கெட்டுகளையும் இழந்து 377 ஓட்டங்களைப் பெற்றது.

 

சீகன்டர் ராஸா, தனது கன்னிச் சதத்தைப் பூர்த்திசெய்து, 127 ஓட்டங்களைப் பெற்றார். தவிர, மல்கொம் வோலர் 68, கிறேம் கிறீமர் 48, பீற்றர் மூர் 40 ஓட்டங்களைப் பெற்றனர்.

 

டெஸ்ட் போட்டிகளில் தனது 31ஆவது 5 விக்கெட் பெறுதியைப் பெற்ற ரங்கன ஹேரத், 6 விக்கெட்டுகளைக் கைப்பற்றினார். இதன்மூலம், போட்டியில் தனது 10 விக்கெட்டுகளையும் அவர் பூர்த்திசெய்தார். இது, அவர் கைப்பற்றும் 8ஆவது 10 விக்கெட் பெறுதியாகும். தவிர, டில்ருவான் பெரேரா, 3 விக்கெட்டுகளைக் கைப்பற்றினார்.

 

போட்டியின் 5ஆவது நாள் இன்றாகும்.

அரையிறுதிகளில் ஆஸி, தென்னாபிரிக்கா

பெண்கள் உலகக் கிண்ண கிரிக்கெட் தொடரில், நேற்று முன்தினம் இடம்பெற்ற போட்டிகளில் வெற்றிபெற்ற தென்னாபிரிக்க, அவுஸ்திரேலிய அணி, அரையிறுதியில் தங்கள் இடத்தை உறுதிப்படுத்திக் கொண்டன. இலங்கை அணி, தனது 6ஆவது தோல்வியைப் பதிவுசெய்துகொண்டது.

 

இதன்படி, இந்தத் தொடரில், எந்தவித வெற்றிகளையும் பதிவுசெய்யாத அணிகளாக, இலங்கை, பாகிஸ்தான் ஆகிய அணிகள் காணப்படுகின்றன.

 

தென்னாபிரிக்கா எதிர் இலங்கை:
இலங்கை: 101/10 (40.3 ஓவ.) (துடுப்பாட்டம்: டிலானி மனோதரா 25 (49), சாமரி பொல்கம்போல 25 (61) ஓட்டங்கள். பந்துவீச்சு: டேன் வான் நிகேர்க் 4/24, ஷப்னிம் இஸ்மாயில் 3/14)

 

தென்னாபிரிக்கா: 104/2 (23.1 ஓவ) (துடுப்பாட்டம்: லாரா வொல்வார்ட் ஆ.இ 48 (66), மிக்னொன் டு பிறீஸ் ஆ.இ 38 (53) ஓட்டங்கள்)

 

அவுஸ்திரேலியா எதிர் இந்தியா:
இந்தியா: 226/7 (50 ஓவ.) (துடுப்பாட்டம்: பூனம் ராவட் 106 (136), மித்தாலி ராஜ் 69 (114) ஓட்டங்கள். பந்துவீச்சு: எலைஸ் பெரி 2/37, மேகன் ஷூட் 2/52)

 

அவுஸ்திரேலியா: 227/2 (45.1 ஓவ.) (துடுப்பாட்டம்: மென் லனிங் ஆ.இ 76 (88), எலைஸ் பெரி ஆ.இ 60 (67), பெத் மூனி 45 (68), நிக்கோல் போல்ட்டன் 36 (48) ஓட்டங்கள்.)

 

இங்கிலாந்து எதிர் நியூசிலாந்து:
இங்கிலாந்து: 284/9 (50 ஓவ.) (துடுப்பாட்டம்: நட்டாலி ஷிவர் 129 (111), டம்மி பியூமொன்ட் 93 (102) ஓட்டங்கள். பந்துவீச்சு: அமெலியா கெர் 4/51, லெய்க் கஸ்பெரெக் 2/49)

 

நியூசிலாந்து: 209/10 (46.4 ஓவ.) (துடுப்பாட்டம்: சுஸி பேட்ஸ் 44 (68), கேற்றி பேர்க்கின்ஸ் ஆ.இ 43 (53), அமி சட்டர்த்வைட் 35 (50) ஓட்டங்கள். பந்துவீச்சு: அலெக்ஸ் ஹார்ட்லி 3/44, அனியா ஷ்ரப்சோல் 2/19, ஜெனி கண் 2/32)

கைவிடப்பட்டது ஆப்கான் – எம்.சி.சி போட்டி

ஆப்கானிஸ்தான் அணிக்கும் மரிலிபோன் கிரிக்கெட் கழகத்துக்கும் (எம்.சி.சி) இடையிலான கிரிக்கெட் போட்டி, மழை காரணமாகக் கைவிடப்பட்டுள்ளது.

 

லோர்ட்ஸில் இடம்பெற்ற இப்போட்டியில், மழை பாதிக்க, முதலில் துடுப்பெடுத்தாடிய எம்.சி.சி அணி, 40 ஓவர்களில் 6 விக்கெட்டுகளை இழந்து 217 ஓட்டங்களைப் பெற்றது. சாம் ஹெய்ன் 76 (100), சமித் பட்டேல் 53 (47) ஓட்டங்களைப் பெற்றனர். ஷபூர் ஸட்ரன் 3, குல்படின் நைப் 2 விக்கெட்டுகளைக் கைப்பற்றினர்.

 

பதிலளித்தாடிய ஆப்கானிஸ்தான் அணி, 5 ஓவர்களில் ஒரு விக்கெட்டை இழந்து 31 ஓட்டங்களுடன் காணப்பட்ட போது, மழை குறுக்கிட்டது. அதன் பின்னர், போட்டியை ஆரம்பிக்க முடியாமல் போனது.

இலங்கைக்கெதிரான இந்தியக் குழாம் அறிவிப்பு

இலங்கை, இந்திய அணிகளுக்கிடையில் இலங்கையில் இடம்பெறவுள்ள 3 டெஸ்ட்கள், 5 ஒருநாள் சர்வதேசப் போட்டிகள், ஒற்றை இருபதுக்கு-20 சர்வதேசப் போட்டி அடங்கிய முழுமையான தொடரில், டெஸ்ட் போட்டிகளுக்கான இந்தியக் குழாம் அறிவிக்கப்பட்டுள்ளது.

 

இதில், சகலதுறை வீரர் ஹார்டிக் பாண்டியா, இந்தக் குழாமில் சேர்க்கப்பட்டுள்ளார். தவிர, லோகேஷ் ராகுல், றோகித் ஷர்மா ஆகியோர், டெஸ்ட் குழாமுக்கு அழைக்கப்பட்டுள்ளனர்.

 

அண்மைய காலத்தில் விளையாடிய வீரர்களில் கருண் நாயர், ஷீகர் தவான் ஆகியோருக்கு இடம் கிடைக்கவில்லை.

 

குழாம்: விராத் கோலி, முரளி விஜய், லோகேஷ் ராகுல், செற்றேஸ்வர் புஜாரா, அஜின்கியா ரஹானே, றோகித் ஷர்மா, இரவிச்சந்திரன் அஷ்வின், இரவீந்திர ஜடேஜா, ரிதிமான் சகா, இஷாந்த் ஷர்மா, உமேஷ் யாதவ், ஹார்டிக் பாண்டியா, புவனேஷ்வர் குமார், மொஹமட் ஷமி, குல்தீப் யாதவ், அபினவ் முகுந்த்.

இலங்கைக்கு 5ஆவது தோல்வி

இங்கிலாந்தில் இடம்பெற்றுவரும் பெண்கள் உலகக் கிண்ணத் தொடரில், அவுஸ்திரேலிய அணியை இங்கிலாந்து அணி வென்ற அதேநேரம், இலங்கையை, மேற்கிந்தியத் தீவுகள் அணி வென்றது.

 

இதில், உலகக் கிண்ணப் போட்டியொன்றில், அவுஸ்திரேலிய அணிக்கெதிராக, இங்கிலாந்து அணி 24 ஆண்டுகளில் பெறும் முதலாவது வெற்றியாக அமைந்தது. குறித்த காலத்தில், 6 போட்டிகளில் அவ்வணி தோல்வியடைந்திருந்தது.

 

மறுபக்கமாக, இலங்கை அணி, இத்தொடரில் தனது 5ஆவது போட்டியில் விளையாடிய போதிலும், 5ஆவது போட்டியிலும் தோல்வியடைந்துள்ளது. 

 

இங்கிலாந்து எதிர் அவுஸ்திரேலியா:

இங்கிலாந்து: 259/8 (50 ஓவ.) (துடுப்பாட்டம்: தம்மி பியூமொன்ட் 49 (88), கேத்தரின் பிரன்ட் ஆ.இ 45 (43), ஜெனி கண் 39 (42), சாரா டெய்லர் 35 (33) ஓட்டங்கள். பந்துவீச்சு: எலைஸ் விலானி 3/42, கிறிஸ்டின் பீம்ஸ் 2/44)

 

அவுஸ்திரேலியா: 256/8 (50 ஓவ.) (துடுப்பாட்டம்: எலைஸ் பெரி 70 (86), மெக் லனிங் 40 (46) ஓட்டங்கள். பந்துவீச்சு: அலெக்ஸ் ஹார்ட்டலி 2/31, கேத்தரின் பிரன்ட் 2/42, ஜெனி கண் 2/54)

 

மே.தீவுகள் எதிர் இலங்கை:

 

மே.தீவுகள்: 229/9 (50 ஓவ.) (துடுப்பாட்டம்: மெரிஸா அகுலெய்ரா ஆ.இ 46 (97), டீன்ட்ரா டொட்டின் 38 (25) ஓட்டங்கள். பந்துவீச்சு: ஸ்ரீபால வீரக்கொடி 3/38, அமா காஞ்சனா 2/50, இனோக்கா ரணவீர 2/56)

 

இலங்கை: 182/10 (48 ஓவ.) (துடுப்பாட்டம்: ஷஷிகலா சிரிவர்தன 33 (67), பிரசாதனி வீரக்கொடி 30 (34) ஓட்டங்கள். பந்துவீச்சு: அனிஸா மொஹமட் 3/39, ஷனல் டாலே 2/30, அ/பி பிளெற்சர் 2/38).

இந்தியாவுக்கு அதிர்ச்சி வைத்தியம்

மேற்கிந்தியத் தீவுகள், இந்திய அணிகளுக்கிடையிலான ஒற்றை இருபதுக்கு-20 சர்வதேசப் போட்டியில், மேற்கிந்தியத் தீவுகள் அணி வெற்றிபெற்றுள்ளது.

 

ஜமைக்காவில் இடம்பெற்ற இப்போட்டியில், இந்திய அணியால் வழங்கப்பட்ட 191 என்ற இலக்கை நோக்கித் துடுப்பெடுத்தாடிய மேற்கிந்தியத் தீவுகள் அணி, பெரும் எதிர்பார்ப்புடன் களமிறங்கிய கிறிஸ் கெயில், பெருமளவுக்குச் சோபிக்காத நிலையிலும், 18.3 ஓவர்களில், ஒரு விக்கெட்டை மாத்திரம் இழந்து, வெற்றியிலக்கை அடைந்தது.

 

இந்தியாவுக்கு எதிராக, இருபதுக்கு-20 சர்வதேசப் போட்டிகளில், ஏற்கெனவே ஒரு சதத்தைப் பெற்றிருந்த எவின் லூயிஸ், இரண்டாவது சதத்தை, இப்போட்டியில் பெற்றார். 53 பந்துகளில் தனது சதத்தை அவர் பூர்த்தி செய்தார். இதன்மூலம், இருபதுக்கு-20 சர்வதேசப் போட்டிகளில், அதி வேகமாக 20 சதங்கள் பட்டியலில், இரண்டு தடவைகள் இடம்பெற்ற மூன்றாமவர் என்ற பெருமையை அவர் பெற்றார். ஏற்கெனவே பிரென்டன் மக்கலம், கிறிஸ் கெயில் ஆகியோர் இப்பெருமையைக் கொண்டவர்களாவர்.

 

இருபதுக்கு-20 சர்வதேசப் போட்டிகளின் தரவரிசை அடிப்படையில், இந்திய அணி 4ஆவது இடத்திலும் மேற்கிந்தியத் தீவுகள் அணி 5ஆவது இடத்திலும் காணப்படுகின்ற நிலையில், இவ்வளவு இலகுவான வெற்றியை, மேற்கிந்தியத் தீவுகள் அணி பெறுமென எதிர்பார்க்கப்பட்டிருக்கவில்லை.

 

இதன்படி, ஒருநாள் சர்வதேசப் போட்டித் தொடரை 1-3 என இழந்தாலும், இருபதுக்கு-20 சர்வதேசப் போட்டியில் வெற்றிபெற்று, ஆறுதல் வெற்றியை, மேற்கிந்தியத் தீவுகள் பெற்றுக் கொண்டது.

 

ஸ்கோர் விவரம்…
நாணயச் சுழற்சி: மேற்கிந்தியத் தீவுகள்
இந்தியா: 190/6 (20 ஓவ.) (துடுப்பாட்டம்: டினேஷ் கார்த்திக் 48 (29), விராத் கோலி 39 (22), றிஷாப் பான்ட் 38 (35) ஓட்டங்கள். பந்துவீச்சு: ஜெரோம் டெய்லர் 2/31, கெஸ்ரிக் வில்லியம்ஸ் 2/42)
மே.தீவுகள்: 194/1 (18.3 ஓவ.) (துடுப்பாட்டம்: எவின் லூயிஸ் ஆ.இ 125 (62), மார்லன் சாமுவேல்ஸ் ஆ.இ 36 (29) ஓட்டங்கள். பந்துவீச்சு: குல்தீப் யாதவ் 1/34)
போட்டியின் நாயகன்: எவின் லூயிஸ்

தென்னாபிரிக்காவை வீழ்த்தியது இங்கிலாந்து

இங்கிலாந்து, தென்னாபிரிக்க அணிகளுக்கிடையிலான 4 போட்டிகள் கொண்ட டெஸ்ட் தொடரின் முதலாவது போட்டியில், இங்கிலாந்து அணி அதிரடி வெற்றிபெற்றுள்ளது. போட்டியின் நான்காவது நாளுடன், இப்போட்டி முடிவுக்கு வந்தது.

 

லோர்ட்ஸில் இடம்பெற்ற இப்போட்டியில், 4ஆவது நாளன்று, 331 ஓட்டங்களை வெற்றியிலக்காகக் கொண்டு துடுப்பெடுத்தாடிய தென்னாபிரிக்க அணி, வெறுமனே 36.4 ஓவர்கள் மாத்திரமே நிலைத்து, 119 ஓட்டங்களுக்கு ஆட்டமிழந்தது. இதனால், 211 ஓட்டங்களால் படுதோல்வியடைந்தது.

 

எந்தவொரு துடுப்பாட்ட வீரரும், தென்னாபிரிக்கா சார்பாக 25 ஓட்டங்களைத் தாண்டியிருக்காத நிலையில், தொடரின் முதலாவது போட்டியில் கிடைத்த இந்தத் தோல்வி, தொடர் முழுவதும் அவ்வணியைப் பாதிப்பதற்கான வாய்ப்புகள் உள்ளன.

 

குறிப்பாக, அணியின் பிரதான வேகப்பந்த வீச்சாளராக மாறியுள்ள கஜிஸ்கோ றபடா, இங்கிலாந்தின் பென் ஸ்டோக்ஸை தகாத வார்த்தைகளால் திட்டியதைத் தொடர்ந்து, அவருக்கு தண்டப் புள்ளியொன்று வழங்கப்பட்டது. ஏற்கெனவே 3 தண்டப் புள்ளிகளைக் கொண்டிருந்த அவர், 4 தண்டப் புள்ளிகளைப் பெற்று, அடுத்த டெஸ்டில் பங்குபற்றுவதிலிருந்து தடை செய்யப்பட்டுள்ளார்.

 

அவரது இழப்பு என்பது மிகப் பெரியதாக அமைய, தென்னாபிரிக்காவின் மற்றொரு வேகப்பந்து வீச்சாளரான வேர்ணன் ஃபிலாந்தரின் கையில் பந்து தாக்கி, 3ஆவது நாள் முழுவதும் அவர் பந்துவீசவோ அல்லது களத்தடுப்பில் ஈடுபடவோ முடிந்திருக்கவில்லை. எனவே, அடுத்த போட்டிக்கு முன்னர் அவர் தயாராகி விடுவாரா என்ற சந்தேகமும் காணப்படுகிறது.

 

ஆனால், பிரசவ விடுப்புக் காரணமாக, முதலாவது டெஸ்டில் பங்குபற்றியிருக்காத அணித்தலைவர் ஃபப் டு பிளெஸி, அடுத்த போட்டியில் பங்குபற்றுவார் என அறிவிக்கப்படுகிறது. எனவே, அவ்வணிக்கான ஆறுதலாக, அது அமைந்துள்ளது.

 

அடுத்த போட்டி, நொட்டிங்காமில் 14ஆம் திகதி ஆரம்பித்து இடம்பெறவுள்ளது.

 

ஸ்கோர் விவரம்…
நாணயச் சுழற்சி: இங்கிலாந்து
இங்கிலாந்து: 458/10 (105.3 ஓவ.) (துடுப்பாட்டம்: ஜோ றூட் 190, மொயின் அலி 87, ஸ்வேர்ட் ப்ரோட் ஆ.இ 57, பென் ஸ்டோக்ஸ் 56 ஓட்டங்கள். பந்துவீச்சு: மோர்னி மோர்க்கல் 4/115, வேர்ணன் ஃபிலாந்தர் 3/67, கஜிஸ்கோ றபடா 3/123)
தென்னாபிரிக்கா: 361/10 (105 ஓவ.) (துடுப்பாட்டம்: தெம்பா பவுமா 59, டீல் எல்கர் 54, வேர்ணன் ஃபிலாந்தர் 52, குயின்டன் டீ கொக் 51, தெயுனிஸ் டி பிரையுன் 48 ஓட்டங்கள். பந்துவீச்சு: மொயின் அலி 4/59, ஜேம்ஸ் அன்டாசன் 2/44, ஸ்டுவேர்ட் ப்ரோட் 2/62, லியம் டவ்ஸன் 2/67)
இங்கிலாந்து: 233/10 (87.1 ஓவ.) (துடுப்பாட்டம்: அலஸ்டெயர் குக் 69, ஜொனி பெயர்ஸ்டோ 51 ஓட்டங்கள். பந்துவீச்சு: கேஷவ் மஹராஜ் 4/85, கஜிஸ்கோ றபடா 3/50, மோர்னி மோர்க்கல் 3/64)
தென்னாபிரிக்கா: 119/10 (36.4 ஓவ.) (துடுப்பாட்டம்: தெம்பா பவுமா 21 ஓட்டங்கள். பந்துவீச்சு: மொய்ன் அலி 6/53, லியம் டவ்ஸன் 2/34)
போட்டியின் நாயகன்: மொய்ன் அலி.