Category Archives: Uncategorised

ஆஸி அணியின் பஸ் மீது கல்வீச்சு

பங்களாதேஷில் கிரிக்கெட் போட்டிகளில் பங்குபற்றிவரும் அவுஸ்திரேலிய அணி பயணம் செய்த பஸ் மீது, கல்வீச்சுத் தாக்குதல் மேற்கொள்ளப்பட்டுள்ளது என அறிவிக்கப்படுகிறது. எனினும், பங்களாதேஷில் காணப்படும் பாதுகாப்பு நிலைமை தொடர்பாகத் திருப்தியுடன் உள்ளதாக, அவுஸ்திரேலிய கிரிக்கெட் சபை அறிவித்துள்ளது.

 

நேற்று இடம்பெற்ற போட்டியின் முதல்நாளில் கலந்துகொண்டுவிட்டுத் திரும்பிக் கொண்டிருக்கையிலேயே, இந்தக் கல்வீச்சு இடம்பெற்றுள்ளது.

 

வீரர்கள் பயணித்த பஸ் மீது கல் பட்டமையின் காரணமாக, பஸ்ஸின் ஜன்னல் கண்ணாடி உடைபட்டது என, அவுஸ்திரேலிய கிரிக்கெட் சபை தெரிவித்தது. மைதானத்திலிருந்து, வீரர்கள் தங்கியிருந்த ஹொட்டலுக்குச் சென்றுகொண்டிருந்த போதே, இது இடம்பெற்றுள்ளது. இந்தச் சம்பவத்தில், எவருக்கும் காயம் ஏற்படவில்லை.

 

இது தொடர்பான விசாரணைகளை மேற்கொள்வதற்கு, உள்ளூர் அதிகாரிகளுடன் தொடர்பில் இருப்பதாகத் தெரிவித்த, கிரிக்கெட் சபையின் பாதுகாப்பு முகாமையாளர் ஷோன் கரோல், பாதுகாப்புத் தொடர்பில் திருப்தியடைவதாகத் தெரிவித்தார்.

 

இதேவேளை, இந்த விடயத்தைப் பெரிதுபடுத்தாமல் விடுவதற்கு, பங்களாதேஷ் தரப்பு முயல்கிறது.
இது தொடர்பாகக் கருத்துத் தெரிவித்த, சிட்டகொங் மெட்ரோபொலிட்டன் பொலிஸ் ஆணையாளர் இக்பால் பஹார், வீதியில் காணப்பட்ட கல்லை, வீதியால் சென்ற வாகனம் மிதித்தமை காரணமாக, அந்தக் கல், பஸ்ஸைத் தாக்கியிருக்கலாம் என்று குறிப்பிட்டார்.

 

எனினும், இது தொடர்பாக விசாரணைகளை மேற்கொள்வதற்காக, மூன்று பேர் கொண்ட விசாரணைக்குழுவை அமைத்துள்ளதாக அவர் குறிப்பிட்டார்.

 

இச்சம்பவம், இலங்கை நேரப்படி திங்கட்கிழமை முன்னிரவு 7 மணிக்கு இடம்பெற்றது என்றும் அவர் மேலும் குறிப்பிட்டார்.

இலங்கையை இனிங்ஸால் வென்றது இந்தியா

 

இலங்கை, இந்திய அணிகளுக்கிடையிலான மூன்று போட்டிகள் கொண்ட டெஸ்ட் தொடரில், கொழும்பு எஸ்.எஸ்.சி மைதானத்தில் இடம்பெற்ற இரண்டாவது போட்டியில், இனிங்ஸ் மற்றும் 53 ஓட்டங்களால் இந்திய அணி வெற்றிபெற்றுள்ளது.

 

இப்போட்டியில் முதலில் துடுப்பெடுத்தாடிய இந்திய அணி, தமது முதலாவது இனிங்ஸில், 9 விக்கெட்டுகளை இழந்து 622 ஓட்டங்களைக் குவித்தது. துடுப்பாட்டத்தில், செட்டேஸ்வர் புஜாரா 133, அஜின்கியா ரஹானே 132, இரவீந்திர ஜடேஜா ஆட்டமிழக்காமல் 70, ரித்திமான் சஹா 67, லோகேஷ் ராகுல் 57, இரவிச்சந்திரன் அஷ்வின் 54 ஓட்டங்களைப் பெற்றனர். பந்துவீச்சில், ரங்கன ஹேரத் 4, மலிந்த புஷ்பகுமார 2 விக்கெட்டுகளைக் கைப்பற்றினர்.

 

பதிலுக்கு, தமது முதலாவது இனிங்ஸில் துடுப்பெடுத்தாடிய இலங்கை அணி, சகல விக்கெட்டுகளையும் இழந்து 183 ஓட்டங்களை மாத்திரமே பெற்றது. துடுப்பாட்டத்தில், நிரோஷன் டிக்வெல்ல 51 ஓட்டங்களைப் பெற்றார். பந்துவீச்சில், இரவிச்சந்திரன் அஷ்வின் 5, இரவீந்திர ஜடேஜா, மொஹமட் ஷமி ஆகியோர் தலா 2 விக்கெட்டுகளைக் கைப்பற்றினார்.

 

இதனையடுத்து, ஃபொலோ ஓன் முறையில் தமது இரண்டாவது இனிங்ஸில் துடுப்பெடுத்தாடிய இலங்கை அணி, 2 விக்கெட்டுகளை இழந்த நிலையில் 209 ஓட்டங்களைப் பெற்றவாறு நேற்றைய நான்காவது நாளை ஆரம்பித்தபோதும், தேநீர் இடைவேளைக்குச் சற்று முன்பதாக, சகல விக்கெட்டுகளையும் இழந்து 386 ஓட்டங்களைப் பெற்றுத் தோல்வியடைந்தது.

 

துடுப்பாட்டத்தில், டிமுத் கருணாரட்ன 141, குசல் மென்டிஸ் 110 ஓட்டங்களைப் பெற்றனர். பந்துவீச்சில், இரவீந்திர ஜடேஜா 5, இரவிச்சந்திரன் அஷ்வின், ஹர்டிக் பாண்டியா ஆகியோர் தலா 2 விக்கெட்டுகளைக் கைப்பற்றினர்.

 

போட்டியின் நாயகானாக இரவீந்திர ஜடேஜா தெரிவானார்.

 

ஏற்கெனவே முதலாவது போட்டியிலும் வெற்றிபெற்ற இந்தியா, மூன்று போட்டிகள் கொண்ட இத்தொடரில், 2-0 என்ற அசைக்க முடியாத முன்னிலையைப் பெற்றுள்ளது.

1ஆவது அரையிறுதியில் இங்கிலாந்து – தென்னாபிரிக்கா

பெண்கள் கிரிக்கெட் உலகக் கிண்ணத் தொடரின் முதலாவது அரையிறுதிப் போட்டி, இன்று இடம்பெறவுள்ளது. பிறிஸ்டலில் இடம்பெறவுள்ள இப்போட்டி, இங்கிலாந்து, தென்னாபிரிக்க அணிகளுக்கிடையில் இடம்பெறவுள்ளது.  

 

இலங்கை நேரப்படி, மாலை 3 மணிக்கு, இப்போட்டி ஆரம்பிக்கவுள்ளது.  

 

புள்ளிகளின் அடிப்படையில், முதலாவது இடத்தைப் பெற்ற அணிக்கும் 4ஆவது இடத்தைப் பெற்ற அணிக்குமிடையிலான போட்டியாக இது அமையவுள்ளது.  

 

இங்கிலாந்து அணி, தான் விளையாடிய 7 போட்டிகளில் 6 போட்டிகளில் வெற்றிபெற்றிருந்தது. இந்தத் தொடரில், அவ்வணியின் முதலாவது போட்டியாக அமைந்த, இந்திய அணிக்கெதிரான போட்டியிலேயே, இங்கிலாந்து அணி தோல்வியடைந்திருந்தது.  

 

தென்னாபிரிக்க அணி, விளையாடிய 7 போட்டிகளில் 4 போட்டிகளில் வெற்றிபெற்றிருந்ததோடு, 2 போட்டிகளில் தோல்வியடைந்திருந்தது. நியூசிலாந்து அணிக்கெதிரான அவ்வணியின் போட்டி, மழை காரணமாகக் கைவிடப்பட்டிருந்தது.  

 

இரு அணிகளும் குழுநிலையில் சந்தித்போது, இங்கிலாந்து அணி, 68 ஓட்டங்களால் இலகுவாக வெற்றிபெற்றிருந்தது. ஆனால், இங்கிலாந்து அணி 373 ஓட்டங்களைப் பெற, தென்னாபிரிக்க அணி, 305 ஓட்டங்களைப் பெற்றிருந்தது. எனவே, இந்தப் போட்டியிலும், தென்னாபிரிக்க அணி, விட்டுக்கொடுக்காமல் விளையாடுமென எதிர்பார்க்கப்படுகிறது.  

 

இங்கிலாந்தின் டம்மி பியூமொன்ட், 7 போட்டிகளில் 53.14 என்ற சராசரியில் 372 ஓட்டங்களைப் பெற்று, இந்தத் தொடரில் அதிக ஓட்டங்களைக் குவித்தவர்களின் பட்டியலில் முதலிடத்தில் காணப்படுகிறார்.  ஆனால், தென்னாபிரிக்காவின் டேன் வான் நியேகேர்க், 6 போட்டிகளில் 15 விக்கெட்டுகளுடனும், மரிஸன்னே கப் 6 போட்டிகளில் 12 விக்கெட்டுகளுடனும், முதலிரு இடங்களில் காணப்படுகின்றனர்.  

 

எனவே, இங்கிலாந்தின் பலமிக்க துடுப்பாட்டத்துக்கும், தென்னாபிரிக்காவின் பலமிக்க பந்துவீச்சுக்கும் இடையிலான போட்டியாக, இது அமையுமென எதிர்பார்க்கப்படுகிறது.    

ஆப்கானிஸ்தானை வென்றது மே.தீவுகள்

மேற்கிந்தியத் தீவுகள், ஆப்கானிஸ்தான் அணிகளுக்கிடையிலான மூன்று போட்டிகள் கொண்ட ஒருநாள் சர்வதேசப் போட்டித் தொடரில், இலங்கை நேரப்படி, நேற்று இடம்பெற்ற இரண்டாவது போட்டியில் மேற்கிந்தியத் தீவுகள் வெற்றிபெற்றுள்ளது.

 

சென். லூசியாவில் இடம்பெற்ற இப்போட்டியில், முதலில் துடுப்பெடுத்தாடிய ஆப்கானிஸ்தான், 37.3 ஓவர்களில் சகல விக்கெட்டுகளையும் இழந்து 135 ஓட்டங்களைப் பெற்றது.

 

துடுப்பாட்டத்தில், குல்படின் நைப் 51 (73) ஓட்டங்களைப் பெற்றார்.

 

பந்துவீச்சில், அல்ஸாரி ஜோசப், ஷனொன் கப்ரியல், அஷ்லி நேர்ஸ், ஜேஸன் ஹோல்டர் ஆகியோர் தலா 2 விக்கெட்டுகளைக் கைப்பற்றினார்.

 

பதிலுக்கு, 136 ஓட்டங்கள் என்ற வெற்றியிலக்குடன் துடுப்பெடுத்தாடிய மேற்கிந்தியத் தீவுகள், 39.2 ஓவர்களில், ஆறு விக்கெட்டுகளை இழந்த நிலையில் வெற்றியில்க்கை அடைந்து, நான்கு விக்கெட்டுகளினால் வெற்றிபெற்றது.

 

துடுப்பாட்டத்தில், ஷை ஹோப் ஆட்டமிழக்காமல் 48 (77), எவின் லூயிஸ் 33 (36) ஓட்டங்களைப் பெற்றனர். பந்துவீச்சில், ரஷீட் கான் 3, குல்படின் நைப் 2 விக்கெட்டுகளைக் கைப்பற்றினர்.     

பங்களாதேஷை வென்றது பாகிஸ்தான்

 

பங்களாதேஷ், பாகிஸ்தான் அணிகளுக்கிடையிலான சர்வதேச கிரிக்கெட் சபையின் சம்பியன்ஸ் கிண்ண பயிற்சி ஒருநாள் போட்டியொன்றில், பாகிஸ்தான் வெற்றிபெற்றுள்ளது.

 

பேர்மிங்காமில் நேற்று (27) இடம்பெற்ற இப்போட்டியில், முதலில் துடுப்பெடுத்தாடிய பங்களாதேஷ், 50 ஓவர்களில் 9 விக்கெட்டுகளை இழந்து 341 ஓட்டங்களைக் குவித்தது. துடுப்பாட்டத்தில், தமிம் இக்பால் 102 (140), இம்ருல் கைஸ் 61 (91), முஷ்பிக்கூர் ரஹீம் 46 (35) ஓட்டங்களைப் பெற்றனர். பந்துவீச்சில், ஜுனைட் கான் 4, ஹஸன் அலி, ஷடாப் கான் ஆகியோர் தலா 2 விக்கெட்டுகளைக் கைப்பற்றினர்.

 

பதிலுக்கு, 342 ஓட்டங்களை வெற்றியிலக்காகக் கொண்டு துடுப்பெடுத்தாடிய பாகிஸ்தான், 49.3 ஓவர்களில், 8 விக்கெட்டுகளை இழந்த நிலையில் வெற்றியிலக்கை அடைந்தது. துடுப்பாட்டத்தில், ஷொய்ப் மலிக் 72 (66), பாஹிம் அஷ்ரப் ஆட்டமிழக்காமல் 64 (30), மொஹமட் ஹபீஸ் 49 (62), இமாட் வஸீம் 45 (50), அஹமட் ஷெஷாட் 44 (40) ஓட்டங்களைப் பெற்றனர்.     

‘பிரச்சினை தொடர்ந்தால் ஆஷஸுக்கு அணி இருக்காது’

அவுஸ்திரேலிய கிரிக்கெட் வீரர்களின் ஒப்பந்தம் தொடர்பான பிரச்சினை தொடர்ந்து, வீரர்களுக்கான ஊதியம் மறுக்கப்படுமாயின், அவுஸ்திரேலியாவில் இடம்பெறத் திட்டமிடப்பட்டுள்ள ஆஷஸ் தொடரில், அவுஸ்திரேலிய அணி விளையாடாமல் விடக்கூடுமென, அவுஸ்திரேலிய அணியின் உப தலைவர் டேவிட் வோணர், வெளிப்படையான எச்சரிக்கையை வெளிப்படுத்தியுள்ளார்.

 

வீரர்களையும் அவுஸ்திரேலிய கிரிக்கெட் வீரர்களின் சங்கத்தையும் பொறுத்தவரை, தற்போதுள்ள, வருமானத்தில் குறிப்பிட்டளவு சதவீதம், வீரர்களுக்குச் செல்ல வேண்டுமென்ற வருமானப் பகிர்வுத் திட்டத்தைத் தொடர விரும்புகின்றனர்.

 

எனினும், அதை மறுக்கும் அவுஸ்திரேலிய கிரிக்கெட் சபை, தங்களால் வழங்கப்படும் ஒப்பந்தத்தை ஏற்காவிட்டால், ஜூன் மாதத்திலிருந்து, வீரர்களுக்கு ஊதியம் வழங்கப்படாது என எச்சரித்திருந்தது.  
இது தொடர்பில், அவுஸ்திரேலிய அணியின் வீரர்கள் பலர், தங்களது விருப்பமின்மையை வெளிப்படுத்திய போதிலும், வோணரே, முதன்முறையாக வெளிப்படையான எச்சரிக்கையை வெளிப்படுத்தியுள்ளார்.

 

“இது, அதி தீவிரமாக மாறுமாயின், அவர்கள் (அவுஸ்திரேலிய கிரிக்கெட் சபை), ஆஷஸ் தொடருக்கு அணியின்றிக் காணப்படுவார்கள். இணக்கமொன்றுக்கு வர முடியுமென, நான் நம்புகிறேன். எங்களிடம் அணியில்லை, அவுஸ்திரேலிய கிரிக்கெட் பருவகாலத்தில் கிரிக்கெட் இல்லை என்ற நிலைமைக்கு வருவதை, நாங்கள் விரும்பவில்லை. அவுஸ்திரேலிய கிரிக்கெட் வீரர்களின் சங்கத்துடன் பணியாற்றுவது, அவுஸ்திரேலிய கிரிக்கெட் சபையைப் பொறுத்தது.

 

“நியாயமான பங்கையும் வருமானப் பங்கீட்டு முறையையும் நாங்கள் வேண்டுகிறோம். ஆகவே நாங்கள், ஒன்றாக இணைந்து காணப்படப் போகிறோம். விட்டுவிலகி ஓடப் போவதில்லை” என்று அவர் தெரிவித்தார்.

 

தொடர்ந்து கருத்துத் தெரிவித்த டேவிட் வோணர், தங்களுக்கான ஒப்பந்தங்கள் வழங்கப்படாவிட்டால், உலகெங்கிலும் இருபதுக்கு-20 தொடர்களில் விளையாடுவதற்கு, சர்வதேச வீரர்களுக்கும் உள்ளூர் வீரர்களுக்கும் வழங்கப்படும் ஏராளமான வாய்ப்புகளை அவர்கள் பற்றிக் கொள்வார்கள் என்று தெரிவித்தார்.

 

இதேவேளை, அவுஸ்திரேலியாவின் முன்னணி வீரர்களான டேவிட் வோணர், ஸ்டீவன் ஸ்மித்,மிற்சல் ஸ்டார், ஜொஷ் ஹேஸல்வூட், பற் கமின்ஸ் ஆகியோர், இந்தியன் பிறீமியர் லீக் தொடர்களில் விளையாடாமலிருப்பதற்கு, பல ஆண்டுகள் இணைந்த ஒப்பந்தங்களை வழங்குவதற்கும் அவுஸ்திரேலிய கிரிக்கெட் சபை முன்வந்திருந்த நிலையில், அது, “சிரிப்பை வரவழைக்கும் ஒன்று” என, வோணர் தெரிவித்தார்.

 

வோணரின் இந்தக் கருத்துகள், இவ்விடயத்தில் இரு தரப்புகளுமே தங்களது நிலைப்பாட்டில் உறுதியாக இருப்பதை எடுத்துக் காட்டும் நிலையில், அடுத்தது என்ன நடக்குமென்ற எதிர்பார்ப்பு எழுந்துள்ளது.    

‘திருப்தி அடைகிறேன்’; ‘வருத்தங்கள் இல்லை’

மேற்கிந்தியத் தீவுகள் அணிக்கெதிரான டெஸ்ட் போட்டியுடன், சர்வதேசப் போட்டிகளிலிருந்து ஓய்வுபெற்றுள்ள பாகிஸ்தானின் மிஸ்பா உல் ஹக், யுனிஸ் கான் இருவரும், தங்களது கிரிக்கெட் வாழ்க்கை குறித்து, திருப்தியை வெளிப்படுத்தியுள்ளனர்.

 

கருத்துத் தெரிவித்த மிஸ்பா, “இந்தக் கிரிக்கெட் வாழ்வில், நான் பெற்றவை குறித்து மகிழ்ச்சியடைகிறேன். என்னவாறான முடிவு, இதைவிடச் சிறந்த ஒன்றை நான் கேட்டிருக்க முடியாது. இந்த அணி தொடர்பாக மகிழ்வடைகிறேன். எனக்கும் யுனிஸுக்கும் அவர்கள் வழங்கிய பிரியாவிடை, சிறப்பானது” என்று தெரிவித்தார்.

 

தொடர்ந்து கருத்துத் தெரிவித்த அவர், தன்னால் முடிந்த அத்தனையையும் செய்ததாகத் தெரிவித்ததோடு, தனக்குக் காணப்பட்ட அதிகாரம், பொறுப்பு என்பவற்றுக்கு ஏற்ப, தன்னால் முடிந்தவற்றைச் செய்ய முயன்றதாகவும் தெரிவித்தார்.

 

இரண்டு சிரேஷ்ட வீரர்கள் ஓய்வுபெறும் நிலையில், அவர்களைப் பிரதியீடு செய்வது கடினமானது என்று தெரிவித்த மிஸ்பா, எனினும், தங்களால் முடியுமென, வீரர்கள் நம்புவது முக்கியமானது என்று தெரிவித்தார்.

 

கருத்துத் தெரிவித்த யுனிஸ் கான், தனது அணித் தலைமைப் பொறுப்புத் தொடர்பாகக் கவனம் செலுத்தினார். 2009ஆம் ஆண்டில் அவர், டெஸ்ட் தலைமையிலிருந்து விலகிய பின்னரே, மிஸ்பா உல் ஹக், புதிய தலைவராக நியமிக்கப்பட்டார்.

 

இந்நிலையில் கருத்துத் தெரிவித்த யுனிஸ், “நான், அதிகமாக போட்டிகளில் அணித்தலைவராக இருந்திருக்க வேண்டுமென, சிலர் என்னிடம் சொல்வர். ஆனால், என்ன நடந்தாலும், நல்லதற்கே நடக்கும்.

 

“நான், அணித்தலைவராக இருந்திருந்தால், இவ்வளவு ஓட்டங்களை என்னால் பெற முடியாதிருந்திருக்கும். நான், வருத்தங்களை மனதில் கொண்டிருப்பது போல் சிலர் நினைக்கின்றனர். ஆனால் அப்படியில்லை” என்று தெரிவித்தார்.

‘சடுதியான நடவடிக்கைகள் வேண்டாம்’

ஞாயிற்றுக்கிழமை இடம்பெறவுள்ள இந்திய கிரிக்கெட் கட்டுப்பாட்டுச் சபையின் (பி.சி.சி.ஐ) விசேட பொதுக் கூட்டத்தில், இந்திய கிரிக்கெட்டின் நலன்கள் பாதிக்கப்படக்கூடிய முடிவுகள் எடுக்கப்பட்டால், அதில் தலையிடவுள்ளதாக, உச்ச நீதிமன்றத்தால் நியமிக்கப்பட்டுள்ள, நிர்வாகிகள் செயற்குழு தெரிவித்துள்ளது.

செயற்குழுவின் தலைவர் வினோத் ராய்

சர்வதேச கிரிக்கெட் சபையிடமிருந்து, பி.சி.சி.ஐ-க்குக் கிடைக்க வேண்டிய வருமானம் குறித்து, இரு சபைகளுக்குமிடையில் முரண்பாடு நிலவுகிறது.

 


சர்வதேச கிரிக்கெட் சபையால் நிறைவேற்றப்பட்ட வருமானத் திட்டத்தின் மூலம், தமக்குக் கிடைக்கும் வருமானம் போதாது எனக் கருதும் பி.சி.சி.ஐ, சடுதியான நடவடிக்கைகளை மேற்கொள்ள முயன்றது.

 


குறிப்பாக, உறுப்பினர் பங்குபற்றுமை ஒப்பந்தம் எனப்படும் ஒப்பந்தத்திலிருந்து விலகுவதற்கு, பி.சி.சி.ஐ-இன் சில உறுப்பினர்கள் முயன்றுள்ளனர். அந்த ஒப்பந்தமே, சர்வதேச கிரிக்கெட் சபையின் தொடர்களில், அணிகள் பங்குபற்றுகின்றமைக்கான ஒப்பந்தமாகும்.
இந்நிலையிலேயே, பி.சி.சி.ஐ நிர்வாகிகள் சிலரின் இந்த முயற்சியை, நிர்வாகிகள் குழு, தடுத்து நிறுத்தியுள்ளது.

 


அத்தோடு, இந்திய கிரிக்கெட்டின் நலன்களைப் பாதிக்கும் நடவடிக்கைகள் எடுக்கப்பட்டால், உச்சநீதிமன்றத்தை நாடவுள்ளதாகவும், நிர்வாகிகள் அறிவித்துள்ளனர்.

‘இளைய அணி போல் விளையாடினோம்’

சண்றைசர்ஸ் ஹைதரபாத் அணிக்கெதிரான போட்டியில், இளைய அணியான தாங்கள், இளைய அணி போல் திறமையை வெளிப்படுத்தியதாக, டெல்லி டெயாடெவில்ஸ் அணியின் பதில் அணித் தலைவர் கருண் நாயர் தெரிவித்துள்ளார்.

 


வழக்கமான அணித் தலைவர் சகீர் கானுக்கு ஏற்பட்ட உபாதையைத் தொடர்ந்து, அணியின் பதில் தலைவராகப் பணியாற்றும் கருண் நாயர், முதலாவது போட்டியில் 10 விக்கெட்டுகளால் தோல்வியைச் சந்தித்தார்.

 


இந்நிலையில், ஹைதரபாத் அணிக்கெதிரான போட்டி, முக்கியமானதாக அமைந்தது. முதலில் துடுப்பெடுத்தாடிய ஹைதரபாத் அணி, யுவ்ராஜ் சிங்கின் ஆட்டமிழக்காத 70 (41) ஓட்டங்களின் துணையோடு, 20 ஓவர்களில் 3 விக்கெட்டுகளை இழந்து 185 ஓட்டங்களைக் குவித்தது.

 

பதிலளித்தாடிய டெல்லி அணி, 19.1 ஓவர்களில் 4 விக்கெட்டுகளை இழந்து, வெற்றியிலக்கை அடைந்தது.  இந்நிலையில் கருத்துத் தெரிவித்த கருண் நாயர், “அது, மிகச்சிறப்பான வெற்றி என நான் நினைக்கிறேன். இளைய அணியான நாங்கள், இளைய அணி போன்று விளையாட வேண்டும் என்பது குறித்தே கலந்துரையாடினோம். ஆகவே நாங்கள், அங்கு சென்று, அச்சமின்றி விளையாடினோம்” என்றார்.

 


பந்துவீச்சை அடித்து விளையாட முயன்றதாகக் குறிப்பிட்ட அவர், அணியின் முதல் 4 துடுப்பாட்ட வீரர்களுமே இளைய வீரர்களாக இருப்பதால், அடித்தாட முடிவு செய்ததாகக் கூறினார்.  தோல்வி குறித்துக் கருத்துத் தெரிவித்த யுவ்ராஜ் சிங், எதிரணியின் தலைவர் கருண் நாயர் வழங்கிய பிடி, புவனேஷ்வர் குமாரால் தவற விடப்பட்டமையை, முக்கியமான தருணமாகக் குறிப்பிட்டார்.

சம்பியன்ஸ் லீக்: இலங்கைக் குழாம் அறிவிப்பு

 

ங்கிலாந்திலும் வேல்ஸிலும் இடம்பெறவுள்ள சம்பியன்ஸ் லீக் கிரிக்கெட் தொடருக்காக இலங்கைக் குழாம் அறிவிக்கப்பட்டுள்ளது.

வழக்கமான தலைவர் அஞ்சலோ மத்தியூஸின் தலைமையில், 15 பேர் கொண்ட குழாமாக அறிவிக்கப்பட்டுள்ள இக்குழாமின் உப தலைவராக, உபுல் தரங்க நியமிக்கப்பட்டுள்ளார்.

குழாம்:

அஞ்சலோ மத்தியூஸ், உபுல் தரங்க, நிரோஷன் டிக்வெல்ல, குசல் ஜனித் பெரேரா, குசல் மென்டிஸ், சாமர கப்புகெதர, அசேல குணரட்ன, டினேஷ் சந்திமால், லசித் மலிங்க, சுரங்க லக்மால், நுவான் பிரதீப், நுவான் குலசேகர, திஸர பெரேரா, லக்‌ஷன் சந்தகான், சீக்குகே பிரசன்ன.

இவர்களுக்கு மேலதிகமாக, இத்தொடரில் டில்ருவான் பெரேரா, தனுஷ்க குணதிலக ஆகியோர், மேலதிக வீரர்களாகச் செயற்படுவர்.

இவர்கள் தவிர, விகும் சஞ்சய, லஹிரு குமார, சச்சித் பத்திரண, மிலிந்த சிரிவர்தன, அகில தனஞ்சய ஆகிய 5 வீரர்களும், மேலதிக வீரர்களாக, கொழும்பில் பயிற்சிகளைப் பெற்றுக் கொண்டிருப்பர். தேவையேற்படின், இங்கிலாந்து அல்லது வேல்ஸுக்கு அனுப்பிவைக்கப்படுவர்.