All posts by Gopikrishna Kanagalingam

இலங்கைக்குக் கிடைக்குமா ஆறுதல் வெற்றி?

இலங்கை அணி, இலங்கையில் வைத்து, மொத்தமாக 9 போட்டிகள் கொண்ட தொடரில் விளையாடும் போது, அதன் 9ஆவது போட்டி வரை அவ்வணிக்கு வெற்றி கிடைக்காது எனவும், 9ஆவது போட்டியாலாவது ஆறுதல் வெற்றியைப் பெற்றுக் கொள்ளுமா என இரசிகர்கள் எதிர்பார்க்கின்றனர் என யாராவது கூறியிருந்தால், அது கேலிக்குரியதாகப் பார்க்கப்பட்டிருக்கும்.

 

ஆனால், இந்திய அணிக்கெதிரான 3 டெஸ்ட் போட்டிகளையும் 5 ஒருநாள் சர்வதேசப் போட்டிகளையும் தோற்றுள்ள இலங்கை, ஒற்றை இருபதுக்கு-20 சர்வதேசப் போட்டியிலாவது வெற்றி பெறுமா என்ற எதிர்பார்ப்புத் தான், இலங்கை இரசிகர்களுக்கு உள்ளது.

 

இன்று இடம்பெறவுள்ள போட்டி, கொழும்பு ஆர். பிரேமதாச மைதானத்தில் இடம்பெறவுள்ளதோடு, இரவு 7 மணிக்கு ஆரம்பிக்கவுள்ளது.

 

எந்த அணியை விளையாடினாலும், என்ன மாற்றங்களை ஏற்படுத்தினாலும், இந்திய அணிக்குச் சவாலை வழங்குவதற்கு, இலங்கை அணி தடுமாறியிருந்தது.

 

இலங்கை அணியின் தடுமாற்றங்கள், பாரிய குழப்பங்களையும் ஏற்படுத்தியிருக்கிறது. ஒருநாள் சர்வதேசப் போட்டித் தொடருக்கு முன்னதாக, இருபதுக்கு-20 குழாமும் இலங்கையால் அறிவிக்கப்பட்டிருந்தது. ஆனால், தற்போது, மீண்டுமொரு குழாம் அறிவிக்கப்பட்டுள்ளது.

 

புதிய குழாமில், ஜெப்றி வன்டர்சே, தசுன் ஷானக, அகில தனஞ்சய, வனிது ஹஸரங்க, திஸர பெரேரா, மிலிந்த சிரிவர்தன ஆகியோர் சேர்க்கப்பட்டுள்ளனர்.

 

இலங்கை அணி, இலங்கையில் வைத்து, இந்தியாவுக்கெதிராக ஓரளவு சிறப்பான பெறுபேறுகளை, முன்னைய காலங்களில் வெளிப்படுத்திய போதிலும், இருபதுக்கு-20 சர்வதேசப் போட்டிகளில், இதுவரை பிரகாசிக்கவில்லை. இதுவரை, இரண்டு போட்டிகளில் விளையாடி, 2 போட்டிகளிலும் இலங்கை அணி தோல்வியடைந்துள்ளது.

 

ஆகவே, ஏற்கெனவே அழுத்தத்தில காணப்படும் இலங்கை அணி, இந்தப் போட்டியில் எவ்வாறு விளையாடும் என்பதே, தற்போதைய கேள்வியாக உள்ளது.

 

எல்லையில் நிற்குமாறு சாமுவேல்ஸ் கோரிக்கை

இங்கிலாந்து அணியின் சகலதுறை வீரர் பென் ஸ்டோக்ஸ், மேற்கிந்தியத் தீவுகள் அணிக்கெதிரான ஒருநாள் சர்வதேசப் போட்டித் தொடரின் போது, எல்லையில் நிற்க வேண்டுமென, மே.தீவுகளின் மார்லன் சாமுவேல்ஸ் கோரியுள்ளார்.

 

இரு வீரர்களும், இதற்கு முன்னர் பலமுறை மோதிக்கொண்ட நிலையிலேயே, இக்கருத்தை அவர் வெளியிட்டுள்ளார்.

 

இங்கிலாந்துச் சென்று, நல்ல பையனாக இருக்க விரும்புவதாகவும், ஸ்டோக்ஸ் அமைதியாக இருக்கும் வரையிலும், தான் எதையும் ஆரம்பிக்கப் போவதில்லை எனவும் தெரிவித்தார்.

 

தான் துடுப்பெடுத்தாடும் போது, அவர், எல்லைக் கோட்டில் நின்று களத்தடுப்பில் ஈடுபட வேண்டும் எனவும், சாமுவேல்ஸ் தெரிவித்துள்ளார்.

வெட்கமடைகிறார் லாரா

1980களின் இறுதியிலும் 1990களின் ஆரம்பத்திலும், மேற்கிந்தியத் தீவுகள் அணி விளையாடிய விதத்தைப் பற்றி வெட்கமடைவதாக, மேற்கிந்தியத் தீவுகள் அணியின் முன்னாள் தலைவர் பிரையன் லாரா தெரிவித்துள்ளார்.

 

புகழ்பெற்ற, எம்.சி.சி கிரிக்கெட் உணர்வுக்கான கௌட்ரி கிரிக்கெட் விரிவுரையை, லோர்ட்ஸ் மைதானத்தில் ஆற்றிய போதே அவர் இவ்வாறு தெரிவித்தார்.

 

முதல்நிலை அணியாக இருந்த மேற்கிந்தியத் தீவுகள், விளையாட்டு உணர்வுகளுடன் விளையாட வேண்டிய பொறுப்பைக் கொண்டிருந்ததாக அவர் தெரிவித்தார்.

 

தற்போதைய நிலையில், ஆட்டமிழந்த துடுப்பாட்ட வீரர்கள், நடுவரின் தீர்ப்புக்குக் காத்திருக்காமல் வெளியேற வேண்டும் என்று கோரிய அவர், முன்னணி அணிகள், கிரிக்கெட் எவ்வாறு விளையாடப்பட வேண்டுமென்பதைக் காட்ட வேண்டிய பொறுப்பைக் கொண்டுள்ளன என்று தெரிவித்தார்.

பங்களாதேஷுக்கு எதிராக முன்னிலையில் அவுஸ்திரேலியா

பங்களாதேஷ், அவுஸ்திரேலிய அணிகளுக்கிடையிலான 2 போட்டிகள் கொண்ட டெஸ்ட் தொடரின் 2ஆவது போட்டியின் 2ஆம் நாள் முடிவில், அவுஸ்திரேலிய அணி முன்னிலை பெற்றுள்ளது.

 

பங்களாதேஷ் அணி முதல் இனிங்ஸில் பெற்ற 305 ஓட்டங்களுக்குப் பின்னர், தனது முதலாவது இனிங்ஸில் விளையாடிவரும் அவுஸ்திரேலிய அணி, நேற்றைய நாள் முடிவில் 2 விக்கெட்டுகளை இழந்து 225 ஓட்டங்களைப் பெற்றுள்ளது.

 

முதலாவது விக்கெட்டாக மற் றென்ஷோ, அணி 5 ஓட்டங்களைப் பெற்றிருந்த போது ஆட்டமிழந்த போதிலும், 2ஆவது விக்கெட்டுக்காக இணை சேர்ந்த உப தலைவர் டேவிட் வோணரும் தலைவர் ஸ்டீவன் ஸ்மித்தும் சிறப்பாக விளையாடி, 93 ஓட்டங்களைப் பகிர்ந்தனர்.

 

2ஆவது விக்கெட்டாக ஸ்மித் ஆட்டமிழந்த பின்னர், 3ஆவது விக்கெட்டுக்காக இணை சேர்ந்த  வோணரும் பீற்றர் ஹான்ட்ஸ்கொம்ப்பும், இதுவரை பிரிக்கப்படாத 127 ஓட்டங்களைப் பகிர்ந்து, அணிக்குப் பலத்தை வழங்கியுள்ளனர்.

 

துடுப்பாட்டத்தில் டேவிட் வோணர் ஆட்டமிழக்காமல் 88, பீற்றர் ஹான்ட்ஸ்கொம்ப் ஆட்டமிழக்காமல் 69, ஸ்டீவன் ஸ்மித் 58 ஓட்டங்களைப் பெற்றனர்.

 

பந்துவீச்சில் முஸ்தபிஸுர் ரஹ்மான், தைஜுல் இஸ்லாம் இருவரும் தலா ஒரு விக்கெட்டைக் கைப்பற்றினர்.

 

இதன்படி, 8 விக்கெட்டுகள் கைவசமுள்ள நிலையில், பங்களாதேஷை விட 80 ஓட்டங்கள் மாத்திரமே பின்தங்கிய நிலையில், அவுஸ்திரேலியா காணப்படுகிறது.

 

முன்னதாக, 6 விக்கெட்டுகளை இழந்து 253 ஓட்டங்களுடன் நேற்றைய நாளை ஆரம்பித்த பங்களாதேஷ் அணி, 305 ஓட்டங்களுக்குச் சகல விக்கெட்டுகளையும் இழந்தது.

 

துடுப்பாட்டத்தில் முஷ்பிக்கூர் ரஹீம் 68, சபீர் ரஹ்மான் 66, நசீர் ஹொஸைன் 45, சௌமியா சர்க்கார் 33 ஓட்டங்களைப் பெற்றனர்.

 

பந்துவீச்சில் நேதன் லையன் 7 விக்கெட்டுகளையும் அஸ்டன் ஏகர் 2 விக்கெட்டுகளையும் கைப்பற்றினர்.

 

இந்தத் தொடரின் முதலாவது போட்டியில், பங்களாதேஷ் அணி வெற்றிபெற்றிருந்தது. தொடரைச் சமப்படுத்த வேண்டுமாயின், இந்தப் போட்டியில் வெற்றிபெற வேண்டிய தேவை, அவுஸ்திரேலிய அணிக்குக் காணப்படுகின்றமை குறிப்பிடத்தக்கது.

ஆஸி அணியின் பஸ் மீது கல்வீச்சு

பங்களாதேஷில் கிரிக்கெட் போட்டிகளில் பங்குபற்றிவரும் அவுஸ்திரேலிய அணி பயணம் செய்த பஸ் மீது, கல்வீச்சுத் தாக்குதல் மேற்கொள்ளப்பட்டுள்ளது என அறிவிக்கப்படுகிறது. எனினும், பங்களாதேஷில் காணப்படும் பாதுகாப்பு நிலைமை தொடர்பாகத் திருப்தியுடன் உள்ளதாக, அவுஸ்திரேலிய கிரிக்கெட் சபை அறிவித்துள்ளது.

 

நேற்று இடம்பெற்ற போட்டியின் முதல்நாளில் கலந்துகொண்டுவிட்டுத் திரும்பிக் கொண்டிருக்கையிலேயே, இந்தக் கல்வீச்சு இடம்பெற்றுள்ளது.

 

வீரர்கள் பயணித்த பஸ் மீது கல் பட்டமையின் காரணமாக, பஸ்ஸின் ஜன்னல் கண்ணாடி உடைபட்டது என, அவுஸ்திரேலிய கிரிக்கெட் சபை தெரிவித்தது. மைதானத்திலிருந்து, வீரர்கள் தங்கியிருந்த ஹொட்டலுக்குச் சென்றுகொண்டிருந்த போதே, இது இடம்பெற்றுள்ளது. இந்தச் சம்பவத்தில், எவருக்கும் காயம் ஏற்படவில்லை.

 

இது தொடர்பான விசாரணைகளை மேற்கொள்வதற்கு, உள்ளூர் அதிகாரிகளுடன் தொடர்பில் இருப்பதாகத் தெரிவித்த, கிரிக்கெட் சபையின் பாதுகாப்பு முகாமையாளர் ஷோன் கரோல், பாதுகாப்புத் தொடர்பில் திருப்தியடைவதாகத் தெரிவித்தார்.

 

இதேவேளை, இந்த விடயத்தைப் பெரிதுபடுத்தாமல் விடுவதற்கு, பங்களாதேஷ் தரப்பு முயல்கிறது.
இது தொடர்பாகக் கருத்துத் தெரிவித்த, சிட்டகொங் மெட்ரோபொலிட்டன் பொலிஸ் ஆணையாளர் இக்பால் பஹார், வீதியில் காணப்பட்ட கல்லை, வீதியால் சென்ற வாகனம் மிதித்தமை காரணமாக, அந்தக் கல், பஸ்ஸைத் தாக்கியிருக்கலாம் என்று குறிப்பிட்டார்.

 

எனினும், இது தொடர்பாக விசாரணைகளை மேற்கொள்வதற்காக, மூன்று பேர் கொண்ட விசாரணைக்குழுவை அமைத்துள்ளதாக அவர் குறிப்பிட்டார்.

 

இச்சம்பவம், இலங்கை நேரப்படி திங்கட்கிழமை முன்னிரவு 7 மணிக்கு இடம்பெற்றது என்றும் அவர் மேலும் குறிப்பிட்டார்.

பொதுநலவாய விளையாட்டுகளில் கிரிக்கெட் இல்லை

2022ஆம் ஆண்டு இடம்பெறவுள்ள பொதுநலவாய விளையாட்டுப் போட்டிகளில், கிரிக்கெட்டை உள்ளடக்குவதற்கான திட்டங்கள் கைவிடப்பட்டுள்ளன. ஜூலை, ஓகஸ்ட் மாதத்தில் இப்போட்டிகள் நடைபெறவுள்ள நிலையில், பல்வேறு முக்கியமான தொடர்களுக்கு நடுவே இது இடம்பெறவுள்ளது.

 

எனவே, ஆண்கள் கிரிக்கெட் அணிகளை அனுப்புவதற்கு, கிரிக்கெட் சபைகள் தயங்கிவந்தன.

 

பெண்கள் கிரிக்கெட் அணிகளை அனுப்புவதற்கு ஓரளவு சம்மதம் இருந்த போதிலும், இரு பாலாரும் பங்குபற்றாத விளையாட்டுகளைச் சேர்ப்பதற்கு, பொதுநலாய விளையாட்டுச் சம்மேளனம் தயங்குவதாகக் கூறப்புடுகிறது. அதனாலேயே, இந்த முடிவு எடுக்கப்படவுள்ளது.

துடுப்பாட்டம் குறித்து உபுல் தரங்க ஏமாற்றம்

இந்திய அணிக்கெதிரான ஒருநாள் சர்வதேசப் போட்டித் தொடரை இழந்தமை குறித்துத் தனது வருத்தத்தை வெளிப்படுத்திய இலங்கை அணியின் தலைவர் உபுல் தரங்க, இலங்கையின் துடுப்பாட்டம் குறித்து ஏமாற்றத்தை வெளிப்படுத்தினார்.

 

இந்தத் தொடரில், இலங்கைக்கும் இந்தியாவுக்கும் இடையில் என்ன வித்தியாசத்தை அவர் உணர்ந்தார் என்று கேட்கப்பட்டபோது, “தொடர்ச்சியான பெறுபேறுகளை வெளிப்படுத்த நாம் தவறியிருந்தோம். நாங்கள் சிறப்பாகத் துடுப்பெடுத்தாடியிருக்கவில்லை. நாங்கள் சிறப்பாகப் பந்துவீசியிருக்கவில்லை. நாங்கள் சிறப்பாகக் களத்தடுப்பில் ஈடுபட்டிருக்கவில்லை. தொடரில் நாங்கள், முற்றுமுழுதாகத் தோற்கடிக்கப்பட்டோம்.

 


“துடுப்பாட்டம் குறித்து ஏமாற்றமடைகிறேன். இந்திய அணி, தொடர்ச்சியான பெறுபேறுகளை வெளிப்படுத்தியது. பெரிய ஓட்ட எண்ணிக்கையைப் பெறத் தவறினோம்” என்று தெரிவித்தார்.
துடுப்பாட்ட வரிசையாக, இலங்கை அணி சிறப்பாகச் செயற்படவில்லை என்று குறிப்பிட்ட அவர், 5 போட்டிகளின் பின்னரும் ஒரு தடவை தானும் 250 ஓட்டங்களைப் பெறவில்லை என்பதைச் சுட்டிக்காட்டினார்.

 

இந்தத் தொடரில், இலங்கை அணி வெள்ளையடிக்கப்பட்டுள்ள நிலையில், அணித்தலைமைப் பொறுப்பிலிருந்து விலகுவதற்குத் திட்டமிடுகிறாரா எனக் கேட்கப்பட்ட போது, அதற்கான தேவை கிடையாது என்று அவர் தெரிவித்ததோடு, அடுத்த கட்டமாக எவ்வாறு முன்னேறிச் செல்வது என்பதை, தேர்வாளர்களே முடிவுசெய்வர் என்று குறிப்பிட்டார்.

 

இதேவேளை, அடுத்த 6 மாதங்களுக்கு, டெஸ்ட் போட்டிகளில் பங்குபற்றப் போவதில்லை என, உபுல் தரங்க, இலங்கை கிரிக்கெட் சபைக்கு அறிவித்துள்ளார். ஒருநாள் சர்வதேச கிரிக்கெட் போட்டிகளில் கவனஞ்செலுத்துவதற்காகவே, அவர் இந்த முடிவை எடுத்துள்ளார் எனக் கருதப்படுகிறது.

 

கோலிக்கும் பும்ராவுக்கும் உச்சம்

இலங்கை, இந்திய அணிகளுக்கிடையிலான, 5 போட்டிகள் கொண்ட ஒருநாள் சர்வதேசப் போட்டித் தொடரின் 5ஆவது போட்டியிலும் வெற்றிபெற்று, 5-0 என இலங்கைக்கு வெள்ளையடித்த இந்திய அணிக்கு, வீரர்களின் தரவரிசையிலும் ஏராளமான முன்னேற்றங்கள் கிடைத்துள்ளன.

 

நேற்று முன்தினம் கொழும்பில் இடம்பெற்ற போட்டியில், முதலில் துடுப்பெடுத்தாடிய இலங்கை அணி, 49.4 ஓவர்களில் சகல விக்கெட்டுகளையும் இழந்து 238 ஓட்டங்களைப் பெற்றது. பதிலளித்தாடிய இந்திய அணி, விராத் கோலியின் அற்புதமான சதத்தின் உதவியுடன், 46.3 ஓவர்களில் 4 விக்கெட்டுகளை மாத்திரம் இழந்து வெற்றிபெற்றது.

 

இதன் மூலம், இலங்கை மண்ணில் வைத்து, ஒருநாள் சர்வதேசப் போட்டிகளில் முதன்முறையாக இலங்கை வெள்ளையடிக்கப்பட்ட சந்தர்ப்பமாக இது அமைந்தது.

 

இந்தப் போட்டியில் மட்டுமல்லாது, தொடரிலும் பிரகாசித்த இந்திய அணித் தலைவர் விராத் கோலி, துடுப்பாட்ட வீரர்களின் தரவரிசையில், தனது முதலிடத்தை உறுதிப்படுத்திக் கொண்டார். அவர், தரப்படுத்தல் புள்ளிகளாக 887 புள்ளிகளைப் பெற்றுள்ளார். இது, அவரது கிரிக்கெட் வாழ்வில் அவர் பெற்ற உச்சபட்சப் புள்ளிகளாகும்.

 

முதல் 8 இடங்களில் எந்த மாற்றங்களும் ஏற்படவில்லை. 9ஆவது இடத்தில் றோகித் ஷர்மாவும் (14இலிருந்து), 10ஆவது இடத்தில் மகேந்திரசிங் டோணியும் (12இலிருந்து) முன்னேறினர்.

 

இலங்கை அணியைப் பொதுத்தவரை, முதல் 20 இடங்களுக்குள் எந்த வீரரும் காணப்படவில்லை. தொடரின் ஆரம்பத்தில் 27ஆவது இடத்தில் காணப்பட்ட முன்னாள் தலைவர் அஞ்சலோ மத்தியூஸ், 23ஆவது இடத்துக்கு முன்னேறியுள்ளார். அவருக்கு அடுத்த இடத்தில், 33ஆவது இடத்திலுள்ள குசல் மென்டிஸும், 36ஆவது இடத்திலுள்ள நிரோஷன் டிக்வெல்லவும் காணப்படுகின்றனர்.
முதல் 10 துடுப்பாட்ட வீரர்கள்:

விராத் கோலி, டேவிட் வோணர், ஏபி டி வில்லியர்ஸ், ஜோ றூட், பாபர் அஸாம், கேன் வில்லியம்ஸன், குயின்டன் டி கொக், ஃபப் டு பிளெஸி, றோகித் ஷர்மா, மகேந்திரசிங் டோணி.

 

பந்துவீச்சாளர்களுக்கான தரப்படுத்தலில், முதல் 3 இடங்களில் எந்த மாற்றமும் ஏற்படவில்லை என்ற போதிலும், 4ஆவது இடத்தில் இந்தியாவின் ஜஸ்பிறிட் பும்ரா காணப்படுகிறார். இந்தத் தொடரின் ஆரம்பத்தில் இவர், 31ஆவது இடத்தில் காணப்பட்டிருந்தார்.

 

அடுத்த முக்கிய மாற்றமாக, சுழற்பந்து வீச்சாளர் அக்ஸர் பட்டேல் காணப்படுகிறார். தொடரின் ஆரம்பத்தில் 20ஆவது இடத்தில் காணப்பட்ட அவர், 10ஆவது இடத்துக்கு முன்னேறியுள்ளார்.

 

இலங்கையைப் பொறுத்தவரை, முதல் 40 இடங்களுக்குள் எவரும் இல்லை. 42ஆவது இடத்தில், சுரங்க லக்மால் காணப்படுகிறார். அவரின் பின்னர் அஞ்சலோ மத்தியூஸ், 52ஆவது இடத்தில் காணப்படுகிறார். தொடரை 100ஆவது இடத்தில் ஆரம்பித்த அகில தனஞ்சய, தற்போது 80ஆவது இடத்தைப் பெற்றுள்ளார்.

 

முதல் 10 வீரர்கள்:
ஜொஷ் ஹேஸல்வூட், இம்ரான் தாஹிர், மிற்சல் ஸ்டார்க், ஜஸ்பிறிட் பும்ரா, கஜிஸ்கோ றபடா, ட்ரென்ட் போல்ட், ஹஸன் அலி, சுனில் நரைன், றஷீட் கான், அக்ஸர் பட்டேல்.

ரந்தீவை ஞாபகப்படுத்திய பொலார்ட்

கரீபியன் பிறீமியர் லீக் போட்டிகள் இடம்பெற்றுவரும் நிலையில், இலங்கை நேரப்படி நேற்றுக் காலை இடம்பெற்ற போட்டியொன்று, இலங்கையின் சுழற்பந்து வீச்சாளர் சுராஜ் ரந்தீவின் செய்கைகளை ஞாபகப்படுத்திவிட்டுச் சென்றது.

 

பிரிட்ஜ்டௌணில் இடம்பெற்ற இந்தப் போட்டி, பார்படோஸ் ட்ரைடென்ட்ஸ் அணிக்கும் சென். கிற்ஸ் மற்றும் நெவிஸ் பட்ரியட்ஸ் அணிக்குமிடையில் இடம்பெற்றது.

 

இதில் முதலில் துடுப்பெடுத்தாடிய, பொலார்ட் தலைமையிலான ட்ரைடென்ட்ஸ் அணி, 20 ஓவர்களில் 9 விக்கெட்டுகளை இழந்து 128 ஓட்டங்களைப் பெற்றது.

 

துடுப்பாட்டத்தில் டியோன் வெப்ஸ்டர் 32 (25) ஓட்டங்களைப் பெற்றார். பந்துவீச்சில் கார்லொஸ் பிறத்வெய்ட் 4 ஓவர்களில் 15 ஓட்டங்களுக்கு 4 விக்கெட்டுகளைக் கைப்பற்றினார். தப்ராஸ் ஷம்ஸி, 2 விக்கெட்டுகளைக் கைப்பற்றினார்.

 

129 ஓட்டங்களை வெற்றியிலக்காகக் கொண்டு துடுப்பெடுத்தாடிய பட்ரியட்ஸ் அணி, அதிரடியாகத் துடுப்பெடுத்தாடியது. 7 ஓவர்களின் நிறைவில் விக்கெட் இழப்பின்றி 128 ஓட்டங்களுடன் காணப்பட்ட அவ்வணிக்கு ஓர் ஓட்டமே தேவைப்பட்டதோடு, 31 பந்துகளில் 97 ஓட்டங்களுடன் காணப்பட்ட எவின் லூயிஸுக்கு, சதத்துக்காக 3 ஓட்டங்கள் தேவைப்பட்டன.

 

எனினும், 8ஆவது ஓவரின் முதலாவது பந்தை வீசிய பொலார்ட், அதை முறையற்ற பந்தாக வீசினார். அது, முறையற்ற பந்தாக அறிவிக்கப்பட்டிருக்கா விட்டாலும் கூட, அகலப்பந்து என அறிவிக்கப்படும் அளவுக்கு, அகலமாகவும் வீசப்பட்டது. நடுவர் அதை, முறையற்ற பந்து என அறிவிக்க, சதம் பெறுவதற்கான லூயிஸின் வாய்ப்பு இல்லாது போனது.

 

2010ஆம் ஆண்டு, இலங்கை, இந்திய அணிகளுக்கிடையிலான ஒருநாள் சர்வதேசப் போட்டியில், இந்திய அணி ஓர் ஓட்டத்தைப் பெற வேண்டியிருந்த போது, விரேந்தர் செவாக்குக்கு, சதத்துக்காக ஓர் ஓட்டம் தேவைப்பட்டது. ஆனால், முறையற்ற பந்தொன்றை வீசிய ரந்தீவ், செவாக், சதம் பெறுவதைத் தடுத்தார்.

 

அதே நடவடிக்கையையே, தற்போது பொலார்க்கும் மேற்கொண்டுள்ளார் என்று கருதப்படுகிறது.

 

பங்களாதேஷும் அவுஸ்திரேலியாவும் போராட்டம்

பங்களாதேஷ், அவுஸ்திரேலிய அணிகளுக்கிடையிலான 2 போட்டிகள் கொண்ட டெஸ்ட் தொடரின் 2ஆவது போட்டியின் முதலாம் நாள் முடிவில், இரு அணிகளும் போராட்டத்தை வெளிப்படுத்தியுள்ளன.

 

சிட்டகொங்கில் இடம்பெறும் இப்போட்டியில், நாணயச் சுழற்சியில் வெற்றிபெற்று முதலில் துடுப்பெடுத்தாடிவரும் பங்களாதேஷ் அணி, நேற்றைய நாள் முடிவில் 6 விக்கெட்டுகளை இழந்து 253 ஓட்டங்களுடன் காணப்படுகிறது.

 

2 விக்கெட்டுகளை இழந்து 21 ஓட்டங்களுடன் தடுமாறிய அவ்வணி, பின்னர் 5 விக்கெட்டுகளை இழந்து 117 ஓட்டங்களுடன் தடுமாறியது. ஆனால், மத்தியவரிசை வீரர்கள், சிறப்பாக விளையாடியிருந்தனர்.

 

துடுப்பாட்டத்தில் சபீர் ரஹ்மான் 66, முஷ்பிக்கூர் ரஹீம் ஆட்டமிழக்காமல் 62 ஓட்டங்களைப் பெற்றனர்.

 

நேதன் லையன், 5 விக்கெட்டுகளைக் கைப்பற்றினார்.